1. Juchar purtʼasirinakat yaqhepajja ¿kunsa amuyapjje?

“¡WALI llakkañ jaqëtwa!” sasaw Apóstol Pablojj säna (Rom. 7:24). Jichhürunakanjja, Jehová Diosan servirinakapat waljaniw ukham llakisipjjaraki. Niyakejjay nayra awk taykasat jucha katoqawaystanjja, Diosatakjam sarnaqañatak chʼamachaskasas taqeniw pantjastanjja, jucharus purtʼasiraktanjja. Jachʼa juchar purtʼasirinakat yaqhepajja, Diosajj janipuniw perdonkitaniti sasaw amuyasipjje.

2. 1) Salmo 34:22 textorjamajja, ¿kunatsa Diosar servirinakajj juchar purtʼasipjjatapat jan sinti llakisipjjañapäki? 2) ¿Kunsa aka yatichäwin yatjjataskañäni? (“¿Imantasiñ markanakajj kun sañsa munpacha? ¿Jan ukajj mä yatichäwikicha?” siski uka recuadro uñjjattʼäta).

² Jehová Diosar imantasirinakajja, janiw juchapat sinti llakisipkaniti sasaw Bibliajj qhanañchi (Salmo 34:22 liytʼañataki). * ¿‘Jehová Diosar imantasiñajj’ kamsañsa muni? ¿Diosampi perdonayasiñatakisa khuyaptʼayasiñatakis kunsa lurañasa? Uka  jisktʼanakarojja, Israel markan utjkäna uka imantasiñ markanakajj kunatakïnsa uk yatjjatasaw qhanañchaskañäni. Uka markanakajj Leyinakarjam lurat pactorjamaw (pacto de la Ley) utjäna, uka Leyisti 33 maranwa Pentecostés fiestan yaqhampi cambiatäjjäna. Jehová Diosaw uka Ley churäna. Ukhamajj imantasiñ markanak utjatapajja, Diosajj kunsa juchatsa, juchachasirinakatsa, juchapat arrepentisirinakatsa amuyi, ukwa amuytʼayistu. Kunatsa Israel markan imantasiñ markanakajj utjäna, kunas uka markanakan lurasïna ukwa nayraqat yatjjataskañäni.

3. ¿Kunsa Israel markan jaqe jiwayirinakampejj lurasiñapäna?

³ Mä israelitan jaqe jiwayañapajja, Jehová Diosatakejj janipuniw walïkänti. Jiwayaspäna ukhajja, jiwatan jakʼa parientepat mä chachaw jupar jiwayañapäna (Núm. 35:19). Ukhamatwa jaqe jiwayirejj pachpa vidapampi jan juchani jaqer jiwayatapat pagañapäna. Jiwatan jakʼa parientepajj jankʼakiw uk lurañapäna, ukhamat Suma Oraqejj jan qʼañuchatäñapataki. Jehová Dios pachpaw akham säna: “Jan kuna jaqe jiwayañampis qʼañuchapjjamti, kawkïri markantejj jakapkta ukarojja” sasa (Núm. 35:33, 34).

4. Mä israelitatï jan munkasina maynir jiwayaspänjja, ¿kunsa lurañapäna?

⁴ ¿Mä israelitan jan munkasin jaqer jiwayatapajj Suma Oraqer qʼañuchañampi sasirakïnti? Jïsa, mä jaqer jiwayatapatwa juchanïna (Gén. 9:5). Niyakejjay jan munkasin jiwaychïnjja, Jehová Diosajj jupat khuyaptʼayasïnwa. Ukatwa jiwayatan jakʼa parientepampi jan jiwayatäñatakejj imantasiñ markaru tʼijtjjañapäna. Ukampis jilïr sacerdoten jiwañapkamaw uka markankañapäna (Núm. 35:15, 28).

5. Jehová Diosajj wali khuyaptʼayasiriwa, ¿kunjamsa imantasiñ markanakajj uk amuyañatak yanaptʼistu?

⁵ Jehová Diosajj akham sasaw Josué chachar säna: “Israelit jaqenakampi parlam, ukatsti sarakim mä markanaka thaqhasipjjam ukaru imantasiñataki” sasa (Jos. 20:1, 2, 7, 8). Ukhamasti Jehová Dios pachpaw imantasiñ markanak ajlliyäna. Ukatwa akham jisktʼasiñasa: “¿Imantasiñ markanakajj kunjamsa Jehová Diosan wali khuyaptʼayasirïtap amuyañatak yanaptʼitu? ¿Kunjamsa Jehová Diosar imantasiñ yatichitu?” sasa.

