1. ¿Kunatsa Bibliat yatjjatañajj yaqhepatak chʼamakïspa?

JICHHÜRUNAKANJJA, jakasiñataki qollqe ganasiñajj wali chʼamawa. Jilat kullakanakasat waljanejj walja horanakaw familiapar manqʼa, isi, uta churañatakejj trabajipjje. Yaqhepasti, trabajopar sarañatakisa trabajot utar kuttʼañatakis walja horanakwa aptʼasipjje. Yaqhepajj chʼama tukuña trabajonwa trabajipjje. Uru tukuyarojj wali qaritäsajja, janiw Bibliat yatjjatirjamäjjapjjeti.

2. ¿Kunapachas jumajj Bibliat yatjjatta?

² Bibliat yatjjatañatakisa, Bibliat apstʼat qellqatanakat yatjjatañatakisa, tiempo apstʼasiñasawa. Uk lurañaw Jehová Diosampi sum apasiñatakisa, wiñay jakañ katoqañatakis yanaptʼistani (1 Tim. 4:15, 16). Yaqhep jilat kullakanakajj wali alwatwa sartasipjje, ukhamat suma samartʼatäpki, taqe kunas utan chʼujukïski ukapachan yatjjatañataki. Yaqhepasti, jaypʼu toqeruw yatjjatañatakisa lupʼiñatakis tiempo apstʼasipjjaraki.

3, 4. ¿Kuna cambionakas qellqatanakatak utjawayi, ukat kunatsa?

³ Bibliat yatjjatañatak tiempo apstʼasiñajj wali wakiskiriwa, uk taqeniw yattanjja. Ukampis ¿kunsa yatjjatañasa? Inas akham amuystan: “Liyiñatakejj waljaw utjistu, ukampis janiw taqpach liyirjamäkti” sasa. Yaqhep jilat kullakanakajj taqpach qellqatanaksa liytʼapkchejja, waljanitakejj chʼamakiwa. Oraqpachan Jilïr Irpirinakajj uk yatipjjewa, ukatwa imprimiski uka qellqatanakasa Internetan utjki uka qellqatanakas jukʼak lurasjjañapatak amtapjje.

⁴ Sañäni, Anuario de los testigos de Jehová sat librojj janiw lurasjjeti. Chʼamañchtʼkir experiencianakjja, Internetan jw.org^® cheqana, ukhamarak JW Broadcasting^® programanwa  jikjjatsna. Ukhamarus jichhajja, Yatiyañataki (yatiyir sarañataki) revistasa ¡Sartapjjañäni! sat revistasa, sapa maynit kimsakiw maran lurasjje. Ukampis uka cambionakajj janiw yaqha lurañanakatak jukʼamp tiemponïñatakejj lurasiwaykiti, jan ukasti, “kunatejj wali wakiskirïki” ukatak jukʼamp tiemponïñatakiw lurasiwayi (Filip. 1:10). Ukhamajj kunas jiwasatak jukʼamp wakiskirïñapa, kunjamsa Bibliat sapak yatjjatasajj jukʼamp sum yateqsna uk uñjañäni.

5, 6. ¿Kuna qellqatanakatsa sum yatjjatañasa?

⁵ ¿Kunas jiwasatak jukʼamp wakiskirïñapa? Diosan Arup sapür liyiñatakiw tiempo apstʼasiñasa. Sapa semana Biblia liytʼañatak utjki uka programarjamajja, jukʼa capitulonakakiw jichhajj congregacionan liytʼasjje. Ukhamatwa liyktan uka toqet lupʼiñatakisa yatjjatañatakis tiempojj jukʼamp utj-jjestu. Ukhamajj uka capitulonakjja, janiw aleqak liyiñasäkiti, jan ukasti, liyktan ukajj chuymasaruw purtʼañapa, Diosar jukʼamp jakʼachasiñatakiw yanaptʼañaparakïstu (Sal. 19:14).

⁶ ¿Kuna qellqatanakatsa sum yatjjatañasaraki? Yatiyañataki (congregacionan yatjjatañataki) revistsa, Congregacionan Bibliat yatjjatañataki tantachäwitakisa, semanan apaski uka tantachäwitakis wakichtʼasiñasawa. Yatiyañataki ukhamarak ¡Sartapjjañäni! sat revistanaksa liytʼañasapuniwa.

