UKA libronakajj suma dibujonakanïnwa, uk uñjjatasajj niyas ukanak uñjkirista ukhamänwa. Cheqas uka libronakaw jiskʼäskayäta ukhatpach Diosar uñtʼañatakejj chʼamañchawayitu.

India markan Segunda Guerra Mundialajj qalltañampïskäna ukhajja, janis jakäwejj nayatak utj-jjaspa ukhamänwa. Awk taykajas jaljtasajj divorciasipjjänwa. Jupanakar wal munasiyäta, kunatsa divorciasipjjäna uk janiw amuykayätti. Sapaki, jaytanukuta ukhamaw amuyasiyäta. Chuymachtʼatäñsa yanaptʼsa wal munayäta, sapa wawakïtaj laykojj janiw uk jikjjatkayätti.

Karachi sat markanwa mamajamp jakasipjjayäta. Mä urojj Fred Hardaker jilataw punku leqtʼanïna, jupajj doctoränwa Testigorakïnwa. Jupajj libronak familiajar churkäna uka misioneron religionapankarakïnwa. Mamitajar Bibliat yatichañ munäna ukhajja, janiw munkänti, ‘wawajaruw yatichasma’ sasaw säna. Ukatwa qhepa semanajj uka jilatampi Bibliat yatjjatañ qalltta.

 Mä qhawqha semanatjja, tantachäwinakar sarjjayätwa. Ukajj Hardaker jilatajj usutanakar qollkäna uka utanwa apasïna, mä 12 jilïr jilat kullakanakaw tantachasipjjäna. Jupanakajj nayampiw qontʼasipjjäna, wawaparjamaw uñjapjjetäna, chuymachtʼapjjarakitänwa. Suma amigonakajänwa, nayamp parlañatakis altʼasipjjerïnwa, uk amtapuntwa. Ukham uñjatäñ walpun munayäta.

Mä jukʼa tiempotjja, Hardaker jilatajj predikañatakiw invittʼitäna. Bibliat apstʼat grabat discursonak jaqenakar istʼayañatakejj gramófono apnaqañwa yatichitu. Yaqhep discursonakajj qhanwa kuns sirïna, ukatwa yaqhepajj jan istʼañ munapjjerïkiti. Ukhamäkchïnsa, Bibliat yatjjatañ wal munayäta, jaqenakarus kusisitaw yatiyirïta.

Japón markan ejercitopajj India markar katuntañatakiw wakichasiskäna, ukatwa británico autoridadanakajj Testigonakar jan waltʼayapjjäna. Julio, 1943 maranjja, nayamppacharuw ukajj jan waltʼayitäna. Escuelajankir directorajj anglicano sacerdotënwa, jupajj “jan wali jaqëtawa” sasaw escuelat jaqsutäna. Mamajarojja, ‘wawamajj Testigonakampi chikachasisajj jan waliruw masinakapar tukuyaski’ sasaw säna. Uk satajja, mamajajj wal coleräna, ukatwa Testigonakampi parlañat jarkʼitäna. Peshawar sat markaruw papitujan ukar khititäna, uka markajj jakasipkayäta ukjat 1.370 kilometronak alay toqenkänwa. Ukanjja, Bibliat apstʼat qellqatanak janiw katoqjjayätti ni tantachäwinakarus sarjjayätti, Diosat jitheqtatäkiristsa ukham amuyasiyäta.

Karachi sat markarojj 1947 maranwa trabajo thaqer kutʼta. Purisajj Hardaker doctoran qollañ utaparuw sarta, jupajj wali sum katoqtʼitu.

Qollayasiris sarkirista ukham amuyasajj ‘¿kunas ustamjja?’ sasaw jisktʼitäna.

‘Janiw usutäkti doctor, antisas Diosar serviñanwa usutäkiristsa ukhamäta. Bibliat yatjjatañwa munta’ sasaw jupar sista.

‘¿Kunapachas qalltañ munasma?’ sasaw situ.

‘Jichpachäspa ukhajj walïspawa’ sasaw sista.

Uka jaypʼojj wali sumwa Bibliat yatjjatapjjta. Diosan markapankjjasajj utarus kuttʼkirista ukhamänwa. Mamitajajj kunaymanitwa Testigonakat jitheqtayañ munitäna, ukampis Jehová Diosar serviñwa amtayäta. Ukatwa 31 de agosto, 1947 maran bautisasta, qhepatjja 17 maranëjjasajj precursor regularatwa serviñ qalltarakta.

