1. ¿Jakäwisajj qhawqha valoranis Jehová Diosatakejja?

 AMIGOMAS mä uta regalkiristam ukham amuytʼañäni, uka utan pinturapajj janiw sumäjjeti, yaqhep cheqanakas kʼakʼatarakiwa, ukhamäkchisa uka utajj millón millón dolaranakaw cuesti. ¿Janit uka ut wali valoranit uñjkasma, cuidkarakisma? Jehová Diosajj ukhamarakiw wali valorani mä regalo churistu: ukajj jakañ vidawa. Niyakejjay Jehová Diosajj jakañ vidas wali valoranit uñjchejja, Yoqaparuw sacrificiot jiwas layku churäna (Juan 3:16).

2. 2 Corintios 7:1 textorjamajja, ¿kun lurañassa Jehová Diosajj muni?

² Jehová Diosaw ‘jakañ vida churirejja’ (Sal. 36:9). Apóstol Pablos ukhamwa amuyarakïna, jupajj akham sänwa: “Jupïpanwa jakasktanjja, sarnaqasktanjja, utjaskaraktanjja” sasa (Hech. 17:25, 28). Ukatwa jakäwejj Diosan regalopawa sasin sissna. Kunanakatï jakañasatakejj munaski ukanakwa Diosajj munasiñat churistu (Hech. 14:15-17). Ukampis Jehová Diosajj janiw jakaskakiñasatakejj milagronak lurkaniti, jan ukasti kʼumaräskakiñatakisa jupar serviskakiñatakis jiwasan chʼamachasiñaswa muni (2 Corintios 7:1 liytʼäta). ¿Kunatsa kʼumaräskakiñatakisa jakaskakiñatakis chʼamachasiñasa, ukat kunjamsa uk lursna?

3. ¿Kunatsa kʼumaräskakiñatak chʼamachasiñasa?

³ Jehová Diosar wali sum serviñ munatasatwa kʼumaräskakiñ muntanjja (Mar. 12:30). ‘Mä sacrificior uñtatwa cuerponakas loqtañ’ muntanjja, “uka sacrificiojj jakkiri, santo, Diosan chuymapar purtʼkiri ukhamäñapawa”, ukatwa taqe kunatï usuntaykistaspa ukanak jan lurktanti (Rom. 12:1). Cheqas  wal cuidasisajj janiw usuntkañäniti sasajj janiw sañ munktanti. Ukampis kunatï kʼumaräskakiñatakejj yanaptʼkistaspa ukwa lurañasa, ukhamatwa alajjpachankir Awkisajj jakañ vida churkistu uk wali valoranit uñjatas uñjani.

4. ¿Kun lurañsa David reyejj munäna?

⁴ Diosajj jakañ vida mä regalot churkäna ukjja, David reyejj wali valoranit uñjäna. Ukatwa akham sasin qellqäna: “Nayatï jiwjjasin sepulturar saraqerista ukhajja, ¿kuna walirak utjaspasti? ¿Laqʼajj jumar jachʼañchätamti? ¿Jan apanukusir Diosätam yatiyaniti?” sasa (Sal. 30:9). Inas Davidajj janïr jiwkasin uka arunak qellqchïna. Jupajj kawkhakamatï wakiskaspa ukhakam jakañwa munäna, ukhamat Jehová Diosar jachʼañchaskakiñataki. Cheqansa taqe jiwasajj ukwa munaraktanjja.

5. Wali jilïrëjjstansa jan ukajj usutäskstansa, ¿kunsa lursna?

⁵ Wali jilïrëjjstansa jan ukajj usutäskstansa, kunanaktï nayrajj lurkayätan ukanak janiw lurirjamäjjsnati, ukatwa jiwasajj colerata llakita jikjjatassna. Ukampis ukajj jan usuntañatakejj janis cuidasiñasäjjaspa ukham janiw sañ munkiti. ¿Kunatsa ukham sistan? Kuna laykutejj wali jilïrëjjstansa jan ukajj usutäskstansa David reyjamajj Jehová Diosar jachʼañchaskaksnawa. Pantjasirïskstansa Diosajj wal munasistu, valoranitwa uñjarakistu, ¿uk yatiñajj waljjay chʼamañchtʼistojja? (Mat. 10:29-31). Diosajj walpun jiwasat llakisi, ukatwa jiwjjapjjchïtas jaktayapjjämaw sasin arsuwayi (Job 14:14, 15). Jakkasin vidas sum cuidañatakisa kʼumaräskañatakis chʼamachasipjjañäni.

