CANADÁ markankiri Don jilatajja, callenakan jakiri jaqenakampi parlañatakiw chʼamachasi. Mä chachampejj kunas pasäna uka toqet jilatajj akham siwa: “Peter sat chachajja, callejonanakan jakirinakat jupaw jukʼamp qʼañüna, janipuniw ukham uñjirïkti. Wali colerasirïnwa, yaqhanakarus ajjsarayirïnwa. Janirakiw yanaptʼayasiñ munirïkänti” sasa. Ukhamäkchïna ukasa, 14 maranakaw Don jilatajj sum uñjañatak chʼamachasïna.

Peter chachajj akham sasaw Don jilatar mä urojj jisktʼäna: “¿Kunatsa nayat llakista? Janiw khitis nayat llakiskiti. ¿Kunatsa yanaptʼañ munista?” sasa. Sum amuytʼasaw Don jilatajj kimsa textonak chuymapar purtʼañatak uñachtʼayäna. Nayraqatjja, ‘¿Diosajj sutinïpachati?’ sasaw jisktʼäna, ukatsti Salmo 83:18 (NM) qellqata Bibliat liytʼayäna. Ukjjarusti, kunatsa jilatajj Peter chachat llakisïna uk uñachtʼayañatakejja, Romanos 10:13, 14 qellqat liytʼarapïna, ukan akham siwa: “Taqe khititï Jehová Diosan sutip artʼaski ukajj salvatäniwa” sasa. Ukatsti Mateo 9:36 qellqata liytʼarapirakïna, ukan siwa: “Jaqenakar uñjasajj walpun [Jesusajj] sinttʼasïna, jupanakajj jan awatirini ovejanakjam qʼala usuchnoqata, ananukuta ukhamäpjjänwa” sasa. Ukatsti Peter chachar jupa pachpa liytʼañapatakiw mayïna. Ukham lurasajja, uka chachajj jachaqtʼasisaw jilatar jisktʼäna: “¿Uka ovejanakatjamti nayat llakisirakpacha?” sasa.

Peter chachajj jareqtʼasïnwa, sunkhanakapsa khuchurtʼasïnwa, Don jilatajj regalkäna uka isi uchtʼasïna. Uka urut aksarojj qʼoma sarnaqañataki, sum isthapisiñatakiw chʼamachasïna.

Peter chachajj kunsa sapürus luräna ukwa mä cuadernor qellqtʼasirïna. Qalltan qellqkäna uka arunakajj wali llakkañänwa. Qhepatsti qellqatanakapajj janiw pachpäjjänti. Mä qellqatapan sänwa: “Jichhürojj Diosan sutip yateqta. Jichhajja, oraskasajj Jehová Diosampiw parltʼasta. Sutip yatiñajj wali sumawa.  Jehová Diosajj amigomäspawa sasaw Don jilatajj situ, kuna toqetsa mayiskchëjja, kuna horasas mayiskchëjja Diosajj nayar istʼañatak tiemponiwa” sasa.

Qellqtʼaskäna ukanakat qhepïrejja, jilanakapataki, kullakanakapatakïnwa. Ukan akham sänwa:

“Jichhajj usutakïtwa, chuymanëjjaraktwa. Qharürojj jiwatäjjä ukhasa, Don sat amigojampejj Paraison jikisipjjäjja. Janiw jumanakampëjjti, ukatwa aka carta liytʼasipkta. Imapkitäta ukantï mä chachar uñjapjjätajja, jupampi parltʼapjjam. Amp suma, aka azul libro liytʼapjjam [Bibliat yateqañatak nayrajj katoqkäna, La verdad que lleva a vida eterna librotwa parlaskäna]. * Uka librorjamajja, Paraisonwa amigojamp jikisipjjä. Uka arunakat janipuniw pächaskti. Jumanakar munasiri Peter jilama”.

Peter chachajj jiwjjäna uka qhepatjja, Ummi kullakapajj akham sänwa. “Peter jilajampejj pä mara nayrakiw parltʼapjjayäta. Walja maranakan ukhapuniw kusisitäna, lartʼasirakïnsa” sasa. Don jilatar akham sänwa: “Uka libro liytʼäwa, jilajan chuymaparutï purtʼchejja uka librojj wali sumäpachawa” sasa. Ummi warmejj ¿Kunsa Bibliax chiqpachapuni yatichi? librotwa mä kullakamp yateqjjäna.

Jaqenakarojj janipuniw uñkatasaki jan walit uñjañasäkiti, jan ukasti taqe casta jaqenakar munasiñampi, pacienciampi uñjañatakiw chʼamachasiñasa (1 Tim. 2:3, 4). Ukhamtï uñjañänejja, uñkatatajj jan wali jaqjamäpki, ukampis suma chuymanïpki ukanakaruw yanaptʼsna, ukaw Peter chachampejj pasäna. ‘Jaqen chuymapa’ uñtʼiri Jehová Diosaw jupar uñtʼañ munapki uka jaqenakarojj cheqa yatichäwinak amuyapjjañapatak yanaptʼani (1 Sam. 16:7; Juan 6:44).