GRAZ (Austria) sat markanwa jilsuwayta. Paqallqo maranïkayäta ukhajja, monjanakajj kunanaksa lurapjje uk yatichir mä escuelaruw khitapjjetäna. Ukanjja, sacerdotenakasa monjanakasa kunayman qʼañu juchanakwa lurapjjäna. Uk uñjasajja, “aka escuelat apsjjeta” sasaw mamajar sayäta. Janiw ni mä maras uka escuelankkayätti.

Awk taykajajj yaqha escuelaruw apapjjetäna, ukanwa jakarakiyäta. Mä arumajja, “walpun bombanakajj phallaski, Graz markat yaqha cheqaruw sarjjañäni” sasaw tatajajj när irptir jutäna. Schladming sat markaruw sarjjapjjayäta. Ukar purisin mä puente makatjjapjjayäta, ukhaw uka puentejj mä bombampi qʼala allthapit uñjasïna. Mä qhawqha tiempotjja, avionat pasapkäna ukanakarakiw awichajampiru nayampirojj disparapjjetäna. Guerrajj tukuyjjäna ukhajja, “iglesiankirinakasa marka apnaqerinakas apanukjjestuwa” sasaw amuyapjjayäta.

Khä 1950 maranjja, mä kullakaw mamajar Bibliat yatichañ qalltäna. Kuntï jupanakajj parlapkäna ukanak istʼirïyätwa, mamajamp chikarakiw yaqhep tantachäwinakarus sarirïta. “Jehová Diosan Testigonakapaw cheq yatichapjje” sasaw mamajajj taqe chuym confiyäna, ukatwa 1952 maran bautisasïna.

Nayatakejja, sarkayäta uka congregacionan jilïr warminakakis tantachasipkaspa ukhamänwa. Qhepatjja, yaqha congregacionaruw visitir sarapjjayäta, ukanjja walja wayn tawaqonakaw utjäna, janiw jilïr warminakak tantachasipkänti. Graz markar kuttʼasajja, jan faltasisaw tantachäwinakar sarjjayäta, mä qhawqha tiemponakwa kuntï yateqkayäta ukajj cheqätap amuyayäta. Jehová Diosajj janipuniw servirinakaparojj jaytanukkaspati, uksa amuyjjarakiyätwa. Jachʼa jan walinakansa uñjaskchiñänejja, Diosajj yanaptʼapunistaniwa (Sal. 3:5, 6).

Kuntï yateqkayäta ukanakat yaqhanakampiw parlañ munayäta. Jil kullakanakajampiw parlañ  qalltta. Pusi kullakanakajajja, utat sarjjasajj profesoratwa trabajisipkäna. Ukatwa kawkjantï jupanakajj jakapkäna ukar sarasajj Bibliat yateqapjjañapatak chʼamañchtʼayäta. Tiempompejja, taqe jil kullakanakajaw Testigöjjapjjäna.

Niya pä semananak utat uta yatiyjjayäta ukhaw 30 jila marani mä warmir Bibliat yatichañ qalltayäta. Diosar serviñan nayrar sartasajja, uka warmejj bautisasjjänwa. Qhepatjja, esposopampi pä wawanakapampejj bautisasjjapjjarakïnwa. Uka warmir Bibliat yatichañajj Diosar jukʼamp confiyañatakiw yanaptʼitäna. Nayarojj janiw khitis Bibliat ukham yatichkitänti, ukhamajj uka warmir sum yatichañatakejja, nayaw nayraqat Biblian yatichäwinakap sum amuyañajäna. Bibliat ukham sum yatjjatañajja, cheqa yatichäwinak sumpach amuyañatakiw yanaptʼawayitu. Ukatwa Diosar jakäwij katuyasisajj 1954 maran abril phajjsin bautisasiyäta.

