1, 2. 1) Diosan arunakap jan istʼañ munapki uka cheqanakan yatiyir jilat kullakanakajj ¿kunatsa chʼamañchtʼistu? (Aka paginankir foto uñjjattʼäta). 2) ¿Jesusajj ‘pachpa markapan’ yatiyañ toqet kamsänsa? (Qhanañchäwip uñjjattʼäta).

ESTADOS UNIDOS markankir Sergio jilatampi Olinda esposapampejj 80 jila maranïpjjewa, precursoratwa Diosar servisipki. Kayut usutäpjjatap laykojj sarnaqañajj jupanakatak chʼamakiwa. Ukhamäkchisa, jupanakajj predikañatakiw mä plazaru paqallqo alwa horasar sarapjje. Ukanjja, autonakajj mistki uka jakʼanwa carritompi yatiyapjje. Walja maranakaw ukham yatiyjjapjje. Ukampis jilaparte jaqenakajj janiw yäqapkiti, ukhamäkchisa jupanakajj ukan yatiyasipkakiwa. Uka cheqnama pasirinakarojj kusisitaw arunttʼapjje. Chika horasarusti, kʼachatwa utapar sarjjapjje. Qhepa alwajja, wasitampiw paqallqo alwa horasarojj pachpa cheqar sarapjjaraki. Semananjja, sojjta urunakaw sapa alwajj ukham marpacha lurapjje.

² Aka oraqpachanjja, ukhamarakiw walja jilat kullakanakajj Diosan arunakap jan istʼañ munapki uka cheqanakan walja maranaka yatiyasipkaki. Inas kawkjantï yatiykta uka cheqan jaqenakajj  Diosan arunakap jan istʼañ munapkarakchiti. Ukhamäkipansa inas jumajj jan qarjtasa yatiyaskaksta, ¡walik ukham lurasktajja! * Ukham yatiyañataki taqe chuyma chʼamachasitamajj mayni jilat kullakanakatakisa, walja maranaka servipki uka jilat kullakanakatakis wali yateqaskayawa. Tamanak tumptʼir yaqhep jilatanakajj uka toqet akham sapjjewa: “Diosar ukham jan jitheqtasa walja maranaka serviri jilat kullakanakampi predikañajj walpun chʼamañchtʼitu”, “Diosar jan jitheqtasa servipjjatapajj jupanakjam aguantañataki, jan ajjsaras yatiyañatakiw chʼamañchitu”, “Diosan arunakap ukham yatiyapjjatapajj chuymajaruw purtʼitu” sasa.

3. ¿Kuna kimsa jisktʼanakarus qhanañchasiskani, ukat kunatsa?

³ Aka yatichäwinjja, aka kimsa jisktʼanakaruw qhanañchasiskani: ¿Kunatsa awisajj predikañ jan munjjsna? ¿Kunjamsa ‘achunak achoqsna’? ¿Kunjamsa jan qarjtasajj ‘achunak achoqaskaksna’? Uka jisktʼanakan qhanañchäwip yatjjatañajja, Diosan arunakap yatiyaskakiñatakiw yanaptʼistani.

4. 1) Judionakajj Diosan arunakap jan istʼañ munapjjepanjja, ¿kunjamsa Pablojj jikjjatasïna? 2) ¿Kunatsa Pablojj “llakiw nayan utjitu” sasin säna?

