1. Colosenses 2:4, 8 textorjamajja, ¿kunjamsa Supayajj engañjañ munistu?

SUPAYAJJ Jehová Dios contra saytʼasiñaswa muni. Ukatakejj amuyunakas mayjtʼayañwa muni, ukhamat kunjamtï jupajj munki ukham amuyañasataki. Supayajja, kunanaktï taqenis munktan ukanakampiw engañjistu, ukhamat munañaparjam sarnaqañasataki (Colosenses 2:4, 8 liytʼañataki).

2, 3. 1) ¿Kunatsa Colosenses 2:8 texton qellqatäki uka arunakar istʼañasa? 2) ¿Kunsa aka yatichäwin yatjjataskañäni?

² ¿Cheqapunit Supayajj engañjañ munistu? Jïsa engañjañwa munistu. Colosenses 2:8 texton qellqat arunakjja, Pablojj alajjpachar sarañatak ajllit cristianonakaruw qellqäna (Col. 1:2, 5). Supayajj jupanakar engañjañwa munäna, ukhamarakiw jichhürunakan engañjañ munistu (1 Cor. 10:12). ¿Kunatsa ukham sistanjja? Supayajj aka oraqer jaqoqanitaw uñjasi, ukatwa Diosat jan jitheqtas servirinakar engañjañ muni (Apoc. 12:9, 12, 17). Janiw ukakïkiti, ‘jan wali jaqenakasa engañjir jaqenakasa jan walit jukʼampi jan waliruw sarasipki’ (2 Tim. 3:1, 13).

³ Aka yatichäwinjja, kunjamsa Supayajj ‘inamay kʼari arunakampiʼ engañjañ munistu ukwa yatjjataskañäni. Ukatakejj kimsa ‘jan wali amtanakapatwa’ yatjjatañäni (Efes. 6:11). Akjjar jutki uka yatichäwinsti, kunsa Supayamp jan engañjayasiñatakejj lursna ukwa yatjjatarakiñäni. Ukanakat janïr yatjjatkasajja, Suma Oraqer (Tierra Prometida) mantapkäna ukhajj kunjamsa Supayajj israelitanakar engañjäna, kunsa jiwasajj ukat yateqsna uk uñjañäni.

4-6. Deuteronomio 11:10-15 textorjamajja, ¿kunjamsa israelitanakajj Suma Oraqer mantasajj yapu lurjjapjjäna?

⁴ Supayajj wali sumwa israelitanakarojj yaqha diosanakar servipjjañapatak engañjäna. Israelitanakajja, manqʼa jikjjatañatakejj yapuchasipjjañapänwa, uk yatisaw Supayajj jupanakar engañjäna. Suma Oraqer mantasajja, kunjamtï uka markan yapu lurapjjerïkäna ukham yapuchañwa israelitanakajj yateqapjjañapäna. Egipto markankkasajja, Nilo sat jawir umampiw yapu lurapjjerïna. Ukampis Suma Oraqenjja, janiw mä jachʼa jawirajj utjkänti, ukatwa jupanakajj sullampi, jallupachan purkäna uka umampi yapu lurapjjañapäna (Deuteronomio 11:10-15 liytʼañataki; Is. 18:4, 5). Ukhamajja, Suma Oraqen yapuchapjjerïkäna ukham yapuchañwa yateqapjjañapäna. Ukampis sum yapuchañ yatiri israelitanakat jila partejj wasaranwa jiwarjjapjjäna, ukatwa yateqañajj jupanakatak chʼamakïna.

⁵ ‘Jakañajj janiw nayrjamäjjaniti’ sasaw Jehová Diosajj israelitanakar säna. Ukatsti, akham sarakïnwa: “Ukampis jan jumanakpacha engañasipjjamti, janiraki Diosata armasimti ni yaqha diosanakarus yupaychapjjamti ni jupanakarus altʼasipjjarakimti” sasa. Amuyatajja, uka arunakajj janiw yapuchañ toqet parlkänti (Deut. 11:16, 17). Ukhamajj ¿kunatsa Jehová Diosajj ‘yaqha diosanakar jan yupaychapjjamti’ sasin sispachäna?

