NAYRA tiemponakan jakiri ‘jiwasjam jaqenakajj’ kamsapjjänsa ukwa Biblian liytʼsna (Sant. 5:17). Apóstol Pablojj akham sasaw mä kutejj qhan säna: “Kunatï walïki uk lurañ nayajj munkta ukhajja, kunatï jan walïki ukaw nayamp chikäski. [...] ¡Wali llakkañ jaqëtwa!” sasa (Rom. 7:21-24). Pablon arunakapajj wal chʼamañchtʼistu, jucharar jaqenakjamajja, ukhamarakiw jiwasajj jan pantjasiñatak wal chʼamachasisktanjja.

Jesusan jiwatapat kunsa amuyäna uk akham sasaw Pablojj sarakïna: ‘Diosan Yoqapaw nayarojj wal munasitu, naya laykurakiw jakäwip churäna’ sasa (Gál. 2:20). Pablojj janiw ukat pächaskänti. ¿Jiwasajj jupjamarakit amuytanjja? Awisajja, jupjam amuyañajj chʼamakïspawa.

Nayra juchanakasat sint llakisiñajja, janis kunatak walïksna, Diosajj janis munaskistaspa, juchanakassa janis perdonkistaspa ukhamwa amuyayistaspa. “¿Jesusajj cheqapunit naya layku jiwäna?” sasaw jisktʼasiraksna. Cheqansa, Jesusan jiwatapajj sapa maynitaki mä regalökaspas ukhamawa, ¿ukham uñjañasti Jesusajj munpacha? ¿Kunas ukham uñjañatak yanaptʼistaspa? Uka pä jisktʼanakar qhanañchañäni.

Jesusajj sapa maynitakiw jiwawayi, uk yatiñaswa muni. ¿Kunatsa ukham sistanjja? Kuntï Lucas 23:39-43 texton siski uk uñjañäni. Jesusan ladopan chʼakkatatäkäna uka chachajja, janiw juchanïtap imtʼkänti. Sinti jan walinak lurapkäna ukanakarukiw lawar chʼakkatasirïna, ukhamasti, kuntï uka chachajj lurkäna ukajj jan walipunïpachänwa. Ukhaman uñjasisajja, akham sasaw Jesusar ruwtʼasïna: “Reinomar mantjjäta ukhajj nayat amttʼasitätawa” sasa.

¿Jesusajj kamspachänsa? Lawan chʼakkatatäsajj walsa tʼaqesiskchïnjja, uka chachar uñkattʼasajj akham sasaw munasiñamp säna: “Cheqpachapuniw nayajj jichhürun sissma, nayamp chikaw jumajj Paraisonkäta” sasa. Inas Jesusajj akhamak sischispäna: “Jaqen Yoqapajj [...] jakañap churañatakiw juti, ukhamat waljanir juchat kutsuyañataki” sasa (Mat. 20:28). Ukampis Jesusajj uka chacha laykuw jiwarakïna, uk amuytʼañapwa munäna. Ukatwa “nayamp chikaw jumajj Paraisonkäta” sasin wali munasiñamp säna. Jesusan jiwatap laykojja, wiñayatakiw uka chachajj aka oraqen mä Paraison jakasispäna.

Uka chachajj niya jiwañampïskänwa, ukhamajj janiw Diosar serviñ puedkaspänti. Ukhamäkchïnsa, Jesusajj jupa layku jiwatapwa yatiñap munäna. Ukhamajj ¿janit Jesusajj bautisat mä cristianon uk yatiñap munkarakispa? Nayrajj jan walinaksa lurkchiyätänjja, Criston jiwatapajj sapa mayniruw yanaptʼistu, ¿kunas ukham uñjañatak yanaptʼistaspa?

