1. ¿Kuna jan walinakansa nayra cristianonakajj uñjasipjjäna?

KHÄ 62, 63 jan ukajj 64 maranakanwa apóstol Pedrojj ‘Ponto, Galacia, Capadocia, Asia, Bitinia uksanakar sarjjasin ukjan akjan jakasipkäna ukanakar qellqäna’, jupanakajj akapachan mä jukʼa tiempotak jakirikïpjjänwa (1 Ped. 1:1). Uka jilat kullakanakajja, walja cheqanakatäpjjarakïnwa. Kunjamtï Pedrojj siskänjja, “ninar uñtat yantʼanaka[ruw]” saykatasipkäna, mä arunjja arknaqataw uñjasipjjäna, ukatwa chuymachtʼatäñsa yanaptʼatäñsa munapjjäna. Jupanakajj jan wali tiemponwa jakasipkäna, ukatwa apóstol Pedrojj akham sasin qellqäna: “Taqe kunan tukusïwipaw jakʼachasinjje” sasa. Ukajja, janïr tunka maranak paskipanwa phoqasïna, Jerusalén markajj qʼala tʼunjataw uñjasïna. ¿Kunas cristianonakar uka jan walinakar saykatañatak yanaptʼaspäna? (1 Ped. 4:4, 7, 12).

2, 3. ¿Kunatsa apóstol Pedrojj katoqtʼasirïpjjam sasin cristianonakar ewjjtʼäna? (Aka paginankir dibujo uñjjattʼäta).

² “Maynit maynikam [...] taqe chuyma katoqtʼasipjjam” sasaw apóstol Pedrojj ewjjtʼäna (1 Ped. 4:9). Katoqtʼasirïña siski uka arojja, “jan uñtʼatanakarus munasiñampi, jan ukajj khuyaptʼasiñat katoqtʼaña” sañwa griego arun muni. Ukampis “maynit maynikam” sum katoqtʼasipjjam sasinjja, jupanakkam sum katoqtʼasipjjañapatakiw  Pedrojj chʼamañchaskäna. ¿Uka ewjjtʼarjam sarnaqañajj kunjamsa yanaptʼaspäna?

³ Mayachtʼatäñatakiw yanaptʼaspäna. Jichhajj jiwasat amuytʼañäni. Mä jilatasa jan ukajj kullakasa utapar invittʼistu ukhajja, wali kusisitätanwa. Jan ukajj jiwasas utasar invittan ukhajja, jupampejj jukʼamp sumwa apastanjja. Cheqas jilat kullakanakar katoqtʼañajja, jupanakar sum uñtʼañatakiw yanaptʼistu. Apóstol Pedrojj jakkäna uka tiempon jan walinakajj jiljjatjjäna ukhajja, jukʼamp mayachtʼatäpjjañapaw wakisïna. Aka “qhepa urunakanjja” ukhamarakiw mayachtʼatäñasajj wakisi (2 Tim. 3:1).

4. ¿Kuna jisktʼanakarus aka yatichäwin qhanañchaskañäni?

⁴ ¿Kunjamanakatsa “maynit maynikam” taqe chuyma katoqtʼassna? ¿Kunanakatï katoqtʼasirïñ jarkʼkistaspa ukanak kunjamsa atipjsna? ¿Invittʼapkistu uka ratojj kunjamsa yuspärasirïtas uñachtʼaysna?

5. ¿Kunjamsa tantachäwinakan katoqtʼasirïsna?

⁵ Tantachäwinakana. Jehová Diosampi, markapampiw tantachäwinakar invittʼistu. Jiwasajj taqe invittʼatanakan kusisitäpjjañapwa munaraktanjja (Rom. 15:7). Yamas jichhak jutapki ukanakajj kusisitäpjjaspa ukwa muntanjja. Niyakejjay Jehová Diosajj jupanakar invitchejja, janis suma uñnaqanïkpan janis suma isthaptʼatäkpan sum katoqtʼañasawa (Sant. 2:1-4). Jupatï sapak qonusiskchi ukhajja, jiwasamp chika qontʼasiñapatakiw jawsañasa. Tantachäwin amuyañapataki, Biblian textonakap katjañapatak yanaptʼañäni ukhajja, wal yuspäristani. Ukhamatwa “jaqe masimarus katoqtʼasipkakim” siski uka ewjjtʼar istʼañäni (Rom. 12:13).

