1, 2. 1) ¿Kunjam chuymampis Jesusajj Diosan Leyip uñjäna? 2)  Fariseonakampi escribanakampejj munañaparjamakiw Diosan Leyinakap phoqapjjäna sasajj ¿kunatsa sissna?

JESUSAJJ Moisesan Leyiparojj wal munasïna, kunattejj uka Leyjja Jehová Diosaw churäna, Awkiparus wal munasirakïna. Jesusajj qhawqsa Diosan leyinakapar munasini, uka toqetjja Bibliajj akham sänwa: “Dios Tatitojjay, munañam lurañaw kusisiyitu; yatichäwinakamajj chuymajjankiwa” sasa (Sal. 40:8). Diosan Leyipajj cheqapätapa wali wakiskirïtapjja, Jesusajj arupampi luratapampiw uñachtʼayäna. Leyipajj phoqasipuniniwa sasaw sarakïna (Mat. 5:17-19).

² Fariseonakampi escribanakampejj Diosan Leyipjja munañaparjamakiw phoqapjjäna, uk uñjasajja Jesusajj wal llakispachäna. Jupanakajja kunanakatï jan sinti wakiskirïkäna ukakwa phoqapjjäna. Ukatwa Jesusajj akham säna: “Jumanakajj yerbabuenatsa, eneldotsa, cominotsa diezmo churapjjtawa. Ukampis cheqapar sarnaqañsa, khuyapayasirïñsa, Diosat jan jitheqtañsa apanukupjjtawa” sasa (Mat. 23:23). Fariseonakajja kunatsa Leyejj utjäna ukanak janiw amuyapkänti, ukhamäkchïnsa jupanakakis leyinak sum phoqapkaspa ukhamwa amuyasipjjäna. Ukampis Jesusajj kunatsa Diosan  Leyipajj utjäna, kunsa uka Leyejj Jehová Diosat yatichäna ukanak sum amuyäna.

3. ¿Kunanakatsa aka yatichäwin yatjjataskañäni?

³ Cristianonakajj janiw Moisesan Leyip phoqañasajj wakisjjeti (Rom. 7:6). Ukhamajj ¿kunatsa Diosajj Bibliar qellqaypachäna? Jupajj sum amuyañasataki ukarjam sarnaqañasatakiw qellqayawayi. Kunatï jukʼamp wakiskirïki uk phoqañaswa muni, mä arunjja, kuna amtampis Leyejj utjäna uk amuyañaswa muni. Sañäni, ¿kunsa imantasiñ markanakajj Jehová Diosat yatichistu? Pasïr yatichäwinjja, jan munkasin jaqe jiwayirejj kunsa khuyaptʼayatäñatakejj lurañapäna ukwa yateqawaytanjja. Aka yatichäwinjja kunsa imantasiñ markanakajj Jehová Diosat yatichistu, kunjamsa Jupat yateqassna ukanakwa yatjjataskañäni. Aka jisktʼanakaruw qhanañchaskañäni: ¿Imantasiñ markanakajj kunsa Jehová Diosan khuyapayasiñapat yatichistu? ¿Kunjamsa Diosajj jakañ vidar uñji ukanakats kunsa yatichistu? ¿Jehová Diosajj cheqaparjam taqe kuns uñjki ukanakat kunsa yaticharakistu? Ukanakat yatjjatkasajj kunjamsa Jehová Diosat yateqassna ukwa amuytʼañasa (Efesios 5:1 liytʼañataki).

4, 5. 1) Jan munkasin jaqe jiwayirin imantasiñ markar ratuk puriñapatakejja, ¿kunanakas lurasïna, ukat kunatsa? 2) ¿Kunsa ukajj Jehová Diosat yatichistu?

⁴ Sojjta imantasiñ markanak ujtkäna ukar puriñajj jan chʼamäñapatakejja, Jehová Diosajj Jordán jawirat sapa ladorojj kimsa marka ajllisipjjäta sasaw säna, ukhamat jan munkasin jaqe jiwayirejj ratuk puriñapataki (Núm. 35:11-14). Israelitanakajj uka markanakar apir thakinakjja sum askichapjjañapäna (Deu. 19:3). Judionakan costumbreparjamajja, uka markanakar ratuk puriñatakejj letreronakaw thakir uchasirïna. Ukhamatwa jan munkasin jaqe jiwayirejj jan yaqha markanakar sarkaspänti, yaqha markanjja inas yaqha diosanakar adorjjchispäna.

