1. ¿Kunatsa Jehová Diosajj taqe kunas nayankiwa saspa? (Aka paginankir foto uñjjattʼäta).

TAQE kunasa Jehová Diosankiwa. “Alajjpachasa, alajjpachan alajjpachapasa, ukhamaraki akapachan oraqenakasa, taqe kunatï ukan utjki ukanakasa” Jupankiwa (Deut. 10:14; Apoc. 4:11). Niyakejjay taqenis Diosan luratästanjja, Jupankapjjtanwa (Sal. 100:3). Aka walja maranakanjja, Jehová Diosajj walja jaqenakaruw Jupar servipjjañapatak ajllïna.

2. Bibliarjamajja ¿khitinakas Diosan ajllitäpjje?

² Amuytʼañataki, Salmo 135 qellqatanjja, Diosat jan jitheqtir israelitanakarojj Diosajj ‘markapäñapatakiw ajllisïna’ sasaw qhanañchi (Sal. 135:4). Oseas libronjja, jan israelitäpki ukanakat yaqhepajj Jehová Diosan markaparuw tukupjjani sasaw qhanañchasïna (Os. 2:23). Uka profeciajja, Jehová Diosajj jan judiöpkäna uka jaqenakamppachar Cristomp chika apnaqanipjjañapatak ajllkäna ukhaw phoqasïna (Hech. 10:45; Rom. 9:23-26). Uka ajllitanakarojj ‘santo markankirinaka’ sasinwa uñtʼasi, jupanakaw ‘Diosan ajllit markapäpjje’. Jupanakarojj Jehová Diosaw alajjpachan jakapjjañapatak espíritu santompi ajlliwayi (1 Ped. 2:9, 10). Diosar jichha tiempon jan jitheqtas servisipki uka jila parte cristianonakajja, aka oraqen jakasiñwa  suyasipki. Jupanakarojj Jehová Diosajj ‘markapjama’, ‘ajllitanakaparjamaw’ uñtʼasi (Is. 65:22).

3. 1) ¿Khitinakas Jehová Diosar serviñataki ajllitäpjje? 2) ¿Kunsa aka yatichäwin yatjjataskañäni?

³ Jichhürunakanjja, alajjpachar sarañataki suytʼäwinïpki uka ‘jiskʼa tamasa’, aka oraqen jakañ suyasipki uka ‘yaqha ovejanakjam’ uñtʼatäpki ukanakasa ‘mä sapa tamakïpjjewa’, mayachtʼataw Diosar servipjjaraki (Luc. 12:32; Juan 10:16). Cheqas Jehová Diosar serviñatak ajllitäñajj mä bendicionawa, ukat wal yuspärañ muntanjja. Aka yatichäwinjja, kunjamsa yuspäratas uñachtʼaysna ukwa walja toqenakat yatjjataskañäni.

4. 1) Jehová Diosajj markapankañatak jiwasar ajllitapatjja, ¿kunjamsa Jupar yuspärsna? 2) ¿Kunjamsa Jesusajj niya jiwasjam lurarakïna?

⁴ Jehová Diosarojja, jakäwis taqe chuyma Jupar katuyasisaw yuspäratas uñachtʼaysna. Bautisasisajja, cheqapuni Jehová Diosankataswa taqenir uñachtʼaytanjja, Jupar istʼañ amtataswa uñachtʼayaraktanjja (Heb. 12:9). Jesusajj bautisasïna ukhajja, niya ukhamarakwa luräna, Jehová Diosarojj akham sänwa: “Dios Tatitojjay, munañam lurañaw kusisiyitu” sasa (Sal. 40:7, 8). Jesusajj naskäna ukhatpachas Diosar katuyat markapankchïnjja, jupa pachpaw Diosan munañap lurañatak katuyasïna.

5, 6. 1) Jesusajj bautisasïna ukhajj ¿kunjamakis Jehová Diosajj jikjjatasïna? 2) Jakäwis Diosar katuyastan ukhajja, ¿kunjamakis Diosajj jikjjatasi? Uk mä uñachtʼäwimpi qhanañchtʼma.

