1. Wawapan janïr bautisaskipanjja, ¿kunsa awk taykanakajj sum amuytʼapjjañapa?

BAUTISASIÑ amtkäna ukhajj kunas pasäna ukwa Blossom Brandt kullakajj akham sasin amti: “Bautisasiñ munta sasajj walja phajjsinakaw awk taykajarojj sirïta. Jupanakajj sapa kutirakiw bautisasiñjjat parlapjjerïtu. Sum amuytʼasisat bautisasiñ amtaskta janicha uk yatiñwa munapjjäna. 31 de diciembre, 1934 maranwa bautisasta, uk janipuniw armaskti” sasa. Jichhürunakanjja, awk taykanakajj ukhamarakiw suma amtar puripjjañapatak wawanakapar yanaptʼañ munapjje. Jupanakatï, bautisasiñ suytʼañamawa sasin wawanakapar amanut sapjjaspajja, janiw walïkaspati. Inas wawapajj Jehová Diosar serviñ jan munjjchispati (Sant. 4:17). Wawapan janïr bautisaskipanjja, Criston arkiripäñatakejj wakichtʼatati janicha ukwa sum amuytʼapjjañapa.

2. 1) ¿Kunsa tamanak tumptʼir yaqhep jilatanakajj sapjje? 2) ¿Kuna toqetsa aka yatichäwin yatjjataskañäni?

² ‘Yaqhep qʼajjo wayn tawaqonakasa, 20 jila marani wayn  tawaqonakasa, cristian familian jilskasas janiw bautisatäpkiti’ sasaw tamanak tumptʼir yaqhep jilatanakajj sapjje. Uka wayn tawaqonakat jila partejja, tantachäwinakarusa, predikiris sarapjjewa, Jehová Diosan Testigopäpkaspas ukhamwa amuyasipjjaraki. Ukampis janiw Jehová Diosar jakäwip katuyasipkiti, ni bautisasipkisa. ¿Kunatsa ukham amtapjjpacha? Awisajj awk taykanakaw wawanakaparojj bautisasiñ suytʼayapjje. Aka yatichäwinjja, kunatsa yaqhep awk taykanakajj bautisasiñapatak wawapar jan chʼamañchapki ukwa pusi toqet yatjjataskañäni.  

3. ¿Kunas Blossom kullakan awk taykaparojj llakisiyäna?

³ Blossom Brandt kullakan awk taykapajja, ‘bautismojj kamsañsa muni, kunja wakiskirisa uk sumti wawajajj amuypacha’ sasaw llakisipjjäna. ¿Kunjamatsa awk taykanakajj wawapajj bautisasiñatak wakichtʼatati janicha uk yatipjjaspa?

4. ¿Kunjamsa Mateo 28:19, 20 textojj awk taykanakar yanaptʼi?

⁴ (Mateo 28:19, 20 liytʼañataki). Kunjamtï nayrïr yatichäwin yatjjataniwayktanjja, qhawqha maranis maynejj bautisasiñapa ukjja janiw Biblian siskiti. Ukhamäkchisa, awk taykanakaw Jesusan discipulopäñajj kamsañsa muni uk sum amuytʼapjjañapa. Mateo 28:19 texton “discipulojar tukuyapjjam” siski ukajja, maynin arkiripäñapatak amtampi yatichaña sañwa griego arun muni. Khititï Jesusan yatichäwinakap yateqki, amuytʼki, ukarjam sarnaqañatak chʼamachaski ukaw Jesusan discipulopajja. Ukhamasti, wawanakajj jiskʼäsipki ukhatpachwa bautisasiñapatakisa, Jesusan arkiripäñapatakisa cristiano awk taykanakajj yanaptʼapjjañapa. Ukampis asu wawanakajj janiw bautisasipkaspati. Bibliarjamajja, jiskʼa wawanakas Diosan arunakap yateqapjjaspawa, kunja wakiskirisa uksa amuyapjjarakispawa.   

5, 6. 1) Kuntï Bibliajj Timoteot siski ukajja, ¿kun amuyañatakis yanaptʼistu? 2) ¿Kunjamsa awk taykanakajj wawanakapar yanaptʼapjjaspa?

