1, 2. 1) ¿Kunatsa Jesusajj jiwatap amtañataki tantachäwin fácil apasiñapatak uttʼaypachäna? 2) ¿Jesusajj kunjam chuymanïtapsa aka yatichäwin uñjaskañäni?

¿KUNANAKAS Jesusan jiwatap amtañataki tantachäwin lurasi uk sasmati? Jïsa, taqeniw uk sissna. Uka tantachäwejj fácil apañakiwa. Ukatwa maynejj akham jisktʼasispa: “¿Kunjamaraki uka wali importante tantachäwejj fácil apañakïspasti?” sasa.

² Jesusajj aka oraqenkkäna ukhajja, wali importante yatichäwinakjja qhana, fácil amuykaña, mä qhawqha arunakampikiw yatichirïna (Mat. 7:28, 29). Ukhamarakiw jiwatap amtañataki wali importante tantachäwin fácil apasiñapatak yatichawayistu. Uka tantachäwita, ukhamarak kunanaksa Jesusajj luräna yaticharakïna ukwa aka yatichäwin sum uñjaskañäni. Ukajj Jesusan humilde chuymanïtapa, jan ajjsarirïtapa, munasirïtap amuyañatakiw yanaptʼistani. Kunjamsa uka toqenakan jupat yateqassna ukwa uñjaskarakiñäni.

3. 1) Mateo 26:26-28 qellqat liytʼasajja, ¿kunatsa Jesusajj uttʼaykäna uka tantachäw apañajj facilakïnwa sasin sistanjja? 2) ¿Vinompi jan levaduran tʼantʼampejj kamsañsa muni?

³ Jesusajj 11 apostolonakapampïskäna ukhaw jupan jiwatap amtañataki tantachäw uttʼayäna. Jan levaduran tʼantʼampi, Pascua fiestat jiltʼkäna uka vinompikiw uka tantachäw apäna (Mateo 26:26-28 liytʼañataki). Tʼantʼajj  “cuerpoj sañ muni”, vinojj ‘wilaj sañ munaraki’ sasaw apostolonakapar säna, niyaw ukanakajj jaqenak layku sacrificiot loqtatäñapäna. Jesusan apostolonakapajja, uttʼaykäna uka tantachäw apañajj facilakïtap uñjasajj janiw sustjasipkpachänti, ¿kunatsa ukham sistanjja?

4. Kuntï Jesusajj Martar siskäna ukajja, ¿kunjamsa jiwatap amtañataki tantachäw apañajj facilakïtap amuytʼayistu?

⁴ Jesusajj kimsa maranak Diosan arunakap yatiyjjäna ukhajj kunas pasäna uk amtañäni. Jupajj Lázaro, Marta, María sat amigonakaparuw visitir saräna. Utar purisajj sumwa jupanakar yatichaskäna. Ukampis Martajja, Jesusatak mä suma manqʼa phayañ laykojj janiw yatichäwinakap istʼkänti. Ukatwa Jesusajj wali munasiñampi akham sasin cheqañchäna: “Janiw waljapunejj munaskiti” sasa (Luc. 10:40-42). Niya jiwañap jakʼäjjäna ukhajja, kuntï Martar yatichkäna ukarjamaw Jesusajj fácil apaña mä tantachäw uttʼayäna. ¿Kunsa ukajj Jesusat yatichistu?

5. Jesusan jiwatap amtañajj facilakïtapajja, ¿kunsa Jesusat yatichistu, ukat kunjamsa Filipenses 2:5-8 textojj uk amuyañatak yanaptʼistu?

⁵ Kuntï Jesusajj siskäna lurkäna ukajj humilde chuymanïtapwa uñachtʼayäna. Ukatwa jiwañap jakʼäjjäna uka arumajj humilde chuymanïtap uñachtʼayarakïna (Mat. 11:29). Niyaw Jesusajj jaqenak layku jakäwip churañapäna, Jehová Diosasti jiwatanak taypitwa jaktayañapäna, Reyitwa alajjpachan uttʼayañaparakïna. Ukanak yatkchïnsa, Jesusajj janiw jachʼa jachʼa tukusin jiwatap amtañatakejj wali chʼama, jan apañjam mä tantachäw uttʼaykänti. Antisas maran may kuti, fácil apañ mä tantachäwinwa arkirinakapajj jupan jiwatap amtapjjañapäna (Juan 13:15; 1 Cor. 11:23-25). Ukhamatwa Jesusajj jan jachʼa jachʼa tukurïtap uñachtʼayäna. Cheqas alajjpachankir Reyisajj humilde chuymaniwa, uk yatiñajj wali kusiskañawa (Filipenses 2:5-8 liytʼañataki).

