1. ¿Kunanaksa Diosan Arupajj yatichistu?

JEHOVÁ DIOSAJJ Suma Yatichiri Diosawa. Yanaptʼapampejj taqe jan waltʼäwinakaruw saykatsna (Is. 30:20, 21). ‘Suma yatjjatatäñatakisa’, ukhamarak ‘taqe suma luräwinak lurañataki suma wakichtʼatäñatakis’ kunanaktï munktan ukanakwa Diosan Arupajj yatichistu (2 Tim. 3:17). Biblian yatichäwinakaparjam sarnaqtan ukhajja, ‘akapachankir jaqenakan yatiñaparjam’ sarnaqerinakat sipansa, jukʼamp yatiñanïtanwa (1 Cor. 3:19; Sal. 119:97-100).

2. ¿Kunanakatsa aka yatichäwin yatjjataskañäni?

² Kunjamtï aka yatichäwin yatjjatkañänejja, “akapachankir jaqenakan yatiñapajj” jiwasatakik taqe kuns munañatakiw chʼamañchistu. Ukhamasti, akapachankir jaqenakjam sarnaqañasa, amuyunakapampi apayasiñas facilakïspawa. Ukatwa Bibliajj akham sasin ewjjtʼistu: “Wal amuyasipjjam, ukatarak jaqenakan amuyunakapampi inamay kʼari arunakampi apayasisipkasma” sasa (Col. 2:8). Aka yatichäwinjja, kunjamsa jaqenakajj Supayan ‘kʼari arunakaparjam’ sarnaqañ qalltapjjäna ukwa pä toqet yatjjataskañäni. Sapa mayninjja, kunatsa akapachankir jaqenakan yatiñapajj jan walïki, kunatsa Biblian utjki uka yatichäwinakajj akapachan yatichäwinakapat sipansa jukʼamp sumäpacha ukanakatwa yatjjataskañäni.

3, 4. Khä 1900 marat 1930 marakamajja, ¿kunjamsa Estados Unidos markankirinakajj chacha warmjam ikthapiñat amuyjjapjjäna?

³ Khä 1900 marat 1930 marakamajja, Estados Unidos markankirinakajj janiw kunjamtï nayrajj chacha warmjam ikthapiñar uñjapkäna ukham uñj-jjapjjänti. Uka maranak nayrajja,  casaratanakakiw ikthapipjjañapa sasaw waljanejj amuyapjjäna, janirakiw jaqenak nayraqatan uka toqet parlañas walïkänti. Ukampis uka maranakat aksarojj janiw ukham amuyjjapjjänti, jan walinaksa jan ajjsartʼasaw lurjjapjjarakïna.

⁴ Khä 1920 maranakanjja, kunayman cambionakaw utjäna, ukatwa uka maranakarojj loqhe maranaka sasin uñtʼasïna. Uka toqet yatjjatiri mä warmejj akham sänwa: “Peliculanakansa, obras de teatro sasin uñtʼatäki ukanakansa, musicanakansa, novelanakansa, propagandanakansa, jukʼampiw qʼañu lurañanakajj utj-jjäna” sasa. Uñstkäna uka thoqoñanakasa isisiñanakasa, qʼañunak lurañatakiw jaqenakar chʼamañchäna. Kunjamatï Biblian qellqatäkejja, qhepa urunakan jakirinakajj ‘pachpa munañapak thaqerinaka’ ukhamäpjjañapänwa (2 Tim. 3:4).

5. ¿Kunas 1960 maranakat aksarojj pasawayi?

⁵ Khä 1960 maranakat aksarojja, chacha pura, jan ukajj warmi pura sarnaqañasa, jan casaratäkasin chacha warmjam jakañasa, divorciasiñas jaqenakatak walikëjjänwa. Peliculanakansa yaqha ukhamanakansa, jukʼampiw qʼañunak lurañanakajj uñjasïna. ¿Kuna jan walinaksa ukanakajj utjayawayi? Libronak qellqeri mä warmejj akham siwa: ‘“Qʼañunakan sarnaqapjjatapatwa” jaqenakajj chacha warmjam jaljtapjje, pornografía uñchʼukiñar yatintapjje, wali llakita uñjasipjje, yaqhepasti, sapakiw wawanakapar uywapjje’ sasa. SIDA ususa yaqha ukham usunakas waljapuniw utji. Ukanakajja, akapachankir jaqenakan yatiñapajj jan kunatak servirïtapwa uñachtʼayi (2 Ped. 2:19).