⁵ Ak amuytʼañäni, jaqe jiwayirinakajj jiwayatäñapawa sasaw Diosajj säna. Ukampis jan munkasin jaqe jiwayirinakat khuyaptʼayasïnwa, jan walinakatsa jarkʼaqarakïnwa. Biblia toqet yatjjatir mä chachajj akham sänwa: “Taqe kunas suma lurtʼatawa, janiw kunas chʼamäkiti” sasa. Jehová Diosajj janiw servirinakaparojj pantjasitanakapat jankʼaki juchañchkiti, antisas “khuyapayasiñapajj wali jachʼawa” (Efe. 2:4).

6. ¿Fariseonakajj Diosjam khuyaptʼayasirïpjjänti?

⁶ Fariseonakajj janiw Jehová Diosjam khuyaptʼayasirïpkänti. Amuytʼañataki, costumbreparjamajja maynitï kimsa kuti uka pachpa pantjaschïna ukhajja, janiw perdonapjjerïkänti. Ukham lurapjjatapajj kunja jan walïnsa uk amuytʼayañatakejja, kunjamsa mä fariseompi impuesto cobririmpejj jakʼa puran Diosar mayisipjjäna uka toqetwa Jesusajj parläna. Impuesto  cobrirejj Diosan khuyaptʼayatäñatakiw wal ruwtʼasïna, fariseosti akham sarakïnwa: “Diosay yuspärsmawa, janiw nayajj mayni jaqenakjamäkti. Jupanakajj lunthatasiri, jan cheqapar sarnaqeri, adulterio jucha luriri ukhamäpjjewa, janirakiw ni aka impuesto cobrir jaqjamäktsa” sasa. Fariseonakajja janis jaqenakar khuyaptʼayañäkaspa, ‘janis kunäpkaspa ukhamwa uñjapjjerïna’ (Luc. 18:9-14).

7, 8. 1) Maynitï chuym ustʼayistani ukhajja, ¿kunjamsa Jehová Diosjam khuyaptʼayasirïsna? 2) ¿Kunatsa mayninakar perdonañatakejj humilde chuymanïñasa?

⁷ Jiwasajj Jehová Diosjam khuyaptʼayasirïñasawa, janiw fariseonakjamäñasäkiti (Colosenses 3:13 liytʼañataki). Jiwasar perdón mayisiñjja janiw khitis ajjsarañapäkiti (Luc. 17:3, 4). Akham jisktʼasiñasawa: “¿Maynir perdonañ wakiski ukhajj perdonaskakti? ¿Chuym ustʼaykitu ukamp sumankthapiñ walti muntjja?” sasa.

⁸ Perdonañatakejj altʼat chuymanïñasawa. Janiw fariseonakjamañasäkiti, jupanakajj janis kunäpkaspa ukhamwa yaqhanakar uñjapjjerïna, ukatwa jan perdonapjjerïkänti. Ukampis jiwasajja, altʼat chuymampiw ‘mayninakajj jiwasat sipan jilïrïpkaspas’ ukham uñjañasa, taqe chuymaw perdonañasaraki (Fili. 2:3). Akhamwa jisktʼasiñasa: “¿Jehová Diosjam altʼat chuymanïtti?” sasa. Ukhamächejja, jiwasar perdón mayiñjja janiw khitis ajjsarkaniti, ni jiwasatakis perdonañajj chʼamäkaniti. Ukhamajj mayninakar khuyaptʼayañatak jankʼakïñasawa, janirakiw ratuk chuym ustʼayasiñasäkiti (Ecl. 7:8, 9).

9. ¿Kunjamsa Diosajj jakañ vidajj wali valoranïtap israelitanakar amuytʼayäna?