6. ¿Khitinakarus utasar invittʼañasa?

⁶ Manqtʼasiñataki jan ukajj kun umtʼasiñatak invittʼasa. Bibliajj qellqaskäna uka tiemponakan jakiri jaqenakajja, sumankañataki, jan ukajj amigopäñatakiw utapar manqtʼasiñatak invittʼapjjerïna (Gén. 18:1-8; Juec. 13:15; Luc. 24:28-30). ¿Jiwasajj khitinakarus utasar invittʼañasa? Congregacionasankir jilat kullakanakaruw invittʼañasa. Aka jan wali pachan tukusiñapajj wali jakʼankjjepanjja, jilat kullakanakasampejj jukʼamp sumwa apasiñasa, ukhamatwa maynit maynikam yanaptʼasiñäni. Amuytʼañataki, Estados Unidos markankir Betelanjja, Oraqpachankir Jilïr Irpirinakajj 2011 maranwa, Yatiyañataki revistat 6:45 jaypʼu horasar yatjjatapjjerïkäna ukjja, 6:15 jaypʼu horasar jittʼayapjjäna. Ukhamat Betelankir jilat kullakanakajj maynit maynikam visittʼasipjjañapataki. Yaqha markankir sucursalanakas uka pachpwa lurapjjaraki, ukhamatwa Betelankirinakajj mayachtʼatäpjje.

7, 8. ¿Yaqha cheqanakat arstʼir jutapki uka jilatanakar kunjamsa katoqtʼasirïtas uñachtʼaysna?

⁷ Yaqha congregacionat discurso arstʼir jutapki, jan ukajj tamanak tumptʼir jilatajj jutki, jan ukajj Betelat arstʼir jutapki ukhanakaw katoqtʼasirïtas uñachtʼaysna. ¿Kunjamsa uk lursna? (3 Juan 5-8 liytʼañataki). Utasaruw manqtʼasiñataki jan ukajj mä kun umtʼasiñatak invittʼsna.

⁸ Estados Unidos markankir mä kullakajj akham siwa: “Esposojampejja, congregacionar arstʼir jutapki uka jilatanakarus esposanakaparus utar invittʼapjjapunirïtwa, ukhamjja walja maranakaw lurapjjta. Ukajj kusiskañapuniwa, Diosar serviskakiñatakis jukʼampiw chʼamañchtʼapjjetu. Ukham lurapjjatajat janipuniw arrepentisipkti” sasa.

9, 10. 1) ¿Khitinakas walja urunak alojtʼatäñ munapjjaspa? 2) ¿Jiskʼa utanïpki uka jilat kullakanakas alojtʼapjjarakispati? Uk mä experienciampi qhanañchtʼma.

⁹ Walja urunaka utasar alojtʼasa. Nayra maranakanjja, confiykañ jaqenakarojja utaparuw  jaqenakajj alojtʼapjjerïna (Job 31:32; Filem. 22). Jichhürunakanjja, ukhamarakiw alojtʼañajj wakisi. Amuytʼañataki, tamanak tumptʼir jilatanakajja, congregacionanak visitkasajj alojtʼatäñwa munapjje. Diosan markapan utjki uka escuelanakar saririnakasa, Tantachasiñ Utanak lurapki ukanakas ukhamarakiw alojamiento munapjjaspa. Maysa toqetjja, jan waltʼäwinak utjipan jan utani uñjasipki uka jilat kullakanakajj ukhamarakiw utap lurasiñapkamajj alojamiento munapjjaraki. Jachʼa utaninakaw alojtʼapjjaspa sasajj janiw amuyañasäkiti. Jupanakajj inas walja kuti utapar aloj-jjapjjchi. ¿Janit jiwasajj utasar alojtʼañatak chʼamachasksna? Ukatakejj janiw jachʼa utanïñasa ni suma utanïñapunis wakiskiti.

¹⁰ Corea del Sur markankir mä jilatat amuytʼañäni, jupajj Diosan markapan utjki uka escuelanakar saririnakaruw walja kuti alojtʼawayi. Jupajj akham siwa: “Qalltanjja ajjsarayätwa, janiw jaya tiempo casaratäpkayätti, utajas jiskʼakirakïnwa. Ukampis jupanakar katoqtʼañajj wali kusiskañänwa. Casadonakajj kunjamsa Diosar servipjjäna, amtanakap phoqañatakis kunjamsa panpachani chʼamachasipjjäna uk uñjañajj walpun chʼamañchtʼawayapjjetu” sasa.