7. Kunanakatï Internetansa, JW Broadcasting programansa uñstki taqe ukanak jan liyirjamäkstan ni uñtirjamäkstan ukhajja, ¿aynachtʼañasati?

⁷ Ukampis inas maynejj akham jisktʼaschispa: “¿Kunanakatï Internetan jw.org cheqansa, JW Broadcasting programansa utjki ukanak taqpachti liyiñaja, uñtañajaraki? Ukanakajj waljawa” sasa. Amuytʼañataki, mä tiendanjja, kunaymaniw aljañatak utji, ukampis alasirinakajj janiw taqpach alasipkiti, jan ukasti kunatï jupanakatak wakiskirïki ukakwa alasipjje. Kunanakatï Internetan uchaski ukanakampejj niya ukhamarakiwa. Jiwasatï taqe ukanak liyiñsa uñtañsa jan puedkstanjja, janiw aynachtʼañasäkiti. Qhawqtï puedktan ukakwa liyiñasa, uñtañasaraki. Ukampis ¿yatjjataña sasin kamsañsa muntanjja? ¿Kunjamsa jukʼamp sum yatjjatsna?

8. 1) ¿Kunjamsa Yatiyañataki revista wakichtʼassna? 2) ¿Kunjamsa ukham wakichtʼasiñajj yanaptʼistani?

⁸ Yatjjatañajj janiw mä yatichäw aleqak liyiñakïkiti, ni respuestanak raytʼañakïkisa, jan ukasti, yateqañ munas wali amuyumpi liytʼañawa. Sañäni, Yatiyañataki (congregacionan yatjjatañataki) revista wakichtʼaskasajja, nayraqatajj “¿Kunanakatsa yatjjataskañäni?” siski uka cheqwa liytʼañasa. Ukjjarojj yatichäwin pʼeqeñchäwipa, jiskʼa pʼeqeñchäwinaka, amtañataki utjki uka jisktʼanakwa liytʼañasaraki, ukanak liytʼasajj lupʼiñasawa. Ukjjarusti, wali amuyumpiw taqpach yatichäw kʼachitata liytʼañasa. Parrafojj parlki uk qhanañchir arunakatsa sum amuytʼañasarakiwa. Uka arunakajja, jila partejj parrafon utjki uka qallta arunakawa. Mä yatichäwi liykasajja, sapa parrafojj kunjamsa jiskʼa pʼeqeñchäwinakar yanaptʼi, kunjamsa liyktan uka yatichäwsa jukʼamp qhanañchi ukanakatwa amuytʼañasa. Jan uñtʼat arunaksa, kuna toqettï jukʼamp yatjjatañ munktan ukanaksa qellqtʼasiñasarakiwa.

9. 1) Yatiyañataki revistat yatjjatkasajja, ¿kunatsa textonakat sum amuytʼañasa, ukat kunjamsa uk lursna? 2) Josué 1:8 qellqatarjamajja, ¿kunsa textonak aleq liytʼañat sipansa lurañasa?

⁹ Yatiyañataki (congregacionan yatjjatañataki) revistat yatjjatktan ukhajja, Bibliatwa yatjjatasktanjja. Ukatwa Bibliat apstʼat  textonakat sum amuytʼañasa. Cheqas congregacionan liytʼaskani uka textonakatwa jukʼamp amuytʼañasa. Uka textonakan arunakapajj kunjamsa parrafor yanaptʼi ukanakatwa amuytʼañasa. Textonakat lupʼiñatakisa, kunjamsa ukarjam sarnaqsna uka toqet lupʼiñatakis tiempo apstʼasiñasawa (Josué 1:8 liytʼañataki).

10. Kuntï Hebreos 5:14 textojj siski ukarjamajja, ¿kunatsa awk taykanakajj Bibliat jukʼamp yatjjatañsa wakichtʼasiñsa wawanakapar yatichapjjañapa?

