1, 2. ¿Kuna tantachäwis aka marajj walja jaqenakaru mayachtʼani? (Aka paginankir fotonak uñjjattʼäta).

AKA marajja, 31 DE MARZO phajjsinwa Jesusan jiwatap amtañatakejj Jehová Diosan waranq waranqa Testigonakapajj Inti jalantar tantachasipjjani, jupanakamp chikajj waljaniw tantachasipjjarakini. Cheqas maran may kuti Jesusan jiwatap amtaski ukajja, taqeniruw mayachtʼistu uk uñjañajj wali musparkañawa, janiw kunas ukham mayachtʼkistuti.

² Jehová Diosampi Jesusampejja, ukham waranq waranqa servirinakaparu aka oraqpachan sapa hora tantachasir uñjasajj wal kusisipjjani. Uka toqet Bibliajj akham sänwa: “Jan khitins jaktʼkaña walja jaqenakaruw uñjta, jupanakajj taqe markanakata, tribunakata, kunayman kasta jaqenakata, kunayman aru parlirinakat jutirinakäpjjänwa”, akham sasaw arnaqasipjjäna: “Tronon qontʼatäki uka Diosasampita Corderompitwa salvacionajj juti” sasa (Apo. 7:9, 10). Jesusan jiwatap sapa mara amtasin Jehová Diosaru, Jesusaru ukham walja jaqenaka jachʼañchapjjatapajj musparkañawa.

3. ¿Kuna jisktʼanakarus qhanañchaskañäni?

 ³ Aka yatichäwinjja, aka pusi jisktʼanakaruw qhanañchaskañäni: 1) ¿Kunjamsa Jesusan jiwatap amtañatakejj wakichtʼasirista, kunjamsa ukajj yanaptʼitaspa? 2) ¿Kunatsa Jesusan jiwatap amtañajj Diosan servirinakapar mayachthapistu? 3) ¿Kunjamsa taqenin mayachtʼatäpjjañapatakejj yanaptʼirista? 4) ¿Jesusan jiwatap qhep qhepa kuti amtañajj utjpachäniti? Ukhamäspa ukhajja, ¿kunapachas uk amtpachañäni?

4. ¿Kunatsa Jesusan jiwatap amtirejj sarañasapuni?

⁴ ¿Kunatsa Jesusan jiwatap amtir sarañajj wali wakiskiri? Tantachäwinakajja, Jehová Diosar adorañatakiwa, uk janiw armañasäkiti. Jesusan jiwatap amtir sarañatak khitinakas wal chʼamachasipjje ukjja, Jehová Diosampi Jesusampejj sum yatipjje. Ukhamasti, uka tantachäwir sarañatak wal chʼamachasitasa, janipun sarirjamäktan ukhak jan saratas uñjapjjañapwa muntanjja. Tantachäwinakar wali askit uñjatas luratasampi uñachtʼayañäni ukhajja, Jehová Diosajj sutisjja janiw ‘librot’ apskaniti. Uka librojj ‘jakañ libro’ sasin uñtʼatarakiwa. Jehová Diosajj wiñay jakaña churañ munki ukanakan sutinakapaw uka libron qellqata (Mal. 3:16; Apo. 20:15).

