1, 2. ¿Kunjamsa Jehová Diosajj taqe kunsa churistu?

JEHOVÁ DIOSAJJA, wajjtʼasir Diosawa, taqe kunatï utjkistu ukanakjja Jupaw churistu. Qorisa, qollqesa, taqe kunatï aka oraqen utjki ukanakasa Jupankiwa. Jakañ vida utjañapatakis Diosarakiw kunatï wakiski ukanak churi (Sal. 104:13-15; Hag. 2:8). Jehová Diosajja, kunanakatï jupan utjki ukanakampejj walja kutiw milagronak toqe markapar yanaptʼawayi sasaw Bibliajj qhanañchi.

² Amuytʼañataki, israelitanakajj 40 maranak wasar pampankasipkäna ukhajja, umsa, maná sat manqʼsa Jehová Diosajj janiw faltaykänti (Éxo. 16:35). ‘Janipuniw kunsa jupanakatakejj pistʼaykänti’ (Neh. 9:20, 21). Diosar jan jitheqtas servir mä viuda warmit amuytʼarakiñäni, juparojj Eliseo profetap toqew Jehová Diosajj mä jukʼa aceitep utjkäna uk waljar tukuyäna. Uka milagrojj wal uka warmir yanaptʼäna, aceitep aljasajj taqe manunakapwa phoqjjäna, qhepatjja jupatakisa wawanakapatakis qollqejj jiltʼaskakïnwa (2 Rey. 4:1-7). Maysa toqetjja, Jehová Diosan yanaptʼapampirakiw Jesusajj mä milagro lurasa walja manqʼa utjayäna, qollqsa wakiskäna ukhajj utjayarakïnwa (Mat. 15:35-38; 17:27).

3. ¿Kunsa aka yatichäwin yatjjataskañäni?

³ Jehová Diosajj taqe kuntï aka oraqen lurki ukanak utjaskakiñapatakejja, kunay wakischispa ukampiw yanaptʼaspa.  Ukhamäkchisa, markapar qollqepampi yanaptʼapjjañapatakiw servirinakapar invittʼi (Éxo. 36:3-7; Proverbios 3:9 liytʼañataki). ¿Kunatsa Jehová Diosajj kuntï churkistu uk Jupar churañas muni? ¿Kunjamsa Diosan nayra servirinakapajj qollqempi yanaptʼapjjäna? Yanaptʼañatak qollqe irantaski ukanakjja, ¿kunjamsa Diosan markapajj apnaqe? Uka jisktʼanakaruw aka yatichäwin qhanañchaskañäni.

4. ¿Kunsa markaparu yanaptʼasajj Jehová Diosar uñachtʼaytanjja?

⁴ Jehová Diosar munasitas laykuw kunatï utjkistu ukanak Jupar churtanjja. Jupajj kunayman toqetwa yanaptʼawayistu, ukanakat lupʼktan ukhajja, chuymas wal chʼalljjtistu. Kunjamtï David reyejj templo lurañatak siskäna, uka pachpa arunakwa saraksna. Jupajj taqe kunatï utjkistu ukajj Jehová Diosatwa juti, ukhamajj kunanaktï Jupar churtan ukanakjja, Jupatwa nayraqat katoqtanjja, sasaw säna (1 Crónicas 29:11-14 liytʼañataki).

