1. Aka qhepa maranakanjja, ¿kunanakas yaqhep cheqanakan mayjtʼawayi?

NAYRA maranakanjja, jila parte jaqenakaw Diosar creyipjjäna. Ukampis aka qhepa maranakan janiw ukhamäjjeti. Sapa maratjamaw jaqenakajj Diosar jan creyjjapjjeti. Cheqas yaqhep markanakanjja, niya taqeniw iglesianakar jan sarjjapjjeti * (Mat. 24:12).

2. ¿Kunatsa jaqenakajj Diosar sapa maratjam jan creyjjapjje?

² ¿Kunatsa Diosar jan creyirinakajj sapa maratjam jiljjattpacha? * Inas yaqhepajj llakinakampi, jan ukajj kusistʼañanakampi apayasipjjchi (Luc. 8:14). Yaqhepasti, ‘Diosajj janiw utjkiti’ sasaw amuyjjapjjaraki. Yaqhepajj Diosar creyisipkiwa, ukampis mä religionar sarañajj janis wakisjjaspa, Diosar creyiñajj ciencia conträkaspasa, janis kuntï jaqenakajj amuyapki ukarjamäkaspa ukhamwa amuyapjje. Inas yatichirinakaparusa amigonakaparus “jaqejj monot jutatätanwa” siri istʼapjjchi. Jan ukajja, radiona televisionana wali uñtʼat jaqenakar ukham siri istʼapjjarakchi. Ukampis awisakiw kunatsa maynejj Diosar creyiñapa uk istʼapjje. Yaqhepajja, kunjamsa religión pʼeqtʼirinakajj munañanïña qollqenïña thaqapjje uk uñjasaw colerapjjaraki. Yaqhep cheqanakansti, gobiernonakaw Diosar serviñ jarktʼapjjaraki.

3. ¿Kuna toqetsa aka yatichäwin yatjjataskañäni?

³ Jesusajja, “taqe markankir jaqenakar nayan discipulojar tukuyapjjam” sasaw säna (Mat. 28:19). ¿Kunjamsa Diosar jan creyirinakarojj Diosar munasipjjañapatakisa Criston discipulopar tukupjjañapatakis yanaptʼsna? Ak amtañasawa: jaqenakajja, kawkinsa jilsuwayapjje ukarjamaw Diosan arunakap  istʼapjjanisa janisa. Sañäni, Europa cheqan jilsurinakajja, inas Asia cheqan jilsurinakat sipans jukʼamp istʼapjjchini. ¿Kunatsa ukham sistanjja? Europanjja, jaqenakajj Bibliatsa, Diosan taqe kun luratapatsa mä jukʼa yatipjjewa. Ukampis Asia cheqanjja, jila partejj janiw Bibliat kunsa yatipkiti, ‘Diosajj janiw utjkiti’ sasaw sapjje. Aka yatichäwinjja, kunjamsa ukham amuyuni jaqenakarojj yanaptʼsna uka toqetwa yatjjataskañäni.

4. Jaqenakajj cambiapjjaspawa sasin ¿kunatsa amuyañasa?

⁴ ‘Jaqenakajj cambiapjjaspawa’ sasin amuyañäni. Sapa maraw Diosar jan creyirinakajj Jehová Diosan Testigopjam bautisasipjje. Jupanakat waljanejja, Diosar janïr uñtʼkasajj janiw jan walinak lurapkänti, Diosaruw servipjjta siri jaqenakan jan walinak lurapjjatap uñjasas colerapjjänwa. Ukampis yaqhepajj jan walinakanwa sarnaqapjjäna, ukatwa jupanakat waljanejj jan wali luräwinak jaytapjjañapäna. Cheqas Diosan yanaptʼapampejja, wiñay jakañ katoqañatak suma chuymanïpki ukanakar jikjjatsnawa (Hech. 13:48; 1 Tim. 2:3, 4).

5. ¿Kunas yaqheparojj Diosan arunakap istʼapjjañapatak yanaptʼaspa?

