1, 2. 1) ¿Kunsa Robert jilatajj amuyasïna? 2) ¿Kunsa Bibliat sum amuyañatak luräna?

ROBERT jilatajj 15 maraniw bautisasïna, ukampis janiw taqe chuyma Diosar sirvkänti. Jupajj akham siwa: “Janipuniw jan walinak lurirïkti. Phoqañ laykukiw Diosar servirïta. Taqpach tantachäwinakaruw sarirïta, maransa walja kutiw precursor auxiliarat servirïta, ukatwa Diosar serviñan suma saytʼatäkiristsa ukham amuyañjamäna. Ukhampachasa, janiw kusisitäkayätti” sasa.

² Casarasjjäna uka qhepatakwa amuytatasïna. Awisajja, Biblia toqet jisktʼasisaw esposapampi anatapjjerïna. Jupajj Dios chuyma warmïnwa, ukatwa jisktʼanakar sum qhanañchirïna. Robert jilatasti awisakiw sum qhanañchiri, ukatwa wal phenqʼasïna, janis kunsa yatkaspa ukham amuyasirakïna. Ukatsti akham amuytʼasïna: “Niyakejjay esposajarojj Diosar serviñan yanaptʼañajächejja, chʼamachasiñajawa” sasa. Ukarjamaw luräna. Jupajj akham saskakiwa: “Bibliat jukʼampi yatjjatayäta, ukhamatwa jukʼat jukʼat sum amuyjjayäta” sasa. Ukaw Biblian cheqa yatichäwinakap sum amuyañatak yanaptʼäna, Jehová Diosampis jukʼamp sumwa apasjjarakïna, ukaw jukʼamp wakiskirejja.

3. 1) ¿Kunsa Robert jilatan experienciapajj yatichistu? 2) ¿Kunanakatsa aka yatichäwin yatjjataskañäni?

³ Robert jilatan sarnaqäwipat kunanaksa yateqsna uk uñjañäni.  Inas Bibliat mä jukʼanak yatiskstan, tantachäwinakarusa, predikirisa sarapunstan. Ukampis ukanak lurañajja, janiw Diosar taqe chuyma serviñampi saskiti. Inas Diosar serviñan mä jukʼa jiltawaystan, ukampis sumpach amuyasisajja, inas jukʼamp jiltaskakiñ wakisitap amuyassna (Filip. 3:16). Jiltaskakiñatakejj kunas yanaptʼistaspa ukwa kimsa toqet yatjjatañäni: 1) ¿Diosar serviñan jiltasktanti janicha uk amuyasiñatakejj kunas yanaptʼistaspa? 2) ¿Diosar serviñan jiltaskakiñatakejj kunsa lurañasa? 3) ¿Espíritu santompi irpayasiñajj kunjamsa yanaptʼistani?

4. ¿Khitinakas Efesios 4:23, 24 texton siski ukarjam lurapjjañapa?

⁴ Diosar serviñ qalltkayätan ukhajja, walja cambionakwa lurawaytanjja. Bautisasjjtan uka qhepatsa chʼamachasiskaktanwa. Biblian akham sistuwa: “Amuyunakam machaqar tukuyasipkakim” sasa. Uka arunakajja, griego arun jan jaytas luraña sañwa muni (Efes. 4:23, 24). Taqeniw pantjasirïtanjja, ukatwa ukarjam lurañataki chʼamachasiskakiñasa. Walja maranak Diosar servipki uka jilat kullakanakas espíritu santompi irpayasiñatak chʼamachasisipkakiñapawa (Filip. 3:12, 13).

5. ¿Kuna jisktʼanakas espíritu santompejj irpayasisktanti janicha uk amuyasiñatak yanaptʼistaspa?

⁵ Diosar serviñan kunjamäsktansa ukjja, taqeniw sum amuykiptʼasiñasa. Waynäsasa, jilirïsasa, akham jisktʼasiñasawa: “¿Diosar serviñan jiltaskti? ¿Cristojj kunjamäkäntï ukhamäñatak chʼamachasisktti? ¿Tantachäwinakan kunanaktï lurkta ukanakajj kunsa nayat uñachtʼayi? ¿Parlatajarjamajj kunas nayatak nayranki? ¿Qellqatanak liyitajasa, isisitajasa kʼachachtʼasitajasa, ewjjtʼanak kunjamsa katoqasta ukasa kuna kasta jaqëtajsa uñachtʼayi? ¿Yantʼanakan uñjasisajj kunsa lurtjja? ¿Akapachan amuyunakap jaytjjasajj amuytʼasir cristianöjjtti?” (Efes. 4:13). Uka jisktʼanakarojj kamstansa ukanwa, espíritu santompi irpayasisktanti janicha uk amuyassna.

6. ¿Espíritu santompi irpayasisktanti janicha uk yatiñatakejj kunas yanaptʼarakistaspa?