⁵ Timoteojja, waynatpachwa Jehová Diosar serviñ amtäna. Apóstol Pablojja, jupajj wawatpachwa sagrado qellqatanak uñtʼi sasaw säna. Tatapajj janis Jehová Diosar sirvkchïnjja, mamapampi awichapampiw Diosan Arupat yatichapjjäna. Ukatwa Timoteojj Diosar taqe chuyma confiyäna (2 Tim. 1:5; 3:14, 15). Jupajj mä 20 maranëjjäna ukhaw apóstol Pablojj tamanak tumptʼir jupamp chika sarañapatak invittʼäna (Hech. 16:1-3).

⁶ Wawanakajja sapa mayniw mayj mayjäpjje. Janirakiw taqenejj mä pachpa edadanirus amuytʼasir jaqer tukupkiti. Yaqhepajj jiskʼäsipki ukhaw amuytʼasir jaqëjjapjje, ukatwa bautisasiñ amtapjjaraki. Yaqhepasti tiempompiw bautisasiñatak wakichtʼatäsipki. Uk amuyir awk taykanakajja, janiw wawaparojj bautisasiñapatak jariyapkiti, jan ukasti chʼamachasitaparjamaw yanaptʼapjje. Awk taykanakajja, wawanakapajj kuntï Proverbios 27:11 (liytʼañataki) texton siski ukarjam lurañatak chʼamachasipki ukhajja, wal kusisipjje. Ukampis wawapan Criston arkiripäñap munapki uk janipuniw armapjjañapäkiti. Uka amtampiw akham jisktʼasipjjañapa: “¿Wawajajj Jehová Diosar jakäwip katuyasiñatakisa bautisasiñatakis Biblian yatichäwinakap sumti amuyjje?” sasa.     

7. ¿Biblian taqpach yatichäwinakapti maynejj bautisasiñatak yatiñapa? Uk qhanañchtʼma.

⁷ Awk taykanakajja, Biblian yatichäwinakap sum uñtʼapjjañapatakiw wawanakapar yatichapjje. Ukaw Jehová Diosar jakäwip katuyasipjjañapatak wawanakar yanaptʼani. Ukampis janiw Biblian yatichäwinakap taqpach sum yatipjjañapajj wakiskapuniti. Cheqas taqeniw bautisasjjtan uka qhepatsa, Bibliat jukʼampi yateqaskakiñasa (Colosenses 1:9, 10 liytʼañataki). Ukhamajja, ¿bautisasiñatakejj qhawqsa maynejj Bibliat yatiñapa?

8, 9. ¿Kunas cárcel uñjirir pasäna, kunsa jiwasajj ukat yateqsna?

⁸ Bautisasiñatakejj qhawqsa maynejj Bibliat yatiñapa uk amuytʼañatakejja, nayra patak maranakan jakiri mä familiat yatjjatañaw yanaptʼistani (Hech. 16:25-33). Apóstol Pablojj congregacionanak visittʼir payïr kuti sarkäna ukhaw Filipos markar 50 maran visittʼäna. Jupamp chika sarir Silasampirojj kʼarintasaw carcelar jistʼantapjjäna. Uka arumajja mä terremotow utjäna, ukaw carcelan punkunakapsa jistʼartayäna. Cárcel uñjirejja, presonakajj sarjjapjjpachaw sasin amuyasajj jiwayasiñwa munäna. Ukampis apóstol Pablow jan jiwayasiñapatakejj jarktʼäna. Pablompi Silasampejja, cárcel uñjirimpiru familiapampiruw Jesusat yatiyapjjäna. Jupanakajj Jesusat kuntï yateqapkäna ukanak wali valoranit uñjasajja, jankʼakiw bautisasipjjäna. ¿Kunsa ukajj yatichistu?

⁹ Cárcel uñjirejja, inas nayrajj romano soldadöchïna. Jupajj janiw sagrado Qellqatanakat yatkänti. Ukatwa cristianöñatakejj Biblian yatichäwinakap mä qhawqsa yatiñapäna. Jehová Diosajj kunsa servirinakapar mayi uksa yatiñaparakïnwa, ukhamat Jesusan yatichäwinakaparjam sarnaqañataki. Jupajj jukʼa tiemponakwa Biblian yatichäwinakap amuyjjäna, wali valoranitwa uñjarakïna, ukatwa bautisasiñ amtäna. Bautisasjjäna uka qhepatsa, Bibliat yateqaskakiñapänwa. Ukhamasti, wawamatï ‘Jehová Diosar wal munasta, jupatakjam sarnaqañ munarakta, ukatwa bautisasiñ munta’ siristam ukhajja, ¿kunsa lurasma? Congregacionankir jilïr irpirinakampi parlañamawa sasaw sapjjasma. Ukhamatwa jilïr irpirinakajj bautisasiñatak wakichtʼatati janicha uk amuyapjjani. * Bautisasjjani uka qhepatsa, kunjamtï bautisat cristianonakajj wiñayatak yateqasipkakini ukhamwa Diosan amtanakap yateqaskakini (Rom. 11:33, 34).