⁵ Munasirïpjjañäni, amuyump parlarakiñäni. Jaqenakajja, janiw kuntï sisktan uk istʼasakejj Diosan arunakap istʼapkiti, jan ukasti, kunjamsa uka arunak sistan uk istʼasaw istʼapjjaraki. Munasiñampi, amuyumpi parltan ukhajj istʼapjjestuwa, jupanakat llakistan ukhas istʼapjjarakistuwa. Jaqenakampejj janiw munkir jan munkir istʼayasiñ munktanti, jan ukasti, kunsa religionat amuyapjje, kunatsa ukham amuyapjje uk yatiñatakiw chʼamachastanjja. Yaqhepajja, janiw jan uñtʼatanakampejj Diosat parlañ munapkiti. Yaqhepasti, “¿kunsa Diosat amuyta?” sasin maynir jisktʼañjja, jan walitwa uñjapjjaraki. Yaqhanakasti, Biblia liyiskir uñjayasiñ ajjsarapjjewa, yamas mä Testigompi liyiskir uñjayasiñ jukʼampiw ajjsarapjje. Ukhamajj janiw jaqenakarojj munkir jan munkir Biblia liyiyañ munktanti (2 Tim. 2:24).

6. ¿Kunjamsa Pablojj Diosan arunakapat yatiyirïna, ukat kunsa jupat yateqsna?

⁶ ¿Kunjamsa Bibliata, Diosata, Diosan luratanakapat jan parlañ munir jaqenakarojj yanaptʼsna? Apóstol Pablotwa yateqassna. Judionakar yatiykäna ukhajja, Qellqatanakat liytʼasaw jupanakar amuytʼayäna. Ukampis griego jaqenakar Aerópago cheqan parlkäna ukhajj janiw Qellqatanakat liytʼkänti (Hech. 17:2, 3, 22-31). ¿Kunsa ukat yateqsna? Bibliar jan creyir mä jaqemp parlkasajja, inas Biblia pachpat liytʼañajj jan wakiskchiniti. Jaqenakamp uñjkat Biblia liyiñ jan munatap amuystan ukhasti, inas celularata, jan ukajj tabletat liytʼañajj wakischini.

7. Kuntï 1 Corintios 9:20-23 texton siski ukarjamajja, ¿kunsa Pablot yateqasisajj lursna?

⁷ Jaqenakar istʼañasawa, kunjamsa jikjjatasipjje uksa amuyañasarakiwa. Jaqenakajj kunatsa jan jiwasjam amuyapki uk yatiñatakiw chʼamachasiñasa (Prov. 20:5). Apóstol Pablot parltʼaskakiñäni. Judío jaqjamajja, kunjamsa jan judío jaqenakarojj yatiyani uk sumwa amuytʼpachäna. ¿Kunatsa? Jupanakajj janiw Jehová Diosatsa ni Qellqatanakatsa yatipkänti, ukatwa Pablojj sum amuytʼañapäna. Jiwasajj ukhamarakiw kunjamsa jaqenakajj jikjjatasipjje, kunsa amuyapjje uk amuyañatak chʼamachasiñasa. Ukatakejj inas Bibliat apstʼat qellqatanakat yatjjatañasa, experienciani mä jilatar yanaptʼa mayiñas wakischini (1 Corintios 9:20-23 liytʼañataki).

8. ¿Kunjamsa Bibliat parlañ qalltsna?

⁸ Diosan arunakapjja, khitinakatï sum istʼañ munapki ukanakar jikjjatañ amtampiw yatiytanjja (Mat. 10:11). Ukatakejja, kunsa amuyapjje uk yatiñatakejj jaqenakar jisktʼañasawa,  jisktʼasajj sumwa istʼañasaraki. Inglaterra markankir mä jilatajj akham sasaw jaqenakar jisktʼi: “¿Familian sum jakasiñatakisa, wawanakar sum uywañatakisa, jan waltʼäwinakar saykatañatakis kun lurañasäspasa?” sasa. Kamsanisa uk sum istʼasinjja, jilatajj akham siwa: “¿Niya pä waranqa maranak qellqat aka ewjjtʼajj yanaptʼistaspati?” sasa. Ukatjja, Bibliat jan parlasaw suma ajlltʼat textonak celularat liytʼarapi.