6. Kunsa manqʼañäni, qhawqsa manqʼañäni umarakiñäni uk amtkasinjja, ¿kun amuyasiñassa Jehová Diosajj muni?

⁶ Bibliajj janiw kʼumaräskakiñatakejj kunanaksa lurañasa, kunanaksa manqʼañasa uka toqet parlir mä librökiti, ukampis kunsa taqe ukanakat Jehová Diosajj amuyi ukwa qhanañchistu. Amuytʼañataki, Diosajj akham sasaw ewjjtʼistu: “Kunanakatï cuerpomar jan waltʼaykaspa ukanakampejj jan jakʼayasimti” sasa (Ecl. 11:10). Jiljas manqʼañasa machantasiñas janiw walïkiti sasaw Bibliajj qhanañchi, ukham lurasajj usuntsnawa, jiwaraksnawa (Prov. 23:20). Ukhamajj kunsa manqʼañäni, qhawqsa manqʼañäni umarakiñäni ukanak amtañajj wakiskani ukhajja, Jehová Diosajj jan jiljañaswa muni (1 Cor. 6:12; 9:25).

7. Kʼumar sarnaqañ toqet amtañatakejja, ¿kunjamsa Proverbios 2:11 textonkki uka wiñay yatichäwirjam amtsna?

⁷ Jehová Diosajj jakañ vida regalot churkistu ukat yuspäratas uñachtʼayañatakejja, wal amuytʼasisaw kuns amtañasa (Sal. 119:99, 100; Proverbios 2:11 liytʼäta). Kunsa manqʼañäni uk janïr amtkasinjja, amuytʼasirïñasaw wakisi. Mä manqʼatï wal gustchistu ukampis jiwasar usuyirïtap yatstan ukhajj ¿kunsa lurañäni? Amuytʼasirïtasat janiw manqʼkañäniti. Amuytʼasirïñäni ukhajja, qhawqhatï wakiski ukhwa iktʼasiñäni, sapa kutiw ejercicio lurañäni, cuerpossa jarisiñäniwa, utassa qʼomacharakiñäniwa.

8. Jehová Diosatakejj mä accidenter jan puriñasajj wali wakiskiriwa, ¿kunsa Bibliajj uka toqet yatichistu?

⁸ Utansa trabajonsa mä accidenter jan puripjjañapatakejj Jehová Diosajj leyinakwa israelitanakar churäna (Éx. 21:28, 29; Deut. 22:8). Maynitï jan munkasin yaqhar jiwayaspäna ukhajja, sinti jan walinakanwa uñjasispäna (Deut. 19:4, 5). Mamapan purakapankaskir mä wawarutï maynejj usuchjaspäna ukhajja, leyirjamajj castigatäñapänwa, jan munkasas uk lurchïnjja castigatäñapänwa (Éx. 21:22, 23). Bibliarjamajja, jan accidenter  puriñatakejj taqe kuns wali amuyump lurañaswa Jehová Diosajj muni.

9. Accidentenakar jan puriñatakejj ¿kunanaksa lursna? (Fotonak uñjjattʼäta).

⁹ Utansa trabajonsa taqe kun wali amuyumpi lurasaw Diosarojj jakañ vida churatapat yuspärtanjja. Sañäni, jiwasantï afilat yänakasa, quimiconakasa jan ukajj medicamentonakas utjchistu ukhajja, jiskʼa wawanakat jayaruw imañasa. Ukanak jaqtañäni ukhajj janiw ukanakajj mayninakar jan waltʼayañapäkiti. Ninatsa, qhatirasir liquidonakatsa, luzamp funcionir herramientanakatsa wal amuyasiñasarakiwa, janiw ukhamak aparpayañasäkiti. Jiwasatï mä medicamento umtʼatasata jan ukajj alcohol umtʼatasat auto jan apnaqañ puedkstan ukhajja, janiw apnaqañasäkiti, janirakiw jan sum ikitasa ni celular aptʼatas auto apnaqañasäkiti.