5. Jesusan jiwatap amtañ uru jakʼajja, ¿kunjamatsa cristianjamat jakasktan janicha uk amuykiptʼassna?

⁵ Jesusan jiwatap amtañ uru jakʼanakajja, orasiñatakisa, Diosampejj sumti apasisktan janicha ukanakat amuykiptʼasiñatakis tiempo apsusiñasawa (2 Corintios 13:5 liytʼañataki). ¿Kunjamsa uk lursna? Apóstol Pablojj akham sänwa: “Jumanakajj cristianjamat jakasipkta janicha ukjja amuykiptʼasisipkakim” sasa. Ukatakejj akham jisktʼasiñasawa: ‘¿Jehová Diosajj aka markarupuniw munañap phoqañatak ajlli sasajj cheqapunit creytjja? ¿Diosan Reinopat suma yatiyäwinak yatiyañatakisa, yatichañatakis chʼamachasipuntti? ¿Qhepa urunakan jakaskatassa, Supayan apnaqäwipas niya tukusiñampëjjatapsa taqe chuymat creytjja, luratajampis ukti uñachtʼaytjja? ¿Jehová Diosarusa Jesusarus kunjamtï qalltan confiykayäta ukham confiyaskaktti?’ sasa (Mat. 24:14; 2 Tim. 3:1; Heb. 3:14). Uka jisktʼanakan qhanañchäwinakapat lupʼiñajja, cristianjamat jakasipktan janicha uk ‘amuykiptʼasiñatakiw’ yanaptʼistani.

6. 1) ¿Kunjamataksa wiñay jakañ katoqsna? 2) ¿Kunjamsa mä jilïr irpir jilatajj Jesusan jiwatap amtañatakejj sapa mara wakichtʼasi? 3) ¿Kunjamsa uka jilatat yateqassna?

⁶ Jesusan jiwatap amtañatakejj ¿kunjamsa wakichtʼassna? Kunatsa uk amtañajj wakisi uka toqet parlir yatichäwinak liyisa ukat lupʼisaw wakichtʼassna (Juan 3:16; 17:3 liytʼañataki). Cheqas Jehová Diosaru Jesusaru uñtʼañäni, confiyañäni ukhakiw wiñay jakañ katoqañäni. Kunanakas Jupanakar jukʼamp jakʼachasiñatak yanaptʼistaspa ukanakat yatjjatasaw Jesusan jiwatap amtañatakejj wakichtʼasiraksna. Experienciani mä jilïr irpir jilatajj kunjamsa wakichtʼasi uk uñjañäni. Jupajja, Jesusan jiwatap toqet parlir Yatiyañataki revistanaka, ukhamarak Jehová Diosas Jesusas kunjamsa munasiñap uñachtʼayapjjestu ukanakat parlir revistanaksa, jaya maranakatpachaw imasiñ yati. Ukatjja, Jesusan jiwatap amtañ uru jakʼa semananakaw uka yatichäwinak liytʼi ukat lupʼiraki. Awisajja, maya jan ukajj pä yatichäwinakampis imasitaparojj yapjjatarakiwa. Uka yatichäwinak uka semananakan repastʼasa, Biblia liyiñ waktʼayat utjki uk liyisa, ukanakat lupʼisajja, waljanakwa sapa marajj yateqe. Jehová Diosarus Jesusarus jukʼampirakiw munasi. Jiwasatï uka jilatjam lurañänejja, ukhamarakiw  Jehová Diosarus Jesusarus jukʼamp munasiñäni, kuntï jiwas layku lurapki ukarus wali valoranit uñjarakiñäni. Ukasti Jesusan jiwatap amtañatakiw yanaptʼistani.

7. 1) Tatitun Cenapajj nayrïr kuti apaskäna uka arumajja, ¿kunsa Jesusajj Diosar mayïna? 2) Jehová Diosajj mayisitapar istʼatapjja, ¿kunjamatsa yattanjja?

⁷ Tatitun Cenapajj nayrïr kuti apaskäna uka arumajja, Jesusajj kunjamtï jupajj alajjpachankir Awkipampi mayachtʼatäkänjja, ukhamarak discipulonakapan mayachtʼatäpjjañapatakiw Awkipar mayïna (Juan 17:20, 21 liytʼañataki). Jehová Diosajj munat wawapan mayisitapjja istʼänwa. Cheqas Jesusan jiwatap amtañajja, Jehová Diosan Testigonakaparojj aka oraqpachanwa mayachtʼistu. Uka urojj walja jaqenakaw kunayman markata, kunayman jañchini mä wawaki tantachtʼasipjjani, ukhamat Jehová Diosajj cheqapuni Yoqaparu khitanitap uñachtʼayapjjani. Yaqhep cheqanakanjja, Diosar serviñataki ukham tantachasiñajj jan walit uñjatawa. Ukampis Jehová Diosampi Jesusampejj wali askitwa uñjapjje.