6, 7. 1) ¿Kunsa jilïrinakajj jan munkasin jaqe jiwayirimpi lurapjjañapäna? (Página 8 ukankir dibujo uñjjattʼäta). 2) ¿Kunatsa jaqe jiwayirejj jilïrinakampi parlañapäna?

⁶ Mä israelitatï jan munkasin maynir jiwayaspänjja, jankʼakiw imantasiñ markar escapjjañapäna, ukatsti marka mantañaru purisajj jilïrinakaruw kuntï lurki uk arsusiñapäna, jilïrinakasti sumwa katoqtʼapjjañaparakïna (Jos. 20:4). Mä qhawqha tiempotjja kawkïr markantï jaqe jiwaykäna ukaruw apayapjjañapäna, ukhamat ukankir jilïrinak juzgapjjañapataki (Números 35:24, 25 liytʼañataki). Cheqapun jan munkasin jiwayatap yatisasti, imantaskäna uka markaruw kuttʼayjjapjjañapäna.

⁷ ¿Kunatsa jaqe jiwayirejj jilïrinakampi parlañapäna? Jupanakaw Jehová Diosan khuyapayasiñap katoqañapatakisa, Israel markan qʼomäñapatakis yanaptʼapjjañapäna. Biblianakat yatjjatiri mä chachajj akham sänwa: ‘Jaqe jiwayiritï jilïrinakampi jan parlkaspänjja, jiwayataw uñjasispäna. Diosan mayitanakap jan istʼatapatjja, jupa pachpaw jiwatapat juchanïspäna’ sasa. Jan munkasin jaqe jiwayiritakejja yanapajj utjänwa, ukampis jupaw thaqañapäna, istʼañaparakïna. Imantasiñ markanakar jan escapkaspänjja, jiwirin mä familiarapaw jiwayaspäna.

8, 9. Jachʼa juchar purtʼasiri mä cristianojj ¿kunatsa jilïr irpirinakar yanaptʼa mayiñapa?

 ⁸ Jichhürunakanjja, jachʼa juchar purtʼasir mä cristianojj ukhamarakiw congregacionankir jilïr irpirinakampi yanaptʼayasiñapa. ¿Kunatsa ukham lurañapajj wali wakiskiri? Maya, jachʼa juchar purtʼasirinakarojj jilïr irpirinakaw yanaptʼapjjañapa sasaw Jehová Diosajj Biblian qellqayäna (Sant. 5:14-16). Paya, juchapat arrepentisirinakarojj jilïr irpirinakaw Diosampi wasitat sum apasjjañapatakisa, jan walinak jan lurjjañapatakisa yanaptʼapjjaspa (Gál. 6:1; Heb. 12:11). Kimsa, juchapat arrepentisirinakan llakimpi jan aynachtʼapjjañapataki yanaptʼatäpjjañapatakisa, Diosaw jilïr irpirinakar yatichi ukhamarak ajlli. Jilïr irpirinakajj ‘jachʼa mathapi thayan imantasiñampi’ sasiwa sasaw Jehová Diosajj säna (Isa. 32:1, 2). Taqe ukanakajja, Jehová Diosajj wali khuyaptʼayasirïtapwa uñachtʼayistu.

⁹ Jilïr irpirinakampi parlañajj waljaniruw chuymachtʼawayi, yanaptʼawayaraki. Sañäni, Daniel sat mä jilatajj jachʼa jucharuw purtʼasïna, ukampis walja phajjsinakaw jilïr irpirinakar jan yatiykänti. Jupajj akham siwa: “Niyakejjay walja tiempo pasjjchejja, jupanakajj janjakiw yanaptʼjjapjjetaspati sasaw amuyjjayäta” sasa. Katjapkitanicha sasaw wal ajjsararakïna, Diosar orasiñatakejj perdón mayisisapunis qalltañäkaspa ukhamwa amuyarakïna. Qhepatsti, jilïr irpirinakaruw yanaptʼa mayïna. Uka tiempot amtasajj akham siwa: “Jupanakampi parlañ wal ajjsarayäta. Ukampis jupanakampi parltʼasajj mä jathi qʼepsa apaqaskirista ukhamänwa” sasa. Uka qhepatsti, Daniel jilatajj jan ajjsartʼasaw Diosar orasjjäna. Jichhajj qʼoma conciencianëjjewa, congregacionan yanapiripjamaw irnaqaskaraki.