6. ¿Kunatsa Supayajj jaqenakan qʼañu juchan sarnaqapjjañap muni?

⁶ Jaqenakajj qʼañu juchan sarnaqapjjaspa ukwa Supayajj muni. Chacha warmjam jakasiñasa ikthapiñas Diosan regalopawa, ukampis jaqenakajj ukar jan respetomp uñjapjje ukhajja, Supayajj wal kusisi (Efes. 2:2). Qʼañu juch luririnakajj janiw Diosan uka regaloparuk jiskʼachapkiti, jan ukasti, wiñay jakañsa aptʼasipjjaspawa (1 Cor. 6:9, 10).

7, 8. Akapachankir jaqenakan yatiñapat sipansa, ¿Bibliajj ikthapiñ toqet kamsistusa?

⁷ Akapachankir jaqenakan yatiñaparjam sarnaqerinakajja, Biblian yatichäwinakapat larusipjjewa, ‘janiw jichhürunakan yanaptʼjjestuti’ sasaw sapjje. Akham sapjjarakiwa: “¿Kunatsa Diosajj chacha warmjam ikthapiñ munir  lurasajj uka munañanakar atipjapjjam sasin sarakpachïstu?” sasa. Jupanakajja, ‘kun lurañtï munktan ukanak lurasksnawa’ sasin amuyasaw ukham sapjje. Ukampis Bibliajja, jaqenakajj jan wali munañanakapar atipjapjjaspawa sasaw yatichi (Col. 3:5). Ukhamarusa casaratanakajj ikthapisipkaspawa sasaw Bibliajj yaticharaki (1 Cor. 7:8, 9). Ukhamajj casaratanakajj jan kunat llakisisa jan ajjsarasaw ikthapisipkaspa.

⁸ Akapachankir jaqenakan yatiñapat sipansa, kunjamsa chacha warmjam ikthapiñar uñjasiñapa ukwa Bibliajj yatichistu. Ikthapiñajj chacha warminakatak kusiskañäspawa sasaw yatichi (Prov. 5:18, 19). Ukampis akham sarakiwa: “Sapa mayni jumanakatjja pachpa cuerpopar kunjam apnaqañsa yatiñaparakiwa, ukhamat qʼoma jakapjjañamataki, Diosampis katoqatäpjjañamataki. Diosar jan uñtʼir yaqha markankir jaqenakjamajj jan sarnaqapjjamti, jupanakajj chacha jan ukajj warmi añcha munañampiw apayasipjje, ukjja jukʼampwa munapjjaraki” sasa (1 Tes. 4:4, 5).

9. 1) Khä 1900 marat 1930 marakamajja, ¿kunjamsa Diosar servirinakarojj Bibliarjam sarnaqapjjañapatak yanaptʼasïna? 2) ¿Kuna suma ewjjtʼas 1 Juan 2:15, 16 texton utji? 3) Romanos 1:24-27 textorjamajja, ¿kuna qʼañu lurañanaksa janipun lurañasäki?

⁹ Khä 1900 marat 1930 marakamajja, Diosan servirinakapajj janiw “kunatï walïki, kunatï jan walïki” uk jan sum amuyirinakampejj engañjayasipkänti (Efes. 4:19). Antisas Diosan leyinakaparjam sarnaqañatakiw chʼamachasipjjäna. Inglés arut 15 de mayo, 1926 maran mistkäna uka Yatiyañataki revistajj akham sänwa: ‘Chachanakasa warminakasa, janiw jan walinak amuyapjjañapäkiti, ni jan walinaksa lurapjjañapäkiti. Chachanakampi warminakampejj janiw jan wali amtamp uñchʼukisipjjañapäkiti’ sasa. Jaqenakajj kunayman qʼañunaksa lurapkchïnjja, Diosan servirinakapajj Bibliarjamaw sarnaqapjjäna (1 Juan 2:15, 16 liytʼañataki). Jiwasatakejj Biblianïñasa, Bibliat apstʼat yatichäwinak katoqañasa, wali kusiskañawa. Ukanakaw kuntï jaqenakajj chacha warmjam ikthapiñat amuyapki ukanakamp jan apayasiñatak yanaptʼistu * (Romanos 1:24-27 liytʼañataki).

