1. ¿Kun yatiñas Diosan servirinakapar wal kusisiyistu?

JEHOVÁ DIOSAN markapajj kunjamsa jiltaski uk yatiñajj walpun kusisiyistu. Cheqas ukaw Diosan servirinakapan mä qhanjam qhantaskatap uñachtʼayi. Pasïr maranjja, 10 millonats jila jaqenakaruw Diosan arunakapat yatichasiwayi. Jesusan jiwatap amtañatakisti, waranq waranqa jaqenakaw tantachasipjjarakïna. Jupanakajja, kunjamsa Diosajj Yoqaparu khitanisajj juchampita jiwañampit kutsuyasin munasiñap uñachtʼayistu ukwa yateqapjjäna (1 Juan 4:9).

2, 3. 1) ¿Kunas mä qhanjam qhantañatak jan jarkʼkistu? 2) ¿Kuna toqetsa aka yatichäwin yatjjataskañäni?

² Diosan markapanjja, kunayman aru parlirinakaw utji, ukampis mayachtʼataw Alajjpachankir Awkisar jachʼañchtanjja (Apoc. 7:9). Kuna arsa parlkstan, jan ukajj kawkinsa jakaskstanjja, “mä qhanar uñtataw akapachan qhants[na]” (Filip. 2:15).

³ Diosan markapan jiljjattatapasa, mayachtʼata jupar servitasasa, kuna tiemponsa jakasktan uk amuyasis taqe chuyma serviskatasas Jehová Diosaruw jachʼañchi. Aka yatichäwinjja, kunjamsa uka  kimsa toqenakan qhantsna ukwa yatjjataskañäni (Mateo 5:14-16 liytʼañataki).

4, 5. 1) Predikasajj mä qhanjamas qhantkstanjja, ¿kun lurasas qhantaraksna? 2) Munasirïñäni ukhajj ¿kunjamsa yaqhanakar yanaptʼañäni? (Página 21 ukankir foto uñjjattʼäta).

⁴ Inglés arut 1 de junio, 1925 maran mistkäna uka Yatiyañataki revistanjja, “qhanaw chʼamakan qhanti” sat pʼeqeñchäwini mä yatichäwiw qellqasïna. Ukan akham sänwa: “Aka qhepa urunakanjja, maynejj janitï qhanap qhantʼaykani ukhajja, [...] janiw Tatitutakejj suma phoqeri, cheqapa ukhamäkaspati” sasa. Uka arunakarjamajja, Reino toqet yatiyasa yaqhanakar Bibliat yatichasaw mä qhanjam qhanttanjja (Mat. 28:19, 20). Cristianjam sarnaqatasas Jehová Diosar jachʼañchasiñapatakiw yanaptʼaspa. Diosan arunakap yatiyasktan ukhajja, jaqenakajj kunsa lurasktan uk uñjasipkistuwa. Jupanakar kusisit uñkattʼañasa munasiñampi arunttʼañas jiwasat sum amuyapjjañapatakiw yanaptʼaspa, Jehová Diosatsa ukhamarakiw amuyapjjaspa.

⁵ Jesusajj discipulonakapar akham sänwa: “Utar mantasinsti utankirinakar aruntapjjam” sasa (Mat. 10:12). Diosan arunakap yatiyapkäna uka cheqanakanjja, jaqenakajj utanakapar katoqtʼapjjapunirïnwa, ukampis jakasktan uka cheqan inas jan ukhamäkchiti. Walja jaqenakajja, jan uñtʼatanakar punku jistʼarañ ajjsarayasipjjewa, yaqhepasti colerasipjjewa. Ukampis jiwasatï munasiñampi, respetompi arunttʼañäni ukhajja, inas jan ukhamäjjapjjchiniti. Yamas kusisit uñkattʼsna ukhajja, jan ajjsartʼasaw jiwasamp parlapjjaspa. Walja jaqenakajj utjki uka cheqanakan carritompi yatiyktan ukhas ukhamarakiw yatiyañasa. Ukham yatiyirinakajj akham sapjjewa: ‘Kusisit aruntʼtan ukhajj walja jaqenakaw sum istʼapjje. Yaqhepajj yamas jakʼachasisinjja, Bibliat apstʼat qellqatanaksa apasipjjewa, nanakampis parltʼapjjarakiwa’ sasa.

6. ¿Kunsa mä chacha warmejj mä qhanjam qhantañatakejj lurapjje?