9. ¿Kunjamsa Diosat jan parlañ munirinakar yanaptʼsna?

⁹ ¿Kunjamsa Diosat jan parlañ munir jaqenakarojj yanaptʼsna? Kunanakattï yatipki uka toqenakatwa jupanakamp parlsna. Sañäni, yaqheparojja kunanakatï aka oraqensa alajjpachansa utjki ukanakat parlañaw gusti. Ukhamajj inas akham sas parlañ qalltsna: “Cientificonakajja, kunanakatï aka oraqen utjki ukanakat yatjjatasaw microfononaksa camaranaksa yaqha ukhamanaksa lurapjje. Sañäni, mä micrófono lurañatakejja, jiñchojj istʼañatak kunjam luratasa uka toqetwa cientificonakajj yatjjatapjje. Mä cámara lurañatakisti, nayrajj kunjam luratasa uka toqetwa yatjjatapjjaraki. Ukhamajj ¿kamsasmasa? ¿Cientificonakajj yatjjatapki uka nayrasa jiñchusa, khitin luratäpachasa?” sasa. Jisktʼatajj kamsanisa uk sum istʼasajj akham sissnawa: “Nayra tiemponjja, poesianak qellqer mä jaqejj akham sänwa: ‘Jiñchu lurirejj ¿janit istʼkanisti? Nayranak utjayirejj ¿janit uñjkanisti?ʼ sasa. Ukjjarojja, ‘Jupaw jaqenakar yatichirejja’ sasaw taqe ukanak Luriri Diosat sarakïna. Yaqhep cientificonakajj uka qellqerjamarakiw amuyapjje” sasa (Sal. 94:9, 10, NM). Ukjjarojja, JW Library^® aplicacionan utjki uka videonakat maywa uñtaysna. (Ukatakejja, MULTIMEDIA > ENTREVISTAS Y EXPERIENCIAS > OPINIONES SOBRE EL ORIGEN DE LA VIDA siski ukaruw mantasma). Jan ukajja, ¿Es la vida obra de un Creador? sat folletsa, El origen de la vida. Cinco cuestiones dignas de análisis sat folletsa churaraksnawa.

10. ¿Kunjamsa Diosat jan parlañ munir mä jaqempejj Diosat parlañ qalltsna?

¹⁰ Niya taqeniw jutïr urunakan sum jakasiñ muntanjja. Ukampis yaqhepajja, ‘aka oraqejj qʼala tʼunjatäniwa, jan ukajj janiw jakañjamäjjaniti’ sasaw ajjsarayasipjje. Noruega markan congregacionanak tumptʼir mä jilatajj akham siwa: “Diosat jan parlañ munirinakajja, kunanakas aka oraqen pasaski uka toqet parlañ wal munapjje” sasa. Ukhamajj arunttʼasajja, uka jilatajj jaqenakar akham sañwa yati: “¿Jan walinakajj aka oraqen chhaqtjjpachäniti? ¿Khitis uka jan walinak chhaqtaypachäni? ¿Politiconakasa  cientificonakas chhaqtayapjjaspati, jan ukajj khitich chhaqtayaspa?” sasa. Jisktʼatajj kamsisa uk sum istʼasajja, Bibliajj jutïr urunakat kamsisa uka textonakwa liytʼarapi, jan ukajj aleqakiw uka textonakat ayti. Yaqhepajja, ‘oraqejj janiw tʼunjatäkaniti, suma jaqenakajj wiñayaw ukan jakapjjani’ sasin satajja, jukʼampiw yatiñ munapjje (Sal. 37:29; Ecl. 1:4).

11. 1) Jaqenakampi parlañ qalltkasajja, ¿kunatsa mä toqetak parlañajj jan walïkaspa? 2) ¿Kunsa Romanos 1:14-16 textorjamajj lurañasa?