¹⁰ Jichhajj Bibliat familjam yatjjatañat parltʼarakiñäni. Awk taykanakajja, familjam yatjjatañajj wawanakapatak kusiskañäspa ukwa munapjje. Kuna toqetsa yatjjatapjjani uk awk taykanakas amtapjjañapäkchejja, janiw Bibliat apsuta dramanaka, yaqha ukhamanak sapa semana lurapjjañapajj wakiskapuniti. JW Broadcasting programa uñtañasa, Noé chachajj lurkäna uka arcar uñtasit mä jiskʼa arca lurañasa, yaqha ukhamanak lurañas walikïskiwa. Ukampis awk taykanakajja, Bibliat jukʼamp yatjjatañwa wawanakapar yatichapjjañapa. Wawanakajj tantachäwinakatak wakichasiña, escuelan utjki uka jan waltʼäwinakar saykatañatak wakichtʼasiñwa yateqapjjañapa (Hebreos 5:14 liytʼañataki). Wawanakatï utan Bibliat yatjjatañatak tiempo apstʼasipjjani ukhajja, tantachäwinakansa jachʼa tantachäwinakansa, sumwa istʼapjjani. Uka tantachäwinakanjja, janiw videonakajj utjkapuniti. Ukhamajj awk taykanakajja, wawanakajj qhawqha maranïpjjesa, kunjam chuymanïpjjesa ukarjamaw qhawqha tiempo yatjjatañsa amtjjapjjañapa.

11. Bibliat yateqerinakasarojja, ¿kunatsa Bibliat jukʼamp yatjjatañ yatichañasa?

¹¹ Bibliat yateqerinakasajj ukhamarakiw Bibliat jukʼamp yatjjatañ yateqapjjañapa. Qalltanjja, respuestanak raytʼasakiw Bibliat yateqañatakisa tantachäwinakatakis wakichtʼasipjje, ukajj jiwasatak walikïskiwa. Ukampis Bibliat jukʼamp yatjjatañwa jupanakar yatichañasa. Ukham lurapjjani ukhajja, jan waltʼäwinakan uñjasipjjani ukhajj janiw jilat kullakanakar yanaptʼa jankʼak mayipkaniti, jan ukasti jupanak pachpaw Bibliat apstʼata qellqatanakat yatjjatapjjani.

12. ¿Kuna amtampis Bibliat yatjjatañasa?

¹² Bibliat yatjjatañatï jiwasar jan gustkchistojja, “Bibliat yatjjatañajj nayatak janipuniw kusiskañäkaniti” sasaw amuysna. Ukampis janiw ukhamäkiti. Inas qalltan jukʼa tiempoki yatjjatsna, qhepat jukʼat jukʼatwa walja tiempo yatjjatjjsna. Ukampis ¿kuna amtampis Bibliat yatjjatañasa? Nayraqatajj Jehová Diosar  jakʼachasiñ amtampiw yatjjatañasa. Ukjjarusti, jaqenakajj jisktʼapkistu ukar qhanañchañataki, jan ukajj mä jan waltʼäwin uñjasktan ukar saykatañatakiw yatjjatañasaraki.

13. 1) Kuntï Bibliajj yatichki uk arjjatañatakejja, ¿kunsa mä waynajj lurañapa? 2) Kunjamtï Colosenses 4:6 textojj siskejja, ¿kunsa yaqhanakar yanaptʼañatakejj lurañasa?

¹³ Mä wayna jilatat parltʼañäni. Colegionjja, taqeniw yateqer masinakapajj ‘monot jutatätanwa’ sasin creyipjje. Uka waynajj kuntï Bibliajj yatichki uk arjjatañsa munkchejja, janis wakichtʼatäkaspa ukhamwa amuyasi. Ukhamajj jukʼampiw yatjjatañapa. ¿Kuna amtampis yatjjatañapa? 1) Taqe kunas Jehová Diosan luratäskapuniwa sasin jukʼamp confiyañatakiw yatjjatañapa. 2) Biblian yatichäwinakap jukʼamp sum arjjatañatakiw yatjjatañaparaki (Rom. 1:20; 1 Ped. 3:15). Nayraqatjja, “¿kunatsa yateqer masinakajajj ‘jaqejj monot jutatätanwa’ sasin creyipjjpacha?” sasinwa jisktʼasiñapa. Ukjjarusti, Bibliat apstʼat qellqatanakajj uka toqet kamsisa uk sumwa yatjjatañaparaki. Ukham lurasajja, kuntï Bibliajj yatichki uk arjjatañajj jan sinti chʼamätapwa amuyani. Cheqas jila parte jaqenakajja, respetapki uka jaqenakan satakiw ‘monot jutatätanwa’ sasin creyipjje. Ukampis uka waynajj suma yatichäwinak jikjjatani ukhajja, Bibliat yateqañ munasin jisktʼaski ukarojj yanaptʼaniwa (Colosenses 4:6 liytʼañataki).

