AKA jan wali pachanjja, sumankañan jakasiñajj chʼamakiwa. Ukhamarus mä jukʼa sumankañ jikjjatkstan ukasa, ukhaman jakaskakiñajj chʼamakïspawa. ¿Biblian kawkïr yatichäwinakapas wiñay cheqpach sumankañan jakasiñatak yanaptʼistaspa? ¿Kunjamsa mayninakar suman jakasipjjañapatak yanaptʼsna?

Cheqpach sumankañan jakasiñatakejj janiw ajjsarañasäkiti, taqe kunatsa jarkʼaqatäñasarakiwa. Mayninakampis sumwa apasiñasa. Ukat sipansa Jehová Diosampiw sum apasiñasa. ¿Kunas ukatakejj yanaptʼistaspa?

Diosan mandamientonakaparu yatichäwinakaparu istʼtan ukhajja, Jupar confiyatasa sum apasiñ munataswa uñachtʼaytanjja (Jer. 17:7, 8; Sant. 2:22, 23). Ukham luratasat Jehová Diosajj jukʼampiw jiwasar jakʼachasi, sumankañapsa churarakistuwa. Isaías 32:17 textojj akham siwa: “Cheqa uñjäwisti sumankañwa utjayani, samarañana sarnaqasiña, jan ajjsarasa, ukasti wiñayatakïniwa” sasa. Ukhamasti sumankañan jakasiñatakejj Diosaruw taqe chuyma istʼañasa (Is. 48:18, 19).

Cheqpach sumankañan jakasiñatakejja, Jehová Diosaw mä suma regalo churarakistu, ukajj espíritu santowa (Hech. 9:31).

Apóstol Pablojj ‘espíritu santon achupat’ mayat may qhanañchkasajja, kimsjjaruw sumankañ aytäna (Gál. 5:22, 23). Ukhamajj espíritu santompiw sumankañan jakasiñatakejj yanaptʼayasiñasa. Kunjamsa yanaptʼistaspa uk pä toqet jichhajj uñjañäni.

Maya, Diosan Arup sapüruw liyiñasa (Sal. 1:2, 3). Kuntï liyktan ukat lupʼtan ukhajja, espíritu santow kunjamtï Jehová Diosajj amuyki ukham amuyañatak yanaptʼistu. Sañäni, sumankañatakejj kunsa Diosajj luri, kunatsa  sumankañajj Jupatak wali wakiskiri ukanakwa amuytanjja. Diosan yatichäwinakaparjam sarnaqtan ukhajja, sumakiw jakastanjja (Prov. 3:1, 2, NM).

Paya, Jehová Diosaruw espíritu santop mayiñasa (Luc. 11:13). Biblianjja Jehová Dios pachpaw akham sistu: “Diosaw sumankañapjja churapjjätam, uka sumankañapasti jaqenakajj kuntï amuyki ukat sipansa jukʼampiwa. Uka sumankañaw chuymanakamsa amuyunakamsa Cristo Jesús taypejj jarkʼaqapjjätam” sasa (Filip. 4:6, 7). Jehová Diosar sapa kuti espíritu santo mayiñäni ukhajja, chuymasan sumankañaw utjani. Diosajj amigonakaparukiw ukham sumankañ churi (Rom. 15:13).

Yaqhep jaqenakarojja, ¿kunjamsa Bibliajj sumankañ jikjjatapjjañapatak yanaptʼäna? ¿Jehová Diosampi mayninakampi sumankañatakejj kunsa jupanakajj lurapjjäna?

Yaqhep jilat kullakanakajja, nayrajj ‘mäkiw kunatsa colerasiripjjäna’, ukampis jichhajj janiw nayrjamäjjapjjeti, antisas munasiri, pacienciani, suma chuymani ukhamäjjapjjewa (Prov. 29:22). * Amuytʼañatakejj mä jilatampita mä kullakampit parltʼañäni. Jupanakajja nayrajj mäki colerasiripjjänwa, ¿kunas jan ukhamäñatakisa mayninakampi sumankañatakis jupanakar yanaptʼäna?

David jilatajja, jakäwip Diosar janïr katuyaskäna ukhajj jaqenakat jan wali parlirïnwa, familiaparus janiw respetirïkänti. Mayninakampi sumankañatakejj cambiañapänwa, ukwa jupajj amuyasïna. ¿Kunas sumankañatak yanaptʼäna? Jupajj akham siwa: “Biblian yatichäwiparjam sarnaqañatakiw chʼamachasta, ukaw familiajar respetompi uñjañatak yanaptʼitu, jupanakas respetompiw uñjapjjarakitu” sasa.