10, 11. 1) ¿Kunsa yaqhep awk taykanakajj amuyapjje? 2) ¿Kunas wawanakar jan walinakat jarkʼaqaspa?

¹⁰ Yaqhep awk taykanakajja, wawapajj janïr bautisaskas universidadan estudiañapa, mä suma trabajonïñapwa munapjje. Inas suma amtampi ukham amuyapjjchi, ukampis akham jisktʼasipjjañapawa: “¿Ukham estudiañajj cheqapunit wawajar yanaptʼani? ¿Bibliarjamajja uk lurañajj walikïskiti? ¿Kun lurañassa Jehová Diosajj munpacha?” sasa (Eclesiastés 12:1 liytʼañataki).

¹¹ Kunanaktï akapachankir jaqenakajj lurapki ukanakajja, janiw kunanaktï Jehová Diosajj munki, amuykaraki ukarjamäkiti (Sant. 4:7, 8; 1 Juan 2:15-17; 5:19). Mä wawarojj Jehová Diosampi sum apasiñaw  Supayatsa, akapachatsa jarkʼaqaspa, ukarakiw akapachankirinakjam jan amuyañatakis yanaptʼaspa. Awk taykatï wawaparojj universidadan estudiañapataki, mä suma trabajonïñapatak chʼamañchapjjani ukhajja, wawapajj Jehová Diosampi sum apasiñat sipansa, ukanakarukiw wali wakiskirit uñj-jjaspa. Cristiano awk taykanakajja, janiw wawapan akapachankirinakjam amuyañap munapkiti. Cheqas Jehová Diosar serviñ nayrar uchañäni ukhakiw cheqpach kusisitässna (Salmo 1:2, 3 liytʼañataki).

12. ¿Kunatsa yaqhep awk taykanakajj wawanakapar bautisasiñ suyayapjje?

¹² ‘Bautisasiñatak mä jukʼamp suytʼakim’ sasaw mä kullakajj imill wawapar säna. ¿Kunatsa ukham säna? Jupajj akham siwa: “Ak sañ phenqʼastwa, ukampis juchachasirinakar congregacionat jaqsuski ukaw ajjsarayitäna” sasa. Yaqhep awk taykanakajja, uka kullakjamarakiw wawapan bautisasiñapatakejj suma amuytʼasirëjjañapkam suyayañ munapjje, ukhamat juchar jan purtʼasiñapataki (Gén. 8:21; Prov. 22:15). ‘Wawajajj jan bautisatäkas juchar purtʼasini ukhajja, janiw congregacionat jaqsupkaniti’ sasin inas amuyapjjchi. ¿Ukham amuyañajj kunatsa jan walïki? (Sant. 1:22).

13. Maynejj jan bautisatäkchi ukhajja, ¿janit Jehová Diosar cuenta churkani? Uk qhanañchtʼma.

¹³ Awk taykanakajja, wawapan Diosar jakäwip katuyasiñapatakisa bautisasiñapatakisa, nayraqat amuytʼasirïñap suyapki ukajj walikïskiwa. Ukampis wawapajj bautisatäpas janisa, kunatï walïki, jan walïkaraki ukanak yatjje ukhatpachwa taqe luratanakapat Jehová Diosar cuenta churani (Santiago 4:17 liytʼañataki). Ukhamasti, amuytʼasir awk taykanakajj wawapar bautisasiñ suyayañat sipansa, yateqaskay sarnaqasaw wawanakapar yatichapjje. Jiskʼäsipki ukhatpachaw kunanaktï Jehová Diosajj uñiski ukanak uñisiñsa, kunanaktï munaski ukanak munasiñsa yatichapjje (Luc. 6:40). Ukaw wawanakarojj Diosan leyinakaparjam sarnaqañataki, kunatï jan walïki ukanak jan lurañatak yanaptʼani (Is. 35:8).

14. ¿Kunjamsa jilïr irpirinakajj awk taykanakar yanaptʼapjjaspa?

