1. ¿Kuna toqenakatsa jan pächasktanjja?

JEHOVÁ DIOSAJJ servirinakapar wal munasi, wiñayatakiw jupanakar munasini. Taqe kunsa cheqaparjam lurasiñapwa munaraki (Sal. 33:5). Ukatwa aka toqenakat jan pächasktanti. Maya, servirinakapar tʼaqesir uñjasajja, Diosajj wal chuym ustʼayasi. Paya, servirinakapar tʼaqesiyirinakarojj castiganiwa. Aka mayachtʼat yatichäwinakat nayrïrinjja, * Moisesan Leyipajj munasiñat utjatapa ukhamarak taqenirus cheqaparjam uñjasiñapatak yanaptʼatapwa yateqawaytanjja, jan arjjatirinïpkäna ukanakarus yanaptʼarakïnwa (Deut. 10:18). Uka Leyejj qhawqsa Diosajj servirinakapat llakisi ukwa uñachtʼayistu.

2. ¿Kuna jisktʼanakarus aka yatichäwin qhanañchaskañäni?

² Moisesan Leyipajja, cristiano congregacionajj 33 maran uttʼayaskäna ukhaw tukuyjjäna. Ukhamajj ¿janit cristianonakatakejj munasiñat apsuta ukat cheqaparjam uñjasiñapatak yanaptʼir mä leyejj utj-jjañapäna? Cristianonakatakejj mä machaq leyiw utji, ukajj ‘Criston leyipa’ satawa. Aka yatichäwinjja, uka leyitwa parlaskañäni, aka jisktʼanakaruw qhanañcharakiñäni: ¿Kunatsa Criston leyipajj munasiñatwa utji sasin sissna? ¿Kunatsa uka leyejj cheqaparjam uñjasiñapatakiw yanaptʼi saraksna? Uka leyirjamajja, ¿kunjamsa familiana ukhamarak congregacionan pʼeqtʼirinakajj mayninakar uñjapjjañapa?

3. Gálatas 6:2 qellqatarjamajja, ¿kunanakarakis ‘Criston leyipajja’?

³ (Gálatas 6:2 liytʼañataki). Cristianonakajj ‘Criston leyiparjamaw’  sarnaqtanjja. Jesusajj walja leyinak arkirinakapar jaytañat sipansa, ewjjtʼanaka, mandamientonaka, wiñay yatichäwinakwa (principios) yatichäna. Taqe ukanakaw ‘Criston leyipajja’. Uka leyit jukʼamp amuytʼañatakejj mä qhawqha jisktʼanakar qhanañchañäni.

4, 5. 1) ¿Kunjamsa Jesusajj yatichäna? 2) ¿Kunapachas Jesusajj yatichäna?

⁴ ¿Kunjamsa Jesusajj yatichäna? Maya, arunakapampiw yatichäna. Jupajja, Diosat kunatï cheqäki, jaqenakajj kuna amtamp luratätansa, “Diosan Reinopakiw tʼaqesiñanak chhaqtayani” sasaw jaqenakar yatichäna, ukatwa arunakapajj chʼamanïna (Luc. 24:19). Paya, Jesusajj sarnaqatapampiw yaticharakïna. Ukhamatwa kunjamsa jakapjjañapa uk arkirinakapar yatichäna (Juan 13:15).

⁵ ¿Kunapachas Jesusajj yatichäna? Aka oraqen Diosar sirvkäna ukhaw yatichäna (Mat. 4:23). Jaktjjäna uka qhepatsa ukhamarakiw yatichäna. Amtapjjañäni, mä 500 jila arkirinakapar uñstasaw ‘jaqenakar nayan discipulojar tukuyapjjam’ sasin säna (Mat. 28:19, 20; 1 Cor. 15:6). Cristiano congregacionan Pʼeqtʼiripjamajja, alajjpachar kuttʼjjäna ukhajj arkirinakapar yatichaskakïnwa. Sañäni, niya 96 uka maranakanjja, apóstol Juan toqew ajllitanakar chʼamañchtʼäna, ewjjtʼarakïna (Col. 1:18; Apoc. 1:1).