¹¹ Jaqenakampi parlañ qalltkasajja, janiw taqenimpejj mä toqetak parlañasäkiti. ¿Kunatsa ukham sistanjja? Jaqejj mayj mayjätanwa, kuntï maynejj yatjjatañ munki ukjja, yaqhajj janiw munkaspati. Yaqhepajj Diosatsa Bibliatsa wal yatiñ munapjje, ukampis yaqhepajja, yaqha toqenakatwa nayraqatajj parlañ munapjjaspa. Ukhamajj janis jaqenakajj mä kikpäkstanjja, taqeniruw Diosan arunakapat parlañ muntanjja (Romanos 1:14-16 liytʼañataki). Ukampis ak amtañasawa, cheqa yatichäwejj cheqaparjam sarnaqañ muniri jaqenakan chuymanakapana jiltañapatakejja, Jehová Diosaw yanaptʼi (1 Cor. 3:6, 7).

12. ¿Kunsa Asia cheqankir jaqenakaru Diosar uñtʼapjjañapatak yanaptʼañatakejj lursna?

¹² Oraqpachanwa jilat kullakanakajj Asia cheqat jutir jaqenakar yatiyapjje. Jupanakat yaqhepajja, gobiernonakajj Diosar serviñ jarktʼapki uka cheqanakatwa jutapjje. Asia cheqankirinakat waljanejja, ‘¿taqe kun Luriri Diosajj utjpachati?’ sasin janipuniw mä kutis jisktʼasipjjerïkiti. Yaqhepajj ‘¿Bibliat yatjjatañ munasmati?’ sasin jisktʼatajj estudiañ qalltapjjewa. Ukampis yaqhepajja, qalltan janiw yaqha yatichäwinak yateqañ munapkiti. ¿Kunsa jupanakamp Diosat parlañatakejj lursna? Diosan arunakap yatiyañan wali experienciani jilat kullakanakajj akham sapjjewa: “Diosat janïr parlkasin yaqha toqenakat parlañasa, jupanakat llakisiñas wali wakiskiriwa. Ukat wakiskani ukhaw kunjamsa Biblian wiñay yatichäwinakapajj jiwasar yanaptʼawayistu uk jupanakar sissna” sasa.

13. ¿Kunas jaqenakarojj Bibliat yateqañ munapjjañapatak yanaptʼaspa? (Nayrïr paginankir foto uñjjattʼäta).

¹³ Yaqhepajja, Biblian suma ewjjanakapat parlatajj sumwa istʼapjje (Ecl. 7:12). Nueva York markanjja, chino mandarín aru parlir jaqenakar visitir mä kullakajj akham siwa: “Jaqenakajj kunjamsa jikjjatasipjje uk amuyañatakisa, jupanakar sum istʼañatakis wal chʼamachasta. Maynin yaqha markat purinitap yatisajja, ‘¿kunjamasktasa?’ ‘¿Trabajonëjjtati?’ ‘¿Kunjamsa jaqenakajj uñjasipktam?’ sasaw jisktʼta” sasa. Ukham jisktʼañaw kullakarojj uka jaqenakamp parltʼañatak yanaptʼi. Jupanakatï jukʼamp parlañ munasipkakchejja, kullakajj akham saskakiwa: “¿Kunas taqenirus maynit maynikam sum apasiñatak yanaptʼistaspa? ¿Biblian mä ewjjtʼap liytʼarapirismati? Uka ewjjtʼajj akham siwa: ‘Chʼajjwaña qalltañasti, umasa jilarkaspa ukhamawa; uka chʼajjwañata jitheqtañasti jukʼampi askiwa’ sasa. ¿Uka ewjjtʼajj maynit maynikam sum apasiñatak yanaptʼistaspati?” sasa (Prov. 17:14). Jaqenakamp ukham parltʼañajja, khitis mayan istʼistani uk amuyañatakiw yanaptʼistaspa.

