1, 2. 1) Jesusan arunakapajj Mateo 28:18-20 texton qellqatäki ukarjamajja, ¿kun lurañas cristiano congregacionatakejj wali wakiskiri? 2) ¿Kuna jisktʼanakarus aka yatichäwin qhanañchaskañäni?

JESUSAJJ jiwatat jaktjjäna uka qhepatjja, mä qollun tantachasipjjañapatakiw apostolonakapar mayïna. Ukan tantachasisajja, apostolonakajj wali kusisitäpjjpachänwa (Mat. 28:16). Ukanwa Jesusajj ‘phesqa patakatsa jukʼampi jilatanakar uñstpachäna’ (1 Cor. 15:6). ¿Kunatsa Jesusajj arkirinakapar tantachäna? Jupanakar akham sänwa: “Sarapjjam, taqe markankir jaqenakar nayan discipulojar tukuyapjjam” sasa (Mateo 28:18-20 liytʼañataki).

² Jesusan uka arunakap phoqerinakajja, nayrïr patak maranakan uttʼayaskäna uka congregación taypinkapjjarakïnwa. Jupanakatakejja, jaqenakar Criston discipulopar tukuyañaw wali wakiskirïna. * Jichhürunakanjja, walja congregacionanakaw oraqpachan utji. Uka congregacionanakan tantachasir cristianonakajj ukhamarakiw jaqenakar yanaptʼañatak chʼamachasipjje. Aka yatichäwinjja, aka pusi jisktʼanakaruw qhanañchaskañäni: ¿Kunatsa jaqenakar Criston discipulopar tukuyañajj wali wakiskiri? ¿Kunanaksa ukatakejj lurañasa? ¿Taqenit jaqenakarojj Criston discipulopar tukupjjañapatak yanaptʼsna? ¿Kunatsa paciencianïñasa?

3. Juan 14:6; 17:3 textorjamajja, ¿kunatsa jaqenakar Criston discipulopar tukuyañajj wali wakiskiri?

³ ¿Kunatsa jaqenakar Criston discipulopar tukuyañajj wali wakiskiri? Khitinakatï Criston discipulopäpki ukanakakiw Diosan amigopäpjjaspa. Jupanakajj sumaw jichhürunakan jakasipjjaspa, jutïrinsa wiñayaw jakapjjarakispa (Juan 14:6; 17:3 liytʼañataki). Jaqenakar Criston discipulopar tukuyañajj janis faciläkchejja, janiw sapäktanti. Apóstol Pablojj jupatsa yaqha cristianonakatsa, akham sänwa: ‘Diosamp chika trabajirïpjjtanwa’ sasa (1 Cor. 3:9). Cheqansa, Jehová Diosampi Jesusampejj wali kusiskañ luräwwa pantjasir jaqenakarojj churawayistu.

4. ¿Kunatï Iván jilatampiru Matilde esposapampir paskäna ukat kunsa yateqsna?

⁴ Jaqenakar Criston discipulopar tukuyañajj wali kusiskañäspawa. Colombia markan jakasiri Iván jilatampita Matilde esposapampit parltʼañäni. Jupanakajj Davier sat mä waynaruw predicapjjäna, uka waynajj jupanakar akham sänwa: “Cambiañ wal muntjja, ukampis janiw puedkti” sasa. Davier waynajj boxeadoränwa, drogasiri, wali machiri ukhamarakïnwa. Érika sat mä tawaqompiw jakäna. Iván jilatajj akham siwa: “Jupajj wali jayanwa jakasïna, ukaruw Bibliat yatichañatakejj sarapjjayäta. Walja horanakaw utapar puriñatakejj bicicletat wali ñeqʼerar thaknam sarapjjañajäna. Davier waynan cambionak luratap uñjasajja, Érika tawaqojj Bibliat yatjjatjjarakïnwa” sasa. Tiempompejja, Davier waynajj drogasiñsa, boxeañsa, machañsa jaytjjänwa, Érika tawaqompis casarasjjarakïnwa. Matilde kullakajj akham siwa: “Jupanakajj 2016 maran bautisasjjapjjäna ukhajja, ‘cambiañ wal muntjja, ukampis janiw puedkti’ sasin Davier waynajj sirïkäna uka arunak amtasajj jachaqtʼasipjjayätwa” sasa. Ukhamajj Criston discipulopar tukuñapatak maynir yanaptʼtan ukhajja, wal kusistanjja.