6, 7. 1) Jesusan yatichäwinakapajj ¿kawkin qellqatasa? 2) ¿Kunjamsa Criston leyipar istʼatas uñachtʼaysna?

⁶ Jesusan yatichäwinakapajj Mateo, Marcos, Lucas, Juan libronakan qellqatawa, ukanwa kunanaktï lurkäna yatichkarakïna ukajj qhanañchasi. Griego arut qellqat mayni libronakas ukhamarakiw kunjamtï Jesusajj amuykäna uk yatiñatak yanaptʼistu, ¿kunatsa? Uka libronak qellqerinakajj espíritu santomp amuytʼayatäpjjänwa, ‘kunjamtï Cristojj amuyki uka pachpa amuyunïpjjarakïnwa’ (1 Cor. 2:16).

⁷ ¿Kunanaksa yateqsna? Jesusan yatichäwinakapajj taqe kunanwa yanaptʼistaspa. Ukhamajj Criston leyipajj utansa, trabajonsa, escuelansa, congregacionansa yanaptʼistaspawa. Griego Arut Qellqatanakat liyisa ukhamarak amuykiptʼasaw Criston leyipat yateqsna. Ukan qellqatäki uka ewjjtʼanakarjama, mandamientonakarjama, wiñay yatichäwinakarjam sarnaqasaw uka leyir istʼatas uñachtʼayaraksna. Criston leyiparjam sarnaqasajj wali munasiri  Jehová Diosaruw istʼasktanjja, Jupatwa kunanaktï Jesusajj yatichkäna ukajj juti (Juan 8:28).

8. ¿Kunas Criston leyipan cimientopäkaspas ukhamajja?

⁸ Suma lurtʼata, suma cimientonakani utan jakirinakajja, janiw “utajj allthaptaniwa” sasin ajjsaras jakapkiti. Suma uttʼayata leyirjam sarnaqerinakajj ukhamarakiw jakasipjje. Criston leyipajj mä suma cimientonïkaspas ukhamawa, uka cimientopajj munasiñawa. ¿Kunatsa ukham sistanjja?

9, 10. 1) Jesusajj munasiñatwa taqe kuns luräna sasin ¿kunatsa sissna? 2) ¿Kunsa Jesusat yateqassna?

⁹ Maya, Jesusajj munasiñatwa taqe kunsa luräna. Jiwasajj munasiñatwa mayninakat sinttʼastanjja. Ukham sinttʼasiñatwa Jesusajj usutanakar qolläna, manqʼat awtjatanakarus manqʼa churäna, jiwatanakarus jaktayarakïna (Mat. 14:14; 15:32-38; Mar. 6:34; Luc. 7:11-15). Taqe ukanak lurañapatakejj tiempow munasïna, awisajj qaritaw jikjjatasirakïna. Ukhamäkchïnsa, Jesusajj taqe chuymaw jaqenakar yanaptʼäna. Taqe ukanakat sipansa, jiwas layku jakäwip churasaw qhawqsa munasistu uk uñachtʼayawayi (Juan 15:13).

¹⁰ ¿Kunanaksa yateqsna? Jesusat yateqasitas uñachtʼayañatakejja, jiwasat llakisiñat sipansa mayninakatwa llakisiñasa, yatiyktan uka jaqenakatsa sinttʼasiñasarakiwa. Ukham sinttʼasiñata Diosan arunakap prediktan yaticharaktan ukhajja, Criston leyipwa phoqasktanjja.

11, 12. 1) ¿Kunjamatsa Diosajj jiwasat wal llakisitap yattanjja? 2) ¿Kunjamsa Diosat yateqasisajj munasiñ uñachtʼaysna?

¹¹ Paya, Jesusajj qhawqsa Awkipajj munasistu ukwa uñachtʼayäna. Aka oraqenkkäna ukhajja, qhawqsa Diosajj jiwasat llakisi ukwa Jesusajj uñachtʼayäna. Sañäni, ‘jumanakajj Diosatak wali valoranïpjjtawa’ sasaw yatichäna (Mat. 10:31). Chhaqat ovejanakajj arrepentisisin congregacionar kuttʼjjapjjaspa ukwa Jehová Diosajj wal muni sasaw Jesusajj yaticharakïna (Luc. 15:7, 10). Ukatjja, jaqenakar qhespiyañataki Yoqapar khitanisaw Diosajj munasiñap uñachtʼayawayi sasaw sarakïna (Juan 3:16).