⁴ Jaqenakajj Diosan arunakap jan istʼañ munapjjepan inas awisajj jan yatiyañ munjjstanti. Ukhamächi ukhajja, apóstol Pablojj kunjamsa jikjjatasïna uk sumwa amuyañäni. Jupajj niya 30 maranakaw Diosan arunakap yatiyäna, Criston arkiripar tukupjjañapatakis waljaniruw yanaptʼäna (Hech. 14:21; 2 Cor. 3: 2, 3). Ukhamäkchïnsa mä qhawqha judionakarukiw cheqpach cristianor tukupjjañapatak yanaptʼäna. Ukampis jilapartejj janiw Pablorojj istʼañ munapkänti, yamas yaqhepajj jan waltʼayañatakiw arknaqapjjäna (Hech. 14:19; 17:1, 4, 5, 13). Uk uñjasajj ¿kunjamakis jikjjataspachäna? Jupajj akham sänwa: “Criston arkiripjamajja, kunatï cheqäki ukwa nayajj parlaskta, [...] wali jachʼa llakiw nayan utjitu, janirakiw jachañas chuymajan tukuskiti” sasa (Rom. 9:1-3). ¿Kunatsa ukham säna? Jupajj taqe chuymaw Diosan arunakap yatiyañ munäna, jaqenakarus wal munasirakïna. Judionakarojj yamas wal yanaptʼañ munäna, ukatwa jan istʼañ munapjjepan wal llakisïna.

5. 1) ¿Kunas predikañatakejj wal chʼamañchistu? 2) ¿Kunatsa awisajj predikañ jan munjjsna?

⁵ Jiwasajj apóstol Pabljamarakiw jaqenakat wal llakistanjja, ukatwa Diosan arunakap yatiytanjja (Mat. 22:39; 1 Cor. 11:1). Taqe kunat sipansa, Jehová Diosar serviñaw jiwasatakejj wali kusiskaña, uk sum yattanjja. Ukatwa yaqhanakan kusisit jakasipjjañapatak yanaptʼañ muntanjja, Jehová Diosaru uñtʼapjjañapatakisa, amtanakapat yatipjjañapatakis wal chʼamachasiraktanjja. Mä suma regalo churañatakis ‘mirä amp suma katoqtʼasikimaya’ sisksnas ukhamawa. Ukatwa uka suma regalo jan katoqasipkistu ukhajj apóstol Pabljama llakita jikjjatastanjja. Ukampejj janis Jehová Diosar confiyjjsna uk janiw sañ munkiti, jan ukasti jaqenakar wal munatas laykuw ukham jikjjatastanjja. Awisajj aynachtʼatas uñjaskstanjja, yatiyañatak chʼamachasiskaktanwa. Inas Elena kullakjam amuyarakstan jupajj 25 maranak jilaw precursorat serviski. Jupajj akham siwa: “Predikañajj chʼamäkaspas ukham awisajj amuyta. Ukampis janipuniw ukham yaqha suma lurañajj utjkiti” sasa.

6. ¿Kuna jisktʼarus qhanañchañäni?

⁶ Diosan arunakap kawkjansay yatiykchiñänejja, ¿kunatsa taqeniw ‘achunak achoqsna’ sasajj sissna? Uka jisktʼar qhanañchañatakejj  Jesusan pä uñachtʼäwipat yatjjatañäni, ukanakanjja ‘sum achoqañatwa’ Jesusajj parläna (Mat. 13:23). Nayrïr uñachtʼäwejj uvas alitwa parli.

7. 1) Jesusajj parlkäna uka uñachtʼäwinjja, ¿khitis ‘yapuchirisa’, ‘uvas alisa’, ‘ramanakasa’? 2) ¿Kuna jisktʼarus qhanañchañasa?

⁷ (Juan 15:1-5, 8 liytʼañataki). Jesusajj parlkäna uka uñachtʼäwinjja, “yapuchirejj” Jehová Diosawa sasaw Jesusajj säna. Nayajj “cheqpach uvas alïtwa”, ‘ramanakasti’ arkirinakajawa sasaw sarakïna. * Ukatjja, akham sasaw apostolonakapar säna: “Kunapachatï walja achunak achoqasipkakta, nayan discipulonakajäpjjatam uñachtʼayapjjarakta ukhajja, alajjpachankir Awkijajj jachʼañchatawa” sasa. Ukhamajja, ¿‘walja achunak achoqaskakiñajj’ kamsañsa muni? Uka uñachtʼäwin kunas achojja uk janiw Jesusajj qhanañchkänti, ukampis kun sañsa munäna uk amuysnawa.

8. 1) ‘Achunïña’ sasinjja Jesusajj janiw jaqenakar discipulopar tukuyañat parlkänti sasajj ¿kunatsa sistanjja? 2) ¿Jehová Diosajj kunaksa mayistu?