5. Jaqenakar Criston discipulopar tukupjjañapatak yanaptʼañatakejja, ¿kunsa nayraqatajj lurañasa?

⁵ Jaqenakar Criston discipulopar tukupjjañapatak yanaptʼañatakejja, nayraqatajj khitinakatï Diosar uñtʼañ munapki ukanakaruw thaqañasa (Mat. 10:11). Diosan arunakapat taqenir yatiyasajja, Jehová Diosan cheqpach Testigopätaswa uñachtʼaytanjja. Jesusan arunakap phoqasasti, cheqpach cristianötaswa uñachtʼayaraktanjja.

6. ¿Kunsa jaqenakan Diosan arunakap istʼapjjañapatakejj lurañasa?

⁶ Yaqhep jaqenakajj Bibliat yateqañ wal munapjje, ukampis yaqhepajj qalltanjja, janis munapkaspa ukhamäspawa. Ukatakejj inas yateqañ munapjjañapataki yanaptʼañajj wakischini. Diosan arunakap istʼapjjañapatakejj sumwa wakichtʼasiñasa. Ukatakejja, kuna toqets yatiñ munapjjaspa, kunjamsa parlañ qalltsna uk sum amuytʼañasawa.

7. 1) ¿Kamsasas parlañ qalltsna? 2) Jaqenakar sum istʼañasa, respeto uñachtʼayañas ¿kunatsa wali wakiskiri?

⁷ Inas akham sissna: “Jichhürunakanjja, taqeniw kunayman jan walinakan uñjastanjja, ¿ukanak askichañatakejj oraqpach apnaqeri mä gobiernojj munasispati? ¿Jumajj kamsasmasa?” sasa. Ukatjja, Daniel 2:44 textwa liytʼsna, qhanañchtʼaraksna. Jan ukajj akham saraksnawa: “May jisktʼañ munsma. ¿Kunas suma wawanakanïñatakejj yanaptʼistaspa?” sasa. Ukham jisktʼasajja, Deuteronomio 6:6, 7 textwa liytʼsna, qhanañchtʼaraksna.  Jaqenakamp kuna toqetsay parlkchiñänejja, kunjamsa Bibliat yateqañajj jupanakar yanaptʼaspa ukwa amuytʼañasa. Jupanakamp parlkasajj sumwa istʼañasa, janirakiw kun sistani ukhas “amuyatamajj janiw walïkiti” sasin sañasäkiti, mä arunjja, respetañasawa. Ukhamatwa kunjamsa jikjjatasipjje uk amuyañäni, jupanakas istʼapjjarakistaniwa.

8. ¿Kunatsa revisitanak jan qarjtas luraskakiñasa?

⁸ Maynir Bibliat yateqañ qalltañapataki yanaptʼañatakejja, inas walja kuti kuttʼañajj wakischini. Ukatakejj tiempo ukhamarak chʼamachasiñaw munasini. ¿Kunatsa ukham sistanjja? Inas kuttʼkañäni ukhajj jan utankkchiniti, jan ukajj jan tiemponïkchiniti. Maysa toqetjja, utanejj jiwasamp jan ajjsaras parlañapatakisa Bibliat estudiañ qalltañapatakis walja kuti kuttʼañaw wakisini. Ak amtañasawa, mä plantar umamp sapa kuti warjjattʼañäni ukhajja, uka plantajj jilsuspawa. Mä jaqempejj ukhamarakiwa, jiwasatï jupampejj Diosan Arupat sapa kuti parlañäni ukhajja, sapürutjamaw Jehová Diosarusa Jesusarusa munasjjaspa.

9, 10. Yatiyir taqe cristianonakaw Diosar uñtʼañ munirinakaru jikjjatañ yanaptʼtanjja sasin ¿kunatsa sistanjja?

⁹ Yatiyir taqe cristianonakaw Diosar uñtʼañ munapki ukanakar jikjjatañ yanaptʼtanjja. Uk lurañajj mä chhaqat wawar thaqañampi sasiwa. ¿Kunatsa ukham sistanjja? Mä kutinjja, kimsa marani mä wawaw chhaqatayna. Katjañatakejj niya 500 jaqenakaw yanaptʼapjjäna. Wawan niya 20 horanak chhaqatapatjja, mayniw wawarojj tonqojj yapuchaski uka cheqan jikjjatäna. Ukampis jikjjatirejj janiw jachʼañchayasiñ munkänti, jan ukasti akham sänwa: “Walja jaqenakan yanaptʼapampiw wawar jikjjatasiwayi” sasa.