6. Jan waltʼäwinakan uñjasktan ukhajja, ¿kunjamsa Jesusjam humilde chuymanïsna?

⁶ Jiwasatak llakisiñat sipansa, mayninakat llakisisaw Jesusjam humilde chuymanïtas uñachtʼaysna (Filip. 2:3, 4). Jiwañap jakʼäjjäna uka arumajj kunsa Jesusajj luräna uka toqet amuytʼañäni. Wali tʼaqesiyata jiwayatäñapsa yatkchïnjja, jupat jan jitheqtiri arkirinakapajj kunja  llakitäpjjanisa ukjjatwa Jesusajj jukʼamp llakisïna. Ukatwa uka arumajj jupanakar yatichañataki, chʼamañchtʼañataki, chuymachtʼañatak tiempo apstʼasïna (Juan 14:25-31). Jesusajj mayninakatwa jukʼamp llakisïna. Ukhamatwa humilde chuymanïñ yatichawayistu.

7. Jesusajj Tatitun Cenapa uttʼayjjasajja, ¿kunjamsa jan ajjsarirïtap uñachtʼayäna?

⁷ Jesusajj Tatitun Cenapa uttʼayjjasajja, jan ajjsarirïtapwa uñachtʼayarakïna. ¿Kunjamsa? ‘Dios contra parliriwa’ sasin juchañchatasa, jiwayatas uñjasiñapäkchïnjja, Diosan munañap lurañaw Jesusatakejj nayrankäna (Mat. 26:65, 66; Luc. 22:41, 42). Jupajj jiwañkamaw Diosar servïna, Diosan sutipsa jachʼañchänwa, Diosajj Taqe Kunjjar Munañanïtapwa uñachtʼayarakïna, arrepentisiri jaqenakan wiñayatak jakapjjañapatakiw jakäwipsa churäna. Kuna jan walinakantï uñjasipjjañapäkäna ukatakiw apostolonakapar wakichtʼarakïna.

8. 1) ¿Jesusajj jupat jan jitheqtir apostolonakaparojj kamsänsa? 2) Jesusan jiwatapat walja maranak qhepatjja, ¿kunjamsa arkirinakapajj jupjam jan ajjsarirïpjjatap uñachtʼayasipkakïna?

⁸ Jesusajj apostolonakapar yanaptʼañatakiw llakinakapat armasïna, ukhamatwa jan ajjsarirïtap uñachtʼayarakïna. Judasar sarjjañap maykäna uka qhepat uttʼaykäna uka tantachäwejja, jupan wilap wartasitapat kuna bendicionanakas utjani ukwa ajllitanakar amtayañapäna, machaq pactor mantapjjatapsa amtayañaparakïnwa (1 Cor. 10:16, 17). Diosat jan jitheqtapjjañapataki, ukhamarak alajjpachar sarapjjañapatakejja, kunsa jupasa Awkipas jupanakat suyapjjäna ukwa Jesusajj apostolonakapar qhan säna (Juan 15:12-15). Kuna jan walinakansa uñjasipjjani uksa qhanwa sarakïna.  Ukat jupjam jan ajjsarirïpjjañapatakiw chʼamañchtʼarakïna (Juan 16:1-4a, 33). Walja maranak qhepatjja, arkirinakapajj ukarjamaw jan ajjsarirïpjjatapsa maynit maynikam yanaptʼasirïpjjatapsa uñachtʼayasipkakïna (Heb. 10:33, 34).

9. ¿Kunjamsa Jesusjam jan ajjsarirïtas uñachtʼaysna?

⁹ ¿Kunjamsa Jesusjam jan ajjsarirïtas uñachtʼaysna? Diosar creyipjjatap layku arknaqat uñjasipki uka jilat kullakanakar yanaptʼasaw jan ajjsarirïtas uñachtʼaysna. Awisajja, jilat kullakanakasajj ina chʼusatwa carcelan jistʼantat uñjasipjje. Ukhaman uñjasirinakarojj yanaptʼañasapuniwa. Sañäni, jupanakatakiw oracionan maysna, jan ukajj autoridadanak nayraqatansa tribunalanakansa jupanak toqetwa saytʼassna (Filip. 1:14; Heb. 13:19). “Jan ajjsartʼas” predicasaw jan ajjsarirïtas uñachtʼayaraksna (Hech. 14:3). Arknaqata tʼaqesiyatas uñjaskchiñänejja, Jesusat yateqasisajj Diosan Reinopat yatiyaskakiñäniwa. Ukampis ajjsarirïtas amuyasiñäni ukhajja, ¿kunsa lurañäni?