¹² ¿Kunanaksa yateqsna? ¿Kunjamsa Diosat yateqasisin munasiñ uñachtʼaysna? (Efes. 5:1, 2). Jilat kullakanakasar wali valoranit uñjasa, Jehová Diosar kuttʼapki uka chhaqat ovejanakar sum katoqtʼasaw munasiñ uñachtʼaysna (Sal. 119:176). Jan walinakan uñjasipki uka jilat kullakanakar yanaptʼasaw munasiñ uñachtʼayaraksna (1 Juan 3:17). Mayninakar munasiñamp uñjtan ukhajja, Criston leyipwa phoqasktanjja.

13, 14. 1) ¿Kuna mandamientos Juan 13:34, 35 texton utji, ukat kunatsa uka mandamientojj machaqajja? 2) ¿Kunjamsa Jesusan mandamientoparjam sarnaqsna?

¹³ Kimsa, Jesusajj ‘kunjamtï nayajj munasipksma ukhamarak munasipjjam’ sasaw arkirinakapar yatichäna (Juan 13:34, 35 liytʼañataki). Uka mandamientojj machaqänwa, janiw Diosajj israelitanakar churkäna uka ley taypinkkänti. Jesusan arunakaparjamajja, kunjamtï jupajj munaskistu ukhamarakiw jilat kullakanakasar munasiñasa. Jiwaspachpar munasktan ukat sipansa, jukʼampiw jupanakar munasiñasa, jupanak layku jiwañatakis jankʼakïñasawa. Ukatakejj Jesusat yateqasisaw maynit maynikam munasiñasa. *

¹⁴ ¿Kunanaksa yateqsna? ¿Kunjamsa Jesusan mandamientoparjam sarnaqsna? Jilat kullakanakasar yanaptʼañataki chʼamachasisaw ukarjam sarnaqsna. Jupanak layku jiwañatakejj jankʼakïkstansa, kunayman jiskʼa luräwinak lurasaw jupanakar yanaptʼsna. Sañäni,  tantachäwir sarasajja, mä jilïr jilataru jan ukajj kullakaruw irptir sarsna. Jan ukajj cristiano masinakasampi sum apasiñatakejja, kunatï wal gustkistu ukwa apanuksna. Terremotonakana, yaqha ukham jan waltʼäwin uñjasirinakar yanaptʼañatakisti, trabajosatwa vacación apstʼassna. Ukanak lurasajj Criston leyipwa phoqasktanjja, jan ajjsarasa kusisit jakasiñ utjañapatakiw congregacionan yanaptʼaraktanjja.

15-17. 1) ¿Kunjamsa Jesusan luratanakapajj cheqaparjam uñjirïtap uñachtʼayäna? 2) ¿Kunjamsa Jesusat yateqasitas uñachtʼaysna?

¹⁵ Bibliarjamajja, “cheqaparjam uñjaña” siski ukajj kunatï Diosatak walïki uk luraña, janirak khitir yaqhachaña sañwa muni. Criston leyipajj taqe kunsa cheqaparjam uñjasiñapatakiw yanaptʼi sasajj ¿kunatsa sissna?

¹⁶ Maya, Jesusajj kunjamsa luratanakapampejj cheqaparjam uñjirïtap uñachtʼayäna uk uñjañäni. Uka tiemponjja, judío religión pʼeqtʼirinakajj yaqha markankirinakar uñisipjjänwa, aleq jaqenakarojj jiskʼachapjjänwa, warminakarus janiw respetapkänti. Ukampis Jesusajj janipuniw khitirus yaqhachirïkänti, cheqaparjamaw jaqenakar uñjirïna. Sañäni, jupar confiyiri yaqha markankir jaqenakarojj munasiñampiw katoqäna (Mat. 8:5-10, 13). Qamirïpasa pobrëpasa, taqeniruw Diosan arunakap yatiyäna (Mat. 11:5; Luc. 19:2, 9). Janiw warminakarojj jiskʼachirïkänti, ni jan wali arunakampis parlirïkänti. Antisas respetompi, munasiñampiw jupanakar uñjäna, jiskʼachat warminakarus sumwa uñjäna (Luc. 7:37-39, 44-50).