8. Mayachtʼatäñ toqet ¿kamsänsa Jehová Diosajj Ezequiel profetarojja?

⁸ Jehová Diosan Testigonakapajj mayachtʼata tantachtʼasiñjja, wali askitwa uñjtanjja. Jehová Diosajj Ezequiel profetap toqew uka toqet parläna. Pä lawanakajja, mä arunjja, ‘Judänkir’ lawapampi, ‘Joseankir’ lawapampejj mayar tukuyatäniwa sasaw säna (Ezequiel 37:15-17 liytʼañataki). Yatiyañataki julio, 2016 revistanjja, “Aka revista liytʼirinakan jisktʼäwinakapa” siski uka cheqan akham sasaw qhanañchäna: “‘Markajajj Suma Oraqeruw kuttʼapjjani, wasitampiw mayachtʼatäpjjani’ sasaw Jehová Diosajj Ezequiel profeta toqejj säna. Uka pachpa profeciajja, aka qhepa urunakanwa Diosan servirinakapampi phoqasiñaparakïna. Jupanakajj mayachtʼasipjjañapänwa” sasa.

9. Jesusan jiwatap sapa mara amtaski uka urojj ¿kunjamsa Ezequiel profetan qellqatapajj phoqasi?

⁹ Jehová Diosajja, 1919 marat aksaruw alajjpachar sarañataki ajllitäpki, mä arunjja ‘Judänkir’ lawa sasin uñtʼatäpki ukanakarojj jukʼat jukʼat wasitat tantachthapiski, mayachtʼaskaraki. Ukatsti, aka oraqen wiñay jakapkani, mä arunjja, ‘Joseankir’ lawapa sasin uñtʼatäpki ukanakajj ajllitanakampiw mayachtʼasiñ qalltapjjarakïna. Jehová Diosajj uka pä lawanakarojj amparajanjja, ‘mä sapa lawaruw’ tukuyarakëjja sasaw sarakïna (Eze. 37:19). Jupajj cheqapuniw ajllitanakampiru, ‘yaqha ovejanakampirojj’, ‘mä sapa tamaruki’ tukuyi (Juan 10:16; Zac. 8:23). Jichhürunakanjja, uka pä tamanakajj mayachtʼataw Jehová Diosar servisipki. Reyipasti Jesusawa, Diosajj Ezequiel profetap toqejj “David servirejjaw” sasaw jupat sarakïna (Eze. 37:24, 25). Kuntï Ezequiel profetajj mayachtʼatäñ toqet qhanañchkäna ukajja, sapa maraw qhan uñjasi. Ajllitanakampi yaqha ovejanaka sasin uñtʼatäpki ukanakampejj Jesusan jiwatapa amtañatakejj mayakiw tantachtʼasipjje. Ukhamajja, ¿kunjamsa sapa maynejj ukham mayachtʼatäñatakejj yanaptʼsna?

10. ¿Kunjamsa Diosan markapan mayachtʼatäñapatakejj yanaptʼsna?

¹⁰ Maya. Diosan markapa mayachtʼatäñapatakejj humilde chuymanïsaw yanaptʼsna. Jesusajj aka oraqenkaskäna ukhajja, humildëpjjañamawa sasaw discipulonakapar säna (Mat. 23:12). Akapachankir jaqenakajj jupanakas mayninakat sipan wali jilankapkaspa ukhamwa amuyasipjje. Ukampis jiwasatï humilde chuymanïstanjja, congregacionan pʼeqtʼapki ukanakarojj respetompiw uñjañäni. Congregacionan  mayachtʼatäñap munstanjja, istʼasir chuymanïñasawa. Jukʼampisa, humilde chuymanïsajj Jehová Diosaruw kusisiyañäni, “jachʼa jachʼa tukuñarojj Diosajj uñisiwa, humilde chuymaninakatjja jupajj wal khuyapayasi” (1 Ped. 5:5).

