“COSECHA apthapiñajj waljawa, trabajirinakasti jukʼanikiwa. Ukhamasti khititï cosecha apthapiyaski ukar mayipjjam, trabajirinak yapupar khitaniñapataki” (Luc. 10:2). Jesusajj 2.000 maranak nayraw uk säna, ukajj kunatï Myanmar markan munaski ukwa uñachtʼayi. Uka markanjja, 55 millón jaqenakarojj 4.200 yatiyirinakaw predikapjjañapa.

Jehová Diosaw “cosecha apthapiyaski”. Ukhamajja, Jupaw walja markanakat jilat kullakanakajj Asia cheqar sarapjjañapatak yanaptʼaski. Ukampis ¿kunas jupanakar markap jaytañatak chʼamañchi? ¿Kunsa ukatakejj lurapjje? ¿Kuna bendicionanaksa katoqapjje? Uk jichhajj uñjañäni.

Mä qhawqha maranak nayrajja, Japón markankir Kazuhiro sat precursor jilatarojj tʼuku (epilepsia) usuw churäna, desmayasitapatjja hospitalaruw apapjjäna. Doctorajj ‘pä maraw auto jan apnaqjjätati’ sänwa. Jilatatakejj janiw ukajj cheqaw sañjamäkänti, “precursoräñajj wali kusiskañawa janiw jaytañ munkti, kamachäsa” sasaw llakisïna. Ukatwa Diosar ‘yanaptʼita’ sasin taqe chuyma mayisïna.

Kazuhiro jilatajj saskakiwa: “Mä phajjsitjja, Myanmar markan servir mä amigojaw uk yatisajj jawsanitu, akham situwa: ‘Akanjja, yaqha cheqanakar sarañatakejj autojj utjapuniwa. Ukhamajj jan autonikisa, precursorat akan serviskasmawa’ sasa. Ukatwa doctorarojj ‘¿usutpachas Myanmar markar jakir sariristti?’ sasin jisktʼayäta. Jupasti, Myanmar markankir ‘pʼeqet yatjjatat (neurólogo) mä doctoraw aka markankaski, uñtʼayirismawa. Usuntasma ukhajj jupaw yanaptʼiristam’ sasaw situ. Ukajj Jehová Diosan yanaptʼapänwa” sasa.

Uka qhepatjja, Kazuhiro jilatajj Internet toqew Myanmar markankir sucursalar qellqäna, akham sasa: ‘Esposajampejj precursoratwa Myanmar markan serviñ munapjjta’ sasa. Phesqa urutjja, sucursalajj jupanakar akham sänwa: “Jutapjjam, walja precursoranakaw munasi” sasa. Kazuhiro jilatampi Mari esposapampejj pä autonakap aljasaw uka markar sarañatak permiso (visa) apsuñ qalltapjjäna, avión pasajsa alapjjarakïnwa. Jichhajja, amparamp parlapki uka congregacionanwa kusisit servisipki. Jilatajj akham siwa: “Kunanakatï pasapkitu ukajj Salmo 37:5 qellqatan siski uka arunakar jukʼamp confiyañatakiw yanaptʼawayapjjetu, ukwa amuyapjjta, ukan akham siwa: ‘Tatitun amparapar  sarnaqäwim katuyasim, jupar taqe chuymamp alkatam, jupasti yanapätamwa’ sasa”.

Asamblea especial sat mä jachʼa tantachäwiw 2014 maran Myanmar markan apasïna. Ukanjja, Testigonakajj walja markanakat jutirinakaruw katoqapjjäna. Jupanakat maynïrejj Estados Unidos markankir Monique kullakänwa, jupajj 34 maraniwa. Kullakajj akham siwa: “Uka jachʼa tantachäwit kuttʼanjjasajja, ‘kunsa jakäwijamp lurirista’ sasaw Diosar mayista. Awk taykajampis parlarakiyätwa. Jupanakatakisa nayatakisa, Myanmar markar sarañajj walikïnwa. Janïr sarkasajj Diosar walpun mayista, mä qhawqha tiempo pasañapsa suyarakiyätwa” sasa. ¿Kunatsa kullakajj ukham lurpachäna?

Jupajj akham siwa: “Jesusajja, kun lurañ amtasas qhawqha qollqes munasini ukwa nayraqat amuytʼasipjjañama sasaw discipulonakapar säna. Ukatwa akham jisktʼasiyäta: ‘¿Uka markan jakañatakejj qollqejj alcansitaniti? ¿Janit walja tiempo trabajiñajajj munaskani?’ sasa. Ukham jisktʼasisajja, jaya markar sarañataki jan añcha qollqenïtajwa amuyasiyäta” sasa. Ukhamajj ¿kunsa kullakajj uka markar sarañatak luräna? (Luc. 14:28).

Kullakajj saskakiwa: “Mä urojja, jefajajj jupamp parlañatakiw jawsitäna. Walpun sustjasiyäta, janiw akan trabaj-jjätati siskitanich sasaw sayäta. Ukampis janiw uk siskitänti, antisas suma trabajitajat qollq churañatakiw jawsitäna. Uka qollqejj manunakaj phoqañatakejj alcansänwa” sasa.