¹⁷ ¿Kunanaksa yateqsna? Jaqenakar jan yaqhachasa, ukhamarak taqenir predicasaw Jesusat yateqasitas uñachtʼaysna. Kuna religionatäsipkpansa, qamirïsipkpansa janisa taqeniruw predicañasa. Jilatanakasti, warminakar respetomp uñjasaw Jesusat yateqasipjjarakispa. Ukham lurasajja, Criston leyipwa phoqasktanjja.

18, 19. 1) ¿Kunsa Jesusajj cheqaparjam uñjañat yatichäna? 2) ¿Kunsa Jesusan yatichäwinakapat yateqsna?

¹⁸ Paya, Jesusajj kunsa cheqaparjam uñjañat säna uk yatjjatañäni. Mayninakar cheqaparjam uñjapjjañapatakejja, Jesusajj sumwa arkirinakapar yatichäna. ‘Kunjamtï jaqenakampi uñjatäñ munapktajja, ukhamarak jupanakar uñjapjjam’ sasaw säna (Mat. 7:12). Uka arunakat amuytʼañäni. Niyakejjay taqenis cheqaparjam uñjatäñ munstanjja, cheqaparjamaw mayninakar uñjañasaraki. Ukhamatwa jupanakajj cheqaparjam uñjapjjarakistani. Ukampis ina chʼusat tʼaqesiyat uñjasiwaystan ukhajja, ¿kunsa lurañasa? Jesusajj arkirinakapar akham sänwa: “¿Janit Diosajj uruy aruma arnaqasir ajllitanakaparojj yanaptʼkani, ukhamat cheqapar uñjatäpjjañapataki?” sasa. Uka arunakaruw confiyañasa (Luc. 18:6, 7). Cheqas ukajj Diosan mä promesapawa. Kuna jan walinakantï aka qhepa urunakan uñjasktan uk Diosajj sumwa yati, jan walinak lurapkistu ukanakarus horasaparuw castigani (2 Tes. 1:6).

¹⁹ ¿Kunanaksa yateqsna? Jesusan yatichäwinakaparjam sarnaqañäni ukhajja, cheqaparjamaw mayninakar uñjañäni. Ukampis jiwasatï aka pachan jan waltʼayat uñjasiwaystanjja, Jehová Diosaruw confiyañasa, Jupaw jan walinak lurapkistu ukanakar castigani, mä arunjja, justicia lurani.

20, 21. 1) ¿Kunjamsa pʼeqtʼirinakajj mayninakar uñjapjjañapa? 2) Casarat chachanakajja, ¿kunjamsa Jesusjam munasirïpjjatap uñachtʼayapjje? 3) ¿Kunjamsa awk taykanakajj wawanakapar uñjapjjañapa?

²⁰ Kunjamtï yateqawayktanjja, Criston leyipajj munasiñatwa utji. Ukhamasti, uka leyirjam sarnaqeri pʼeqtʼirinakajj respetompi,  munasiñampiw mayninakar uñjapjjañapa. Cristojj taqe kunsa munasiñamp lursna ukwa muni, uksa janiw armapjjañapäkiti.

²¹ Familiana. Chachajja, ‘kunjamtï Cristojj congregacionar munaski’ ukhamwa warmipar munasiñapa (Efes. 5:25, 28, 29). Esposapar ukham munasir chachajja, jupat llakisiñat sipansa esposapar yanaptʼañatakiw jukʼamp chʼamachasi. Yaqhep chachanakajj inas familiapan tʼaqesiyata, jan munata ukham jilsuwayapjjchi, ukatwa warmipar sum uñjañajj jupanakatak chʼamakïspa. Ukhamäkchisa, Criston leyiparjam sarnaqañ munir chachanakajja, warmipar munasiñatakiw chʼamachasipjjañapa. Warminakajj Jesusjam munasir chachaparojj respetompiw uñjapjje. Wawanakapar taqe chuyma munasir awk taykanakasti, janipuniw arumpisa ni luratanakampis wawanakapar chuym ustʼayapkiti (Efes. 4:31). Antisas jan ajjsarasa kusisit jakasipjjañapatakejj munasiñampiw uñjapjje. Ukhamatwa wawanakajj awk taykapar munasipjje, confiyapjjaraki.