⁸ Jesusajj Awkipat parlkasajj akham sänwa: “Nayan utjki uka jan achuni ramanakjja taqpachwa jupajj apaqe” sasa. Uka arunakarjamajja, Jehová Diosan serviripäñatakejj ‘achunïñasawa’ (Mat. 13:23; 21:43). Ukhamajja, uka uñachtʼäwejj janiw jaqenakar Jesusan arkiripar tukuyañat parlkaspati (Mat. 28:19). Ukhamäspa ukhajja, khitinakatï jan maynirus Jesusan arkiripäñapatak yanaptʼapki ukanakajj ‘jan achuni ramäpkaspas’ ukhamäpjjaspawa. Ukampis janiw uk sañ munkiti. Jaqenakarojj janiw munkir jan munkir Jesusan arkiripar tukuyksnati. Jehová Diosajj wali munasiriwa. Jupajj janipuniw kuntï jan lurirjamäktan uk maykistaspati. Kuntï lurirjamäktan ukakwa mayistu (Deut. 30:11-14).

9. 1) ¿Achunïñasatakejj kunsa lurañasa? 2) ¿Kuna uñachtʼäwitsa yatjjataskañäni, ukat kunatsa?

⁹ Ukhamajja, ¿Jesusajj parlkäna uka achojj kunasa? Kuntï Jehová Diosajj taqenir lurañ maykistu ukäpachawa. ¿Kunsa Jupajj mayistu? Reinop toqet suma yatiyäwinak jaqenakar yatiyañaswa muni (Mat. 24:14). * Jesusajj ‘yapuchir jaqet’ mä uñachtʼäwipan parlkäna ukaw uk sum qhanañchi. Uka toqetwa jichhajj yatjjatañäni.

10. 1) Jesusajj mä yapuchirit parlkäna uka uñachtʼäwirjamajja, ¿kunas jathajja, suma laqʼasa? 2) ¿Kunsa trigo alejj achoqe?

¹⁰ (Lucas 8:5-8, 11-15 liytʼañataki). Jesusajj mä yapuchir jaqet parlkäna uka uñachtʼäwinjja, “jathajj [jan ukajj semillajj] Diosan arunakapawa” mä arunjja, Diosan Reinopat yatiyktan ukawa. Laqʼasti jaqen chuymapäkaspas ukhamarakiwa. Suma laqʼar purki uka jathajj saphintasinwa alsuni, ukatsti mä aliruw tukjje. Jiltasajja, ‘mä jathajj patakaruw achoqe’. Uka alitï trigöchejja, ¿kunsa achoqani? ¿Jiskʼa trigo alinakti achoqani? Janiwa, trigo jathanakwa achoqani. Uka jathanakaw trigo aliru tukuni. Jesusan uka uñachtʼäwiparjamajja, mä jathajj patak jathanakwa achoqäna. ¿Kunsa ukajj Diosan arunakap yatiyañ toqet yatichistu?

11. 1) Jesusajj yapuchirit parlkäna uka uñachtʼäwejja, ¿kunsa yatiyañ toqet yatichistu? 2) ¿Kunjamsa chuymasan utjki uka jathanak phawtanjja?

¹¹ Cristiano awk taykasasa jan ukajj Jehová Diosan mä Testigopas Diosan Reinopat yatichkistäna ukhajja, mä jathsa suma laqʼar uchkaspa ukhamänwa. Jiwasajj Diosan arunakap istʼasajj taqe chuymaw katoqasiyätanjja, uk uñjasajj wal kusisipjjäna. Ukatjja, uka jathajj chuymasan jiltasinjja, achunïñatakejj wakichtʼatäjjänwa, ¿kunsa achoqani? Trigo alejj janiw yaqha jiskʼa trigo alinak achoqkiti, jan ukasti  jathanakwa achoqe. Jiwasajj ukhamarakiw achunak achoqtanjja, uka achojj Diosan Reinopat yatiyañawa, janiw machaq arkirinaka tukuyañäkiti. * Diosan Reinopat yatiyktan ukhajja, chuymasan utjki uka jathanaksa phawksna ukhamawa (Luc. 6:45; 8:1). Ukhamajja, Jesusajj mä yapuchirit parlkäna uka uñachtʼäwejj ¿kunsa yatichistu? Jiwasatï Diosan Reinopat yatiyaskakiñäni ukhajja, kunjamtï trigo alejj achoqki ukhamarakiw achoqañäni.