⁵ Jesusan ukham luratapatjja, ¿kunjamakis Jehová Diosajj jikjjatasïna? Biblian akham siwa: “Jesusajj bautisatäjjasinjja ukspachaw umat mistjjäna. Ukatjja alajjpachaw jistʼartäna, Juanan uñjkatarakiw Diosan espiritupajj Jesusjjar jutäna, mä palomar uñtata. Ukatsti mä aruw alajjpachat istʼasirakïna, akham siri: ‘Jupajj Wawajawa, wali munatawa, nayajj wal jupat kusista’ sasa” (Mat. 3:16, 17). Jesusajj Jehová Diosankjjänwa, ukhamäkchïnsa Dios saparuki taqe chuyma serviñwa amtäna, ukajj walpun Diosar kusisiyäna. Jehová Diosajj jakäwis Jupar katuyastan ukhajja, ukhamarakiw wal kusisi, ukham luratasat bendisistaniwa (Sal. 149:4).

⁶ Jehová Diosajj jakäwis Jupar katuyasitasat kunja kusisitasa uk amuytʼañatakejja, wali suma panqaranak yapuchir mä awkit parltʼañäni. Mä urojja, jiskʼa imill wawapaw uka panqaranakat mä panqar apsunisajj jupar churi. Taqe uka panqaranakajj awkinkkchisa, wawapajj jupar munasitap laykuw ukham luri, ukajj walpun awkipar kusisiyi. Jupatakejj uka panqaraw mayninakat sipan jukʼamp sumajja. Jakäwis Jehová Dios saparuki katuyastan ukhajja, niya ukhamarakwa Diosajj wal kusisi (Éx. 34:14).

7. Diosajj kunjamsa servirinakapar uñji uk amuytʼañatakejja, ¿kunjamsa Malaquías librojj yanaptʼistu?

⁷ (Malaquías 3:16 liytʼañataki). Khitinakatï jakäwip Jehová Diosar janïrar katuyasipki ni bautisasipkisa ukanakajja, kunatsa ukanak lurapjjañapajj wakiskiri uk amuytʼañapawa. Cheqas taqeniw taykasan purakapankkayätan ukhatpach Jehová Diosankjjtanjja. Ukhamäkchisa ak amuytʼañasawa, Jehová Diosar Reyisarjam uñjtan ukhasa, Jupar jakäwis katuyasisin munañap lurañ amttan ukhasa, Diosajj wal kusisi (Prov. 23:15). Ukhamarusa Jehová Diosajj taqe chuyma Jupar servipki ukanakarojj uñtʼiwa, sutinakapsa ‘mä libroruw qellqaraki’.

8, 9. Jehová Diosajj ‘libropan’ qellqantatäki uka servirinakapan ¿kun lurapjjañapsa muni?

⁸ Jehová Diosan ‘libropan’ sutis qellqatäñap  munstan ukhajja, ¿kunanaksa lurañasa? Malaquías profetajj ‘Diosaruw ajjsarañasa, ukhamaraki Diosatsa janipuniw armasiñasäkiti’ sasaw säna. Jehová Diosaru adorañat sipansa yaqharu jan ukajj mä kunaru adorjjsna ukhajja, Jupajj ‘jakañ libro’ sasin uñtʼatäki ukat sutis apsjjaniwa (Éx. 32:33; Apoc. 3:5).

⁹ Jakäwis Diosar katuyasiñajja, janiw Diosan munañap lurä sañakïkiti ni bautisasiñakïkisa. Ukanakjja, jakäwisan may kutikiw lurtanjja, ukampis Jehová Dios toqet saytʼasitassa Jupan serviripätassa luratanakasampiw sapüru uñachtʼayañasa, mä arunjja, kunapachkamay jakchiñäni ukhakamaw Diosar istʼañasa (1 Ped. 4:1, 2).

10. ¿Kunansa Jehová Diosan servirinakapampi Jupar jan servirinakampejj mayjäpjjañapa?

¹⁰ Pasïr yatichäwinjja, Caín, Salomón uka chachanakata ukat israelitanakan sarnaqäwipatwa yatjjatawaytanjja. Jupanakajj Jehová Diosaruw adorapjjta sapkchïnsa, janiw Dios saparuki adorapkänti. Jehová Diosankirinakajj taqe chuymaw kunatï cheqapäki ukar arjjatañasa, kunatï jan walïki uksa uñisiñasawa, ukwa uka sarnaqäwinakajj yatichistu (Rom. 12:9). Malaquías profetajj Jehová Diosan ‘libropat’ parlkäna uka qhepatjja, Jehová Diosajj akham sänwa: “Jumanakajj amuyasipjjäta[wa] kunatejj askïki, ukhamaraki kunatejj jan askïki uksa, ukhamaraki khititejj Diosaru yupaychki, jan yupaychki ukanaksa” sasa (Mal. 3:18).