Khä 1955 maranjja, Alemania, Francia ukat Inglaterra markanakan walja markanakat jachʼa tantachäwejj utjkäna ukaruw sarayäta. Londres markanjja, Galaad Escuelan yatichiri Albert Schroeder jilataruw uñtʼayäta. Qhepatjja, uka jilatajj Oraqpachan Jilïr Irpirinakat maynirëjjänwa. Albert jilatajja, Londres markan Museo Británico ukaruw irpapjjetäna. Bibliat nayra qellqatanakaw uka museon utjäna. “Uka qellqatanakanjja, Diosan sutipaw hebreo letranakan uñsti, ukajj wali wakiskiriwa” sasaw jilatajj sapjjetäna. Uk yatiñajj chuymaruw purtʼitäna, Diosar jukʼamp confiyañatakiw yanaptʼarakitäna, cheqa yatichäwinaksa jukʼampiw yatiyañ munjjayäta.

Khä 1956 marana 1 de enero uka uruw precursorat serviñ qalltayäta. Pusi phajjsinak qhepatjja, Austria markan precursor especialat serviñatakiw invitapjjetäna, Mistelbach cheqana. Ukanjja, janiw Testigonakajj utjkänti. Jakkayäta uka compañerajampis janiw kikpäpkayätti. Nayajj niya 19 maranïyätwa, jupajj 25 maranïnwa. Nayajj ciudadan jakasiriyätwa, jupajj campon jakasirïnwa. Nayajj urukam ikiriyätwa, jupasti alwat sartirïnwa. Nayajj arumkam uñanaqeriyätwa, jupasti urut ikintirëjjänwa. Ukhamäkchïnsa, Biblian ewjjtʼanakaparjam sarnaqasaw sum apasiñatak chʼamachasipjjayäta, wali kusisitarakiw panijajj precursorat servipjjayäta.

Yaqha jan walinakaw uka cheqan utjarakïna. Jan waltʼayañatak arknaqataw uñjasipjjayäta, ukampis Jehová Diosajj janiw sapak jaytapkitänti (2 Cor. 4:7-9). Mä urojja, mä jiskʼa markan yatiyasipkayäta ukhaw jaqenakajj nanakar achjañapatakejj anunakap antutanipjjäna. Uka anunakajj mäkiw muyuntapjjetäna. Compañerajaru amparat katthapisajj akham sasaw Diosar mayisiyäta: “Mirä amp suma, aka anunakajj jan tʼaqesiyasin jankʼak jiwayapjjetpan” sasa. Anunakajj wali jakʼankjjapjjäna ukhajja, ukharukiw saytʼjjapjjäna ukat wichʼink khiwisisajj sarjjapjjakïnwa. Jehová Diosapuniw jarkʼaqapjjetäna. Uka qhepatjja, uka markpachanwa yatiyapjjayäta, jaqenakas sumwa istʼapjjetäna, ukajj janiw cheqaw sañjamäkänti. Inas anunakajj nanakar jan kun kamachapjjatapata, jan ukajj ukham jan walin uñjaskasas yatiyasipkakitajat ukham sum istʼapjjchitäna. Uka jaqenakat yaqhepajj Testigöjjapjjänwa.

 Yaqha jan walinwa uñjasipjjarakiyäta. Jakapkayäta uka utan dueñopajja, “jaqenakan utapar sarapjjatamatwa jichhajj jiwayapjjäma” sasaw mä urojj wali machantat purinisin arnaqasïna. Esposapajj pacienciayañwa munäna, ukampis uka chachajj janiw istʼkänti. Uk istʼasajja, sillanak punkur apkatasajj mäkiw nanakajj cosasanakaj apthapisipjjayäta. Punk jistʼarapjjayäta ukhajja, niyaw uka chachajj mä jachʼa cuchillos aptʼata gradanak makatanjjatayna. Uk uñjasajja, yaqha punknam mistusaw taqe cosasanakaj aptʼata jan mayamp kuttʼaniñatak sarjjapjjayäta.