⁶ Diosar serviñan nayrar sartasktanti janicha uk yatiñatakejja, jilat kullakanakan yanaptʼapaw awisajj munasispa. “Munañapampi apayasir jaqejja” sarnaqatapajj Diosatak jan walïtapjja janiw amuyaskiti sasaw apóstol Pablojj säna. “Espíritu santompi irpayasir jaqesti”, kuntï Diosajj amuyki ukhamwa amuyaraki, jañchin munañanakap lurañajj Diosatak jan walïtapsa amuyarakiwa (1 Cor. 2:14-16; 3:1-3). Jilïr irpirinakajj Jesucristjam amuyapjje, ukatwa khitis jañchin munañapampi apayasiski uk amuyapjje, ukatsti yanaptʼañatakiw chʼamachasipjje. Jiwasatï munañanakasampi apayasiskstanjja, ¿ewjjtʼanakapar istʼañäniti? Istʼasirïsajja, espíritu santompi irpayasiskataswa uñachtʼayañäni (Ecl. 7:5, 9).

7. Diosar serviñan jiltaskakiñatakejja, ¿kunatsa Bibliat yatiñakejj jan wakiski?

⁷ Espíritu santompi irpayasir jaqëñatakejja, janiw Bibliat yatiñakejj wakiskiti. Salomón reyisa Jehová Diosar uñtʼarakïnwa. Kunanaktï jupajj siskäna ukanakat yaqhepajj Bibliankarakiwa. Ukampisa Salomonajj Diosat jitheqtänwa (1 Rey. 4:29, 30; 11:4-6). Bibliat sumsa yatkstanjja, Diosar serviñan jiltaskakiñasawa (Col. 2:6, 7). ¿Kunas ukatak yanaptʼistaspa?

8, 9. 1) ¿Kunas Diosar serviñan suma saytʼatäñatak yanaptʼistaspa? 2) ¿Kuna amtampis Bibliat yatjjatañasa, lupʼiñasaraki? (Página 23 ukankir fotonak uñjjattʼäta).

⁸ Apóstol Pablojja, “jilïr jaqer tukuñkamajj  chʼamachasiskakiñäni” sasaw nayrïr cristianonakar säna (Heb. 6:1). Jichhürunakas uka ewjjtʼarjamaw lurañasa. Ukatakejj “Diosan munasiñapan jakasipxañäni” sat librot yatjjatañajj wali wakiskiriwa. Uka librojja, kunjamsa Biblian ewjjtʼanakaparjam sarnaqsna ukatakiw yanaptʼistani. Uka librot yatjjatañ tukuyjjstanjja, kawkïr qellqatanakatï Diosar serviñan suma saytʼatäñatak yanaptʼkistaspa ukanakat yatjjatañasawa (Col. 1:23). Ukatjja, orasiñasapuniwa, kunjamsa yateqktan ukarjam phoqsna ukanakatsa lupʼiñasawa.

⁹ Ukatsti, Jehová Diosan munañap lurañataki, istʼasirïñataki amtampiw Bibliat yatjjatañasa, lupʼiñasaraki (Sal. 40:8; 119:97). Kunanakatï Diosar serviñan jiltañatak jarkʼkistaspa ukanakatsa jitheqtañasawa (Tito 2:11, 12).

10. Diosar serviñan suma saphintatäñatakejj ¿kunsa wayn tawaqonakajj lurapjjaspa?

¹⁰ Wayn tawaqonaka, ¿Diosar jukʼamp serviñatakejj kunanak lurañsa amtasipkta? Betelan trabajir mä jilatajja, mä uru jachʼa tantachäwinakan bautisasipki uka wayn tawaqonakampejj parltʼapuniwa. ‘¿Diosar serviñan kunanak lurañsa amtaskta?’ sasaw jisktʼaraki. Jila parte wayn tawaqonakajja, Jehová Diosar serviñatak kunanaksa lurapjjani uk sum amtjjapjje. Yaqhepajj precursor regularat serviña, jan ukajj yatiyirinakajj munaski ukar sarañwa munapjje. Ukampis yaqhep wayn tawaqonakajja, janiw kamsirjamäpkisa. Ukhamajja, ¿kunsa lurapjjani uk amtañajj janis wakiskaspa ukhamti amuyapjjpacha? Wayn tawaqonakajj akham jisktʼasipjjañapawa: “¿Tantachäwinakarusa, predikiris awk taykajan jariyatakit sartjja? ¿Jan ukajj Jehová Diosar munasitaj laykuch ukham lurtjja?” sasa. Cheqas wayn tawaqonakasa jilïrinakasa, taqeniw Diosar serviñatakejj kunanaksa lursna ukanak amtañasa. Ukaw Diosar serviñan suma saphintatäñatak yanaptʼistani (Ecl. 12:1, 13).