⁹ Imantasiñ markanak utjkäna ukajja, israelitanakarojj jan juchan jaqen wilapat jan manuni uñjasipjjañapatakiw yanaptʼäna (Deu. 19:10). Jehová Diosajj jakañ vidarojj wali valoranitwa uñji, ‘jan juchani jaqe jiwayañarojj’ uñisiwa (Pro. 6:16, 17). Jupajj cheqaparjam uñjiri, qʼoma Diosawa. Jaqer jiwayañajj janipuniw Jupatakejj walïkiti, jan munkasin jiwayañas janirakiw walïkiti. Jan munkasin jiwayirinakarojj khuyaptʼayaskchïnsa, jupanakajj jilïrinakaruw uk yatiyapjjañapäna. Ukajj cheqäskapunitap jilïrinakajj yatjjatapjjäna ukhajja, uka jaqejj imantasiñ markanwa jilïr sacerdoten jiwañapkam qheparaspäna. Mä arunjja, jiwañkamaw ukankaspäna. Ukampejj jakañ vidajj kunja valoranisa ukwa Jehová Diosajj israelitanakar amuytʼayäna. Jupanakajj Jehová Diosar respetapjjatap uñachtʼayañatakejja, jaqe jiwayañatjja wal cuidasipjjañapäna.

10. Jesusan arunakaparjamajja, ¿kunjamsa fariseonakampi escribanakampejj jakañ vidar jan respetapjjatap uñachtʼayapjjäna?

¹⁰ Fariseonakampi escribanakampejj janiw jakañ vidarojj Jehová Diosjam uñjapkänti. Ukatwa Jesusajj jupanakar akham säna: “Yatiñan llavepsa jaqenakat apaqapjjtawa, janiw jumanakas mantapktati, ni mantaskirinakarus mantayapktati” sasa (Luc. 11:52). Jupanakajj Diosan Arup amuyapjjañapatakiw jaqenakar yanaptʼapjjañapäna, ukhamat wiñay jakañ katoqapjjañapataki. Ukampis jupanakajj “jakañ churañataki Jachʼa Irpirïki” uka Jesusar  uñtʼañatjja jarkʼapjjänwa (Hech. 3:15). Ukham lurasajja, jiwañarus jaqenakar apapkaspa ukhamänwa. Janipuniw mayninakat llakisipkänti ni khuyaptʼayasipkänsa, jan sinttʼasiri qala chuymani jaqenakäpjjänwa.

11. 1) ¿Kunjamsa apóstol Pablojj Jehová Diosjam jakañ vidar uñjäna? 2) ¿Kunas apóstol Pabljam taqe chuyma yatiyañatak yanaptʼistani?

¹¹ Jiwasatï uka kʼari religión pʼeqtʼirinakjamäñ jan munkstanjja, Jehová Diosjamaw jakañ vidarojj wali respetompi uñjañasa. Apóstol Pablojj ukhamwa luräna, walja jaqenakar yatiyañatakiw chʼamachasïna. Ukatwa akham säna: “Nayajj taqe jaqenakan wilapatjja qʼomätwa” sasa (Hechos 20:26, 27 liytʼañataki). Jupajj janiw jaqenakan wilapat jan juchañchatäñ laykukisa, ni Diosar istʼañ laykukis yatiykänti, jan ukasti jaqenakar wal munasitap layku, jakañ vidanakapar wali valoranit uñjasaw yatiyäna (1 Cor. 9:19-23). Jiwasajj jakañ vidarojj kunjamtï Jehová Diosajj uñjki ukham uñjañatakiw chʼamachasiñasa, Jupajj “taqenin arrepentisipjjañapwa muni” (2 Ped. 3:9). ¿Jumajj ukhamarakit munta? Jiwasatï jaqenakat khuyaptʼayasiñ munstanjja, taqeniruw taqe chuyma yatiyañasa, ukhamatwa kusisitäñäni.

12. ¿Kunatsa Diosan servirinakapajj jan usuchjasiñatak chʼamachasipjje?

¹² Jehová Diosatakejj jakañ vidajj wali valoraniwa, jiwasajj ukhamarakiw uñjañasa, ukatakejj jan usuchjasiñatak ewjjtʼanak utjki ukanakar istʼañasawa. Trabajonsa, utanak utachkasasa, askichkasasa janiw usuchjasirjam lurañasäkiti. Auto apnaqkasasa, tantachäwinakar sarkasasa, jachʼa tantachäwinakar sarkasasa wali amuyumpiw sarnaqañasa. Tiempot sipansa qollqet sipansa, jakañ vidasaw jukʼamp wakiskirejja. Jehová Diosajj kunatï cheqapäki ukpunwa luri, jiwasajj Jupat yateqasiñ munaraktanjja. Jukʼampis jilïr irpirinakaw nayraqatajj jakañ vidar wali valoranit uñjapjjañapa (Pro. 22:3). Ukhamajj mä jilïr irpiritï jan usuchjasiñatak ewjjtʼistani ukhajja istʼañasawa (Gál. 6:1). Jiwasatï jakañ vidarojj Jehová Diosjam wali valoranit uñjañänejja, janiw wila wartasitapat juchañchatäkañäniti.