 ¹⁰ Walja jaqenakaw uka wawjam chhaqat jikjjatasipjje. Jupanakajj janiw suytʼäwinïpkiti, ukampis yanaptʼatäñ wal munapjje (Efes. 2:12). Uka chhaqat jaqenakarojj 8 millón jila Testigonakaw thaqasktanjja. Inas jiwasajj Bibliat yateqañ munirinakar jan jikjjatkstanti, ukampis predikktan uka pachpa territorion predikir jilat kullakanakajj jikjjatapjjaspawa. Kunapachatï mä jilatasa, jan ukajj mä kullakas maynir jikjjati, ukat jupajj Criston discipulopar tukjjaraki ukhajja, taqeniw kusistanjja.

11. Janis jiwasajj Bibliat khitirus yatichkstanjja, ¿kunanak lurasas yaqhanakarojj Criston discipulopar tukupjjañapatak yanaptʼsna?

¹¹ Inas jichhajj Bibliat jan khitirus yatichkstanti, ukampis yaqha toqenakatwa jaqenakarojj Criston discipulopar tukupjjañapatak yanaptʼsna. Amuytʼañataki, Tantachäw Utar jutirinakarojj sumwa katoqtʼsna, yanaptʼaraksnawa. Ukham lurañajj cheqpach cristianötas amuyapjjañapatakiw yanaptʼani (Juan 13:34, 35). Maysa toqetjja, tantachäwinakan arstʼasaw yanaptʼaraksna. Jukʼa arunakampikis arstʼkchiñänejja, arstʼatasajj jan ajjsarasa, respetompi arstʼañapatakiw tantachäwir jutirirojj yanaptʼaspa. Yatiyañ jichhak qalltaski ukampis predikir sararaksnawa, ukhamatwa jaqenakar Bibliamp amuytʼayañ yateqañapatak yanaptʼsna. Ukham lurasajja, Cristot yateqasiñapatakiw yanaptʼasktanjja (Luc. 10:25-28).

12. Maynir Criston discipuloparu tukuyañatakejja, ¿taqe kun yatiñajj wakisipuniti?

¹² Maynir Criston discipuloparu tukuyañatakejja, janiw taqe kun yatiñajj wakiskapuniti. Bolivia markan jakasiri Faustina mä kullakat parltʼañäni. Jehová Diosan Testigonakapar janïr uñtʼkäna ukhajja, janiw liytʼasiñ yatkänti, ukampis jichhajj mä jukʼa yatjjewa. Kullakajj bautisatäjjewa, yaqhanakar Bibliat yatichañas wal gustaraki. Sapa semanajj phesqaniruw Bibliat yatichi. Jilaparte Biblia yateqerinakapat sipansa, Faustina kullakajj janiw sum liytʼañ yatkiti, ukampis sojjtaniruw bautisasipjjañapatak yanaptʼawayi (Luc. 10:21).

13. Cristianonakajj jan tiemponis sarnaqstanjja, ¿kuna bendicionanaksa jaqenakar Criston discipulopar tukuyasajj katoqsna?

¹³ Walja cristianonakaw kunayman wakiskir lurañanakanïsajj jan tiemponi sarnaqtanjja. Ukampis jaqenakar Bibliat yatichañatakejj tiempo apstʼasipuntanwa, uk lurañajj wal kusisiyistu. Alaska cheqankir Melanie sat kullakat parltʼañäni. Jupajj sapakiw kimsaqallqo marani imill wawapar uywäna, jornälaw trabajirakïna, cáncer usuni awkiparus yanaptʼañaparakïnwa. Kullakajja, wali jaya mä jiskʼa markanwa jakasïna, ukan jupa sapakiw Jehová Diosan Testigopäna. Niyakejjay uka  cheqajj wali thayächejja, walja kutiw Diosarojj “yatiyir mistuñataki yanaptʼita” sasin mayisirïna. Kullakajj walpun Bibliat yatichañ munäna, ukatwa ukham mayisïna. Mä urojja, Sara sat warmiruw ‘Diosajj Jehová satawa’ sasin yatichäna, uk yatisajj walpun uka warmejj kusisïna. Qhepatjja, Bibliat yatjjatañwa qalltjjäna. Melanie kullakajj akham siwa: “Viernes jaypʼunakajj wali qaritirïtwa. Ukhampachas estudio churirejj imill wawajamp sarapjjapunirïtwa. Sara warmin jisktʼanakapar qhanañchañatak yatjjatañasa, jupajj kunjamsa Diosan amigapar tuküna uk uñjañas wal kusisiyapjjetäna” sasa. Sararojja, iglesiapankir amigonakapasa familiaranakapas uñisiñwa qalltapjjäna, Jehová Diosan Testigopäñapsa janiw munapkänti, ukajj jupar wal llakisiyäna. Ukampis iglesiap jaytasinjja, Sarajj bautisasjjänwa.