Quetta sat markanwa precursorat serviñ qalltta, nayrajj británico soldadonakan cuartelapajj ukankänwa. 1947 maranjja, India markajj payaruw tʼaqjjtäna, maynïrejj Pakistán satänwa, maynïristi India satäskakïnwa. * Ukhamïpanjja, religionanakajj kunayman jan walinakwa utjayäna, waljaniw yaqha markanakar escapapjjäna. Mä 14 millón jaqenakaw ukham lurapjjäna. India markankir musulmananakajja, Pakistán markaruw escapapjjäna, Pakistán markankir hinduistanakampi sijes sasin uñtʼatäpki ukanakampejj India markaruraki. Ukhaw Karachi markat Quetta markar mä trenat sarta. Wali phoqätap laykojja, trena anqäjjan mä fierrot katthapisisaw sarta.

Quetta markanwa precursor especialat servir mä 20 marani George Singh jilatar uñtʼta. Jupaw mä thantha bicicleta qollo qollo cheqanak sarañatak churitäna, awisajj nuktʼatakiw sarirïta. Jila partejj sapakiw predikirïta. Mä sojjta phajjsitjja, 17 jaqenakaruw Bibliat yatichjjayäta, qhepatjja yaqhepajj Testigöjjapjjänwa. Jupanakat maynïrejj ejerciton oficialapänwa Sadiq Masih satänwa. Jupaw Bibliat apstʼat mä qhawqha qellqatanak urdu arur traduciñatak George jilatampirojj yanaptʼapjjetu, uka arwa Pakistán markan jilapartejj parlapjjäna. Tiempompejja, uka oficialajj taqe chuymaw predikjjäna.

Qhepatjja, Karachi markaruw kuttʼayäta, ukanwa Galaad Escuelat jichhak purinita Henry Finch, Harry Forrest jilatanakampi serviyäta. Jupanakajj Diosar serviñan walpun yanaptʼapjjetäna, ukat wal yuspärta. Mä kutejja, Finch jilatampiw Pakistán markat alay toqer sarapjjta. Uka jachʼa qollunak  kayunjja, urdu aru parlir humilde walja jaqenakaruw predikapjjta, jupanakajj Diosat yatiñ wal munapjjäna. Pä maratsti, Galaad Escuelaruw invitapjjetu, ukat kuttʼanisajj Pakistán markaruw sarta, ukanjja tamanak tumptʼiritwa awisajj servirïta. Misioneronakatak utajj Lahore markan utjkäna ukanwa kimsa misioneronakampi jakasiyäta.

Lahore markanjja, misioneronakajj jupanakkamaw 1954 maran jan waltʼayasipjjäna, ukatwa sarjjapjjäna. Nayas jan amuytʼasis ukar mitisitajatwa cheqañchat uñjasta. Ukhamïpanjja, Diosar janis sum sirvjjerista ukham amuyasiyäta. Ukat Karachi markaruw kuttʼayäta, uka qhepatsti, Diosar wasitat sum serviñ munasajj Londres (Inglaterra) markaruw sarjjarakiyäta.

Londres markankir congregacionanjja, walja betelitanakaw utjäna. Ukanjja, Pryce Hughes jilatajj munasiñampiw uñjitäna, jupajj sucursal pʼeqtʼirïnwa. Mä kutejja, oraqpachan yatiyasiñapatak pʼeqtʼiri Joseph Rutherford jilatajj kunjamsa jupar cheqañchatayna ukwa cuenttʼitäna. ‘Janis kuna jan walsa lurkirista ukham amuyasitajatjja, Rutherford jilatajj qhana arunakampiw toqenoqetäna’ sasa. Ukanak amtasajja, Hughes jilatajj lartʼasïnwa, ukajj musparayitänwa. ‘Qalltanjja, chuym ustʼayastwa, ukampis qhepatjja ukham cheqañchatäñajj yanaptʼitänwa, Jehová Diosaw munasiñata cheqañchaskitäna’ sasaw säna (Heb. 12:6). Uka arunakapajj chuymaruw purtʼitäna, Diosar wasitampi kusisit serviñatakis yanaptʼarakitänwa.

Uka tiemponjja, mamajajj Londres markaruw jutjjäna, ukanwa John Barr jilatampi Bibliat yatjjatäna, qhepatjja uka jilatajj Oraqpachan Jilïr Irpirinakat maynïrëjjänwa. Mamitajajj Diosar serviñan jankʼak nayrar sartasajja, 1957 maranwa bautisasjjäna. Tatajas janïr jiwkasajj Testigonakampi Bibliat yatjjatañ qalltarakitaynawa, ukwa qhepat yatiyäta.