⁶ Inglaterra markankir chuymankipstat mä chacha warmejja, usutäpjjatap laykojj janiw utat uta yatiyirjamäpkiti. Ukampis mä qhanjam qhantañatakiw chʼamachasipjje, ukatwa utap nayraqatan yatiyapjje. Jupanakajja, awk taykanakajj wawanakapar escuelat irptir jutapki ukhaw Bibliat apstʼat qellqatanak mä mesar uchapjje. Jaqenakajj uk uñjasajja, Kunsa wayn tawaqunakax yatiñ munapxi sat librojj mayïri jan ukajj payïri utjki ukanakwa apasipjje, yaqhep folletonaksa apasipjjarakiwa. Mä precursora kullakas uka jilat kullakamp chikaw yatiyarakïna. Uka kullakan wali munasiñampi yatiyatapata, jilat kullakan wali chʼamachasitap laykojja, uka awk taykanakat mä chachaw Bibliat yatjjatañ qallti.

7. ¿Kunjamsa markapat escapanipki ukanakar yanaptʼsna?

⁷ Aka qhepa maranakanjja, jan walinak utjipanwa waljanejj markapat yaqha markanakar escapapjje. Jehová Diosar uñtʼapjjañapatakisa Diosajj kuna amtanisa uk yatipjjañapatakis ¿kunjamsa yanaptʼsna? Nayraqatajja, parlapki uka arut arunttʼañwa yateqsna. Ukatakejja, JW Language sat aplicacionampiw yanaptʼayassna, jan ukajj kunanakattï yatiñ munapkaspa ukanakwa arupat yateqsna. Ukhamat Internetan jw.org cheqan utjki uka videonaka, Bibliat apstʼat qellqatanak pachpa arupat uñachtʼaysna (Deut. 10:19).

8, 9. 1) ¿Kuna yanaptʼsa Cristianjam Jakañataki ukat Yatiyañataki tantachäwin katoqtanjja? 2) Awk taykanakajja, ¿kunjamsa wawanakaparojj tantachäwinakan arstʼapjjañapatak yanaptʼapjjaspa?

⁸ Jehová Diosajja, Cristianjam Jakañataki ukat Yatiyañataki tantachäwi toqew jukʼamp sum yatiyañasatak yanaptʼistu. Ukan kunanaktï yateqktan uka ewjjtʼanakaw Bibliat yateqañ munapki ukanakaru jan ajjsartʼas kuttʼañatakisa, Bibliat yatichañatakis yanaptʼistu.

 ⁹ Tantachasiñ Utar jutapki uka jaqenakat waljanirojja, wawanakajj tantachäwinakan arstʼapki ukaw wal musparayi. Ukhamajj awk taykanakajja, pachpa arunakapampi arstʼapjjañapatakiw wawanakapar yatichapjjañapa, ukhamatwa jupanakajj mä qhanjam qhantapjjani. Wawanakajj tantachäwin taqe chuyma arstʼapjje ukhajja, jichhak jutapki ukanakajj kuntï yateqapki ukajj cheqätapwa amuyapjje (1 Cor. 14:25).

10. ¿Kunjamsa familjam Bibliat yatjjatañajj jukʼamp mayachtʼatäñatak yanaptʼi?

¹⁰ Maysa toqetjja, congregacionana, familiana mayachtʼat sarnaqañataki chʼamachasisaw mä qhanjam qhantaraksna. Sañäni, awk taykanakajja, familjam Bibliat sapa semana yatjjatañatakiw chʼamachasipjjañapa. Ukatakejja, yaqhepajj JW Broadcasting programwa uñtapjje. Uñtañ tukuyjjasajja, kuntï yateqawayapki ukarjamajj kunjamsa sarnaqapjjaspa ukanakatwa parltʼapjjaraki. Ukampis awk taykanakajj ak amtapjjañapawa, qʼajjo wayn tawaqonakajj wawanakat sipansa yaqha yanaptʼwa munapjje. Ukhamasti, awk taykanakajj kunjamsa familian taqenir yanaptʼapjjaspa ukwa amuyapjjañapa (Sal. 148:12, 13).

11-13. ¿Kunjamsa congregacionan jukʼamp mayachtʼatäñatakisa mä qhanjam qhantapjjañapatakis yaqhanakar yanaptʼsna?

¹¹ Wayn tawaqonakasa, congregacionan jukʼamp mayachtʼatäñatakejj yanaptʼapjjarakispawa, ukhamatwa yaqhanakarojj mä qhanjam qhantapjjañapatak chʼamañchtʼapjjaspa. Jupanakajj chuymankipstat jilat kullakanakan amigopäñatakiw chʼamachasipjjaspa. Jehová Diosarojj kunjamsa serviwayapjje uka toqenakat parltʼapjjañapatakiw jupanakar mayipjjaspa. Ukham lurapjjani ukhajja, jupanakasa chuymankipstat jilat kullakanakas mä qhanjam qhantañatakiw maynit maynikam chʼamañchtʼasipjjani. Maysa toqetjja, Tantachasiñ Utar jutapki ukanakar katoqtʼañatakiw taqenis chʼamachasiraksna. Jupanakarojj kusisitaw katoqtʼsna, mä asiento jikjjatapjjañapatakiw yanaptʼsna, yaqha jilat kullakanakaruw uñtʼayaraksna, ukhamatwa jan ajjsarapkaspati.