11. 1) ¿Diosar serviñan jiltaskakiñatakejj kunsa lurañasa? 2) ¿Khitin sarnaqäwipatsa yateqassna?

¹¹ Kunanakan nayrar sartañas wakisi uk amuyasisajja, jankʼakiw ukatak chʼamachasiñasa. Ukham lurañajj wali wakiskiriwa. Cheqas ukham lurasaw wiñay jakañ katoqsna (Rom. 8:6-8). Jehová Diosajj janiw jan pantjasirïñas suykiti, antisas espíritu santompiw yanaptʼistu. Ukampis jiwasaw chʼamachasiskakiñasa. John Barr jilatat parltʼañäni, jupajj Oraqpachan Jilïr Irpiri jilatanakat maynïnwa. Lucas 13:24 textot parlkasajj akham sänwa: “Jan chʼamachasipjjatap laykuw walja cristianonakajj kʼullkʼu punknäm jan mantirjamäpkiti” sasa. Ukhamasti Jacob chachjamaw wal chʼamachasiñasa, jupajj bendición katoqañkamaw mä angelampi nuwasïna (Gén. 32:26-28). Bibliat yatjjatañajj wali sumäspawa. Ukampis janiw mä cuentökaspas ukham liyiñasäkiti. Jan ukasti, suma yatichäwinak katjañatakiw chʼamachasiñasa, ukaw Diosar serviñan jiltayistani.

12, 13. 1) ¿Kunas Romanos 15:5 texton siski ukarjam lurañatak yanaptʼistaspa? 2) ¿Kunjamsa Pedron sarnaqäwipasa ewjjtʼapas yanaptʼistu? 3) Jukʼamp Dios chuyma jaqëñatakejj ¿kunsa lurañasa? (“ Diosar serviñan jiltaskakiñatak kunsa lurañasa” siski uka recuadro uñjjattʼäta).

¹² Diosar serviñan jiltañatak chʼamachastan ukhajja, Diosajj espíritu santompiw amuyunakas cambiañatak yanaptʼistu. Ukhamatwa jukʼat jukʼat kunjamtï Cristojj amuyki ukham amuyjjarakiñäni (Rom. 15:5). Ukarakiw jañchin munañanakap apanukuñatakisa, Diosajj munki ukham suma jaqëñatakis yanaptʼistaspa (Gál. 5:16, 22, 23). Jiwasatï qollqe chuymätassa, jañchin munañanakampampi apayasiskatas amuyastanjja, chʼamachasiñasawa. Jehová Diosar espíritu santop mayisiskakiñasawa, jupaw kunatï walïki ukanak  lupʼiñatak yanaptʼistani (Luc. 11:13). Apóstol Pedrot amtañäni, jupajj walja kutiw munañanakapampi apayasïna (Mat. 16:22, 23; Luc. 22:34, 54-62; Gál. 2:11-14). Ukhampachasa, chʼamachasiskakïnwa. Ukhamatwa Diosan yanaptʼapampejj jukʼat jukʼat Cristjam amuyjjarakïna. Jiwasajj ukhamwa luraraksna.

¹³ Kunjam jaqëñatakis chʼamachasiñasa ukwa Pedrojj qhanañchäna. Sañäni, munañanakasampi jan apnaqayasiña, aguantaña, jila purjam munasiña (2 Pedro 1:5-8 liytʼañataki). Ukham lurañatakiw chʼamachasiñasa, ukaw Diosar serviñan jiltaskakiñatak yanaptʼistani. Sapüru akham jisktʼasiñaw walïspa: “¿Jukʼamp Dios chuyma jaqëñatakejj kunansa jichhürojj chʼamachasiristjja?” sasa.

14. Espíritu santompi irpayasiñatak chʼamachasitasajj ¿kunjamsa yanaptʼistani?

¹⁴ Cristjam amuyañajja, trabajonsa escuelansa sum sarnaqañatakiw yanaptʼistani, parlatasas sumarakïniwa, kunsa lurañäni uk sapüru amtañatakis yanaptʼarakistaniwa. Ukham luratasajj Cristor arkañataki chʼamachasitaswa uñachtʼayani. Jiwasatï espíritu santompi irpayasiñatak chʼamachastanjja, kunanakatï Diosat jitheqtaykistaspa ukanak janiw lurkañäniti. Yantʼanakan uñjasiñäni ukhajja, Cristjam amuyañaw ukanakat jaltjjañatak yanaptʼistani. Kunsa lurañäni uk amtañatakisa, akham jisktʼasiñasawa: “¿Kun lurañajas wakisi uk amuytʼasiñatakejj Biblian kawkïr ewjjtʼanakapas yanaptʼitani? ¿Akhaman uñjasisajj kunsa Jesusajj luraspa? ¿Kunjam lurañajsa Jehová Diosajj munpacha?” sasa. Sapa kuti ukham amuytʼañwa yateqañasa. Ukanakat jichhajj mä qhawqha uñjañäni. Ukanakat yatjjatasajja, Biblian kawkïr ewjjtʼapas suma amtanakar puriñatak yanaptʼistaspa ukwa qhanañchañäni.

