AWISAJJ ukham lurañatakiw chʼamachasipjjäna, uka toqet maya yatjjatañäni. Deuteronomio 24:14, 15 textojj akham siwa: “Jan jumanakajj jukʼampi chʼam tukuyapjjamti, kawkïritejj pobresan jikjjataski ukarojja; ni pagopsa katusipjjamti, kawkïri jumanakan marka masimäpansa, jan ukajj jaya markat jutir jaqëpansa. [...] Janitejj ukhamäkani ukhajj Diosaruw jumanak contra mayisini, ukatsti jumanakaw juchañchatäpjjäta” sasa.

Ukar uñtasit mä solicitud qellqataw Asdod markan katupjjäna, uka qellqatajj 600 (antes de Cristo) mara nayratawa. Inas mä trabajirin jan grano phoqatpach churatapata ukham qellqaschïna. Uka qellqatajj jikʼillan (jiwkʼillan) qellqatänwa. Ukan akham sänwa: “Naya servirimajj (quejaskäna uka jaqe) cosecha apthapitanak imañ tukuyjjayäta ukhat mä qhawqha urunak pasatatjja, Shobay sat chachan Hoshayahu wawapaw jutasin isija apasjje. [...] Nayamp chika wali lupina yawisipkäna ukanakajja, taqeniw ukajj cheqäskapunitap qhanañchapjjaspa. [...] Kuntï sisksma ukajj cheqäskapuniwa. Janiw nayajj ina chʼusat juchañchkti. [...] Gobernadoratejj janiw uk mayiñajj nayar waktʼkituti sischi ukhajja, ¡mirä amp suma khuyaptʼayasiñat uk lurakmaya! Janiw amukiñamäkiti, serviriman isipajj janiw utjkiti” sasa.

Sarnaqäwinakat qellqeri Simon Schama chachajj uka toqet akham siwa: “Uka qellqatajj janiw mä trabajirin isip kutsuyasiñatak wal chʼamachasitapak yatiykistuti” sasa. “Jan ukasti quejasir jaqejj Biblian leyinakap sum uñtʼpachäna, Levítico, Deuteronomio qellqatanakajj kunjamsa pobrenakar uñjasiñapa ukanakatwa qhanañchi” sasaw saraki.