10. Mä akatjamat jan waltʼäwejj utjki ukhasa, janïr ukajj paski ukhasa, ¿kunsa jakañ vidas salvasiñatakejj lursna?

¹⁰ Awisajja, kunanakatï jakañ vidasar jan waltʼaykaspa ukanakajj pasaspawa, janiw ukanak  pasañap jarkʼksnati. Terremotonaka, volcanan phallatapa jan ukajj yaqha ukhamanaka, epidemianaka, mä markan jan waltʼäwinakaw utjaspa. Ukampis ukanakatï utjaspa ukhajja, ¿kunsa sinti jan walinakan jan uñjasiñatakisa salvasiñatakis lursna? Autoridadanakajj toque de queda utjayapki, uka cheqat sarjjañatak mayipkistu jan ukajj yaqha ukham ewjjtʼanak churapkistu ukanakar istʼañasawa (Rom. 13:1, 5-7). Mä akatjamat utjir yaqhep jan waltʼäwinakatakejj wakichtʼassnawa, ukatakejj kunanaktï autoridadanakajj sapkistu ukaruw istʼañasa. Inas uma ukhamarak jan ñusantir manqʼañanak imasiñajj wakischispa, botiquín de primeros auxilios ukanïñas wakisirakchispa.

11. Mä epidemiajj utjki ukhajj ¿kunsa jankʼak lurañasa?

¹¹ ¿Jakasktan uka cheqantï mä epidemiajj utjchi ukhajj kunsa lursna? Kunanaktï autoridadanakajj sapkistu ukanakwa istʼañasa: inas ampar jarisipjjam, mayninakat jitheqtapjjam, barbijo jan ukajj mascarilla uchasipjjam, cuarentena lurapjjam sasin sapjjchistani. Uka ewjjtʼanakar jankʼaki istʼasajja, Diosajj regalot churkistu uka jakañ vidar wali valoranit uñjataswa uñachtʼaytanjja.

12. Mä akatjamat jan waltʼäwejj utjki ukhajj ¿kunjamsa Proverbios 14:15 textojj yatiyäwinakat amuyasiñatak yanaptʼistu?

¹² Mä akatjamat jan waltʼäwinakajj utjki ukhajja, awisajj amigonakas toqe, vecinonakas toqe, radio toqe, televisión toqe jan ukajj yaqha ukhamanak toqew kʼari yatiyäwinakasa jan phoqatpach yatiyäwinakas purinistaspa. Taqe ukanakar creyiñat sipansa, kuna confiykañ yatiyäwinaktï gobiernos doctoranakas apsupki ukaruw istʼañasa (Proverbios 14:15 liytʼäta). Ukatjja tantachasiñ toqetsa predicación toqetsa kuntï Cuerpo Gobernantesa sucursalas siskistu ukaruw istʼañasaraki, jupanakajj confiykañ yatiyäwinakarjam amtañatakiw chʼamachasipjje (Heb. 13:17). Jupanakar istʼasaw jiwasan kʼumaräskakiñatakisa mayninakan kʼumaräsipkakiñapatakis yanaptʼtanjja, inas Jehová Diosan Testigonakapat sum parlapjjañapatakis yanaptʼarakchiñäni (1 Ped. 2:12).

13. Wil uchas qollañ munapkistani ukhajj ¿kunjamsa jakañ vidar valoranit uñjatas uñachtʼaytanjja?

¹³ Walja jaqenakajja, Jehová Diosan Testigonakaparojj wilar sagradot uñjirïtasatwa uñtʼapjjestu. Jehová Diosajj wila toqet churkistu uka leyir istʼatasjja, wila jan uchayasisaw uñachtʼaytanjja, hospitalar mä akatjamat purchiñäni ukhasa janiw uchayasktanti (Hech. 15:28, 29). Ukampis ukajj jiwañsa munksna ukham janiw sañ munkiti. Jan ukasti Jehová Diosajj jakañ vida regalot churkistu uk valoranit uñjataswa uñachtʼaytanjja. Ukatwa wil jan uchas sum qollapkistaspa uka doctoranak thaqtanjja.

14. Jan operayasiñatakisa jan ukajj yaqha tratamientonak jan lurañatakis ¿kunsa lursna?

¹⁴ Jiwasatï qalltan parlaniwayktan ukarjam lurañäni ukhajja, inas operayasiñasa jan ukajj yaqha tratamientonak lurañas jan wakiskchiniti. Ukampis operapjjestani ukhajja, cuidasitasat jankʼakiw waliptjjarakiñäni. Maysa toqetjja, kunanakatï utansa trabajonsa jan walir puriykistaspa ukanak jan utjañapatak chʼamachasiñäni, auto apnaqañ toqet leyinakajj utjki ukar istʼañäni ukhajja, janiw mä accidenter purtʼaskañäniti, janirakiw mä akatjamat operatäñatakis apapkistaniti.