5. Bibliarjamajj ¿kunatsa jan kuns suyasaki churañajj Diosar adorañampi sasejja?

⁵ Kunatï utjkistu uk Jehová Diosar churasajja, jupar adorataswa uñachtʼayaraktanjja. Mä visionanjja, apóstol Juanajj Diosan servirinakaparojj Diosar akham sir istʼatayna: “Nanakan Jehová Diosaja, jumaw jachʼañchäwi, honra katoqañatakisa, chʼamanïñatakisa derechonïtajja. Jumaw taqe kunsa lurtajja, juman munañamatwa taqe kunas utji, munañamat luratarakiwa” sasa (Apo. 4:11). Cheqas Jehová Diosakiw jachʼañchäwi, honra katoqañatak derechoni, ukhamajj kunatï jiwasatak jukʼamp askïki ukwa Jupar churañasa. Nayra Israel markat amtañäni. Jehová Diosajj ‘maran kimsa fiestanakwa amtapjjäta’ sasaw Moisés toqejj israelitanakar säna. Uka toqet Leyejj akham sänwa: “Janirakiw kawkïri jaqes Diosarojj jan kunani uñstkaniti” sasa (Deu. 16:16). Uka fiestanakan israelitanakajja Jehová Diosarojj kunsa churapjjapuniñapänwa, ukham lurasaw Diosar adorapjjerïna. Jichhürunakanjja, jiwasajj ukhamarakiw jan kuns suyasaki churasajj Diosar adortanjja. Ukham lurasajja, kunatï Diosan markapajj luraski uk wali wakiskirit uñjataswa uñachtʼaytanjja.

6. ¿Kunatï utjkistu ukampi yanaptʼañajj kunatsa jiwasatak wali wakiskirejja? (Página 17 ukankir fotonak uñjjattʼäta).

⁶ Jiwasajj janiw katoqañak suyktanti, jan ukasti, churañwa munaraktanjja (Proverbios 29:21 liytʼañataki). Mä wawat amuytʼañäni, awk taykapajj sapa kuti qollqe churki, ukampi mä regalo jupanakatak alaspajja, awk taykapajj wal kusisipjjaspa. Awk taykapampi jakasir mä precursor waynat amuytʼarakiñäni. Jupajj awk taykaparuw qollqempi yanaptʼi. Awk taykapajj inas ukham lurañap jan munapkchïnti, ukampis ukham lurasajja awk taykapar yuspäratapwa uñachtʼayi, ukatwa katoqapjje. Jehová Diosajj ukhamarakiw kunatï utjkistu ukampi yanaptʼktan uk wali wakiskirit uñji.

7, 8. 1) Diosan nayra servirinakapajj ¿kunjamsa yanaptʼapjjerïna? 2) ¿Kunjamsa Diosan markap sarayirinakarus yanaptʼapjjerïna?

⁷ Nayra tiempon Diosan servirinakapajja, kunanakapatï utjkän ukampiw yanaptʼapjjerïna sasaw Bibliajj qhanañchi. Awisajj kun lurañatakis yanaptʼapjjapunirïnwa. Amuytʼañataki, Moisesajj tabernáculo lurasiñapatakiw israelitanakar yanaptʼapjjañapatak mayïna. David reyejj ukhamarakiw Diosan templopa lurasiñapatakejj yanaptʼa mayirakïna (Éxo. 35:5; 1 Cró. 29:5-9). Joas (Jehoás) reyejj apnaqkäna uka tiemponjja, jaqenakajj qollqe churapkäna ukampejj Diosan templopwa sacerdotenakajj askichapjjäna (2 Rey. 12:4, 5).  Nayrïr patak maranakanjja, Judea markan manqʼat pistʼañ utjatap yatisajja, cristianonakajj kunatï jupanakan utjkäna ukampiw jilat kullakanakar yanaptʼapjjäna sasaw Bibliajj qhanañchi (Hech. 11:27-30).

⁸ Jehová Diosan servirinakapajja, Diosan markap sarayirinakarojj yanaptʼapjjarakïnwa. Amuytʼañataki, Moisesan Leyiparjamajja, levitanakajj janiw mayni tribunakjam herencia katoqapkänti. Ukatwa israelitanakajj utjirinakapat diezmo churasa yanaptʼapjjäna. Ukhamatwa levitanakajj lurañanakap tabernaculon phoqapjjaspäna (Núm. 18:21). Walja maranak qhepatjja, Jesusampiru apostolonakapampirojj warminakaw “kunatï jupanakan utjkäna ukanakampi yanaptʼapjj[äna]” (Luc. 8:1-3).