Mä qorpachasiñ utaruw puripjjayäta. Niya mä maraw ukan quedasipjjayäta. Uka utajj marka taypinkänwa, ukatwa yaqhep jaqenakajj Bibliat yateqañatak uka utar jutañ munapjjerïna. Mä qhawqha tiempotjja, jakapkayäta uka cuartonwa librot yateqañatak tantachäwisa, Yatiyañataki sat revistat Yatjjatañataki tantachäwis apasjjäna. Niya 15 ukan tantachasipjjerïta.

Mä mara jilaw Mistelbach sat markan servipjjayäta. Uka qhepatjja, Graz markan Inti jalsu aynach toqeruw nayarojj khitapjjetäna, Feldbach sat cheqaru. Ukanjja, yaqha kullakampiw jakayäta, janirakiw mä congregacionajj utjkänti. Lawanakat lurata mä altus utanwa jakapjjayäta. Thayajj walpun pʼiyanakat mantanirïna, ukatwa uka pʼiyanak periodiconakamp tapantapjjerïta. Umas mä phujut apsuñänwa. Ukhamanakan jakañajj janiw inamayäkänti. Mä qhawqha phajjsinakatjja, mä jiskʼa grupow ukan utj-jjäna. Tiempompejj Bibliat yatichapkayäta uka familiatjja, niya 30 bautisasipjjäna.

Jehová Diosajj Reinop nayrar uchapki ukanakarojj yanaptʼapuniwa, uk jan armañatakiw taqe kuntï uñjawaykta ukajj yanaptʼawayitu. Janis jiwasan khiti yanaptʼiris utjaskpan, Jehová Diosajj yanaptʼapunistaniwa (Sal. 121:1-3).

Khä 1958 maranjja, walja markanakat mä jachʼa tantachäwiw Nueva York markan apasiñapäna, Estadio de los Yankees ukat Polo Grounds sat estadionakana. Ukar sarañataki Austria markankir sucursalar maykayäta ukhajja, “¿janit Galaad Escuelaru, clase 32 ukar sarañ munkasma?” sasaw ukankir jilatanakajj jisktʼapjjetäna. Nayajj jankʼakiw “jïsa” sasin sayäta.

Uka escuelanjja, Martin Poetzinger sat jilatampiw qontʼasiyäta. Uka jilatajj kunayman jan walinakanwa campos de concentración ukanakan uñjasitayna. Qhepatjja, Oraqpachan Jilïr  Irpirinakat maynirëjjänwa. Jilatampi nayampejja, alemán aru parlirïpjjayätwa, ukatwa jilatajj inglesat mä aru istʼasajj “Erika, ¿ukajj kamsañsa muni?” sasin jisktʼirïtäna.

Niya kimsa phajjsinak escuelankapkayäta ukhaw Nathan Knorr jilatajj kuna markansa servipjjä uk yatiyapjjetäna. Nayajj Paraguay markaruw sarañajäna. Ukhajj minus maranikïskayätwa, ukhamajj tatajaw uka markar mantañajatakejj mä permiso firmtʼañapäna. Tatajajj firmtʼänwa, ukhamatwa 1959 maran marzo phajjsin Paraguay markar puriyäta. Asunción markan misioneronakataki utjkäna uka utanwa yaqha kullakamp jakañajäna.

Mä qhawqha tiempotjja, Walter Bright jilataruw uñtʼayäta, jupajj Galaad Escuelaru, clase 30 ukaruw saratayna. Casarasisajja, panijaw jan waltʼäwinakar saykatañatak chʼamachasipjjayäta. Ukham jan walinakan uñjasisajja, Isaías 41:10 qellqatwa liytʼapjjerïta, ukanjj akham siwa: “Jan ajjsaramti, nayaw jumampïskta, jan ajjsaramti, nayäsktwa juman Diosamajja. Nayaw chʼamañchaskäma” sasa. “Jiwasatï Jehová Diosat jan jitheqtañatakisa Reinop nayrar uchañatakis chʼamachasiñäni ukhajja, Jupajj yanaptʼapunistaniwa” sasin confiyañatakiw uka arunakajj yanaptʼapjjetäna.

