“¡KAMISARAKI! ¿Kunjamasktasa?”.

Taqeniw ukham arunttʼastanjja, yaqhepajj amparatwa katthaptʼasipjje, jan ukajj qhomanttʼasipjjewa. Aruntasiñajj sapa markansa mayj mayjäkchejja, taqe cheqanwa aruntasipjje. Maynejj jan aruntaski, aruntatas jan istʼki ukhajja, janis munasirïkaspa, janis respetirïkaspa ukhamwa mayninakar amuyayaspa.

Ukampis yaqhepajja, mayninakar ajjsarasa, jan ukajj janis khitis yäqkaspa ukham amuyasisaw jan aruntapkiti. Yaqhepasti, yaqha kasta jañchinïtapata, yaqha costumbrenïtap layku, jan ukajj jan jupjamätapatwa jan aruntasipkiti. Ukampis aleq aruntañakisa, mayninakar yanaptʼaspawa.

Akham jisktʼasiñasawa: ‘¿Kunjamsa arunttʼañajj mayninakar yanaptʼaspa? ¿Kunsa Bibliajj arunttʼasiñat yatichi?’ sasa.

“Diosajj janiw khitirus yaqhachkiti” (Hech. 10:34). Apóstol Pedrojj ukham sasaw jan judiokäna uka Cornelio chachar cristiano congregacionaru katoqasajj säna. Qhepatjja, “[Diosajj] taqenin arrepentisipjjañapwa muni” sasaw qellqarakïna (2 Ped. 3:9). Uka textojj Bibliat yateqañ qalltirinakatwa parlpacha sasin inas qalltan amuysna, ukampis Pedrojj cristianonakar akham sänwa: “Taqe kasta jaqenakar respetapjjam, taqpach creyente masinakamar munasipjjam” sasa (1 Ped. 2:17). Ukhamajj yaqha kasta jañchinirusa, yaqha costumbrenirusa, jan ukajj yaqha markankirirus aruntañasawa. Ukhamatwa taqenir munasitassa respetatassa uñachtʼayañäni.

Apóstol Pablojj cristianonakar akham sänwa: “Kunjamtï Cristojj katoqapktamjja, ukhamarak jumanakajj maynit maynikam katoqtʼasipjjam” sasa (Rom. 15:7). Ukham sasinjja, khitinakatï jupar wal chʼamañchtʼapkäna ukanakatwa parlaskäna. Jichhürunakanjja, Diosan markapajj uka tiempot sipansa Supayan jukʼamp jan waltʼayataw uñjasi, ukatwa jukʼamp chʼamañchtʼatäñ muntanjja (Col. 4:11; Apoc. 12:12, 17).

Aruntañajj janiw suma katoqtʼatätap amuyapjjañapatakik yaqhanakar yanaptʼkiti, jan ukasti jukʼampwa yanaptʼi ukwa Bibliajj amuytʼayistu.

Yoqapan jakäwip Marian purakapar uchatäñataki horasäjjäna ukhajja, Jehová Diosajj mä angelaruw Mariampi parlañapatak khitanïna. Angelajj akham sasaw aruntäna: “Kamisaraki, suma warmit uñjat María, Jehová Diosajj jumampïskiwa” sasa. Uka arunak istʼasajja, Mariajj wal sustjasïna. Kunatsa ukham aruntäna uk janiw amuykänti. Ukatwa angelajj jupar akham säna: “María, jan ajjsaramti, jumajj Diosan suma warmit uñjatätawa” sasa. Angelan arunakaparjamajja, Mariajj Diosan munañaparjamaw Mesiasar ususiñapäna. Uk yatisajja, Mariajj janiw sinti llakisjjänti, “¡nayajj Jehová Diosan esclavapätwa! Kuntï jumajj siskta ukajj nayan phoqaspan” sasaw säna (Luc. 1:26-38).

Uka angelajj Diosan khitapäkchïnsa, Mariampi parlasajj janiw jiskʼachatjam amuyaskänti, jan ukasti arunttʼasaw parlañ qalltäna. ¿Kunsa ukajj yatichistu? Yaqhanakarojj aruntañasapuniwa, chʼamañchtʼañasarakiwa. Mä qhawqha arunakampikis chʼamañchtʼsnawa, Diosan markapan wali valoranïpjjatapsa amtaysnawa.