9. Nayra tiemponakanjja, ¿kawkitsa cristianonakajj qollqe apsupjjerïna?

⁹ Taqe uka yanaptʼanakajj kunayman toqetwa jutäna. Amuytʼañataki, wasar pampan tabernáculo lurasiñapatakejja, israelitanakajj kunanaktï Egiptot apasipkäna ukanakampi inas yanaptʼapjjchïna (Éxo. 3:21, 22; 35:22-24). Nayrïr patak maranakan jakasir yaqhep cristianonakajja, kunanakapatï utjkän ukanakampiw yanaptʼapjjäna. Sañäni oraqenakapa, utanakapa, aljasinwa apostolonakar qollqe churapjjäna. Apostolonakasti kawkïr jilat kullakanakatï yanapa munapkän ukanakaruw uka qollqe churapjjäna (Hech. 4:34, 35). Yaqhep cristianonakajj Diosar adorasiñapatakejj qollqepat iraqtʼapjjapunirïnwa (1 Cor. 16:2). Cheqas qamirinakasa, pisinkirinakas, taqeniw kunatï sapa maynin utjkän ukampi yanaptʼapjjerïna (Luc. 21:1-4).

10, 11. 1) ¿Kunjamsa nayra cristianonakjam yanaptʼaraksna? 2) Diosan Reinoparu yanaptʼasajja, ¿kunjamakis jikjjatasta?

¹⁰ Jichhürunakanjja, ukhamarakiw kun lurañatakis yanaptʼajj munasirakispa. Inas congregacionasan Tantachasiñ Uta luraña jan ukajj askichañ amtasipkchi. Inas sucursal askichañataki, mä jachʼa tantachäwitaki, jan ukajj jan waltʼäwinakan uñjasipki uka jilat kullakanakar yanaptʼañatak qollqew munasi sasin yatiyapjjchistu. Qollqempi yanaptʼatasajja, misioneronakaru, precursor especialanakaru, tamanak tumptʼirinakaru, sucursalan trabajipki uka jilat kullakanakaru, Warwick, Nueva York markan Betel utan trabajir jilat kullakanakar yanaptʼañatakejj wali wakiskiriwa. Congregacionasanjja, Tantachasiñ Utanak lurasiñapatakisa Jachʼa Tantachasiñ Utanak lurasiñapatakisa, sapa phajjsiw qollqejj apayasi. Ukajj oraqpachankir taqe jilat kullakanakaruw yanaptʼi.

¹¹ Jehová Diosan markapajj aka qhepa urunakan kuntï luraski ukarojj taqeniw yanaptʼsna. Qollqempi yanaptʼaski ukanakat jila partejja janiw khitirus yatiyaskiti. Tantachasiñ Utan utjki uka cajar uchasasa, Internetan jw.org toqnam apayasas janirakiw khitirus yatiyktanti. Jukʼa qollqempiki yanaptʼasajj inas janis kunäkaspa ukham amuystan. Cheqas Diosan markapan qollqe utjki ukanakat jila partejja, jukʼa qollqempi yanaptʼaski ukawa, janiw mä qhawqhanin walja qollqe churapki ukakïkiti. Taqe jilat kullakanakawa, jukʼa qollqenïpki ukanakasa, nayra tiempon utjkäna uka Macedoniankir jilat kullakanakjam lurapjjaraki. Uka jilat kullakanakajja, “wali pobrëkasinsa” qollqemp yanaptʼañatakiw rogtʼasipjjäna (2 Cor. 8:1-4).