¹² Yatiyir mistuñatak tantachäwi sarayapki uka jilatanakajja, chuymankipstat jilat kullakanakarojj mä qhanjam qhantasipkakiñapatakiw yanaptʼapjjaspa. Ukatakejja, kawkïr territoriotï jupanakatakjamäki ukwa churapjjaspa. Awisasti, mä wayna jilatampi jan ukajj tawaq kullakampiw yanaptʼayapjjarakispa, ukhamat jupanakamp chika yatiyapjjañapataki. Khitinakatï  usutäpki, jan ukajj yaqha ukham jan walinakan uñjasipki ukanakarus munasiñampiw yanaptʼapjjañaparaki. Ukham lurapjjani ukhajja, wayn tawaqonakarusa, chuymankipstatanakarusa, machaqanakarusa, taqeniruw taqe chuyma yatiyapjjañapatak yanaptʼapjjani (Lev. 19:32).

¹³ Mä kutejja, salmonak qellqerejj akham sänwa: “Uñjapjjam: ¡kunj munkayasa jilanak pur mä wawak suman jakasiñajja!” sasa (Salmo 133:1, 2 liytʼañataki). Jehová Diosar juntuki adorañajj israelitanakar walpun yanaptʼäna. Salmonak qellqerejja, mä wawak jakasiñajj ajlliñatak nayrajj apnaqapjjerïkäna uka aceitjam suma olorani, phajtayiri jan ukajj qollartʼiri ukhamawa sasaw säna. Ukhamajj ¿congregacionan jukʼamp mayachtʼatäñataki yanaptʼañatakejj janit chʼamachasksna? Ukham luraskstan ukhajj walikiwa. Ukampis jukʼamp yanaptʼañatak chʼamachasiskaksnawa (2 Cor. 6:11-13).

14. Kawkjantï jakasktan ukanjja, ¿kunsa mä qhanjam qhantañatakejj lursna?

¹⁴ Kawkjantï jakasktan ukanjja, ¿kunjamsa mä qhanjam qhantaskakiñatakejj jukʼamp chʼamachassna? Utas jakʼankirinakarutï munasiñäni ukhajja, inas jupanakajj Diosat jukʼamp yateqañ munapjjchispa. Ukatwa akham jisktʼasiñasa: “¿Utaj jakʼan jakasipki ukanakajj nayat kamsapjjesa? ¿Utajasa utaj anqäjjasa suma apthaptʼatati, qʼomarakiti? ¿Yaqhanakar yanaptʼañatak chʼamachastti?” sasa. Jilat kullakanakasamp parltʼañäni ukhajj inas jupanakar akham jisktʼsna: “Utam jakʼan jakasirinakarusa, familiaranakamarusa, trabajir masinakamarusa, yateqer masinakamarus ¿kunjamsa suma sarnaqatamajj yanaptʼawayi?” sasa. Jupanakajj chʼamañchtʼkir experiencianakwa cuenttʼapjjestaspa (Efes. 5:9).

15. Kuna tiemponsa jakasktan uka toqet amuyasiñajj ¿kunatsa wali wakiskiri?

¹⁵ Qhanasajj mä qhanjam qhanaskakiñapatakejja, kuna tiemponakansa jakasktan uk sum amuyañasawa. Jesusajj walja kutiw discipulonakapar akham säna: “Amuyasipjjapunim” sasa (Mat. 24:42; 25:13; 26:41). Jiwasatï “‘wali tʼaqesiñ tiempo’ puriniñapatakejj faltaskiwa, janjakiw uñjawaykäti” sasin amuystan ukhajja, Diosan arunakap yatiyañajj janis wali wakiskirïkaspa ukhamwa amuyjjsna (Mat. 24:21). Qhanasajj inakiw laphaqjjaspa, jan ukajj jiwjjaspawa.

16, 17. Kuna tiemponsa jakasktan uka toqet amuyasiñasatakejj ¿kunsa lurañasa?

¹⁶ Akapachajj sapürutjam jukʼamp jan walir saraskipanjja, kuna tiemponsa jakasktan uka toqet jukʼampiw amuyasiñasa. Jehová Diosajj horasaparuw jan walinak tukjani, uka toqet janipuniw pächasiñasäkiti (Mat. 24:42-44). Ukañkamajja, pacienciampiw suytʼañasa, amuyasiñasarakiwa. Sapüruw Diosan Arup liyiñasa, orasiñsa janipuniw armañasäkiti (1 Ped. 4:7). Yaqhep jilat kullakanakasajj kunjamsa Diosar walja maranak servisipki, kunjamsa mä qhanjamas qhanasipkaki ukanakatwa yateqasiñasa. Yatiyañataki abril 15, 2012 revistan páginas 18-21 ukanjja, “Paqallqo tunka maranakaw ‘mä judío jaqen isipat katuntasita’ sarnaqta” sat pʼeqeñchäwini mä experienciaw mistüna, ukwa liytʼsna.