11. ¿Kunjamsa congregacionasar jichhak purinipki uka jilat kullakanakar yanaptʼsna?

¹¹ Congregacionasar jutapki uka jilat kullakanakar yanaptʼasa. Congregacionasar yanaptʼañatakejja, jilat kullakanakajj yaqha cheqatwa jutapjjaspa, jan ukajj precursorat serviñatakiw jutapjjaspa, jan ukajj sucursalaw khitanispa. Cheqas jupanakatakejja, yaqha cheqankañasa, yaqha congregacionankañasa, yaqha aru yateqañas chʼamakïspawa. Ukatwa manqtʼasiñatakisa, kun umtʼasiñatakisa, jan ukajj kawk sarañatakis invittʼañasa, ukaw amigonakanïñapatakisa, congregacionan yatinoqtañapatakis yanaptʼani.

12. Katoqtʼañatakejj janiw suma manqʼanak wakichañapun wakiskiti, ¿kunatsa ukham sistanjja?

¹² Jilat kullakanakar katoqtʼañatakejja, janiw suma manqʼanak wakichañapunejj wakiskiti (Lucas 10:41, 42 liytʼañataki). Mä jilatajj esposapampi misionerot serviñ qalltapkäna ukhajj kunas pasäna uka toqet jilatajj akham siwa: “Wayn tawaqösipkayätwa, markajata, familiaranakajat amtasisajj wal llakisipjjayäta. Mä jaypʼojja esposajajj wali llakitapunïnwa, janiw chuymachtʼañ puedkayätti. Ukatjja niya 7:30 jaypʼu horasarojj mayniw punku leqtʼanïna. Bibliat mä yateqeriw kimsa naranjanak iranitayna. Nanakar aruntiriw jutatayna, nanakasti utar mantayasajj umwa wajjtʼapjjta, ukatjja juntʼumampi chocholatempi lurasipjjta. Nanakajj janiw suajili aru parlañ yatipkayätti, jupasti janirakiw inglés aru parlañ yatkänti. Ukat aksaruw walja amigonakanïñatak chʼamachasipjjta, ukatsti wali kusisitäpjjarakiyätwa” sasa.

13. ¿Kunatsa katoqtʼasirïñajj wali wakiskiri?

¹³ ¿Jilat kullakanakar katoqtʼañajj jiwasatak chʼamakiti? Ukhamächejja, jupanakampi parltʼasiñsa, maynit maynikam chʼamañchtʼasiñsa, jupanakampi wiñay amigöñsa inas aptʼasiwaystan. Jilat kullakanakar katoqtʼañaw jan saparstʼatäñatakejj yanaptʼistu. Ukampis kunanakas katoqtʼasirïñ jarkʼistaspa, uk mä qhawqha uñjañäni.

14. Jilat kullakanakar invittʼañatakisa, invittʼapkistu ukar sarañatakis jan tiempojj utjkchistu, qaritak sarnaqstan ukhajja, ¿kuns lursna?

¹⁴ Qaritäña, jan tiemponïña. Jehová Diosan servirinakapajj jan tiemponïtanwa, kunayman lurañanak phoqañasawa. Ukatwa yaqhep jilat kullakanakajj janis katoqtʼañatak tiempojj utjkaspa ukham amuyasipjjaspa. Jiwasatï jan tiemponjam amuyastanjja, ¿janit wasitampi  horarios uñakiptʼañajj wakiskaspa? Ukhamatwa utasar invittʼañatakisa, invittʼapkistu ukar sarañatakis tiempojj utjistaspa. Cheqas Bibliaw “janirak katoqtʼasiñsa armasipjjamti” sasin ewjjtʼistu (Heb. 13:2). Ukhamasti, jilat kullakanakar invittʼañatak tiempo apstʼasiñajj wali wakiskiriwa. Ukatakejj inas jan wakiski uka lurañanak apanukuñasajj wakischini.