11. ¿Kunatsa mayninakajj Jehová Diosar servitas qhan amuyapjjañapa?

¹¹ Maysa toqetjja, Jehová Diosar serviñan nayrar sartatasajj ‘taqenin qhana amuykayäñapawa’, ukhamatwa Diosar yuspäratas uñachtʼayaraksna (1 Tim. 4:15; Mat. 5:16). Ukatakejj sapa mayniw akham jisktʼasiñasa: ‘¿Mayninakajj Jehová Diosar jan jitheqtas servitaj qhanti amuyapjje? ¿Jehová Diosan Testigopätaj mayninakar yatiyañatak chʼamachastti?’ sasa. Jehová Diosajj markapäñasatakiw ajllisiwayistu, jiwasatï mayninakar uk yatiyañ pächassna ukhajja, Diosajj wal llakisispa (Sal. 119:46; Marcos 8:38 liytʼañataki).

12, 13. ¿Kunatsa yaqhep Testigonakajj Jehová Diosan serviripati janicha ukajj jan amuyañjamäki?

 ¹² Jehová Diosan yaqhep Testigonakapajja, ‘akapachan espiritupwa katoqapjje’ mä arunjja, akapachankir jaqenakjamaw amuyapjje, ukatwa Diosar serviriti janicha ukajj jan qhan amuyasjjeti, ukajj wali llakkañawa (1 Cor. 2:12). Akapachankir jaqenakjam sarnaqerinakajja, jupanakan munañapakwa thaqapjje (Efes. 2:3). Amuytʼañataki, uka toqet walja kutis ewjjtʼanak katoqstanjja, yaqhep Testigonakajj janiw Jehová Diosan servirinakapjam isisipkiti. Jan ukasti wali tʼeqe isinakampi jan ukajj yaqha ukham jan wali isinakampiw uchasipjje, tantachäwinakarus ukham isiniw sarapjje. Yaqhepanakasti, Diosar jan servir jaqenakjamaw ñikʼutsa khuchurayasipjje, jan ukajj peinasipjje (1 Tim. 2:9, 10). Ukhamïpansti jaqenak taypinjja, Jehová Diosan Testigopati jan ukajj ‘akapachan amigopacha’ ukajj janiw qhan amuyasjjeti (Sant. 4:4).

¹³ ¿Kunjamsa yaqhep Testigonakajj akapachankir jaqenakjam sarnaqapjjaraki? Kusistʼañanak utji ukhajja, Diosar jan servir jaqenakjamaw thoqopjje jan walinaksa lurapjje. Ukatjja, jupanakjamarakiw redes sociales sasin uñtʼatäki ukarus jan wali fotonakap apkatapjje, jan wali arunaksa qellqapjjaraki. Inas jachʼa juchar purtʼasirinakarjam jan cheqañchaskchiti, ukampis sum sarnaqañatak chʼamachasipki ukanakatakejj janiw yateqaskayäpkiti (1 Pedro 2:11, 12 liytʼañataki).

14. ¿Kunsa Jehová Diosan amigopäskakiñatakejj lurañasa?

¹⁴ Akapachajja, ‘jañchin munañanakaparjama, nayran munañanakaparjama, kunanakatï maynin utjki ukanakat jachʼañchasiñanakan’ sarnaqañasatakiw wal chʼamañchistu (1 Juan 2:16). Ukampis jiwasajj Jehová Diosanktanwa, ukatwa Jupajj ‘jan wali sarnaqañanak apanukuñasa akapachan utjki uka jan wali munañanak apanukuñas’ mayistu. Ukatjja ‘suma amuyumpi jakañasataki, cheqapar sarnaqañasataki, akapachankir jaqenak taypin Dios chuymäñasatakiw’ mayirakistu (Tito 2:12). Arsutasasa, manqʼastan ukasa, umktan ukasa, isisitasasa, kʼachachtʼasitasasa, trabajitasas Jehová Dios saparuki servitaswa qhan uñachtʼayañapa (1 Corintios 10:31, 32 liytʼañataki).

15. ¿Kunatsa jilat kullakanakarojj munasiñampi uñjañasa?