10. Jesusan jiwatap amtañataki mä qhawqha semananak nayrajja, ¿kunanaksa lursna?

¹⁰ Jesusan jiwatapat kuna suytʼäwinïtansa uka toqet lupʼiñaw jan ajjsarirïñatak yanaptʼistani (Juan 3:16; Efes. 1:7). Jesusan jiwatap amtañataki mä qhawqha semananak faltkipanwa uk lursna. Uka semananakajj Jesusan jiwatap amtañataki waktʼayasiwayki uka textonakwa liysna, Jesusan janïr jiwkipan kunanakas pasäna uka toqetwa lupʼiraksna. Ukhamatwa Jesusan jiwatap amtkañäni ukhajja, tʼantʼampi vinompejj kamsañsa muni, ukanakajj kunjamsa Jesusan jiwatapajj jan kikpanïtap uñachtʼayistu uk sum amuyañäni. Kuntï Diosasa Jesusas jiwas layku lurapki ukajj kunjamsa jiwasarusa  familiasarus yanaptʼi uk amuytan ukhajja, suytʼäwisajj jukʼampiw jilti, tukuykam aguantañwa munaraktanjja (Heb. 12:3).

11, 12. ¿Kunsa jichhakam yateqtanjja?

¹¹ Kunjamtï yateqktanjja, Tatitun Cenap amtañajj Jesusan jiwatapajj kunja wakiskirisa ukwa amtayistu. Humilde chuymanïtapa, jan ajjsarirïtapwa amtayarakistu. Jesusajj pachpakïskiwa, uk yatiñajj wali kusiskañawa, jupajj Jachʼa Jilïr Sacerdotesjamaw alajjpachan jiwas layku Diosar ruwtʼaski (Heb. 7:24, 25). Qhawqsa Jesusar yuspärtan uk uñachtʼayañatakejja, jupar istʼasaw jiwatap amtañasa (Luc. 22:19, 20). Sapa maraw judionakan calendarioparjamajj 14 de nisán urun uk amttanjja, uka uruw yaqha urunakat sipansa jukʼamp importantejja.

¹² Tatitun Cenap fácil amtañakïtap uñjañajja, Jesusajj kunjam chuymanirakisa uk amuyañatakiw yanaptʼistu. Ukham chuymanïtapatwa jiwas layku jiwäna, aka oraqenkkäna ukhas wali uñtʼatäna. ¿Kuna toqetsa parlasktanjja?

13. 1) Diosasa Jesusas qhawqsa munasipjjestu uk ¿kunjamsa Juan 15:9 ukat 1 Juan 4:8-10 textonakajj qhanañchi? 2) Jesusana ukhamarak Jehová Diosan wali munasirïpjjatapatjja, ¿khitinakas salvatäpjjaspa?

¹³ Qhawqsa Jehová Diosajj munasistu ukwa Jesusan luratanakapan amuysna (Juan 15:9; 1 Juan 4:8-10 liytʼañataki). Jesusajj wali munasirïtapatwa jiwas layku jiwäna. Cheqansa, Jesusana ukhamarak Jehová Diosan wali munasirïpjjatapatwa ajllitanakasa, yaqha ovejanakas salvatäpjjaspa (Juan 10:16; 1 Juan 2:2). Jesusan arkirinakapajj kunjamsa Tatitun Cenap amtapjjañapäna ukaw Jesusan munasirïtap uñachtʼayarakistu. Uka toqet jichhajj parltʼañäni.

14. ¿Kunjamsa Jesusajj arkirinakapar munasitap uñachtʼayarakïna?

¹⁴ Jesusajj janiw jiwatap amtañatakejj wali chʼama apañ tantachäw uttʼaykänti, jan ukasti, fácil apañ mä tantachäwikwa uttʼayäna. Ukhat aksarojja, Jesusan arkirinakapajj kunayman jan walinakan uñjasisa, yaqhepajj carcelankkasaw Jesusan jiwatap amtapjjañapäna (Apoc. 2:10). ¿Jupanakajj Jesusar istʼasajj Tatitun Cenap amtapjjpachänti? Jïsa, amtapjjänwa.