⁶ Suma Oraqer mantasajja, israelitanakajj yaqha diosanakar serviri jaqenakjam yapuchañwa munapjjañapäna, Jehová Diosajj uk yatïnwa. Cananeonakajj israelitanakat sipans yapuchañ wal yatipjjäna, israelitanakas jupanakat yateqapjjarakispänwa, ukampis mä jan waliw israelitanakatak utjäna. Cananeonakajj  Baal sat diosaruw yupaychapjjäna, costumbrenakapas ukarjamarakïnwa. Uka jaqenakajja, ‘Baal diosaw alajjpach apnaqerejja, jupaw jallsa churistu’ sasaw amuyapjjäna. Ukatwa Jehová Diosajj israelitanakar uka creencianakat jarkʼaqañ munäna. Ukhampachasa, israelitanakajj walja kutiw Baal diosar yupaychapjjäna (Núm. 25:3, 5; Juec. 2:13; 1 Rey. 18:18). ¿Kunjamsa Supayajj israelitanakar engañjäna? Uk uñjañäni.

7. Israelitanakajj Suma Oraqenkjjapjjäna ukhajja, ¿Diosar confiyapjjänti janicha ukajj kunjamatsa yatisïna?

⁷ Maya, niya taqeniw jallu puriñap muntanjja, Supayajj uk sum yati, uk yatisaw israelitanakar engañjäna. Suma Oraqenjja, abril phajjsit septiembre phajjsikamajj janiw jallojj añch purkänti. Ukampis octubre phajjsinjja, jallojj wal puriñ qalltäna, ukaw yapu utjañapatakejj yanaptʼäna. Diosanakajj jallu apayanipjjañapatakejja, Israel marka jakʼan jakiri markanakajj walja costumbrenakwa lurapjjerïna. Israelitanakas ukhamarakiw Supayampi engañjatäsajj uka costumbrenak lurjjapjjäna, ‘sumaw jakasiñäni’ sasin amuyasa. Diosar jan confiyiri israelitanakajja, ‘jupanakjam lurañäni ukhakiw yapojj wal utjani’ sasaw amuyapjjäna. Ukhamatwa kunanaktï Baal diosar yupaychirinakajj lurapjjerïkäna ukanak lurjjapjjäna.

8. ¿Kunjamsa Supayajj israelitanakar engañjarakïna?

⁸ Paya, jan walinak lurañ munañajj chuymanakapan utjkäna ukampiw Supayajj israelitanakar engañjarakïna. Yaqha diosanakar servir jaqenakajja, diosanakapar yupaychañatakejj kunayman qʼañunakwa lurapjjerïna. Sañäni, templonakanjja, prostituta warminakasa chachanakas kunayman qʼañunakwa lurapjjäna. Uka jaqenakatakejja, chacha pura jan ukajj warmi pura ikthapiñasa, yaqha ukham qʼañu juchanak lurañas walikïskänwa, janiw ukanak luririnakarojj kamsapjjerïkänsa (Deut. 23:17, 18; 1 Rey. 14:24). ‘Taqe ukanakajj yapu utjañapatakiw yanaptʼani’ sasaw amuyapjjäna. Israelitanakat waljanejj uka qʼañunak lurañwa munjjapjjäna, ukatwa kʼari diosanakar yupaychjjapjjäna. Cheqansa Supayaw jupanakar engañjaskäna.

9. Oseas 2:16, 17 qellqatarjamajja, ¿kunjamsa Supayajj Jehová Diosan sutip chhaqtayäna?

⁹ Kimsa, Supayajj Jehová Diosan sutipwa chhaqtayäna. Jeremías profetajj jakkäna uka urunakan Diosajj akham sänwa: ‘Falso profetanakajj Sutij armapjjañapatakiw israelitanakar chʼamañchapjje, ukhamat Baal diosar arkapjjañapataki’ sasa (Jer. 23:27). Amuyatajja, israelitanakajj janiw Diosan sutip aytasjjapjjänti, Baal diosan sutipakwa aytasjjapjjäna. Baal sutejj “dueño” jan ukajj “diosaja” sañwa muni. Jehová Diosajj khitïnsa, Baal diosajj khitirakïnsa uk janiw israelitanakajj amuyjjapjjänti. Jehová Diosarojja, kunjamtï Baal diosar yupaychapjjerïkäna ukhamwa yupaychjjapjjäna (Oseas 2:16, 17 liytʼañataki).

10. ¿Kunjamsa Supayajj jichhürunakan jaqenakar engañjañ muni?