13, 14. ¿Kunsa Jehová Diosjam cheqapar uñjañatakejj Israel markankir jilïrinakajj lurapjjañapäna?

¹³ Israel markankir jilïr irpirinakarojja, taqe kuns cheqaparjam uñjapjjañapwa Jehová Diosajj mayïna. Jaqe jiwayirir juchañchañatakejja, nayraqatajj kunas pasäna uk sumwa yatjjatapjjañapäna. Ukatjja, juchaniti janicha uk janïr siskasajj kunatsa ukham luräna, kunjam chuymanisa, nayrajj kunjam jaqënsa ukanakwa sum yatjjatapjjañapäna. Jehová Diosjam cheqapar uñjañatakejja, jaqe jiwayirejj uñisiñatti jiwayäna, jan wali amtampich uk luräna uksa yatjjatapjjañaparakïnwa (Números 35:20-24 liytʼañataki). Jaqe jiwayiri uñjirinakatï utjchïnjja, jan wali amtampiw jiwayi sañatakejj pä testigokis utjañapapunïnwa (Núm. 35:30).

¹⁴ Ukhamajj taqe kun sum yatjjatasajja, jilïrinakajj jaqe jiwayirejj kunjam jaqënsa ukwa uñjapjjañapäna, janiw jiwayatapaki uñjapjjañapäkänti. Ukatakejj suma amuytʼiripjjañapänwa, mä arunjja, kunatsa ukajj pasäna, ukwa sum yatjjatapjjañapäna. Ukhamajj cheqaparjam uñjañatakisa, amuytʼirïñatakisa, khuyaptʼayañatakisa, Jehová Diosaruw espíritu santo mayipjjañapäna (Éxo. 34:6, 7).

15. 1) ¿Kunjamsa Jesusajj juchararanakar uñjäna? 2) ¿Kunjamsa fariseonakajj uñjapjjarakïna?

¹⁵ Fariseonakajj jan khuyaptʼayasisaw jaqenakar juzgapjjerïna, juchachasirejj kunjam jaqesa uk uñjañat sipansa, kuna jan waltï lurkäna ukakwa uñjapjjerïna. Amuytʼañataki, Jesusarojj Mateon utapan manqʼaskir uñjasajja, fariseonakajj akhamwa discipulonakapar jisktʼapjjäna: “¿Kunatsa yatichirimajj impuesto cobririnakampi juchararanakampi manqʼe?” sasa. Uk istʼasasti Jesusajj akham sänwa: “Sano jaqenakatakejj janiw doctorajj munaskiti, jan ukasti khitinakatï usutäpki ukanakatakikiw munasi.  Ukhamasti sarapjjam, kuntï Diosajj siskäna uka arunakajj kamsañsa muni uk yatjjatanipjjam, jupasti sänwa: ‘Nayajj jaqenakan khuyapayasirïñap munta, janiw sacrificionakap munkti’” sasa (Mat. 9:9-13). Uk sasajj ¿juchararanakatti Jesusajj arjjatasiskäna? Janiwa, arrepentisipjjañapwa munäna. Uka toqetwa yatiyarakirïna (Mat. 4:17). ‘Impuesto cobririnakata juchararanakat’ yaqhepajj arrepentisiñ munapjjatap Jesusajj amuyänwa. Jupanakajj janiw Mateon utapar manqʼeriki sarapkänti, jan ukasti jupanakat waljanejj Jesusan arkirinakapäpjjänwa (Mar. 2:15). Ukampis fariseonakajj janiw Jesusjam jaqenakar uñjapkänti, jan ukasti janipuniw cambiapkaspati sasaw jaqenakat amuyapjjäna. Fariseonakajj Diosaruw servipjjta sapkchïnsa, janiw Diosjam khuyaptʼayasirïpkänti.