15. Utasar invittʼañ munktan ukhajja, ¿kunanakas llakisiyistaspa?

¹⁵ Jiwas pachpat jan wal amuyaña. Inas maynir invittʼañ wal munstan, ukampis janis ukatak wakichtʼatäksna ukhamwa amuyassna. Inas ajjsarirïstan, ‘kunsa jupanakampi parläjja, aburjasipjjaspawa’ sasin amuystan. Maysa toqetjja, inas jukʼa qollqenikïsajj janiw mayni jilat kullakanakjam sum katoqkiristti sasin amuyarakstan. Ukampis maynir katoqtʼañatakejj janiw utasajj wali sumäñapapunïkiti uk amtañasapuniwa. Antisas utasajj suma apthaptʼata qʼoma ukhamäñapawa, munasiñampiw katoqtʼañasaraki, ukhamatwa invittʼatanakasajj kusisitäpjjani.

16, 17. ¿Kunas invittʼatanakar kusisit chuymampi katoqtʼañatak yanaptʼistaspa?

¹⁶ Jilat kullakanakar katoqañjja, janiw jiwasakejj ajjsarktanti, yaqhanakas ajjsarapjjarakiwa. Gran Bretaña markankir jilïr irpiri mä jilatajja, uka toqet akham siwa: “Cheqas invitktan ukanakar katoqtʼañatakejj mä jukʼa ajjsartʼayasisaw wakichtʼastanjja. Kunjamtï Diosar serviñatak chʼamachasitasat bendicionanak katoqktanjja, ukhamarakiw invittʼañataki chʼamachasitasat bendicionanak katoqtanjja. Jupanakampi cafecito umtʼasiñakisa parltʼasiñakisa, wal chʼamañchtʼistu” sasa. Ukhamajja, invittʼatanakasar munasiñampi katoqañajj wali wakiskiriwa (Filip. 2:4). Niya taqeniw jakäwipat parlañ munapjje, ukhamajj invitktan ukhaw jupanakampi parltʼasiñatak tiempo apstʼasiñasa. Yaqha jilïr irpir jilatajj akham sarakiwa: “Congregacionajankir jilat kullakanakar invittʼasajja, jukʼampiw jupanakar uñtʼta, kunjamsa jupanakajj Diosar uñtʼawayapjje uksa yatiraktwa” sasa. Invittʼatanakasar sum katoqtʼañatak chʼamachasiñäni ukhajja, jupanakasa jiwasas kusisitäñäniwa.

¹⁷ Mä precursora kullakajja, Diosan markapan utjki uka escuelanakar sarapki ukanakaruw utapar alojtʼirïna, jupajj akham siwa: “Qalltanjja, utajan machaq yänak jan ukajj cosasanak jan utjipanjja llakisiyätwa, merqʼe mueblenakakiw utjitäna. Ukampis uka escuelanakan yatichiri mä jilatan esposapaw jan llakisiñatak yanaptʼitäna, jupajj akham sitänwa: ‘Tamanak tumptʼirjam visittʼapkta ukhajja, Diosar taqe chuyma serviri jan walja utjirini jilat kullakanak alojtʼapjjetu ukhajja, jukʼamp kusisitäpjjtwa. Ukajj Diosar taqe chuyma serviskakiñatakiw chʼamañchtʼapjjetu’ sasa. Ukajj mamajan arunakap amtayitu, wawasipkäyäta ukhajja, akhamwa sapjjerïtu: ‘Jukʼamp askiwa munasiñampi chʼojjñanaka manqʼañajja’” sasa (Prov. 15:17). Ukhamajj llakisiñat sipansa, munasiñampi invittʼatanakar katoqañatakiw chʼamachasiñasa.

18, 19. ¿Katoqtʼasirïñajj kunjamsa mayninakampi sum apasiñatak yanaptʼistu?

¹⁸ Mayninakat jan wal amuyaña. Inas congregacionasankir mä jilatata, jan ukajj mä kullakat jan wal amuystan. Jiwasatï jupanakar sum uñtʼañatak jan chʼamachaskañäni ukhajja, jupat jan walikpun amuyaskañäni. Awisajj khititï chuym ustʼaykistäna uk jan armasa, jan ukajj qhoru jaqjamäpki ukanakaruw invittʼañ jan munksnati.