14-16. 1) Jiwasatak jan uñtʼatäki uka librot sum yatjjatañatakejja, ¿kunsa lurañasa? 2) Aka parrafon uñstki uka textonakajja, ¿kunjamsa Amós librot jukʼamp sum amuyañatak yanaptʼistu? (“ Biblian parlki uka jaqenakar sum uñtʼapjjañäni” siski uka recuadro uñjjattʼarakïta).

¹⁴ Amuytʼañataki, jutir tantachäwinjja, profetas menores (Oseas librot Malaquías librokamaw uka sutimp uñtʼasi) sasin uñtʼatäki uka libronakat maynïritsa yatjjatañasäkaspa ukham sañäni. Inas uka libro jan sum uñtʼkstanti. Ukatakejja, nayraqatajj kunanaktï uka libro qellqerejj qellqkäna uk yatjjatañ munañatakiw chʼamachasiñasa. ¿Kunjamsa uk lursna?

¹⁵ Nayraqatajj akanakwa uka libro qellqerit jisktʼasiñasa: “¿Khitïnsa? ¿Kawkinsa jakäna? ¿Kun lurasas trabajïna?” sasa. Ukanak yatiñaw kuna arunakampitï qellqkäna uk yatiñatakisa, kuna uñachtʼäwinakampitï qellqkäna uk amuyañatakis yanaptʼistani. Ukhamajj Biblia liykañäni ukhajja, qellqerejj kunjam jaqënsa uk uñachtʼayir arunak jikjjatañatakiw chʼamachasiñasa.

¹⁶ Ukjjarojja, kunapachas uka librojj qellqasïna uk yatiñatakiw chʼamachasiñasaraki. Ukatakejja, Traducción del Nuevo Mundo de las Santas Escrituras (con referencias) sat Biblian “Tabla de los libros de la Biblia” sat cheqajj utjki ukwa liytʼsna. Diosan Arupat yatjjatañataki yanaptʼa sat folletsa liytʼaraksnawa. Páginas 14-17 (3 jalja) ukanjja, “Israel ukat Judá markanakan profetanakapampi reyinakapampi” sat pʼeqeñchäwini mä yanaptʼaw utji. Yatjjatktan uka librotï profecianakat parlir libröchejja, uka libro qellqaskäna ukhajj kunjamsa jaqenakajj jakasipjjäna uk yatjjatañaw wakisirakispa. Jaqenakan kuna jan wali sarnaqäwinakapsa profetajj askichañ munäna, khitinakas uka tiempon jakapjjäna uksa yatjjataraksnawa. Uka toqenakat jukʼamppach sum yatiñatakejja, inas Bibliankir yaqha libronak liytʼañajj wakisirakchispa. Sañäni, Amós sat profetajj jakkäna uka tiemponakan kunanakas pasäna uk jukʼamp yatiñatakejja, 2 Reyes 14:25-28 ukat 2 Crónicas 26:1-15 * textonakwa liytʼañasa. Oseas profetajj qellqkäna  uka libro liytʼañas yanaptʼarakistaspawa, jupajja, Amós profetajj jakkäna uka tiemponwa jakarakpachäna. Taqe ukanak yatiñajja, Amós profetajj jakkäna uka tiempon jakasiñajj kunjamänsa uk amuyañatakiw yanaptʼistani (Os. 1:1-11; Amós 1:1).

17, 18. Bibliat jukʼamp yatjjatañajja, ¿kunjamsa Biblia kusisit liyiñatakejj yanaptʼistaspa? Parrafon parlki uka sarnaqäwimpi, jan ukajj yaqha ukham sarnaqäwinakampiw qhanañchtʼasma.