Qhepatjja, Brasil marka jakʼan serviñatakiw khitapjjetäna. Ukanjja, misioneronakan utap qalamp kʼupsupjjañapatakiw tatakuranakajj wayn tawaqonakar chʼamañchapjjäna, uka utajj janiw machaq utäkänti. Mä qhawqha tiempotjja, esposojajj policianakan jefeparuw Bibliat yatichañ qalltäna, uka policiajj mä semanpacha utaj uñjapjjañapatakiw yaqha policianakar khitanïna. Ukhat sumakiw jakasjjapjjayäta. Tiempompejj Brasil markaruw jakir sarjjapjjayäta. Ukhamatwa Paraguay ukat Brasil markanakan tantachäwinakajj apasjjäna. Jutjjañatakejja, pä jiskʼa congregacionanakaw uka cheqan utj-jjäna.

“Janiw wawanïñ puedkätati” sasaw doctoranakajj sapjjetäna. Ukampis 1962 maranjja, usuriptayätwa. Janiw cheqaw sañjamäkänti. Hollywood, Florida (Estados Unidos) markaruw sarjjapjjayäta, esposojan familiap jakʼaru. Familiar uñjañ laykojj mä qhawqha maranakajj janiw precursorat serviñ puedepkayätti. Ukhamäkchïnsa, Diosan Reinopajj nanakatakejj nayrankapunïnwa (Mat. 6:33).

Florida markar 1962 maran noviembre phajjsin puripjjayäta ukhajja, jaqenakan amuyunakapar istʼasajj janqʼo jañchin jilat kullakanakasa, chʼiyar jañchin jilat kullakanakas yaqh yaqhaw tantachasipjjäna, Diosan arunakapsa janiw juntuk yatiyapkänti. Jehová Diosajj janiw ukham yaqhachir Diosäkiti, ukatwa jilat kullakanakajj mayachtʼatäñatak chʼamachasipjjäna. Diosajj ukham chʼamachasitanakap wal bendisïna, jichhajj walja congregacionanakaw uka cheqan utj-jje.

Esposojajj 2015 maranwa pʼeqer canceramp jiwäna, ukajj wal llakisiyitäna. 55 maranakaw jupamp wali kusisit jakasiwayta. Esposojajj taqe chuymaw Jehová Diosar munasïna, walja jilat kullakanakaruw yanaptʼarakïna. Jupajj kʼumara jaktanjjani uka uru puriniñap wal suyasktjja (Hech. 24:15).

Pusi tunka jila maranak Jehová Diosar precursorat servisajj walja bendicionanakwa katoqawayta, walpun ukanakat Diosar yuspärta. Bibliat yatichapkayäta uka jaqenakatjja, 136 bautisasiwayapjje. Awisajj jan walinakansa uñjasipkchiyätjja, Jehová Diosar serviñ jaytañat sipansa jukʼampiw Jupar jakʼachasipjjayäta, “Jehová Diosaw jan walinak horasapar askichaskani” sasaw confiyapjjerïta. Ukajj ukhamapunïnwa (2 Tim. 4:16, 17).

Esposojar janiw armirjamäkti, ukampis precursorat serviñaw jan sint llakisiñatak yanaptʼitu. Yaqhanakaru cheqa yatichäwinak yatichañajja, yamas jiwatanakajj jaktanipjjaniwa sasin yatichañajj walpun kusisiyitu. Jehová Diosajj janipuniw jaytanukkituti, wal yanaptʼawayitu. Arsutaparjamaw Jupajj chʼamañchtʼawayitu, ‘atipjir amparapampis katjjaruwayituʼ (Is. 41:10).