12. Jichhürunakanjja, ¿kunjamsa Diosan markapajj qollqe sum apnaqapjje?

¹² Oraqpachan Jilïr Irpirinakajja, Diosan markapan qollqep wali amuyumpi apnaqañatakiw chʼamachasipjje (Mat. 24:45). Uka jilatanakajja, kunjamsa qollqe apnaqapjjani ukatakejj sum amuytʼapjje, Diosarus mayisipjjarakiwa (Luc. 14:28). Nayra tiemponakanjja,  qollqe sum apnaqapjjañapatakejj Diosar jan jitheqtas serviri chachanakaruw confiyasirïna. Jupanakajja uka qollqjja Diosar adorasiñapatakikiw apnaqapjjañapäna. Esdras chachat amuytʼañäni, Jerusalén markar kutʼkäna ukhajja, Persia markankir reyejj walja qollqe, qori ukat yaqha ukhamanakampwa churäna. Jichhürunjja taqe ukanakajj 100 millón jila dolaranakäspawa. Esdras chachatakejj taqe ukanakajja Jehová Diosatak mä regalökaspas ukhamänwa. Ukatwa thakin jan walinakat sum jarkʼaqapjjañapatak ewjjtʼäna (Esd. 8:24-34). Walja maranak qhepatjja, apóstol Pablojj Judeankir jilat kullakanakar yanaptʼañatakiw qollqe apthapïna, ukatakejja, khitinakatï uka qollqe jaljapkani ukanakarojj akham sänwa: ‘Taqe kunsa jan khitir engañasaw lurapjjäta, janiw Jehová Dios nayraqatanakjja ukham lurapkätati, jan ukasti jaqenak nayraqatansa ukhamarak lurapjjäta’ sasa (2 Corintios 8:18-21 liytʼañataki). Jichhürunakanjja, Diosan markapajj Esdrasampit apóstol Pablompit yateqasisaw qollqe sum apnaqapjje.

13. Jichhürunakanjja, ¿kuna askinakas Diosan markapan lurasiwayi?

¹³ Yaqhep familianakajj qollqe sum apnaqañatakiw awisajj chʼamachasipjje, ukhamat qollqep jan sinti gastañataki. Maysa toqetjja, Jehová Diosar jukʼamp serviñ munasaw kunatï wakiski ukampiki jakasiñ amtapjje. Jehová Diosan markapajj niya ukhamarakiwa. Aka qhepa maranakanjja, kunayman askinak lurañwa amtasiwayi, ukatakejj qhawqha qollqetï uk lurañataki amtaskäna, ukat sipans jukʼamp qollqew gastasiwayi. Ukatwa Diosan markapajj jan sinti qollqe gastasiñapataki, trabajonakajj jan sinti chʼamäñapatak chʼamachasiwayi, ukhamatwa kuna qollqetï utjki uk sum apnaqañataki.

14-16. 1) Qollqempi yanaptʼktan ukajj ¿kunatakis apnaqasi? 2) ¿Kuna regalonaksa jumajj Diosan markapat katoqawayta?

¹⁴ Walja maranaka Diosar serviri jilat kullakanakajja, ‘janipuniw Jehová Diosan markapat jichha tiemponjam walja regalonak katoqapjjerïkti’ sasaw sapjje. Ukham sasajj janiw pantjasipkiti. Amuytʼañataki, aka qhepa maranakanwa Internetan jw.org sat cheqasa, JW Broadcasting programas lurasiwayi. Machaq Mundon Jakirinakataki Diosan Arunakapa sat Biblias jukʼampi arunakanwa utjaraki. Maysa toqetjja, 2014, 2015 maranakan walja markanakat jachʼa tantachäwinakas 14 markanakanwa jachʼa estadionakan apasirakïna. Pʼeqeñchäwipajj “¡Diosan Reinop nayraqat thaqasipkakiñäni!”  satänwa. Jilat kullakanakajj uka jachʼa tantachäwinakan wali kusisitäpjjänwa.

¹⁵ Walja jilat kullakanakaw Diosan markapat regalonak katoqasajj wal yuspärapjje. Asia cheqan jakasir mä chacha warmejja, JW Broadcasting programat akham sapjjänwa: “Awisajj jayarstʼatäpkirista ukhamjamaw amuyasipjjerïta. Cheqas Jehová Diosan markapajj kunjamsa nayrar sartaski ukanak armañjamawa. Ukampis JW Broadcasting programa uñtasajja, oraqpachankir walja jilat kullakanak taypinkapjjataj qhan amuyapjjta. Akanjja, jilat kullakanakajj JW Broadcasting programampejj wali kusisitäpjjewa. Jupanakajj akham sañ yatipjje ‘sapa phajjsi utjki uka programanakajj Oraqpachan Jilïr Irpirinakan jakʼapankapkiristsa ukham amuyasipjjta’ sasa. Jehová Diosan markap taypinkasajj wali kusisitäpjjewa” sasa.