¹⁰ Jichhürunakanjja, Supayajj uka kikparakiw jaqenakar engañjaski. Kunanaktï taqenis jakasiñatak munktan ukampiw jaqenakar engañji. Qʼañu juchanak lurapjjañapatakiw jaqenakar chʼamañchi. Diosan sutipwa chhaqtayaraki. Supayajj kunjamsa Diosan sutip chhaqtayi uk yatjjatas qalltañäni.

11. Diosajj khitisa uk jan amuyasiñapatakejja, ¿kunanaksa Supayajj lurawayi?

¹¹ Supayajj Jehová Diosan sutipwa chhaqtayi. Jesusan apostolonakapajj jiwjjapjjäna  uka qhepatjja, cristianöpjjtwa sirinakajj kʼari yatichäwinak yatichañwa qalltapjjäna (Hech. 20:29, 30; 2 Tes. 2:3). Diosan markap contra saytʼir (apóstatas) uka jaqenakajja, cheqpach Diosan sutip chhaqtayañwa qalltapjjäna. “Jehová” suti lantejja, “Tatitu” jan ukajj yaqha ukham sutinakwa Biblian qellqapjjäna. Ukhamajja, Jehová Diosampi, Bibliajj yaqha ‘tatitunakat’ parlki ukampejj pachpakïkaspas ukhamwa amuyasjjäna (1 Cor. 8:5). Jehová Diosata ukhamaraki Jesusat parlañatakisti, “Tatitu” sasaw Biblian qellqapjjarakïna, ukatwa Diosajj khitïnsa Jesusas khitirakïnsa uk amuyañajj Biblia liytʼirinakatakejj chʼamakëjjäna (Juan 17:3). Ukhamatwa Trinidad sat kʼari yatichäwir creyiñajj qalltasïna. Diosar uñtʼañajj chʼamäkaspasa, sutipajj janis yatiskaspa ukham amuyasjjaraki. Ukampis Diosar uñtʼsnawa (Hech. 17:27).

12. 1) ¿Kunatakis falso religionajj jaqenakar chʼamañchi? 2) Romanos 1:28-31 textorjamajja, ¿kuna jan walinakas ukham lurapjjatapat uñjasi?

¹² Supayajj qʼañu juchanak lurañ munañampiw jaqenakar engañji. Nayra Israel tiemponakanjja, Supayajj falso religión toqew qʼañu juchanak lurapjjañapatakejj jaqenakar chʼamañchäna. Jichhürunakan uka pachparakiw luri. Falso religionankirinakajja, qʼañu juchanak lurañajj walikïskaspas ukham amuyayañwa munapjje, janirakiw qʼañunak luririnakarus kamsapkiti. Ukatwa ‘Diosaruw servipjjta’ sirinakat waljanejj Diosan leyinakaparjam jan sarnaqjjapjjeti. ¿Kunanakas ukham jan walinak utjatapat uñjasi? Roma markankir cristianonakar qellqkäna uka cartapanwa Apóstol Pablojj uk qhanañchäna (Romanos 1:28-31 liytʼañataki). “Kunanakatï jan walïki ukanaka” sasinjja, kunayman qʼañu juchanakatwa parlaskäna, ukanakat mayajj chacha pura jan ukajj warmi pura ikthapiñawa (Rom. 1:24-27, 32; Apoc. 2:20). Cheqas Biblian yatichäwinakaparjam sarnaqañatakejj wal chʼamachasiñasawa.

13. ¿Kunjamsa Supayajj jaqenakar engañjaraki?

¹³ Kunanaktï taqenis jakasiñatak munktan ukampiw Supayajj jaqenakar engañji. Kunanakatï jiwasatakisa familiasatakis munaski ukanak jikjjatañatakejj taqeniw kun lurañsa yatiñasa (1 Tim. 5:8). Ukatwa yateqañ utar sartanjja, ukan sum yateqañatakiw chʼamachasiraktanjja. Ukampis walja markanakanjja, janiw kunanakatï jakäwin munaski ukanakakejj  yateqañ utanakan yatichaskiti, jan ukasti, jaqenakan amuyunakapaw (filosofía) yatichasiraki. Yateqerinakarojja, Diosan utjatapat pächasipjjañapataki, Bibliar jan walit uñjapjjañapatakiw chʼamañchasi. ‘Jaqejj monot jutatätanwa sat yatichäwikiw jaqejj kunjamatsa utjtan uk sum qhanañchi’ sasaw yatichasiraki. Ukanakat amuyasiñasawa (Rom. 1:21-23). Uka yatichäwinakajj Diosan yatichäwinakap contrawa (1 Cor. 1:19-21; 3:18-20).