15, 16. Jan walin uñjasiri jilat kullakanakajja, ¿kunjamsa Tatitun Cenap amtapjjäna?

¹⁵ Cheqpach cristianonakajj nayratpachaw Jesusan jiwatap amtapjjäna, jichhas amtasipkakiwa. Awisajj kunayman jan walinakan uñjasisaw kuntï Cristojj siskäna ukarjam lurasajj Tatitun Cenap amtapjjerïna. Harold King jilatat parltʼañäni. Jupajj China markankir mä carcelan sapak jistʼantatänwa. Ukhamajj Jesusan jiwatap amtañatakejj kunatï uka cheqan utjkäna ukampikiw kuns lurañapäna. Policianakan jan uñjkataw tʼantʼsa vinsa wakichirïna. 14 de nisán urojj kuna fechankanisa uksa wali amuyumpiw tantiyirïna. Uka urojj purinjjäna ukhajja, sapakiw jilatajj cantirïna, Diosar mayisirïna ukat mä discurso arstʼarakirïna.

¹⁶ Segunda Guerra Mundialajj utjkäna ukhajja, campo de concentración ukan jistʼantata mä qhawqha kullakanakarakiw jakäwip niya aptʼasirjam Tatitun Cenap amtapjjäna. Niyakejjay uka tantachäw apañajj jan chʼamäkchejja, policianakan jan uñjkataw kullakanakajj tantachasipjjäna. Jupanakajj akham sapjjewa: “Janqʼo telamp tapjjatata mä bancoruw tʼantʼsa vinsa usktʼapjjayäta. Ukat uka bancor muytataw saytʼasipjjayäta. Policianakajj cuarton luzap uñjasajj  katjapjjetaspänwa, ukatwa mä velampik uka tantachäw apapjjayäta. [...] ‘Taqe chʼamanakajampiw santo sutim jachʼañchapjjä’ sasaw Diosar mayamp arsupjjayäta”. ¡Uka kullakanakajj taqe chuymaw Diosar confiyapjjäna! Cheqas jan walin uñjaskasas Jesusan jiwatap amtañajja, qhawqsa jupajj munasistu ukwa uñachtʼayi.

17. ¿Kunanak jisktʼasiñas walïspa?

¹⁷ Niyaw Jesusan jiwatap amtañäni, ukhamajj akham jisktʼasiñaw walïspa: “¿Kunjamsa Jesusjam munasir chuymanïristjja? ¿Nayatak llakisiñat sipansa jilat kullakanakajat llakistti? ¿Jupanakan jan pantjasipjjañapti suytjja, jan ukajj kuntï lurirjamäpki ukakcha suytjja?” sasa. Jesusat yateqasipjjapuniñäni, jupjam sinttʼasirïpjjarakiñäni (1 Ped. 3:8).

18, 19. 1) ¿Kunsa jutïrin amtasiskakiñäni? 2) ¿Kun lurañatakis jumajj chʼamachasïta?

¹⁸ Mä jukʼa tiempotjja, janiw Jesusan jiwatap amtañataki tantachasiñajj wakisjjaniti. Jesusajj wali tʼaqesiñ tiempon “jutkani” ukhaw aka oraqenkir taqe “ajllitanakapar” alajjpachar apasjjani. Ukat uksarojja, janiw Jesusan jiwatap amtjjañäniti (1 Cor. 11:26; Mat. 24:31).

¹⁹ Jesusan jiwatap amtañataki tantachäwejj jan apasjjani ukhajja, kunjamsa uka tantachäwejj Jesusan humilde chuymanïtapa, jan ajjsarirïtapa, munasirïtap yatichistäna uk amtasiskakiñäniwa. Tatitun Cenap amtirinakajja, uka tantachäwejj kunjamas apasirïna ukwa uka tiempon jakirinakar cuenttʼapjjani. Uk istʼañajj wal jupanakar yanaptʼani. Ukampis uka tantachäwejj jiwasar yanaptʼañap munstan ukhajja, Jesusjam humilde chuymanïñataki, jan ajjsarirïñataki, munasirïñatakiw chʼamachasiñasa. Ukhamtï lurañänejja, Jehová Diosajj bendisistaniwa (2 Ped. 1:10, 11).