14. 1) ¿Kunatsa jaqenakar Criston discipulopar tukuyañajj chawlla katuñampi sasejja? 2) ¿Kun lurañatakis 2 Timoteo 4:1, 2 textojj chʼamañchistu?

¹⁴ Inas jichhakamajj Criston discipulopäñ munir mä jaqer jan jikjjatkstanti, ukampis thaqaskakiñasawa. Ak amtañasawa, jaqenakar Criston discipulopar tukuyañajja, chawlla katuñampi sasiwa sasaw Jesusajj säna. Chawlla katurinakajj inamayakiw jan mä chawlla katusajj walja tiempo aptʼasipjjaspa. Jilapartejj aruma, jan ukajj wali alwaw chawlla katur sarapjje, awisajj wali jaya cheqanakaruw sarapjje (Luc. 5:5). Yaqhep Testigonakajj ukhamarakiw Diosar uñtʼañ munirinakarojj walja horanak pacienciamp thaqapjje, taqe cheqanwa yatiyapjjaraki. Ukham chʼamachasirinakajj  Diosar uñtʼañ munirinakar jikjjatapjjewa. Ukhamajj ¿janit kunapachantï jaqenakar jikjjatksna ukapachan yatiyañasa, kawkjantï jaqenakar jikjjatksna uka cheqan yatiyañas wakiskaspa? (2 Timoteo 4:1, 2 liytʼañataki).

15. ¿Kunatsa Bibliat yatichkasajj paciencianïñasa?

¹⁵ ¿Kunatsa jaqenakar Bibliat yatichkasajj paciencianïñasa? Maya, Bibliat yateqerinakarojj janiw Biblian yatichäwinakapaksa, ni uka yatichäwinakar munasiñaksa yatichañasäkiti, jan ukasti, Biblia qellqayiri Jehová Diosar uñtʼapjjañapataki, ukhamarak Jupar munasipjjañapatakiw yanaptʼañasa. Paya, janiw kuntï Jesusajj discipulonakapar mayki ukak yatichañasäkiti, jan ukasti, kunjamsa cheqpach cristianor tukuspa uk yatiñapatakiw yanaptʼañasaraki. Biblian wiñay yatichäwinakaparjam (principios bíblicos) sarnaqañapatakis yanaptʼañasarakiwa. Bibliat yaqhep yateqerinakajja, mä qhawqha tiemponakwa jan wali sarnaqäwinakapsa jan wali amuyunakapsa apanukupjje, ukampis yaqhepajja, walja tiempotwa apanukupjjaraki.

16. ¿Kunsa Raúl chachan experienciapat yateqsna?

¹⁶ Paciencianïñajj kunatsa wali wakiskiri ukjja, kunatï Perú markankir mä misionero jilatar paskäna ukaw uñachtʼayistu. Jupajj akham siwa: “Raúl sat mä chachajj pä libro estudiañwa tukuyjjäna. Ukampis jan walinakan uñjasiskakïnwa. Warmipampejj janipuniw waltʼayaskänti, jan wali arunakwa parlarakïna, wawanakapas janiw respetapkänti. Ukampis tantachäwinakar jutapuniriwa, ukatwa juparusa familiaparus yanaptʼañatak saraskakiyäta. Uñtʼasipkayäta ukhat kimsa maranak jilaw pasjjäna, ukhaw Biblian mayitanakap phoqasajj bautisasjjäna” sasa.

17. ¿Kunsa akjjar jutki uka yatichäwin yatjjataskañäni?

¹⁷ Jesusajj akham sänwa: “Sarapjjam, taqe markankir jaqenakar nayan discipulojar tukuyapjjam” sasa. Uka arunak phoqañatakejja, walja kutiw jiwasat sipans yaqha amuyunïpki uka jaqenakamp parltanjja. Jupanakat yaqhepajj janiw kuna religionarus sarapkiti, yaqhepajj yamas janiw Diosar creyipkiti. Akjjar jutki uka yatichäwinwa kunjamsa jupanakampejj Reinon suma yatiyäwinakapat parlañ qalltsna uk yatjjataskañäni.