11. Tʼantʼampi vinompejj kamsañsa muni uka toqet lupʼiñajj ¿kunatsa mayachtʼatäñatak yanaptʼistu?

¹¹ Paya. Jesusan jiwatap amtañataki tʼantʼasa, vinos kamsañsa muni ukanakat lupʼisaw mayachtʼatäñatak yanaptʼaraksna. Ukjja, janïr uka aruma purinkipanwa lupʼiñasa ukat uka arumasa lupʼiñasarakiwa (1 Cor. 11:23-25). Jan levadurani tʼantʼajja, Jesusan jan juchani cuerpopa sañwa muni, vinosti, Jesusajj wilap wartasiwayki ukampi sasirakiwa. Ukampis janiw kunsa tʼantʼampi vinompejj sañ muni ukak amuyañasäkiti. Jan ukasti kunjamsa Jehová Diosajj munat Yoqapa jiwasanakar munasa khitanïna, Jesusas kunjamsa jiwasanakar munasa taqe chuyma jakañ vidap loqtasiwayi ukanakatwa lupʼiñasa. Jiwasatï ukanakat wali amuyumpi lupʼiñäni ukhajja, Jehová Diosampir Jesusampirojj jukʼampiw munasiñäni. Cheqas ukaw jilat kullakanakasampi mayachtʼatäñasatakejj yanaptʼistu.

12. Jesusajj mä reyimpit esclavonakapampit parlkäna ukajj ¿kunjamsa jilat kullakanakar perdonañ toqet amuytʼayistu?

¹² Kimsa. Mayninakar taqe chuyma perdonasaw mayachtʼatäñatakejj yanaptʼaraksna. Chuym ustʼayapkistu ukanakar perdonasajja, Jehová Diosajj juchanakas perdonkistu ukar yuspärataswa uñachtʼaytanjja. Jesusajj Mateo 18:23-34 qellqatan kuna uñachtʼäwittï qhanañchkäna uka toqet amuytʼañäni. Akham jisktʼasiñäni: “¿Kuntï Jesusajj uka uñachtʼäwimpi yatichkäna ukajj kunjamsa yanaptʼitu? ¿Pacienciampi munasiñampit jilat kullakanakar uñjtjja? ¿Chuym ustʼayapkitu ukanakar perdonañatakejj jankʼakïtti?” sasa. Niyakejjay pantjasir jaqëstanjja, yaqhep juchanak perdonañajj chʼamakïspawa. Ukampis Jehová Diosajj mayninakar perdonañaswa muni, ukwa Jesusan arunakapajj amuytʼayistu (Mateo 18:35 liytʼañataki). Jiwasatï jilat kullakanakar jan perdonkañänejja, janirakiw Jehová Diosajj perdonkistaniti, ukwa Jesusajj qhan säna. Cheqas uka toqet sum amuytʼasiñasawa. Jesusar istʼasa mayninakar perdontan ukhajja, mayachtʼatäñatakiw yanaptʼtanjja.

13. ¿Kunjamsa jilat kullakanakampi sum apasisajj mayachtʼatäñatak yanaptʼtanjja?

 ¹³ Jilat kullakanakaru perdontan ukhajja, jupanakampejj sum apastanjja. Apóstol Pablojj “espíritu santojj mayachtʼat jakasiñ churkistu ukarjam sarnaqañatak wal chʼamachasisa, sumankañan jakasa” sarnaqañatak chʼamachasipjjam sasaw säna, uk amtañasapuniwa (Efes. 4:3). Kunjamsa mayninakarojj uñjtan ukanakatwa Jesusan jiwatap amtañ uru jakʼasa, uka urusa, lupʼiñasa. Akham sasaw jisktʼasiñasa: “¿Jan coler imjjasirïtajajj luratanakajan qhanat amuyasi? ¿Mayachtʼatäñataki sum apasiñataki chʼamachasitaj mayninakajj amuyapjjeti?” sasa. Uka wakiskir jisktʼanakat lupʼiñasawa.

14. ¿Kunjamsa maynit maynikam munasiñampi aguantasitas uñachtʼaysna?