10. Khuyaptʼayatäñatakejj ¿kunsa jaqe jiwayirejj lurañapäna?

¹⁰ Jan munkasin jaqe jiwayiritï khuyaptʼayatäñ munchïnjja, jankʼakiw imantasiñ markar  escapjjañapäna (Josué 20:4 liytʼañataki). Uka markanjja, jilïr sacerdoten jiwañapkamaw qheparañapäna, jupatï uka markar jan escapkaspänjja, jiwayataw uñjasispäna. Trabajopsa suma utapsa jaytañapänwa, janirakiw viajiñapäkänti (Núm. 35:25). * Ukham lurañapajj janiw inamayäkänti. Jupatï imantasiñ markat mistuspänjja, jaqer jiwayatapat janis arrepentiskaspa ukhamäspänwa, jiwayataw uñjasirakispäna.

11. ¿Jehová Diosan khuyaptʼayatapat kunjamsa mä cristianojj yuspäraspa?

¹¹ Jichhürunakanjja, ukhamarakiw juchapat arrepentisirinakajj jankʼaki yanaptʼa thaqapjjañapa, ukhamat Jehová Diosan khuyapayasiñap katoqañataki. Ukatsti uka jan waljja, jan mayampitakiw jaytjjañapa, kunanakatï juchar puriykaspa ukanaksa janiw lurjjañapäjjeti. Jehová Diosan amuytʼayataw apóstol Pablojj Corinto markankir cristianonakar akham säna: “Diosatakjam llakisipjjatamajj wal chʼamachasiñatakiw yanaptʼapjjtamjja. Jïsa, qʼomachasiñataki, juchar uñisiñataki, Diosar ajjsarañataki, taqe chuyma arrepentisiñataki, jankʼaki jan walinak askichañatakiw yanaptʼapjjtamjja” sasa (2 Cor. 7:10, 11). Jiwasatï jachʼa juchanak apanukuñatak chʼamachasiñäni ukhajja, Jehová Diosampi perdonatäñat llakisitasa, Jupamp khuyaptʼayatäñ munataswa uñachtʼayañäni.

12. Diosan khuyaptʼayasiñap katoqañatakejja, ¿kunanaksa mä cristianojj apanukuñapa?

¹² Jehová Diosan khuyaptʼayasiñap katoqañatakejja, ¿kunanaksa mä cristianojj apanukuñapa? Kunanakatï juchar puriykaspa, kunanaktï wal munki ukanaksa apanukuñapawa (Mat. 18:8, 9). Sañäni, amigonakasatï juchar puriyirjamächejja, ¿jupanakampi chikachasiskakiñäniti? Alcoholani umañanak mä jukʼa umtʼasajj jukʼampi munirïstan ukhajja ¿uka umañanak jiljañar apkistaspa ukanakat jitheqtjjañäniti? Qʼañu lurañanak munañanakaru apanukuñatak chʼamachasiskstanjja, ¿jan wali peliculanaksa, Internetan utjki uka jan walinaksa uñchʼukiskakiñäniti? ¿Kunanakatï jan walinak lupʼiykistaspa ukanaksa apanukjjañäniti? Jehová Diosar taqe chuyma serviñatak chʼamachasitasajj janiw inamayäkaniti. Jupat jitheqtañajj wali llakkañawa, ukampis ‘khuyapayasiñap’ katoqañajj wali kusiskañawa (Isa. 54:7, 8).

13. ¿Kunatsa jaqe jiwayirejj imantasiñ markan jan ajjsarasa, kusisita jakasispäna?

¹³ Nayra tiemponjja, jan munkasina jaqe jiwayirirojj imantasiñ markanjja janiw khitis jiwaykaspänti. Jehová Diosaw uka markanakajj “imantasiñapatakïniwa” sasin säna (Jos. 20:2, 3). Janirakiw uka juchapat mayampi juchañchatäñap munkänti. Jiwatan parientepas janirakiw imantasiñ markar mantasajj jiwaykaspänti. Uka markanjja, Jehová Diosaw jarkʼaqäna, janiw kuna jan walis paskaspänti. Janiw mä carcelankkaspas ukhamäkanti, ukanjja trabajaspänwa, yaqhanakarus yanaptʼaspänwa, Jehová Diosarus serviskaspänwa. Imantasiñ markanjja kusisitaw jakasispäna.