Monique kullakajj diciembre, 2014 marat aksaruw Myanmar markan serviski. ¿Kunjamakis yatiyirinakajj jukʼamp munaski uka cheqan servisajj jikjjatasi? Jupajj akham siwa: “Akar jutatajat walpun kusista. Kimsaniruw Bibliat yatichta. Jupanakat maynïrejj 67 marani warmiwa. Jupajj qhomanttʼasa, kusisitapuniw katoqtʼitu. Diosajj Jehová sutinïtap yateqasajj jachaqtʼasïnwa. ‘Jichhapuniw Diosan sutip istʼta. Nayat sullkäkstasa, kuntï jichhakam jan yatkayäta ukwa yatichista’ sasaw jupajj situ. Uk istʼasajj nayas jachaqtʼasirakiyätwa. Ukham experiencianakajja, akan kusisit serviñatakiw yanaptʼitu” sasa. Monique kullakajj jichhakiw Diosan Reinopat Yatiyirinakataki Escuelar sari.

Kuntï Anuario de los testigos de Jehová 2013 libron Myanmar markat parlkäna ukaw yaqheparojj ukar sarañatak chʼamañchtʼarakïna. Asia cheqan jakasir Li sat 30 jila marani kullakajj jornälaw sapür trabajïna. Anuario liytʼasajja, Myanmar markar sarañwa amtäna. Kullakajj akham siwa: “2014 maran asamblea especial sat jachʼa tantachäwejj Yangón markan apaskäna ukanwa mä chacha warmir uñtʼta, jupanakajj chino aru parlirinakaruw Myanmar markan yanaptʼasipkäna. Niyakejjay nayajj chino aru parlstjja, uka aru parlir gruporu yanaptʼañatakiw uka markar sarañ amtayäta. Monique kullakampejj Mandalay markan junto serviñwa amtapjjta. Jehová Diosan yanaptʼapampejja, profesoratwa mä escuelan panpachanejj chika uruki trabajipjjta. Uka jakʼanarakwa mä utsa jakañatak jikjjatapjjarakiyäta. Uka markajj wali juntʼükchisa, jan ukajj jan walinakas utjkchejja, ukan serviñajj wali kusiskañawa. Myanmar markankirinakajj kunatï jupanakan utjki ukampejj kusisitakiw jakasipjje, munasirïpjjewa, Diosan arunakapat parlatas istʼapjjarakiwa. Jehová Diosajj kunjamsa predikañ bendisiski uk uñjañajj kusiskañawa. Jupaw aka markan serviñaj munpacha” sasa.

Yatiyirinakajj jukʼamp munaski uka cheqanakan yanaptʼirinakajja, Diosar mayisiñajj qhawqsa yanaptʼi ukwa amuyapjje. Sañäni, 37 marani Jumpei  jilatampi, 35 marani Nao esposapampejj Japón markanwa amparampi parlir congregacionan yanaptʼasipkäna. ¿Kunatsa Myanmar markar jakasiñatak sarjjapjjäna? Jilatajj akham siwa: “Esposajampejj yaqha markan serviñ nayratpach munapjjapuniyätwa. Congregacionajankir mä jilatas uka markaruw yanaptʼir sarjjäna. Janis walja qollqenïpkchiyätjja, mayo, 2010 maranwa Myanmar markar sarjjapjjta. Ukankir jilat kullakanakajj wali sumwa katoqtʼapjjetu” sasa. Jumpei jilatajja, uka markan yatiyañajj kunjamasa uk akham siwa: “Jaqenakajj Diosan Arupat wal yatiñ munapjje. Amparampi parlirinakataki videonak utjki uk oqaranakar uñachtʼayapjjta ukhajja, walpun musparapjje. Akar jutapjjatajat wal kusisipjjta” sasa.

Jumpei jilatampi esposapampejj ¿kuna qollqempis jakasipjjäna? Jilatajj akham siwa: “Kimsa maranak ukankjjasajja, imat qollqejj mä jukʼakiw utj-jjapjjetäna. Janiw qhepa maran alquiler pagañatak utj-jjänti. Ukatwa Diosar mayisipjjayäta. Sucursalajj ukhapuniw precursor especialat mä qhawqha tiempo serviñatak invittʼapjjetu. Diosajj jupar confiyapjjatajatjja yanaptʼapjjetuwa, janipuniw jaytanukupkituti” sasa. Jupanakajj jichhakiw Diosan Reinopat Yatiyirinakataki Escuelar sarapjje.