¹⁷ Jukʼamp yateqañ amtampiw Biblia liyiñasa. Amuytʼañataki, Zacarías capítulo 12 uksa liyksna ukham sañäni, ukanjja, Mesiasajj jiwayatäñapäkäna uka toqetwa parli (Zac. 12:10). Versículo 12 ukanjja, ‘Natán chachat jutir familiajj’ Mesiasan jiwatapat wal jachapjjani sasaw qhanañchi. Uka qellqat ukhamak liyiñat sipansa akham jisktʼasiñasawa: “¿Mesiasajj Natán chachatak kunapäpachänsa? ¿Kawkinsa uka toqet jukʼamp yatjjatirista?” sasa. Yatjjatañatakejja, 2 Samuel 5:14 * textwa liytʼsna, ukanjja, Natán chachajj Davidan wawapänwa sasaw qhanañchi. Ukat Lucas 3:31 textwa liytʼaraksna, ukanjja, Jesusajj María taykap toqejj Natán chachat jutirïnwa sasaw qhanañcharaki (Yatiyañataki agosto, 2017 revistan página 32, párrafo 4 uñjjattʼäta). ¡Taqe ukanak yatiñajj wali musparkañawa! Profecianakarjamajja, Jesusajj Davidatwa jutañapäna uk sum yattanjja (Mat. 22:42). Ukampis Davidajj 20 jila wawanakanïnwa. Ukanak yatiñajja, ‘Natán chachat jutir familiajj’ kunatsa Mesiasan jiwatapat wal jachapjjäna uk amuyañatakiw yanaptʼistu.

¹⁸ Diosan yaqha serviripat parltʼarakiñäni.  Lucas capítulo 1 qellqatanjja, Gabriel angelajj María sat mä tawaqoruw visitäna, ukatsti wawaniñapäkäna uka wawat akham sänwa: “Jupasti wali jachʼäniwa, Jachʼa Diosan Wawapa satarakïniwa. Jehová Diosaw juparojj David awkipan tronop churani. Jacobun utapjjaruw jupajj wiñayataki mä Reyjam apnaqani” sasa (Luc. 1:32, 33). Inas kuntï angelajj siskäna uka qallta arunak sum amuystan, ukampis janiw ukak siskänti, jan ukasti, Jesusajj ‘mä Reyjamaw apnaqani’ sasaw sarakïna. Mariajj kunsa uka arunak istʼasajj amuypachäna. ¿‘Jesusajj Herodes lanti, jan ukajj Herodes qhepat apnaqapkani ukanakat maynïri lantiw apnaqani’ sasat amuypachäna? ¿‘Reyin mamapjamajj wali jachʼañchatäyäwa, familiajas reyin utapanwa jakasini’ sasat amuypachäna? Janiwa. Mariajj angelar ukanak sispachänwa sasin qellqatajj janiw Biblian utjkiti. Janirakiw Jesusan pä discipulonakapjamas ‘Reinon Jesusamp chika qontʼayatäñwa munirista’ sasinsa maykänti (Mat. 20:20-23). Taqe ukanakajja, Mariajj wali humilde chuymanïtapwa uñachtʼayistu.

19, 20. Kunjamtï Santiago 1:22-25 ukat Santiago 4:8 textonakajj siskejja, ¿kuna amtampis Bibliatsa qellqatanakatsa yatjjatañasa?

¹⁹ Bibliatsa qellqatanakatsa, Jehová Diosar jukʼamp jakʼachasiñ amtampiw yatjjatañasa, uk janipun armañäniti. ‘Kunjam jaqëtansa’, Diosatakjam sarnaqaskakiñatakejj kuna cambionak lurañasas wakisi uksa amuyañasarakiwa (Santiago 1:22-25; 4:8 liytʼañataki). Ukhamajj Bibliat sapa kuti yatjjatkasajja, Diosar espíritu santop mayisiñajj wali wakiskiriwa. Diosatakjam sarnaqañatakejj kuna cambionak lurañasas wakisi uk amuyañatakisa, ‘Bibliat yatjjatasin suma yatichäwinak jikjjatañatak yanaptʼitaʼ sasin mayisiñas wali wakiskirirakiwa.

²⁰ Taqenis kuntï Salmo 1:2, 3 qellqatajj Diosan mä serviripat siski ukhamäñwa muntanjja. Uka qellqatajj uka servirit akham siwa: “Jupan kusisiñapajj [Jehová] Tatitun arupawa, uka arupatsti arumay uruw lupʼi. [...] Taqe luräwinakapasti waltʼaskakipuniwa” sasa.