14. Jachʼa juchapat arrepentisirejja, ¿kunsa jan ajjsarañapäki?

¹⁴ Yaqhepajj jachʼa juchapat arrepentisjjapkchisa, juchañchasisipkakiwa. Jehová Diosajj janipuniw uka juchajj armkaniti sasaw amuyapjje. Jumatï ukham amuyasstajja, ak amtañamawa, Jehová Diosajj khuyaptʼayasiñapatwa wiñayatak perdontamjja, janiw llakisjjañamäkiti. Párrafo llätunkan parltʼaniwayktan uka Daniel jilatajja, uka arunakajj cheqäskapunitapwa uñjäna. Jilïr irpirinakajj cheqañchapkäna,  qʼoma conciencianïñapatakis yanaptʼapkäna uka qhepatwa chuymas chuymäjjäna. Jupajj akham sänwa: “Janiw naya pachpajj juchañchasjjayätti. Perdonatäjjtan ukajja, wiñayatakiwa. Kunjamtï Jehová Diosajj siskejja, jupajj wali jayarus juchanakas apkaspa ukhamawa. Janirakiw uka juchanakasat mayampi juchañchjjestaniti” sasa. Amtañäni, imantasiñ markanjja jiwatan familiarapaw jiwayitaspa sasin janiw ajjsarañapäjjänti. Ukhamarakiw Jehová Diosajj perdonkistu ukhajja, mayampiw Diosajj uka juchajat juchañchitani sasin jan ajjsarañasäkiti (Salmo 103:8-12 liytʼañataki).

15, 16. Jesusajj jiwas laykuw jiwawayi, Jilïr Sacerdotesarakiwa, ¿kunjamsa uk yatiñajj yanaptʼistu?

¹⁵ Israelitanakat sipansa, Jehová Diosan khuyaptʼayasirïtap jukʼampiw jiwasajj confiyañasa. Apóstol Pablojja, janiw Jehová Diosar jan pantjasis sirvkänti. Jupajj akham sänwa: “¡Jesucristo Tatitus taypiw nayajj Diosar yuspärta!” sasa (Rom. 7:25). Niyakejjay juchapat arrepentisjjchïnjja, Jehová Diosajj Jesusan sutipjjaruw perdonitu sasaw säna. Amtapuniñäni, Jesusajj jiwas laykuw jiwawayi, ukhamatwa jan llakisisa qʼoma concienciani jakassna (Heb. 9:13, 14). Niyakejjay Jesusajj Jilïr Sacerdotesächejja, “khitinakatejj jupa taypi Diosar jakʼachasipki ukanakarojja jupajj salvaspawa, jupanakataki Diosar ruwtʼañatakis jakaskakiniwa” (Heb. 7:24, 25). Nayra tiemponjja, jilïr sacerdotew israelitanakarojj Jehová Diosampi perdonayasiñatak yanaptʼapjjäna, jichhürunakanjja, Jehová Diosan khuyapayasiñap katoqañatakejj Jilïr Sacerdote Jesusaw horasapar yanaptʼistu (Heb. 4:15, 16).

¹⁶ Ukhamajj Jehová Diosar imantasiñatakejja, Jesusan jakäwip loqtasitaparuw confiyañasa. Jesusajj taqe jaqenak laykus jiwkchejja, sapa maynitakiw jiwaraki, ukarojj taqe chuymaw confiyañasa (Gál. 2:20, 21). Jehová Diosajj Jesusan loqtasitapjjaruw juchanakas sapa maynir perdonistu, uka laykurakiw wiñay jakañ katoqsna, ukanakarojj taqe chuymaw confiyañasa. Jesusan jaqenak layku jiwatapajj Jehová Diosan mä suma regalopawa.

17. ¿Kunatsa Jehová Diosar imantasiñ muntajja?

¹⁷ Imantasiñ markanak utjkäna ukajja, Jehová Diosajj kunja khuyaptʼayasirisa uk amuyañatakiw yanaptʼistu. Jupatakejj jakañ vidajj wali valoraniwa, ukwa amuytʼayarakistu. Imantasiñ markanakan kunatï luraskäna ukarjamajja, kunjamsa jilïr irpirinakajj juchapat arrepentisirinakar yanaptʼapjje, cheqpach arrepentisiñajj kunasa, Jehová Diosajj perdonistuwa sasajj kunatsa taqe chuyma confiysna, ukanakwa qhan amuytʼayistu. Ukhamajj Jehová Diosaruw imantasiñasa. Janiw Jupjam yaqha imantasiñajj utjkiti (Sal. 91:1, 2). Jutïr yatichäwinjja, imantasiñ markanak utjkäna ukanakatjja, kunjamsa Jehová Diosjam khuyaptʼayasirïña, cheqaparjam uñjirïña yateqassna ukwa yatjjataskañäni.