¹⁷ Jiwasatï Jehová Diosar taqe chuyma serviñäni, jaqe masisarus yanaptʼañäni, jilat kullakanakampïñatakis tiempo apstʼasiñäni ukhajja, jukʼamp kusisitaw jakasiñäni, tiempojj ratukis paskaspa ukhamäniwa (Efes. 5:16). Pasïr patak maranakanjja, jilat kullakanakasajj waljaniruw Diosar servipjjañapatak yanaptʼapjjäna. Jichhürunakanjja, Jehová Diosan yanaptʼapampejj jukʼamp jaqenakaruw yanaptʼasktanjja. Qhanasajj mä qhanjamaw jukʼamp qhantaski, janipuniw ukhamäñap suykayätanti.

18, 19. Kuna tiemponakansa jakasktan uka toqet amuyasiñatakisa jan qarjtañatakisa, ¿kunjamsa jilïr irpirinakajj yanaptʼapjjestaspa? Uk mä experienciampi qhanañchtʼam.

¹⁸ Walja kutis pantjaskstanjja, Jehová Diosajj  jupar serviñatakejj yanaptʼaskakistuwa. Kuna tiemponakansa jakasktan uka toqet amuyasiñasatakisa jan qarjtañatakis ‘jaqenakwa mä bendicionar uñtasit churistu’ mä arunjja, jilïr irpirinakwa congregacionan churistu (Efesios 4:8, 11, 12 liytʼañataki). Ukhamajj mä jilïr irpiritï visittʼistani ukhajja, suma ewjjtʼanakap katoqasiñatak chʼamachasipjjañäni.

¹⁹ Inglaterra markanjja, mä chacha warmiw jan waltʼayasisajj pä jilïr irpirinakar jawsapjjäna. Kullakajja, chachajampejj ‘chʼulla chʼulla yapintatäkiristsa’ ukhamaw Diosar serviñan amuyasta sasaw jilïr irpirinakar säna. Jilatasti, ‘janiw suma yatichirïkti, janirakiw familjam Bibliat sapa semana yatjjatapjjañajatakis chʼamachaskti’ sasaw sarakïna. Jilïr irpirinakajj Jesusat parlasaw yanaptʼapjjäna. Jesusajj wali sumwa discipulonakapar uñjäna, kunansa yanaptʼatäñ munapjjäna uks amuyirïnwa. Jilatarojja, ‘Jesusatwa yateqasiñama’ sasaw sapjjäna, kullakarusti, ‘Jesusjam paciencianïñamawa’ sasaw ewjjtʼapjjarakïna. Familjam Bibliat pä wawanakapamp chika yatjjatañatakejj kunsa lurapjjaspa uksa sapjjarakïnwa (Efes. 5:21-29). Mä qhawqha tiempotjja, uka ewjjtʼanakarjam luratapat ‘walik ukham lurasktajja’ sasaw jilatar sapjjäna. ‘Janiw qarjtañamäkiti, familiamar sum pʼeqtʼañatakejj Diosaw espíritu santopamp yanaptʼaskätam’ sasaw sapjjarakïna. Jilïr irpirinakajja, uka familiarojj munasiñampiw yanaptʼapjjäna, jupanakat llakisipjjarakïnwa, ukhamatwa mä qhanjam qhantasipkakiñapatak yanaptʼapjjäna.

20. Jiwasatï mä qhanjam qhantañatak chʼamachasiñäni ukhajja, ¿kunanaksa jikjjatañäni?

²⁰ Salmo 128:1 qellqatajj akham siwa: “¡[Jehová] Tatitur ajjsartʼir jaqe, kusisiñanïtawa, Tatitur jaysir jaqe, kusisiñanïtawa” sasa. Aka yatichäwinjja, mä qhanjam qhantañatakejj kunanaksa lurañasa ukanakwa yateqawaytanjja. Maya, jaqenakarojj Diosar servipjjañapatakiw invittʼañasa. Paya, mayachtʼat sarnaqañatakiw chʼamachasiñasa. Kimsa, kuna tiemponakansa jakasktan uka toqetwa amuyasiñasa. Ukhamtï lurañänejja, jukʼamp kusisitaw jakasiñäni, jaqenakajj suma luratanakas uñjasajj alajjpachankir Awkisarojj jachʼañchañwa munapjjarakini (Mat. 5:16).