14. Inti jalsu toqenkir markanakanjja, ¿kunsa mä jilatajj ‘janiw Diosar creykti’ siri jaqenakar yanaptʼañatakejj luri?

¹⁴ ¿‘Janiw Diosar creykti’ siri jaqenakarojj kamsaraksnasa? Ukham jaqenakar inti jalsu toqenkir markanakan predikiri mä jilatajj akham siwa: “‘Janiw Diosar creykti’ sasinjja, kawkïr diosanakarutï jaqenakajj akan adorapki uka diosanakatwa parlasipki. Ukatwa jupanakar akham sista: ‘Ukham amuyatamajj walikïskiwa, jila parte diosanakajj jaqen luratakiwa, janiw cheqa diosäpkitiʼ sasa. Ukjjarojja,  Jeremías 16:20 textwa liytʼta, ukan akham siwa: ‘¿Lurasispati mä jaqejj pachpa diosanakapa? ¡Ukhamasti uka diosanakajj janiw cheqäpkiti!’ sasa. Ukjjarusti, akham jisktʼarakta: ‘¿Mä diosajj cheqpach diosati, jan ukajj jaqenakan uñstayatakicha, uk kunjamats yatsna?’ sasa. Jupar sum istʼasajja, Isaías 41:23 textwa liytʼarapta, ukan akham siwa: ‘Kunatejj paskani uksa sapjjarakita, ukhamat nanakajj diosäpjjatam yatipjjañajataki’ sasa. Ukjjarojja, kuntï Jehová Diosajj jutïritak arsuwayki uka toqet parlir textwa liytʼarapirakta” sasa.

15. ¿Kunsa Asia cheqankir mä jilatat yateqsna?

¹⁵ Asia cheqan inti jalsu toqen jakasiri mä jilatat parltʼarakiñäni. Jaqenakan ukar wasitamp kuttʼasajj kamsisa uka toqet akham siwa: “Jaqenakarojja, Biblian ewjjanakapajj qhawqsa yanaptʼistaspa, kawkïr profecianakas phoqasjje ukanakatwa parlta, aka oraqejj kunjam luratasa uka toqetsa parlaraktwa. Ukjjarojja, kunjamsa ukanakajj wali yatiñani Diosan utjatap uñachtʼayi uk amuyapjjañapatakiw yanaptʼarakta. Diosan utjatap amuyapjje ukhajja, Bibliajj Diosat kamsisa ukwa liytʼarakta” sasa.

16. Hebreos 11:6 textorjamajja, ¿kunatsa Bibliat yateqerinakajj Diosarusa Bibliarus confiyapjjañapa, ukat kunjamsa ukatak yanaptʼsna?

¹⁶ Diosar jan creyirinakar Bibliat yatichkasajja, Diosajj utjaskapuniw sasin taqe chuyma confiyapjjañapatak yanaptʼaskakiñasawa (Hebreos 11:6 liytʼañataki). Biblian yatichäwinakapar confiyapjjañapatakis yanaptʼañasarakiwa. Ukatakejja, inas yaqhep yatichäwinak walja kuti qhanañchañajj wakischini. Bibliat sapa kuti yatichkasajja, inas ‘kunatsa Bibliajj Diosan Arupäskapuniwa’ sasin sistan uka toqet qhanañchañajj wakischini. Ukatakejja, Biblian kawkïr profecianakapas phoqasjje, ciencia toqetsa nayra tiemponakatsa kunjamsa Bibliajj cheq parli, kunjamsa Biblian ewjjanakapajj yanaptʼistu ukanakatwa jukʼamp yatjjatsna.

17. ¿Kunsa munasiñ uñachtʼayasajj jikjjatañäni?

¹⁷ Taqenir munasisajja, Criston discipulopar tukupjjañapatakiw jaqenakar yanaptʼasktanjja (1 Cor. 13:1). Diosajj wal munasistu, jiwasajj ukhamarak Jupar munassna ukwa muni, uk amuyapjjañapatakiw jaqenakarojj Bibliat yatichañasa. Sapa marajja, nayrajj Diosar jan creyipkäna ukanakat waljaniw bautisasipjje, Diosarus wal munasjjapjje. Ukhamajja, ‘janiw cambiapkaspati’ sasin janipun amuyapjjañäniti, taqeniru munasipjjañäni, taqenitarak llakisipjjañäni. Jaqenakajj parlapjjestani ukhajj sum istʼapjjañäni, kunjamsa jikjjatasipjje uks amuyapjjarakiñäni. Criston discipulopäpjjañapatakejj sarnaqatasampi yatichapjjañäni.