12. 1) Jesusajj uvas alita, yapuchirita parlkäna uka uñachtʼäwinakatjja, ¿kunsa yateqsna? 2) ¿Kunjamsa uka uñachtʼäwejj yanaptʼtamjja?

¹² Jesusajj uvas alita, yapuchirita parlkäna uka uñachtʼäwinakatjja, ¿kunsa yateqsna? Jaqenakajj Diosan arunakap istʼapjjestu ukhakiw achunïsna sasajj janiw sisksnati, jan ukasti jan qarjtasa yatiyaskakiñäni ukhaw achunïsna. Apóstol Pablojj uka toqet akham sänwa: “Diosasti sapa mayniruw lurataparjam bendisirakini” sasa (1 Cor. 3:8). Jehová Diosajj luratanakasatwa bendisistani, janiw qhawqhanirus Jesusan discipulopar tukuytan ukarjam bendiskistaniti. Matilda kullakajja, 20 maranakaw precursorat serviski, jupajj akham siwa: “Jehová Diosajj chʼamachastan ukarjamaw bendisistu, uk yatiñaw kusisiyitu” sasa.

13, 14. Romanos 10:1, 2 qellqatarjamajja, ¿kunatsa Pablojj jan aynachtʼasa yatiyaskakïna?

¹³ ¿Kunas ‘achunak achoqaskakiñataki’ yanaptʼistaspa? Ukatakejj apóstol Pablot parltʼañäni. Judionakat waljanejj Diosan arunakap jan istʼañ munapkäna ukhajja, aynachtʼataw uñjasïna. Jupajj akham sasaw Roma markankir cristianonakar qellqäna: “Cheqpachansa israelitanakan salvasipjjañap wal nayajj chuymajan munta, ukatakiw Diosarus wal ruwtʼasirakta. Nayajj ak jupanakat qhanañchirista, jupanakajj walsa Diosar serviñatakejj chʼamachasisipkchejja, Diosat jan sum yatisaw uk lurapjje” sasa (Rom. 10:1, 2). Ukhamajj ¿kunatsa Pablojj yatiyaskakïna?

¹⁴ Maya, Pablojja, israelitanakan salvasipjjañap “wal nayajj chuymajan munta” sasaw  säna. Cheqas jupajj judionakan salvasipjjañapwa munäna (Rom. 11:13, 14). Paya, “ukatakiw Diosarus wal ruwtʼasirakta” sasaw sarakïna. Pablojj judionakat taqeni Diosan arunakap istʼapjjañapatakiw Jehová Diosar mayïna. Kimsa, Pablojj akham sänwa: ‘Jupanakajj Diosar serviñatakejj wal chʼamachasipjje’ sasa. Jaqenakajj kunjamsa Diosar servipjjaspa uk uñjañatakiw Pablojj chʼamachasïna. Judionakajj Diosar taqe chuyma serviñ munirinakäpjjänwa, uk Pablojj sum yatïna. Criston discipulopäjjasajj nayjamarakiw chʼamachasipjjani sasaw amuyäna.

15. 1) ¿Kunsa Pablot yateqassna? 2) ¿Kunsa yaqhep jilat kullakanakajj lurapjje? Uk qhanañchtʼma.