Lene esposajampejj 1958 maranwa casarasta, jupajj Dinamarca sat markatwa Londres markar jutjjatayna. Mä maratjja, Jane wawajaw nasïna, jupajj phesqa wawanakajat jilïriwa. Fulham sat congregacionanjja, mä qhawqha luräwinak katoqta. Esposajan usutätap laykojja, jukʼamp juntʼu cheqaruw sarjjapjjañajäna, ukatwa 1967 maran Adelaida (Australia) markar sarjjapjjta.

Adelaida markankir congregacionanjja, alajjpachar sarañatak 12 ajllitanakaw utjäna. Jilïrïpkchïnsa, taqe chuymaw predikapjjäna. Ukanjja, jankʼakiw Diosar serviñan yatinoqtapjjayäta.

 Daniel wawajajj 1979 maranwa nasïna, jupajj sullkïri wawajawa. Síndrome de Down * usunïsajj walpun aynachtʼäna, jukʼa tiempokiw jakani sasaw doctoranakajj sapjjetäna. Uka toqet parlañajj jichhakamas nayatak chʼamakiwa. Mayni wawanakajat jan armtʼasis jupar sum uñjañatakejj taqe kunwa lurawayapjjta. Lloqopajj pä pʼiyanïnwa, ukatwa awisajj samanap pistʼjjeri ukhajj morador tukuri, ukhamïpansti jankʼakiw hospitalar apapjjerïta. Wali usutäkchïnsa, munasiri, chʼikhi ukhamänwa, Diosarus wal munasïna. Manqʼasiñatak familjam orasipjjerïta ukhajja, jiskʼa amparanakap apthaptʼasisaw pʼeqep altʼirïna, ukatsti taqe chuymaw “amén” sirïna. Mayisipjjerïta ukhakiw manqʼañ qalltirïna.

Danielitojj pusi maranirojja, leucemia usumpiw wal usuntäna. Esposajampejj wali qaritäjjapjjayätwa walirak llakisipjjayäta. Niyapuniw sinti llakisisajj usuntta. Ukhapuniw Neville Bromwich tamanak tumptʼir jilatajj punku leqtʼanïna. Uka arumajj jachtʼasisaw qhomanttʼapjjetäna, nanakas jachaqtʼasipjjarakiyätwa, arunakapajj wal chuymachtʼapjjetäna. Chika arum pasaw sarjjäna, uka qhepatwa Danielitojj jiwjjäna. Ukajj wali llakit jaytawayapjjetu. Ukhamäkchïnsa, wawajarojj janipuniw jiwañasa ni kunasa Diosan munasiñapat apaqkaniti, uk amtañaw aguantañatak yanaptʼapjjetu (Rom. 8:38, 39). Paraison jaktaniñap walpun suyasipkta (Juan 5:28, 29).

Pä kutis wilajj pʼeqejan phallkchïnjja, jilïr irpirit serviskaktwa. Jan walinakan uñjasitajajj mayninakat sinttʼasiñataki, khuyaptʼayañatakiw yanaptʼawayitu, yamas jan walinakan uñjasipki ukanakat sinttʼasipuntwa. Jan sum yatkasin jan juchañchañatakis chʼamachasiraktwa. Antisas akham jisktʼasta: “¿Kuna jan walintï uñjasiwayki ukajj kunjamsa amuyupsa chuymapsa mayjtʼayi? ¿Kunjamsa jupanakar yanaptʼirista? ¿Kunjamsa Diosar servisipkakiñapatakejj chʼamañchtʼirista?” sasa. Jilat kullakanakaru chʼamañchtʼañataki visittʼir sarasajj walpun kusista. Ukham lurasajja, naya pachpaw chuymachtʼasta chʼamañchtʼasirakta.

Nayajj salmonak qellqerjamaw jikjjatasta, jupajj akham sänwa: “Llakinakajjajj walipun yapjjataskän ukapachaw chuymachäwimampejj kusisiyista” sasa (Sal. 94:19). Jan waltʼäwinakajj familiajan utjäna ukhasa, Diosar serviñ jarkʼapkitäna ukhasa, pantjasitajat aynachtʼatäkäyäta ukhasa, wali llakitäkäyäta ukhas Jehová Diosaw mä cheqpach Awkjam yanaptʼawayitu.