15. 1) ¿Kunatsa wila jan uchayasiñ documentos apnaqasiñasapuni, ukat kunatsa actualizatäñapa? (Fotonak uñjjattʼarakïta). 2) Videorjamajja, ¿wila jan uchayasiñ toqet suma amtanakar puriñatakejj kunjamsa yatjjatsna?

¹⁵ ¿Kunjamsa jakañ vidar valoranit uñjatas uñachtʼayaraksna? Wila jan uchayasiñatak  documento jan ukajj tarjeta sum phoqantasinwa uñachtʼaysna, uksti jiwasamp chiktʼatapuniw apnaqasiñasaraki. b Wila jan uchayasiñatak kunanaksa amttan, kunjam qollatäñsa muntan ukanak qhanañchañatakiw uka documentojj yanaptʼasi. ¿Juman uka documentomajj actualizatäjjeti? Uka tarjetamatï jan phoqantatäkchi jan ukajj jan actualizatäkchi ukhajja, jankʼakiw uk lurañama. Qollayasiñ toqet kunanaktï amtktan uk qhan qellqtʼañäni ukhajja, janiw doctorasar ukanak qhanañchtʼasin tiempo apaqaskañäniti, jupanakasti jankʼakirakiw qollistani. Uka documentonïñäni ukhajja, jan waltʼaykistaspa uka qollanaksa janirakiw uchapkistaniti. c

16. Jumatï wila jan uchayasiñatak documento jan phoqantañ yatksta ukhajj ¿kunsa lurasma?

¹⁶ Wayn tawaqöskstansa jan ukajj suma kʼumaräskstansa, taqeniw mä akatjamat accidentassna jan ukajj usuntsna (Ecl. 9:11). Ukhamajj wila jan uchayasiñatak documentonïñajj wali wakiskiripuniwa. Jumatï uka documento jan phoqantañ yatksta ukhajj ¿kunsa lurasma? Congregacionamankir ancianonakaw uk  phoqantañ yatipjje, jupanakaw yanaptʼapjjeristam. Ukampis jupanakajj janiw juma lantejj mä amtar puripkaniti, kunjamsa qollayasïta uk jumaw amtañama (Gál. 6:4, 5). Ancianonakajja, kunjam qollayasiñanakas utji uk amuytʼañwa yanaptʼapjjätam, kunjam qollayasiñtï amtkäta uk qellqtʼañamatakis yanaptʼapjjarakïtamwa.

17. ¿Qollayasiñ toqet kunjamsa amuytʼasirïtas uñachtʼaysna?

¹⁷ Kunanaktï qollayasiñ toqet amtktan ukanakat jilapartejja, Biblian yatichat concienciasarjamaw amttanjja (Hech. 24:16; 1 Tim. 3:9). Ukatwa mä amtar purktan ukhasa, mayninakamp uka toqet parlktan ukhas kuntï Filipenses 4:5 textojj siski ukarjam amtañasa, ukan akham siwa: “Jumanakan amuytʼasirïpjjatam taqeni yatipjjpan” sasa. ¿Kunjamsa amuytʼasirïtas uñachtʼaysna? Janiw kʼumaräñ toqet sinti llakisiñasäkiti, janirakiw mayninakarojj jiwasjam amuyapjjañapatak chʼamañchañasäkiti. Jilat kullakanakajj janis jiwasjam amtapkchinejja, jupanakarojj munastanwa, respetaraktanwa (Rom. 14:10-12).

18. ¿Kunjamsa mä regaljam katoqtan uka jakañ vidat yuspäratas uñachtʼaysna?

¹⁸ Kunjamtï qalltan yatjjataniwayktanjja, Jehová Diosaw jakañ vida churirejja. Mä regaljam churkistu uka jakañ vidar cuidasa, jupar serviñatak chʼamachasisaw yuspäratas uñachtʼaysna (Apoc. 4:11). Jichhürunakanjja, taqeniw usunttanjja jan walinakans uñjasiraktanjja, ukampis Jehová Diosajj janiw ukham jakañas munkänti. Ukatwa jupajj wiñay jakañ churistani, niyaw mä suma oraqen jakasjjañäni, janirakiw tʼaqesiñas ni jiwañas utj-jjaniti (Apoc. 21:4). Uka urun puriniñapkamajja, jakañ vidar wali valoranit uñjapjjañäni, jakañ vida churkistu uka munasiri Jehová Dios Awkisar serviñatak chʼamachasipjjañäni.