14. ¿Kunatakis jaqenakan amuyunakapajj chʼamañchi?

¹⁴ Jaqenakan amuyunakapajj janiw Diosan leyinakaparjam sarnaqañatakejj jaqenakar yanaptʼkiti, antisas uka contrawa. Janiw espíritu santon achuparjam sarnaqañatak chʼamañchkiti, jan ukasti, jañchin lurañanakaparjam sarnaqañatakiw chʼamañchi (Gál. 5:19-23). Jachʼa jachʼa tukupjjañapatakiw jaqenakar wiyti, ukatwa jaqenakajj jupanak pachpa munasirinakäpjje (2 Tim. 3:2-4). Ukham jaqëñajja, janiw llampʼu chuymanïñatakisa ni humilde chuymanïñatakis yanaptʼkistuti (2 Sam. 22:28). Universidadar sarir yaqhep cristianonakampejj ukaw pasi. Diosan yatichäwinakaparjam amuyañat sipansa, jaqenakan yatichäwinakaparjamaw amuyjjapjje. Ukatakejj mä kullakat parltʼañäni.

15, 16. Kunatï mä kullakar paskäna ukat ¿kunsa yateqsna?

¹⁵ Diosar 15 maranak jila precursorat servir mä kullakajj akham siwa: “Bautisatäjjayätwa, universidadar yateqer sarañajj kuna jan walinakansa maynir uñjasiyaspa uksa yatiyätwa, qellqatanakansa uk liytʼarakiyätwa. Ukampis uka ewjjanakajj janis nayatakïkaspa ukhamwa amuyayäta” sasa. ¿Kuna jan walinakansa  jan istʼasirïtapat uñjasïna? Kullakajj akham siwa: “Jan tiemponi, qarita ukhamaw estudiayäta, Diosar nayrjam mayisiñatakis janiw tiempojj utj-jjetänti, janirakiw predicañas kusisiyjjetänti, ni tantachäwinakatak sum wakichtʼasiñatakis chʼamajj utj-jjetänti. Cheqas Jehová Diosatwa jitheqtaskayäta. Ukatwa universidad jaytjjayäta” sasa.

¹⁶ ¿Kunjamsa universidadan estudiañajj kullakar mayjtʼayäna? Jupajj akham siwa: “Universidadaw jilat kullakanakan pantjasitanakap uñchʼukiñsa, jan lurirjamäpki uk lurapjjañap mayiñsa, jupanakat jitheqtañsa yatichawayitu, uka toqet parlañajj nayatak chʼamakiwa. Walja maranak qhepat uka amuyunak jaytjjayätwa. Ukampis ukajja, kunanaktï Diosajj markap toqe ewjjtʼkistu, ukanakar jan istʼasajj kuna jan walinakansa uñjassna ukwa yatichawayitu. Jehová Diosajj sumwa uñtʼitäna. Jupar istʼiriskayäta ukhajj janiw jan walinakan uñjasiriskayätti” sasa.

17. 1) ¿Kun lurañsa taqenis muntanjja? 2) ¿Kuna toqetsa akjjar jutki uka yatichäwin yatjjataskañäni?

¹⁷ Akapachankir ‘jaqenakan amuyunakapampisa inamay kʼari arunakampis’ janipun engañjayasiñäniti. Walpun Supayat amuyasipjjañäni (1 Cor. 3:18; 2 Cor. 2:11). Jehová Diosajj khitisa, kunjamsa Jupar serviñasa uk janipun armañäniti. Leyinakaparjampun sarnaqapjjañäni, ewjjanakapsa istʼapjjapuniñäni, janipun Supayamp engañjayasiñäniti. Ukampis jiwasatï akapachankir jaqenakjam amuyatas amuyasstan ukhajja, ¿kunsa lurañasa? Akjjar jutki uka yatichäwinwa, kunjamsa Bibliajj “suma saytʼayatäki” uka costumbrenakarusa amuyunakarus atipjañ yanaptʼistaspa uk yatjjataskañäni (2 Cor. 10:4, 5).