10, 11. Bibliarjamajja, ¿kunanakas aka qhepa urunakan pasañapäna?

¹⁰ Qhepa urunakanjja, jaqenakajj ‘jupanak pachpa munasirinakäpjjaniwa’ sasaw Bibliajj qhanañchi (2 Tim. 3:1, 2). Akapachajj ukhamäpjjañapatakiw jaqenakar chʼamañchi. Mä qellqatarjamajja, “jaqenakar yanaptʼañatak walja libronakaw” 1970 maranakan uñstäna. Uka libronakat yaqhepajj “mayni pachpar uñtʼasiñataki, maynejj kunjamäkitï ukat jan llakisiñatakiw jaqenakar chʼamañchäna”. Mä librojja, “jumajj suma uñnaqtʼanïtawa, wali valoranïtawa, jumjam yaqha jaqejj janiw utjkiti” sasaw jaqenakar jukʼamp munasipjjañapatak chʼamañchäna. Uka pachpa librojja, “kunjamsa sarnaqäta, kunanaksa luräta uk juma pachpaw chuymamarjam amtjjañama” sasaw sarakïna.

¹¹ ¿Uka arunak istʼirïtati? Supayaw ukham lurañapatakejj Eva warmir chʼamañchäna. ‘Kunatejj askïki ukhamarak ñanqhäki ukanakjja yatismawa, ukatsti Diosjamäsmawa’ sasaw säna (Gén. 3:5). Jichhürunakanjja, waljaniw ukham jachʼa jachʼa tukupjje. “Kunas wali, kunas jan walïkaraki uk janiw khitisa ni Diosas siskitaspati” sasaw sapjje. Ukham amuyañaw jaqenakarojj mayjtʼayi, ukatwa chacha warmi jakañarus jan sum uñj-jjapjjeti.

12. ¿Kunsa akapachankir jaqenakajj casarasiñ toqet amuyapjje?

 ¹² Bibliajja, purapat respetasipjjañapataki, casarasipkän uka urojj kuntï arsupkäna uk phoqapjjañapatakiw chacha warminakar chʼamañchi, janipun kunäkipansa jaljtapjjañapatakiw chʼamañcharaki. Akham siwa: “Ukatpï chachajj awkipsa, taykapsa jaytjjanejja, warmipampi mayachasjjañataki, panpachanisti mä sapa jaqekïpkaspasa ukhamäpjjaniwa” sasa (Gén. 2:24). Ukampis akapachankir jaqenakan yatiñaparjam sarnaqerinakajja, “maynejj jupa pachpatakwa llakisiñapa” sasaw sapjje. Divorciasiñ toqet parlir mä librojj akham siwa: “Yaqhep casarasïwinakanjja, ‘jiwañakiw jaljtayjjestani’ sañat sipansa, ‘munasiñajj tukusjjani ukhakamakiw junto jakasiñäni’ sañwa yatipjje” sasa. Ukham amuyasaw walja chacha warminakajj jaljtapjje, jachtʼasisas sarnaqapjjaraki. Cheqas kuntï akapachankir jaqenakajj casarasiñ toqet amuyapki ukajj jan kunatak serviriwa.

13. ¿Kunatsa Diosajj jachʼa jachʼa tukurinakar uñisi?