15, 16. 1) Khitimpis casarasiñäni uk sum amtañatakejja, ¿kunjamsa Cristjam amuyañajj yanaptʼistu? 2) Khitinakas amigonakasäni uk ajlliñatakejja, ¿kunjamsa Cristjam amuyañajj yanaptʼistu?

¹⁵ Khitimpis casarasïta. 2 Corintios 6:14, 15 (liytʼañataki) texton kuntï siski ukaw amuytʼasiñatak yanaptʼistani. Apóstol Pablon aruparjamajja, espíritu santompi irpayasir jaqejj janiw munañapampi apayasir jaqempi casaraskaspati. Khitimpis casarasiñäni uk sum amtañatakejj ¿kunjamsa uka ewjjtʼajj yanaptʼistaspa?

¹⁶ Khitinakas amigonakamäni. 1 Corintios 15:33 (liytʼañataki) texton kamsisa uk amuytʼañäni. Espíritu santompi irpayasir jaqenakajja, janiw munañapampi apayasir jaqenakampi amigöpkaspati. Kunjamsa uka arunakarjam phoqasma uk amuytʼañamawa. Internetan redes sociales sasin uñtʼatäki ukar mantasajj kunsa amtañama, jan ukajj Internet taypi mä jan uñtʼat jaqejj anatañatak invittʼiristam ukhajja, ¿kunsa lurañama?

17-19. Espíritu santompi irpayasir jaqëstanjja: 1) ¿Kunanaksa jan lurkañäni? 2) ¿Kunas jiwasatak nayrankani? 3) ¿Maynimpi jan waltʼayasisajj kunsa lurañäni?

¹⁷ Kunanakatï Diosar serviñan jan jiltaykistaspa ukanakat amuyasiñasawa. Hebreos  6:1 (liytʼañataki) textonwa mä suma ewjjtʼajj utji. “Inamay luräwinakat” sasinjja, kunanakatï Diosar serviñan jan yanaptʼkistu ukanakatwa apóstol Pablojj parlaskäna. Uka ewjjtʼajja, aka jisktʼanakar qhanañchañatakiw yanaptʼistani: ‘¿Akham lurañajj yanaptʼituti janicha? ¿Jukʼampi qollqenïñatakejj aka trabajo qatoqasiñajäspati? ¿Kunatsa akapach sumaptayañatak chʼamachasipki uka grupor mantañajj nayatak jan walïki?’ sasa.

¹⁸ Diosan Reinop nayrar uchañatak kunsa lurañäni. Jesusajj Qollun yatichkäna ukhajja, kunas jiwasatak nayrankañapa ukwa qhanañchäna (Mat. 6:33). Espíritu santompi irpayasir jaqejja, Diosan Reinopwa nayrar uchi. Universidadan estudiañäniti janicha, mä trabajo katoqañäniti janicha uk amtañatakejja, Jesusan uka ewjjtʼapaw yanaptʼistani.

¹⁹ Jan waltʼayasiñanaka. Maynimpi jan waltʼayaskañäni ukhajja, kuntï apóstol Pablojj Romanos 12:18 qellqatan siskäna uka ewjjtʼapaw yanaptʼistani. Criston arkirinakapajja, “taqe jaqenakampi sumanka[ñatakiw]” chʼamachastanjja. ¿Maynimpi jan waltʼayasktan ukhajj kunsa lurtanjja? ¿Munañasarjamat taqe kun lurañ muntanjja, jan ukajj sumankañ utjayiri jaqetcha uñtʼapjjestu? (Sant. 3:18).

20. ¿Kunatsa jumajj Diosar serviñan jiltaskakiñ munta?

²⁰ Kunjamtï uñjaniwayktanjja, Bibliankir ewjjtʼanakat amuytʼañajj suma amtanakar puriñatakiw yanaptʼistu, ukasti espíritu santompi irpayasitaswa uñachtʼayaraki. Ukham lurañajja, kusisita jakasiñatakiw yanaptʼistu. Qalltan parlaniwayktan uka Robert jilatajja, akham siwa: “Jehová Diosampi sum apasiñajja, suma esposöñataki, suma awkïñatakiw yanaptʼitu. Wali kusisitarakïtwa” sasa. Jiwasatï espíritu santompi irpayasiñatak chʼamachasiñänejja, ukhamarakiw yanaptʼistani. Aka tiemponjja kusisitaw jakasiñäni, jutir pachansti ‘cheqpach jakaña’ katoqarakiñäni (1 Tim. 6:19).