Rachel kullakarojja, jiskʼatpach kunjam uywatäkäntï ukaw jan waltʼaykänti. Jupajj akham siwa: “Familiajanjja janiw suma arunakampi parlasiñajj utjkänti, ukhaman jilsusajj jichhakamas jan jankʼak colerasiñatakejj wal chʼamachasiñajawa” sasa. ¿Kunas  jan jankʼak colerasiñatak yanaptʼäna? Jupajj saskakiwa: “Jehová Diosar sapa kuti mayisiñaw wal yanaptʼitu” sasa.

Biblian yatichäwinakaparjam sarnaqañäni, Diosarus espíritu santo mayiñäni ukhajja, sumankañanwa jakasiñäni. Ukwa David jilatampina Rachel kullakampin experienciapat yateqsna. Aka jan wali pachan jakkasasa, chuymasan sumankañ jikjjatsnawa, familiasampisa jilat kullakanakampis sumaw apassna. Jehová Diosajj “taqe jaqenakampi sumankapjjam” sasaw chʼamañchistu (Rom. 12:18). ¿Kunjamsa jaqenakampejj sum apassna? Sumankañatak chʼamachasiñajj ¿kunjamsa yanaptʼistani?

Predikir sartan ukhajja, jaqenakaruw Diosan Reinopat sumankañ yatiyäwinak istʼapjjañapatak invittanjja (Is. 9:6, 7; Mat. 24:14). Waljaniw ukar istʼapjjaraki. Ukatwa jupanakajj jan walinak uñjasajj jan sint llakisjjapjjeti ni colerjjapjjesa. Jan ukasti jutïrin sum jakasiñwa suytʼasipki, ‘sumankañwa thaqapjje, qhepap arkapjjaraki’ (Sal. 34:14).

Cheqas yatiyir sartan ukhajja, janiw taqenis nayrïr kuti visitʼktan ukhajj istʼañ munapkistuti (Juan 3:19). Ukhamäkchisa, Diosajj churkistu uka espíritu santow suma arunakampi respetompi predikaskakiñatak yanaptʼistu. Ukhamatwa Jesusan aka ewjjtʼaparjam lurtanjja, jupajj akham sänwa: “Utar mantasinsti utankirinakar aruntapjjam. Sum katoqapjjätam ukhajja, jumanakan sumankañanakamajj jupanakampïpan, ukampis jan sum katoqapkätam ukhasti, uka sumankañajj jumanakjjar kuttʼanjjpan” sasa (Mat. 10:11-13). Uka ewjjtʼarjam lurañäni ukhajja, mayan kuttʼkañäni ukhajj utanejj istʼjjestaspawa.

Gobiernotak trabajipki uka jaqenakar respetompi parlasaw sumankañ utjañapatakejj yanaptʼaraktanjja. Jupanakajj jiwas conträpkchisa respetompiw parlañasa. Sañäni, África toqenkir gobiernojja, Testigonak conträsajj tantachasiñ utanak lurasiñap jarkʼänwa. Uk askichañatakejja, mä jilataruw uka gobiernon embajadorapampi parlañapatakejj Londres (Inglaterra) markan khitapjjäna. Ukhamat Testigonakajj sumankañ arunak yatiyapjjatap qhanañchañapataki. Jilatajja nayrajj África toqenwa misionerot servïna. ¿Kunjamsa jilatajj yanaptʼäna?

Jilatajj akham siwa: “Puriyäta ukhajja, katoqkitäna uka warmejj kunjam isisitänsa uk uñjasajj África toqenkkasajj kuna artï yateqkayäta uka aru parlirïtapwa amuyta. Ukatwa uka arut arunttʼayäta. Uk uñjasajj musparänwa, ukatsti kunarus sarayäta ukwa jisktʼitäna. Embajadorampiw parlañ munta sasaw respetompi sista. Jupajj jankʼakiw embajadorar telefonot jawsäna, ukatsti kuna artï yateqkayäta uka arutwa jupajj aruntitäna. Jehová Diosan Testigonakapajj kunsa lurapjjta uk qhanañchta ukhajj sum istʼitäna” sasa.

Jilatan respetompi parlatapajja, Jehová Diosan Testigonakapat sum amuyjjañatakiw embajadorar yanaptʼäna. Tiempompejja África toqenkir gobiernojj janiw tantachasiñ utanak lurasiñap jarkʼjjänti. Jilat kullakanakajj uka jan waltʼäwi sumak askichasitapat wal kusisipjjäna. Ukhamajj mayninakar respetompi uñjañäni ukhajja, walja bendicionanakwa katoqañäni, sumankañatakis yanaptʼarakistaniwa.

Jichhürunakanjja, Jehová Diosan markapan sumankañaw utji, ukhamatwa mä paraisonjam jakastanjja. Espíritu santon achuparjam sumankañan jakasiñatak chʼamachasiñäni ukhajja, Diosan markapan sumankañ utjañapatakiw yanaptʼañäni. Ukhamarus Jehová Diosajj bendisistaniwa, jutïrinsa wiñayatakiw sumankañan jakasirakiñäni (2 Ped. 3:13, 14).