¹³ Bibliajj akham siwa: “[Jehová Diosajja] jachʼa jachʼa tukur jaqenakarojj uñisiwa” sasa (Prov. 16:5). ¿Kunatsa Diosajj ukham jaqenakar uñispacha? Jachʼa jachʼa tukurinakasa, ukham jaqëñatak yaqhanakar chʼamañchirinakasa, Supayjamäpjjatapwa uñachtʼayapjje. Supayajj jachʼa jachʼa tukurïtapatwa Jesusarojja, mä arunjja, Diosar taqe kun lurañan yanaptʼkäna ukarojj ‘killptʼasisin adorita’ sasin säna (Mat. 4:8, 9; Col. 1:15, 16). Jachʼa jachʼa tukurinakajj ukham chuymanïpjjewa, ukatwa Diosajj akapachankir jaqenakan yatiñaparojj jan kunatak servirit uñji.

14. ¿Kunjamsa Romanos 12:3 textojj jiwas pachpat kunatï wakiski ukak amuyañatak yanaptʼistu?

¹⁴ Bibliajja, jiwas pachpat kunatï wakiski ukak amuyañatakiw yanaptʼistu. Bibliarjamajja, jiwas pachpa mä jukʼa munasiñajj walikïskiwa. Jesusajj akham sänwa: “Jaqe masimarus juma kikparjam munasirakim” sasa (Mat. 19:19). Uka arunakajja, kunatï wakiski ukanak lurasksnawa sañwa muni. Ukampis janipuniw mayninakat sipan jukʼampïksnas ukham  amuyasiñasäkiti. Bibliajj akham sistuwa: “Jan kunsa jumanakajj jiskhisiñ laykusa ni wali wal tukuñ laykus lurapjjamti, jan ukasti mayninakarojj humilde chuymamp uñjapjjam, jumanakat sipansa jilïrïpkaspas ukhama” sasa (Filip. 2:3; Romanos 12:3 liytʼañataki).

15. Kuntï Bibliajj jachʼa jachʼa tukuñat yatichki ukajj yanaptʼistaspawa sasin ¿kunatsa sista?

¹⁵ Akapachan wali yatiñanit uñtʼat jaqenakajja, kuntï Bibliajj jachʼa jachʼa tukuñat yatichki ukat larusipjjewa. Akham sapjjewa: “Yaqhanakajj jiwasat sipan jilankapjjewa sasin amuyañäni ukhajja, jaqenakajj jiwasat aprovechasiniwa” sasa. Ukampis ¿kuna jan walinaksa jachʼa jachʼa tukuñajj utjayi? ¿Ukham chuymani jaqenakasa familiapas kusisitäpjjeti? ¿Suma amigonakanïpjjeti? ¿Diosampis sumti apasipjje? Jumajj kamsasmasa, ¿Bibliati, jan ukajj akapachankir jaqenakan yatiñapach jukʼamp sum yanaptʼistaspa?

16, 17. ¿Kunatsa Diosar wal yuspärtanjja?

¹⁶ Akapachan “yatiñanïpki” uka jaqenakan ewjjanakaparjam sarnaqerinakajja, kunjamtï payinukut mä jaqejj mä lugarar puriñatak yaqha payinukutar jisktʼaskejj ukamp sasipjjewa. Jesusajja, tiempopan jakapkäna uka “yatiñan” jaqenakat akham sänwa: “Jupanakajj juykhu irpirinakäpjjewa. Mä juykhutejj yaqha juykhuru irpaspa ukhajja, panpachaniw pʼiyar jalantapjjaspa” sasa (Mat. 15:14). Cheqas Diosatakejja, akapachankir jaqenakan yatiñapajj jan kunatak serviriwa.

¹⁷ Biblian ewjjanakapajja, ‘yatichañatakisa, cheqañchañatakisa, kunatejj jan walïki ukanak askichañatakisa, cheqapar sarnaqañ yatichañatakis’ wal yanaptʼistu (2 Tim. 3:16). Cheqas Jehová Diosaw akapachankir jaqenakan yatiñapampi jan engañjatäñatakejj markap toqe yanaptʼistu, ukham luratapat wal Jupar yuspärtanjja (Efes. 4:14). Diosajja, manqʼäkaspas ukhamwa Bibliat apstʼat yatichäwinak churistu, ukaw leyinakaparjam sarnaqañatak yanaptʼistu. Cheqas Diosan Aruparjam sarnaqañajj mä suma bendicionawa.