¹⁴ Jehová Diosar serviñajj kunja wakiskirisa ukanakat sum parlasaw jilïr irpirinakajj awk taykanakar yanaptʼapjjaspa. Mä kullakarojja, sojjta maranïkäna ukhaw Charles T. Russell jilatajj jupampi parlatayna. Kullakajj akham siwa: “Diosar serviñan kunanaksa lurirista ukwa jilatajj 15 minutonak nayampi parläna” sasa. Uka kullakajj 70 maranakat jilaw precursorat Diosar serviwayi. Ukhamajj maynir chʼamañchtʼatasasa, sum parlatasas wal yanaptʼaspa (Prov. 25:11). Jilïr irpirinakajja congregacionan utjki uka lurañanakampi yanaptʼapjjañapatakiw awk taykanakampir wawanakapampir mayipjjaspa, ukhamat wawanakajj chʼamaparjam yanaptʼapjjañapataki.

15. ¿Kunjamsa jilat kullakanakajj wayn tawaqonakar yanaptʼapjjaspa?

¹⁵ Congregacionankir jilat kullakanakasa, wayn tawaqonakar yanaptʼapjjarakispawa, ukampis amuyumpiw yanaptʼapjjañapa. Diosar serviñan nayrar sartasipkiti janicha ukwa sum amuytʼapjjaspa. Amuytʼañataki, ¿mä jiskʼa wawajj sumti tantachäwin pachpa arunakapampi arstʼawayi? ¿“Cristianjam Jakañataki ukat Yatiyañataki”  sat tantachäwin sumti discursop arstʼawayi? ¿Yantʼanakan uñjasisajj Diosar jukʼamp confiyatapti uñachtʼayi? ¿Escuelan Diosan arunakap yatiyiti? Jupanakatï ukanak lurapjjchejja, ‘walik ukham lurtajja’ sañasawa. Jupanakampejj tantachäwinak janïr qalltkipansa, jan ukajj tukuyarus parltʼañasapuniwa. Ukhamatwa jupanakajj congregacionan kusisitäpjjani (Sal. 35:18).

16, 17. 1) ¿Kunatsa wawanakan bautisasipjjañapajj wali wakiskiri? 2) ¿Kunas Diosar serviri awk taykanakarojj kusisiyaspa? (Página 8 ukankir foto uñjjattʼäta).

¹⁶ Wawanakar “kunjamtï Jehová Diosajj munki ukarjam cheqañchasa ewjjtʼasa uywa[ñajja]” Diosar serviri awk taykanakatakejj wali wakiskiriwa (Efes. 6:4; Sal. 127:3). Israelita wawanakat amtañäni, jupanakajj Diosar katuyat markanwa nasipjjäna, ukampis jichhajja, cristiano familian nasipki uka wawanakampejj janiw ukhamäkiti. Jupa pachpaw Diosar munasiñapa, kunatï cheqäki uksa yateqañaparaki. Awk taykanakajja, wawaparojj nasjje ukhatpachwa Criston arkiripäñapataki Diosar jakäwip katuyasisin bautisasiñapatakejj yanaptʼapjjañapa. Ukaw taqe kunat sipansa wali wakiskirejja. Cheqas maynejj bautisasini, Diosar taqe chuyma servini, ukhakiw wali tʼaqesiñ tiempon salvasini (Mat. 24:13).

¹⁷ Aka yatichäwinjja, Blossom Brandt kullakat parlasaw qalltayätanjja. Bautisasiñ munta sasin awk taykapar säna ukhajja, bautisasiñatak wakichtʼatäjjeti janicha uk yatiñwa munapjjäna. Sum amuytʼasisa ukham amtaskatap amuyapjjäna ukhajja, wawaparojj yanaptʼapjjänwa. Bautisasiñapatak mä uru faltkipanjja, kunsa tatapajj luratayna uk akham sasaw Blossom Brandt kullakajj qhanañchi: “Uka arumajj taqeniruw qonqortʼayapjjetäna, ukatsti akham sasaw Diosar mayïna: ‘Aka jiskʼa wawajan Jumar jakäwip katuyasitapat walpun kusista’” sasa. Ukat 60 jila maranak qhepatjja, kullakajj akham siwa: “Kunatï uka arumajj paskäna ukjja, janipuniw armkäti” sasa. Awk taykanaka, wawanakaman Diosar jakäwip katuyasisa bautisasipjjatapat kusisitäpjjasma ukwa munapjjta.