¹⁴ Pusi. Munasir Jehová Diosat munasiñ yateqasisaw mayachtʼatäñatakejj yanaptʼaraktanjja (1 Juan 4:8). Janipuniw akham sañasäkiti: “Janis kunjamtï munkta ukhampun sarnaqapkchejja, jilat kullakanakäpjjatap laykuw munasiñaja” sasa. Ukham sissna ukhajja, kuntï apóstol Pablojj “maynit maynikam munasiñamp aguantasisa” uñjasipjjam siskistu ukar jan istʼataswa uñachtʼaysna (Efes. 4:2). Janiw ‘maynit maynikam aguantasipjjam’ sasakejj siskänti, jan ukasti ‘munasiñamp aguantasipjjam’ sasaw säna. Uka arunakajj janiw pachpäkiti. Ukhamarusa Jehová Diosaw taqe kasta jaqenakarojj congregacionar apani (Juan 6:44). Cheqas Jupajja, sapa mayniruw munasi. Ukhamajja, ¿kunjamarak ‘janiw nayatak askïpkiti’ sasajj sissna? Jehová Diosaw jupanakar munasiñamp uñjañas muni, ukhamajj taqeniruw munasiñasa (1 Juan 4:20, 21).

15. Jesusan jiwatap qhep qhepa kuti amtaskani uka urojj purininiwa sasajj ¿kunatsa sissna?

¹⁵ Jesusan jiwatap qhep qhepa kuti amtaskani uka urojj purininiwa. ¿Kunjamatsa uk yattanjja? Apóstol Pablojj Corintonkirinakar nayrïr cartapa qellqkäna ukanjja, ajllit cristianonakaruw qellqäna, jupajj akham sänwa: “Tatitun jiwatapat yatiyasipktajja, jupajj jutkani ukapachkama” sasa (1 Cor. 11:26). Jesusajj akapachan tukusiñapat mä profecian parlkasajja, ukhamarakiw jupan jutañapata, puriñapat parläna. Wali tʼaqesiñ tiempon jakʼankjjatap toqetjja, akham sänwa: “Jaqen Yoqapan señalapaw alajjpachan uñstanini. Aka oraqenkir taqe tribunakasa llakisiñatwa chuym leqʼesipjjani. Jaqen Yoqaparuw alajjpachankir qenayanak patjjan wali kʼajkiri wali chʼamani jutaskir uñjapjjani. Angelanakaparuw jupajj khitanini, trompetas wali jachʼatwa istʼasirakini, uka angelanakaw jupan ajllitanakapar pusi toqetpach jawsthapipjjani, alajjpach mä thiyata mä thiyakama” sasa (Mat. 24:29-31). Jesusajja, aka oraqen jiltʼasipkani uka “ajllitanakapar” alajjpacharu apasjjani ukhaw jupanakar tantachthapini. Ukajj wali tʼaqesiñ tiempo qalltkani ukhaw pasani, ukampis janïr Armagedón guerra qalltkipana. Uka guerranjja, Jesusampi 144.000 ajllitanakampiw aka oraqenkir taqe reyinakar atipjapjjani (Apo. 17:12-14). Ukhamajja, Jesusajj ajllitanakaru alajjpachan tantachthapiñataki janïr apaskani ukhaw Jesusan jiwatap qhep qhepa kuti amtañäni.

16. ¿Kunatsa aka marajj Jesusan jiwatap amtañ wal munta?

¹⁶ Niyakejjay aka marajj Jesusan jiwatapajj 31 de marzo phajjsin amtaschinejja, ukar sarañatak chʼamachasipjjapuniñäni. Diosan markapan mayachtʼatäñapatak yanaptʼañatakis Jehová Diosaru mayisiñ jan armasipjjañäniti (Salmo 133:1 liytʼañataki). Jesusan jiwatap qhep qhepa kuti amtañ urojj purininiwa, uk janipun armañäniti. Ukañkamasti, Jesusan jiwatap amtasa taqenis mayachtʼatäñap wal munatas uñachtʼayasipkakiñäni.