16. Jachʼa juchanir yanaptʼapki uka jilïr irpirinakajja, ¿kunanaksa sum amuyapjjañapa?

¹⁶ Jilïr irpirinakajja, Jehová Diosjamarakiw taqe kuns cheqaparjam uñjapjjañapa (Sal. 37:28). Ukatakejja, cheqapunit juchani janicha ukwa nayraqatajj ‘sum yatjjatapjjañapa’. Cheqapun juchanïchejja, Bibliajj siski ukarjamaw uñjapjjañapa (Deu. 13:12-14). Jachʼa juchar purtʼasipki ukanakar yanaptʼapki uka jilïr irpirinakajja, juchachasir jilatasa jan ukajj kullakasa cheqapunit arrepentisi janicha ukwa amuyapjjañapa. Uk amuyañajj chʼamakïspawa, ukatwa kunsa juchapat amuyi, kunas chuymapan utji ukanak amuyapjjañapa (Apo. 3:3). Cheqapun arrepentischejja, khuyaptʼayapjjañapawa. *

17, 18. Juchachasirejj cheqapunit arrepentisi janicha ukjja, ¿kunjamatsa jilïr irpirinakajj amuyapjjaspa? (Página 13 ukankir foto uñjjattʼäta).

¹⁷ Jehová Diosampi Jesusampejja, jaqenakajj kunjam chuymanïpjjes uk yatipjjewa, ukampis jilïr irpirinakajj janiw yatipkaspati. Ukhamajj ¿kunjamatsa juchachasirejj cheqapunit arrepentisi janicha uk yatipjjaspa? Nayraqatajj Jehová Diosaruw yatiñanïñsa sum amuytʼirïñsa mayisipjjañapa (1 Rey. 3:9). Ukatsti, ‘akapachankir jaqenakjamat llakisi’, jan ukajj ‘Diosatakjamach llakisi’ ukanakwa, suma phoqeri amuyasir esclavojj qellqatanak apayanki ukarjama, Bibliarjam amuytʼapjjañapa (2 Cor. 7:10, 11). Biblianjja, cheqpach arrepentisirinakajj kunjamäpjjänsa, jan arrepentisirinakajj kunjamäpjjarakïnsa ukwa qhanañchi. Jilïr irpirinakajj ukanakatwa sum amuytʼapjjañapa.

¹⁸ Ukjjarusti, juchachasirejj kunjam jaqesa, kunatsa jan wal lurawayi, kunanaksa lurirjama jan lurirjamäkaraki ukanakwa amuyapjjañaparaki. Bibliajj congregación pʼeqtʼiri Jesusat akham sänwa: “Jupajj janiw aleq uñkatasaki kunsa uñjkaniti, chʼajjwanaksa janirakiw aleqa parlanak istʼasaki tʼaqjkaniti. Aynachtʼatanakarusti cheqa luräwimpiw uñjani, markan utjiri pobrenakan arsusitanakapsti arjjatarakiniwa” sasa (Isa. 11:3, 4). Jesusaw jilïr irpirinakarojj congregacionanak uñjapjjañapatak uttʼayi, juparakiw cheqaparjam sum juzgapjjañapatakejj yanaptʼani (Mat. 18:18-20). Jesusjam khuyaptʼayasirïñatak chʼamachasipki uka jilïr irpirinak utjatapat wal yuspärtanjja. Jupanakaw jilat kullakanakar khuyaptʼayañatakisa cheqaparjam uñjañatakis yanaptʼapjjestu.

19. ¿Kunsa imantasiñ markanakat jumajj yateqasiñ munta?

¹⁹ Moisesan Leyipaw Jehová Diosat “wali wakiskiri cheqa yatichäwinak” yatichistu (Rom. 2:20). Sañäni, imantasiñ markanakan kunatï luraskäna ukajja, ‘cheqapar juzgañatakiw’ jilïr irpirinakar yanaptʼi. Jiwasarus ukhamarakiw ‘maynit maynikam munasiñasataki, khuyaptʼayasirïñataki’ yanaptʼistu (Zac. 7:9, NM). Jiwasajj janis Moisesan Leyip phoqañasäkchejja, cheqaparjam taqe kun lurañasa khuyaptʼayasirïñasa Jehová Diosatakejj wali wakiskirikïskiwa. Jupar serviñajj kusiskañawa, Jupasti pachpakïskiwa. Ukhamajj Jehová Diosar imantasiñäni, Jupjam cheqaparjam taqe kuns uñjañäni khuyaptʼayasirirakiñäni.