Jesusajja, “predicañamawa” sasaw Pablor säna, ukaw Jesusan jupa layku jiwatap uñachtʼayäna. ¿Kunatsa ukham sistanjja? Pablojj akham sänwa: “Cristo Jesús Tatitusarojj wal nayajj yuspärta,  jupaw nayarojj chʼam churitu, juparakiw suma phoqer jaqerjam uñjasajj jupar serviñatak uttʼayitu. Nayrajj Dios contra jan wal parliri, markapar jan waltʼayañatak arknaqeri, jan respetasiri ukhamäyätwa” sasa (1 Tim. 1:12-14). Diosan arunakap yatiyañaw qhawqsa Jesusajj jupat khuyaptʼayasïna, munasïna, confiyarakïna uk amuyañatak Pablor yanaptʼäna. Jesusajj ukhamarakiw jichhürunakan “Reinot predicapjjañamawa” sasin sapa maynir sistu (Mat. 28:19, 20). Uka luräw katoqañajja, Jesusajj jiwas layku jiwatap amuyañatakiw yanaptʼarakistu.

Albert sat jilatat parltʼañäni, jupajj jichhakiw niya kimsa tunka pusini maranakat Diosan markapar kuttʼaniwayi. Jilatajj akham siwa: “Nayra juchanakajat amtasipuntwa. Ukampis yatiyir sarkta ukhajj akwa amtasta: Jesusajj kunjamtï Pablorojj mä luräwi jaytawaykänjja, ukhamarakiw nayarojj mä luräwi jaytawayitu. Uk amtañajj kusisit jakasiñatakiw yanaptʼitu, nä pachpatsa, jakäwijatsa, kunas jutïrin pasani ukatsa janiw jan wal amuyjjti” sasa (Sal. 51:3).

Allan jilatajja, janïr Diosar uñtʼkasajj wali nuwasir jaqënwa, kunayman jan walinakwa lurarakïna. Jupajj akham siwa. “Kuna jan walinaksa lurawayta ukanak amtasiskaktwa. Awisajja, ukanak amtasajj wal llakista. Jucharar jaqëktsa, suma yatiyäwinak yatiyañajatakiw Jehová Diosajj jaytitu, ukatwa Jupar wal yuspärta. Jaqenakajj sum istʼapjje ukhajja, Diosajj qhawqha munasirisa ukwa amtasta. Nayrajj kunjam jaqëkayätti ukham jaqenakar yanaptʼañatakiw Diosajj khititu” sasa.

Diosan arunakap yatiyir sarañajja, kunatï sumäki uk lurañataki ukat kunatï yanaptʼkistaspa ukanakat lupʼiñatakiw yanaptʼistu. Jesusajj qhawqsa khuyaptʼayasistu, munasistu, confiyarakistu uk amuyañatakiw yanaptʼarakistu.

Chuymasajja, akapachajj tukuskani ukhakamaw nayra juchanakasat juchañchistaspa. ¿Kunas jan aynachtʼañatak yanaptʼistani?

Jean sat jilatajja, nayrajj Testigökasin jamasat jan walinak lurkatayna ukanak amtasaw wal llakisi. Jupajj akham siwa: “Diosajj chuymasat sipansa jukʼamp jachʼätap yatiñajja, wal kusisiyitu” sasa (1 Juan 3:19, 20). Jehová Diosampi Jesusampejj juchararätas yatipjjewa, uk yatiñajj wal chuymachtʼistu. Ak amtapjjapuniñäni, Jesusajj juchanakapat arrepentisiri jaqenak laykuw jiwawayi, janiw jan pantjasiri jaqenak layku jiwawaykiti (1 Tim. 1:15).

Ukhamasti, Jesusajj sapa mayni jaqenak layku jiwatap jan armañatakejj ¿kunas yanaptʼistani? Nayraqatjja, Jesusajj kunjamsa jucharar jaqenakar uñjirïna ukwa amtañasa, ukatjja Diosan arunakap yatiyañasatak jaytawaykistu uk sum phoqañatakiw chʼamachasiñasaraki. Ukhamatwa apóstol Pabljam akham sañäni: ‘Jesusaw nayarojj wal munasitu, naya laykurakiw jakäwip churäna’ sasa.