¹⁹ Taqenimpi sumankañatakisa, uñisipkistu ukanakampi sumankthapiñatakisa, katoqtʼasirïñasatakiw Bibliajj chʼamañchistu (Romanos 12:20 liytʼañataki). Cheqas utasar invitsna ukhakiw kawkïr jilat kullakanakattï jan wal amuyktan uk chuymasat apsna, jupanakampis  sum apasiraksna. Ukatjja, kunatsa Jehová Diosajj markapar irpani uksa amuyaraksna (Juan 6:44). Uka jilatarusa jan ukajj kullakarus munasiñat invittʼañäni ukhajja, jupampejj sumwa apasjjsna. ¿Kunas ukatakejj yanaptʼistaspa? Filipenses 2:3 texton ewjjtʼapaw yanaptʼistaspa, ukan akham siwa: “Mayninakarojj humilde chuymamp uñjapjjam, jumanakat sipansa jilïrïpkaspas ukhama” sasa. Cheqas taqe jilat kullakanakaw jiwasat mä kunansa jilirïpjje. Sañäni, inas Jehová Diosar jukʼamp confiyapjjchi, kunayman jan walinak aguantapjjchi, jan ukajj jukʼamp suma jaqëpjjchi. Ukanakat amuytʼañaw jupanakar munasiñatakisa, katoqtʼañatakis yanaptʼistani.

20. Invittʼatajj iyaw sistan ukhajja, ¿kunsa lurañasa ukat kunatsa?

²⁰ David Reyejj akham sasaw Diosar jisktʼäna: “¿Khitirak qollan utaman jakaspasti?” sasa (Sal. 15:1). Khitinakatï Diosan utapankkaspa ukanakat mayajja, jan phoqerjamäkasas arsutap phoqki ukäspawa (Sal. 15:4). Ukhamajja, jiwasatï invittʼatajj ‘jutaw’ sistanjja phoqañasawa, janiw amanut jan sarañasäkiti. Ukham lursna ukhajja, invittʼirin chʼamachasitapajj inamayakïspawa (Mat. 5:37). Yaqhepanakajja, jukʼamp suma invitación katoqasajj ukarukiw sarjjapjje. Ukham lurasajja, janiw munasiñsa ni respetatapsa uñachtʼayapkiti. Ukhamajja, khitisay invittʼistpan, kunsay wajjtʼistpan taqe chuymaw katoqtʼasiñasa (Luc. 10:7). Ukampis sarañ jan puedjjañäni ukhajja, jankʼakiw yatiyjjañasa, ukhamatwa munasirïtassa, respetompi uñjatassa uñachtʼayañäni.

21. ¿Kuna costumbrenaksa respetañasa?

²¹ Kawkjantï jakasktan ukan costumbrenakapsa respetañasarakiwa. Sañäni, yaqhep cheqanakanjja, jan yatiyasa maynin utaparu visittʼañajj walikïskiwa, yaqhep cheqansti janiraki. Yaqhep cheqanakansti, invitatanakarojj sumäkis ukwa churapjje, yaqhep cheqansti invitatanakarusa familiaparusa igualak churapjjaraki. Yaqhep cheqanakanjja, invitatanakajj kuns apapjjapuniwa, yaqhep cheqansti janiw ukhamäkarakiti. Yaqhep markanakanjja, invittʼatäsajj “janiw puedkäti” sasin may kuti, jan ukajj pay kuti respetompi sañajj walikïskiwa, ukampis yaqhep markanakanjja ukham sañajj jan walit uñjatawa. Ukhamajja, utapar invittʼapkistani ukanakajj jiwasar invittʼasajj kusisitäpjjañapawa.

22. ¿Kunatsa ‘maynit maynikam katoqtʼasirïñajj’ wali wakiskiri?

²² Apóstol Pedrojj akham sänwa: “Taqe kunan tukusïwipaw jakʼachasinjje” sasa (1 Ped. 4:7). Niyakejjay, wali tʼaqesiñ tiempojj wali jakʼankjjchejja, maynit maynikam munasiñasajj jukʼamp wakiskiriwa. Ukatwa “maynit maynikam [...] taqe chuyma katoqtʼasipjjam” sasin apóstol Pedrojj ewjjtʼkistu ukar istʼañasa (1 Ped. 4:9). Cheqas katoqtʼasirïñajj jichha tiemponsa, jutïrinsa wali wakiskirikïskaniwa.