¹⁵ ¿Kunsa Pablot yateqassna? Maya, ‘wiñay jakañatak suma chuymanïpki ukanakar’ jikjjatañatakiw chʼamachasiñasa. Paya, suma chuyman jaqenakar yanaptʼañapatakiw Jehová Diosar mayiñasa, ukhamat jupanakajj yatiykañäni ukhajj jiwasar istʼapjjañapataki (Hech. 13:48; 16:14). Silvana kullakajj ukwa luräna, jupajj niya 30 maranakaw precursorat serviski. Kullakajj akham siwa: “Punkunak janïr leqtʼkasajja, ‘jaqenakajj istʼapjjetaniwa sasin amuyañatak yanaptʼita’ sasaw Jehová Diosar mayista” sasa. Diosan arunakap istʼañ muniri jaqenakar jikjjatañatakejj ukhamarakiw angelanakampi yanaptʼayasiñatak mayisiñasa (Mat. 10:11-13; Apoc. 14:6). Robert jilatajj 30 maranak jilaw precursorat serviski, jupajj akham siwa: “Jaqenakajj kunjamsa jikjjatasipjje uk angelanakajj sum yatipjje, ukatwa jupanakampi yanaptʼayasiñajj wali kusiskañajja” sasa. Kimsa, jaqenakajj kunjamsa Diosar servipjjaspa uk amuyañatakiw chʼamachasiñasa. Carl sat jilatajj jilïr irpiritwa serviski, 50 jila maranakaw bautisatäjjaraki, jupajj akham siwa: “Utanejj kusisit uñkattʼitu, jisktʼitu ukhajja, qhawqsa Diosan arunakap yatiñ muni uk amuyañatakiw chʼamachasta” sasa. Jiwasajj ukham luraraktan ukhajja, apóstol Pabljamaw ‘achunak achoqaskakiñataki’ chʼamachasisktanjja.

16, 17. 1) ¿Kunsa Eclesiastés 11:6 qellqatajj yatichistu? 2) Diosan arunakap yatiyatasajja, ¿kunjamsa yaqhanakar yanaptʼaspa?

¹⁶ Diosan arunakap yatiyatasajj qhawqsa jaqenakar yanaptʼaspa uk janipuniw armañasäkiti. Jupanakajj janis istʼañ munapkchejja, qhepat istʼjjapjjestaspawa (Eclesiastés 11:6 liytʼañataki). Cheqas waljanejj janiw istʼañ munapkistuti, ukampis uñchʼukisipkistuwa. Sañäni, suma isthaptʼatätanti, respetasirïtanti janicha, munasirïtanti janicha uk amuyapjjewa. Yaqhepajj jan walsa jiwasanakat amuyapkchejja, tiempompejj suma sarnaqatas uñjasajj janiw ukham amuyjjapjjeti. Sergio jilatampi Olinda esposapampejj ukwa uñjapjjäna.

¹⁷ Sergio jilatajj akham siwa: “Usuntapjjataj laykojja, mä qhawqha tiempojj janiw yatiyir sarjjapjjayätti. Ukampis kuttʼjjapjjayäta ukhajja yaqhepajj akham sapjjetänwa: ‘Kunats jan jutjjapjjta, walpun faltachasipjjsma’” sasa. Olinda kullakajj lartʼasisaw akham saraki: “Choferonakajj arunttʼapjjetänwa, yamas yaqhepanakajj auto manqhatpachaw ‘¡walik ukham lurasipktajja!’ sasin artʼanipjjetäna. Yaqhepasti revistanaksa apasipjjarakïnwa” sasa. Mä chachajja, Sergio jilatampi Olinda esposapampejj carritompi yatiyasipkäna ukar sarasinwa panqaranak jupanakar churäna, ukham yatiyapjjatapatsa wal yuspärarakïna.

18. ¿Kunatsa Diosan arunakap jan qarjtas yatiyaskakiñasa?

¹⁸ Bibliajj akham siwa: “Alwatajja yapucham, jaypʼusa yapucharakim” sasa. Jiwasatï Diosan Reinopat jan qarjtasa yatiyaskakiñäni ukhajja, ‘aka oraqpachan yatiyasiñapatakiw’ yanaptʼañäni (Mat. 24:14). Diosarus wal kusisiyañäni. Jupajj ‘achunak achoqasipkaki’, mä arunjja, jan qarjtas yatiyasipkaki ukanakarojj munasiwa.