¹⁵ Jehová Diosajj jupar serviñatak ajllisiwaykistu ukat yuspäratasjja, jilat kullakanakar sum uñjasaw uñachtʼayaraksna. Jupanakajj Jehová Diosankapjjarakiwa. Uk janipun armkañäni ukhajja, munasiñampipuniw jupanakar uñjañäni (1 Tes. 5:15). Jesusajj arkirinakapar akham sänwa: “Jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” sasa (Juan 13:35).

16. Jehová Diosajj kunjamsa markapar uñji uk amuyañasatakejja, ¿kunas yanaptʼistaspa?

¹⁶ Jilat kullakanakar kunjamsa uñjañasa uk sum amuytʼañatakejja, Moisesan Leyiparjamajj kunjamsa templon utjkäna uka yänakar (utensilios) uñjapjjañapäna uka toqet parltʼañäni. Uka yänakajj Diosar adorañatakikiw apnaqasiñapäna. Moisesan Leyipanwa kunjamsa ukanak sum cuidapjjañapäna ukajj sum qhanañchasïna. Khitinakatï uka Leyirjam jan istʼapkäna ukanakajja jiwayatäpjjañapänwa (Núm. 1:50, 51). Niyakejjay Jehová Diosajj uka yänakarus sum uñjapjjañap maychïnjja, Jupar serviñataki ajllitäpki uka taqe chuyma servirinakaparojj jukʼamp sumwa uñji. Mä kutejja, Jehová Diosajj markapat akham sänwa: “Khititejj llamktʼi markajjarojja, ukajj nayan nayrajjaruw llamktʼaski” sasa (Zac. 2:8).

17. ¿Kunanaksa Jehová Diosajj sum uñjaski, istʼaskaraki?

¹⁷ Malaquías profetajja, ‘kuntï servirinakapajj parlapki ukanakjja sumwa Jehová Diosajj istʼi’ sasaw qhanañchäna (Mal. 3:16). Cheqas “Jehová Diosajja jupankirinakarojj uñtʼasiwa” (2 Tim. 2:19). Jupajj kuntï lurktan, kunanaktï parlktan ukjja sum uñjaski (Heb. 4:13). Jilat kullakanakar jan munasiñampi uñjktan uksa Jehová Diosajj uñjaskiwa. Maysa toqetjja, jupanakar katoqtan, yanaptʼtan, perdontan, munasiñampi uñjaraktan uksa sumwa uñjaskaraki (Heb. 13:16; 1 Ped. 4:8, 9).

18. Jehová Diosajj markapjam ajllisiwayistu ukatjja, ¿kunjamsa yuspärsna?

¹⁸ Jehová Diosajj markapjam ajllisiwayistu ukatjja, wal yuspärañ muntanjja. Jupar jakäwis taqe chuyma katuyasitasat janiw arrepentisktanti. ‘Jan cheqapar sarnaqer jan wali jaqenak taypinsa jakstanjja’, ‘jan kuna juchani qʼoma, mä qhanar uñtataw akapachan qhantsna’ (Filip. 2:15). Kunanaktï Jehová Diosajj uñiski ukanakjja, janipuniw lurañ munktanti (Sant. 4:7). Niyakejjay jilat kullakanakajj Jehová Diosankapjjchejja, jupanakarojj wal munastanjja respetaraktanwa (Rom. 12:10).

19. ¿Kunjamsa Jehová Diosajj jupankirinakaru bendisi?

¹⁹ Bibliajj akham siwa: “[Jehová Diosajj] janiw markaparojj apanukkaniti” sasa (Sal. 94:14). Uka arunakajj cheqäskapuniwa, kuna jan walinakans uñjaskchiñänejja, Jehová Diosajj janiw jaytanukkistaniti, jiwkañäni ukasa janiw jiwasat armaskaniti (Rom. 8:38, 39). “Jiwasatï jakaskstanjja, Jehová Diosatakiw jaktanjja, jiwasatï jiwstanjja, Jehová Diosatakiw jiwtanjja. Ukhamajj jakañänis jiwañänisa Jehová Diosanktanwa” (Rom. 14:8). Jupat jan jitheqtir amigonakapar jaktaykani uka uru puriniñap wal muntanjja (Mat. 22:32). Jichhürunakansa walja bendicionanakwa katoqtanjja. Kunjamtï Bibliajj siskejja, “[Jehová] Tatitut Diosanïki uka markajj kusisiñaniwa, jupatak ajllitäki uka markajj kusisiñaniwa” (Sal. 33:12).