22. Kuntï 1 Pedro 5:1-3 textojj siski ukarjamajja, ¿khitis jilat kullakanakan dueñopajja, ukat kunjamsa jupanakar uñjasiñapa?

²² Congregacionana. Jilïr irpirinakajja, janiw jilat kullakanakarojj jupanakankkaspas ukham uñjapjjañapäkiti (Juan 10:16; 1 Pedro 5:1-3 liytʼañataki). ‘Diosan congregacionapa’, ‘Diosan herenciapa’ siski uka arunakajja, jilat kullakanakajj Jehová Diosankatapwa amuytʼayistu. Jupasti, munasiñamp uñjatäpjjaspa ukwa munaraki (1 Tes. 2:7, 8). Jilat kullakanakar ukham uñjir jilïr irpirinakajja, Diosamp askit uñjatäpjjewa, jilat kullakanakan munatäpjjewa, respetomp uñjatäpjjarakiwa.

23, 24. 1) Congregacionan mä jachʼa juchajj utji ukhajja, ¿kuna toqensa jilïr irpirinakajj juchanir yanaptʼapjje? 2) Mä jachʼa juchajj utji ukhajja, ¿kunanakatsa jilïr irpirinakajj amuykiptʼapjjañapa?

²³ Moisesan Leyiparjamajja, markankir jilïrinakampi  juezanakampiw Diosar yupaychañansa, chʼajjwañanakansa, jaqe jiwayañanakajj utjkäna ukansa, yaqha ukhamanakansa israelitanakar yanaptʼapjjañapäna. Ukampis Criston leyiparjamajja, mä jachʼa juchajj congregacionan utji ukhajja, kunjamsa juchanejj Diosamp sum apasiskakispa ukakwa jilïr irpirinakajj uñjapjjañapa. Diosajj akapachankir autoridadanakaruw jan waltʼayasiñanaksa, chʼajjwañanaksa, jaqe jiwayañanaksa, yaqha ukham jan waltʼäwinaksa juzgapjjañapatak uchawayi. Jupanakaw kuna multanakas pagasini, juchanejj carcelar saraniti janicha uk amtjjapjjañapa (Rom. 13:1-4).

²⁴ Ukhamajj congregacionan mä jachʼa juchajj utji ukhajja, ¿kunsa jilïr irpirinakajj lurapjje? Juchanejj kunanaksa lurawayi, ukham luratapat kunjam uñjatänisa uk Bibliarjamaw amtapjje. Jilïr irpirinakajj ak janiw armapkiti, Criston leyipajj munasiñatwa utji. Ukatwa yaqhan jan waltʼayata, jan ukajj abusat uñjasiwayapki ukanakar kunjamsa yanaptʼasispa uk amuytʼapjje. Juchachasirejj juchapat arrepentisiti janicha uksa munasiñatwa amuykiptʼapjjaraki, ukhamat Diosampi wasitat sum apasiñapataki.

25. ¿Kunsa akjjar jutki uka yatichäwin yatjjataskañäni?

²⁵ Criston leyip utjatapat Diosar wal yuspärtanjja. Ukarjam sarnaqañatak taqeni chʼamachastan ukhajja, wali valoranit uñjata, wali munata, jarkʼaqata ukhamaw taqenis congregacionan jikjjatasipjje. Ukampis aka jan wali pachanjja, ‘jan wali jaqenakajj jan walit jukʼamp jan waliruw sarasipki’ (2 Tim. 3:13). Ukatwa wali amuyump sarnaqañasa. Maynitï mä wawar abuschi ukhajja, ¿kunjamsa jilïr irpirinakajj Diosat yateqasisin uka jucha cheqaparjam askichapjjaspa? Akjjar jutki uka yatichäwinwa uk yatjjataskañäni.