¹⁶ Oraqpachanjja, 2.500 Tantachasiñ Utanakaw lurasiski, jan ukajj askichasiski. Honduras markanjja, machaq Tantachasiñ Utapan tantachasiñ qalltapjjäna ukhajja, akham sasaw qellqapjjäna: “Diosan jachʼa familiap taypinkasasa, oraqpachankir jilat kullakanakampi mayachtʼatäsasa, wali kusisitäpjjtwa. Jupanakan yanaptʼapampiw markajan mä Tantachasiñ Utajj lurasiwayi” sasa. Walja jilat kullakanakajja, parlasipki uka arupat Biblia katoqasasa, Bibliat apstʼata qellqatanak katoqasas wal kusisipjje. Jan waltʼäwinak utjki ukan yanaptʼa katoqasasa, jan ukajj carritonakampi ukat walja jaqenak utjki uka cheqanakan yatiyatasajj kunjamsa nayrar sartaski uk uñjasas jilat kullakanakajj ukhamarakiw wal kusisipjje.

17. Jehová Diosaw jichhürunakan markapar yanaptʼaski sasajj ¿kunatsa sissna?

¹⁷ Taqe kunatï Diosan markapan luraski ukajja, donacionanakampikiw lurasi, jan Testigöpki ukanakatakejja uk amuyañajj chʼamakiwa. Mä jachʼa empresan jilïripajja, mä sucursalan imprentapar visittʼiriw saräna. Ukanjja taqe kunas donacionanakampikiw lurasïna, trabajirinakas janiw qollqe katoqapkänti, janirakiw mä kun lurasas qollqe apthapipkänti, ukanak yatisajj wal musparäna. ‘Kuntï jumanakajj lurapkta ukajj janiw creyiñjamäkiti’ sasaw säna. Ukajj cheqäskapuniwa, Jehová Diosan yanaptʼapampikiw ukham lurasiski (Job 42:2).

18. 1) ¿Kuna bendicionanaksa Diosan Reinopar yanaptʼatasat katoqañäni? 2) Diosan markapar jichhak mantasipki ukanakarusa wawanakarusa, ¿kunjamsa wajjtʼasirïpjjañapataki yanaptʼsna?

¹⁸ Jehová Diosaw Reinoparu yanaptʼañasatakejj uka suma privilegio churistu. Ukham yanaptʼatasatjja walja bendicionanakwa katoqañäni (Mal. 3:10). Jiwasatï wajjtʼasiriñänejja, jakäwisan nayraruw sartañäni (Proverbios 11:24, 25 liytʼañataki). Ukatjja kusisitäñäniwa, kunattejj “katoqañat sipansa churañanwa jukʼamp kusisiñajj utji” sasaw Bibliajj qhanañchi (Hech. 20:35). Maysa toqetjja, arusampisa, luratasampisa Diosan markapar mantasipki ukanakarusa wawanakasarus kunatï jupanakan utjki ukampi yanaptʼapjjañapatakiw yanaptʼsna, ukhamatwa walja bendicionanak katoqapjjarakini.

19. ¿Kunjamsa aka yatichäwejj yanaptʼawaytam?

¹⁹ Taqe kunatï utjkistu ukajj Jehová Diosatwa juti. Ukhamajj kunatï jiwasan utjkistu uk Jehová Diosar churtan ukhajja, kuntï jiwasanak layku lurawayki ukar yuspäratasa, Jupar munasitaswa uñachtʼaytanjja (1 Cró. 29:17). Israelitanakajj templo lurasiñapatak yanaptʼapkän ukhajja, “walwa kusisipjjäna, jupanakajj taqe chuymawa Tatitur churapjjäna uka layku” (1 Cró. 29:9). Jiwasajj ukhamarakiw kunatï utjkistu ukanak Jehová Diosar churasa kusisiraksna.