Simone, 43 marani jilatajj Italia markatawa, Anna 37 marani esposapasti Nueva Zelanda markatarakiwa. Jupanakajj ukhamarakiw Myanmar markar sarjjapjje. Kunatsa sarjjapjjäna uk kullakajj akham siwa: “Anuario 2013 libron Myanmar markat parlkäna ukaw yanaptʼapjjetu” sasa. Jilatajj akham sarakiwa: “Aka markankañajj kusiskañawa. Akanjja, kunatï utjki ukampejj kusisitakiw jakasipjje, ukajj jukʼamp predikañatakiw yanaptʼitu. Yatiyirinakajj jukʼamp munaski uka cheqanakan sirvtan ukhajj kunjamsa Diosajj cuidistu uk uñjañajj wali kusiskañawa” sasa (Sal. 121:5). Kullakajj akham sarakiwa: “Janipuniw kunapachas ukham kusisitïrïkti, kunatï jakañatak munaski ukampikiw jakasipjjta, esposojampipuniw kuns lurapjjarakta; jupampejj jukʼamp mayachtʼatäpjjtwa, jukʼamp amigonakwa jikjjatapjjarakta. Jaqenakajj janiw Testigonakar yaqhachapkiti, Diosan arunakapsa istʼapjjarakiwa” sasa. ¿Kunatsa ukham sispacha?

Anna kullakajj akham siwa: “Mä urojja, universidadankir mä tawaqoruw mercadon predikta, ukatsti ‘yaqha uruw kuttʼanï’ sasaw jupar sista. Kuttʼayäta ukhajja, jupajj mä amigaparuw irpanitayna. Qhepat kuttʼayäta ukhasti, yaqhanakampiruw irpanirakïna, qhepatsti yaqhanakaruraki. Jichhajj jupanakat phesqanimpiw Bibliat yatjjatasipkta” sasa. Simone jilatajj akham sarakiwa: “Yatiyapkta uka jaqenakajj munasirïpjjewa, walja jisktʼanakanïpjjarakiwa, Bibliat yateqañsa wal munapjje. Taqe jupanakar yatichañatakejj janiw tiempos utj-jjeti” sasa.

Myanmar markar janïr sarkasajj ¿kunjamsa yaqhepajj wakichtʼasipjjäna? Japón markankir  Mizuho kullakajj akham siwa: “Sachio esposojampejja, yatiyirinakajj jukʼamp munaski uka cheqar sarañ munapjjapuniyätwa, ukampis janiw kawkir sarañsa puedipkayätti. Anuario 2013 libron mistkäna uka experiencianakaw chuymar purtʼapjjetu. Ukatwa Myanmar markan serviñ amtapjjta” sasa. Sachio jilatajj akham sarakiwa: “Uka marka uñtʼañatakejja, Yangón markan mä semana qheparañwa amtapjjta. Ukaw Myanmar markar jan pächasis sarañatak yanaptʼawayapjjetu” sasa.

Rodney jilatampi Jane esposapampejj Australia markatäpjjewa, jupanakajj mä 50 maranïpjjewa. Myanmar markanjja, Jordan, Danica wawanakapamp chikaw 2010 maratpach servisipki. Rodney jilatajj akham siwa: “Jaqenakajj Diosat walpun yateqañ munapjje, ukaw chuym chʼalljjtayapjjetu. Taqe familianakaruw yaqha markan servipjjañapatak chʼamañchtʼirista” sasa. ¿Kunatsa ukham sispacha? Jilatajj saskakiwa: “Walja bendicionanakwa akan katoqapjjta. Walja wayn tawaqonakajja, celularanïñata, autonïñata, trabajonïñata, jan ukajj yaqha ukhamanakatwa llakisipjje. Ukampis wawanakajajj machaq arunak yateqañatakiw chʼamachasipjje, ukhamat jaqenakar Bibliat sum amuytʼayañataki, tantachäwinakan arstʼañataki. Taqe ukanaksa yaqhanaksa jan tiemponiw lurapjje” sasa.

Estados Unidos markankir Oliver jilatajj 37 maraniwa. Yaqha markar sarañajj kunatsa wakisi uk jupajj akham siwa: “Markajan taqe kunanïkchiyätsa, yaqha markar sarañajj walpun yanaptʼawayitu. Yaqha markan jakañajj chʼamäkchisa, jan ajjsarirïñataki, Diosar jukʼamp confiyañatakiw yanaptʼitu. Jilat kullakanakar janis uñtʼkchiyätjja, jupanakajj nayjamarakiw Diosar servisipki, ukaw Diosan Reinopar jukʼamp askit uñjañatak yanaptʼitu” sasa. Oliver jilatampi, Anna esposapampejj chino aru parlir jaqenakarojj kusisitaw yatiyasipkaki.

Australia markankir Trazel sat kullakajj 52 maraniwa, jupajj 2004 maratwa Myanmar markan serviski. Kullakajj akham siwa: “Yatiyirinakajj jukʼamp munaski ukar sarapjjañapatakiw khitinakatï sarañ puedipki ukanakar chʼamañchtʼañ munta. Diosar serviñatak chʼamachasipki ukanakarojja, Jupajj bendisiwa. Janipuniw akham sum jakasiñ pienskayätti. Ukham jakasiñajj janipuniw utjkiti” sasa.

Parltʼaniwayktan uka jilat kullakanakan arunakapajja, jan predikatäki uka cheqanakar sarañatak chʼamañchtʼapjjeristam ukwa munapjjta, ukhamat suma chuyman jaqenakar yanaptʼañataki. Jupanakajj akham sapkistaspas ukhamawa: “¡Myanmar markar pastʼanim, yanaptʼapjjeta!” sasa.