Pablojj Asia Menor, Europa uka cheqanakankir congregacionanakanjja walja jilat kullakanakaruw uñtʼäna. Cartanakapanjja, waljaniruw sutipat aruntäna, ukajj Romanos capítulo 16 ukan qellqatawa.  Febe kullakat parlkasajja, ‘kullakasa’ sasaw säna. Ukat jilat kullakanakar akham sarakïnwa: “Tatitun arkiriparjamay juparojj munasiñamp katoqapjjam, kunjamtï santo jilatanakar katoqapkta ukhama. Kunanakantï jupajj yanaptʼatäñ munki ukarjam yanaptʼapjjam” sasa. Priscampiru Aquilampirus arunttʼarakïnwa, jupanakat akham sänwa: “Janiw naya sapakejja, jan ukasti yaqha markankir taqe congregacionanakas yuspärapjjarakiwa” sasa. Jichhürunakan jan añcha uñtʼatäki uka ‘Epéneto munat jilatarusa’ ‘Tatitun luräwipan wal trabajtʼasipkäna’ uka Trifena, Trifosa kullakanakarus aruntarakïnwa. Ukhamajja, Pablojj aruntapunirïnwa (Rom. 16:1-16).

Pablojj jupanakat ukham amtasitapatjja, uka jilat kullakanakajj wal kusisipjjpachäna. Pablorusa jupanakkamas jukʼampiw munasipjjpachäna. Mayni cristianonakarus Diosar confiyañatakejj jukʼampiw yanaptʼpachäna. Munasiñampi, chʼamañchtʼasiñatak arunttʼastan ukhajja, Diosan servirinakapajj jukʼamp mayachtʼatätanwa.

Puteoli puertor purisajja, Pablojj Roma markaruw saräna, ukankir cristianonakajj katoqeriw jutapjjäna. Jayatpach “jupanakar uñjasajj Diosaruw Pablojj yuspäräna, chʼamañchtʼatarakïnwa” (Hech. 28:13-15). Awisajj kusisit uñkattʼasasa, jayataki amparamp arunttʼasasa, wali llakitanakarojj chʼamañchtʼsnawa.

Nayrïr patak maranakanjja, cristianonakajj Diosar serviñan adulterio juchsa lurapkaspa ukhamänwa, mä arunjja akapachan amigoparuw tukupjjäna, ukatwa Santiagojj jupanakar cheqañchäna (Sant. 4:4). Jupajj akham sasaw cartap qellqañ qalltäna:

“Naya Santiagojj Diosana ukhamarak Jesucristo Tatitun esclavopätwa, taqe cheqankir tunka payan tribunakaruw nayajj aruntanipjjsma” sasa (Sant. 1:1). Uka arunakajj Dios nayraqatan igualakïpjjatapwa uka cristianonakar amtayäna. Ukaw ewjjtʼapar istʼañatakejj jupanakar yanaptʼpachäna. Ukhamajj aleq arunttʼañakisa, mä jan waltʼäwi askichañatakis yanaptʼaspawa.

Aruntkañäni ukhajj janis yaqhepajj yäqkistaspa ukhamsa amuychiñänejja, taqe chuymaw munasiñampi aruntañasa. Ukhamatakwa yaqhanakar yanaptʼsna (Mat. 22:39). Mä kutejja, Irlandankir mä kullakajj tantachäwejj niya qalltañampëjjäna ukhaw Tantachasiñ Utar purïna. Wali apurata mantaskäna ukhajja, mä jilataw jupar akham säna: “Kamisaki. Walik juttajja” sasa. Kullakajj jan kamsasakiw qontʼasïna.

Mä qhawqha semananakatjja, uka kullakajj jilatar akham sänwa: “Familiajan jan waltʼäwinak utjipan wali llakitäsajja, uka arumajj niyapuniw tantachäwir jan jutkti. Tantachäwin kuna toqetsa parläna uk janiw sum amtkti, ukampis arunttʼatamajj walpun chʼamañchtʼawayitu. Yuspära” sasa.

Jilatajja, kunjamsa aruntatapajj kullakar yanaptʼäna uk janiw amuykänti. Jupajj akham siwa: “Aruntatajajj kunjamsa jupar yanaptʼatayna uk sitäna ukhajja, aruntañatak chʼamachasitajat wal kusista” sasa.

Salomón reyejj akham sasaw qellqäna: “Umar tʼantʼam ucham; ukatsti mä qawqha tiempotwa jikjjatjjäta” sasa (Ecl. 11:1). Cheqas taqenir aruntañäni, yamas jilat kullakanakasar aruntañäni ukhajja, purapatwa chʼamañchtʼasiñäni. Ukhamajj taqenir aruntañ janipun armasipjjañäniti.