ALLEN * jilatajj akham siwa: “Aka congregacionar cambiasisajj wal ajjsarayasiyäta. Amigonakajj utjitaniti janicha, jilat kullakanakajj kunjamsa uñjapjjetani uk janiw yatkayätti” sasa. Uka jilatan machaq congregacionapajja, utapat 1.400 kilometronakatsa jukʼamp jayankiwa.

Jumatï congregacionat cambiasirakstajja, inas ukham ajjsararaksta. ¿Kunas yatinoqtañatak yanaptʼiristam? ¿Amuykayäta ukat sipans jukʼamp chʼamächi ukajj kuns lurasma? Inas jan yaqha congregacionar sarkstati, ukampis ¿kunjamsa jichhak purinipki ukanakar yanaptʼasma?

Mä arbolajj mayawjat yaqha cheqar ayruntasi ukhajja, wañsuñwa munaspa. Yaqha cheqar apañatakejj niya taqpach saphinakapwa khuchhurapjje. Ayruntatajj jankʼakiw mayampi saphintañapa. Yaqha congregacionar sarjjañajj niya ukhamarakïspawa. Nayra congregacionaman suma saphintatäkasmas ukhamänwa, Diosar serviñatak horariomas ukarjam waktʼayatäpachänwa, amigonakamas utjarakpachänwa. Ukampis jichhajj mayampi saphintasin yatinoqtañäkaspas ukhamawa. ¿Kunas ukatak yanaptʼiristamjja? Biblian siski ukarjam lurañaw yanaptʼiristam. Ukanakat mä qhawqha uñjañäni.

Biblia sapür liyki ukajja, “jawir thiyan ayruntat qoqar uñtatawa: wakisitarjamaw achunak churi, laphinakapajj janiw wañskiti; taqe luräwinakapasti waltʼaskakipuniwa” (Sal. 1:1-3).

Kunjamtï mä arbolan sum jilsuñapatakejj umampi warjjatañajj wakisipunejja, ukhamarakiw Diosar serviñan wali chʼamañchtʼatäñatakejj Diosan Arupat yatjjatañasa. Ukatwa Biblia sapüru liyiñama, jan faltasis reunionanakar sarañama, familiansa Bibliat sapa semana yatjjatañamaraki. Kunanaktï Jehová Diosar serviñatak nayrajj lurkayäta ukanak luraskakiñamawa.

“Churañ yatki ukaw jukʼamp katoqe; churiristi churatapatjamwa katoqarakini” (Pro. 11:25).

Diosan arunakap yatiyir sarapunïtajja, janiw sinti llakiskätati, ratukiw yatinoqtarakïta. Jilïr irpiri Kevin jilatajj akham siwa: “Congregacionar puripkta uka qhepatjja, jankʼakiw esposajampejj precursor auxiliarat serviñ qalltapjjta, ukaw yanaptʼawayapjjetu. Ukajj jilat kullakanakaru, mayni precursoranakaru, yatiyapkta uka cheqanak uñtʼañatakis yanaptʼapjjetuwa” sasa. Roger jilatajj utapat 1.600 kilometronak jayaruw sararaki, jupajj akham siwa: “Sapa kuti yatiyir sarasaw yatinoqtasma. Kunantï wakiski ukanwa congregacionan yanaptʼirista sasaw jilïr irpirinakar sarakisma, inas Tantachasiñ Uta qʼomachañächi, arstʼirinak jan utjkaspa ukatak wakichtʼatäñächi, jan ukajj reunionanakar maynir irpañatakis yanaptʼañarakïchi. Yanaptʼañ munatam uñjasajja, jilat kullakanakajj jankʼakiw amigomäñ munapjjani” sasa.

“Chuymanakamjja wali jachʼa jistʼarapjjam” (2 Cor. 6:13).

Jilat kullakanakar munasiñampi uñjañajj wali wakiskiriwa. Melissa kullakajj familiapampi yaqha congregacionar sarjjapjjäna ukhajja, machaq amigonakanïñatakiw chʼamachasipjjäna. Kullakajj akham siwa: “Tantachäwi janïr qalltkipansa, tukuyarusa, jilat kullakanakampiw parltʼasipjjerïta.  Ukaw aleq aruntasiñat sipansa, sum parltʼasiñatak yanaptʼapjjetäna” sasa. Ukham lurasaw sutinakap yatipjjarakïna, jilat kullakanakarojj utaparuw invittʼapjjerïna, ukhamatwa sum uñtʼasipjjäna. Melissa kullakajj akham saskakiwa: “Teléfono numeronakajwa churapjjayäta. Ukhamatwa yatiyir sarañatakisa, jan ukajj kun lurañatakis jawsanipjjetäna” sasa.

Jilat kullakanakampi parltʼasiñajj jumatak chʼamakïchejja, inas akham lurchisma: kusisitaw uñkattʼasma, ukham lurañajj inas qalltan chʼamakïchini, ukampis yanaptʼätamwa. Kunjamtï Biblian siskejja, ‘kusisit uñkattʼañajj maynir kusisiyiwa’ (Pro. 15:30, NM). Raquel kullakajj ukhamarakiw yaqha congregacionar sarjjäna, jupajj akham siwa: “Niyakejjay wawatpach wali ajjsarirïstjja, machaq congregacionajankir jilat kullakanakampi parltʼasiñatakejj wal chʼamachasiñajawa. Ukatwa sapak qonusisipki uka jilat kullakanakampi parltʼasir sarta, inas yaqhepajj nayjam ajjsarirïpjjarakchi” sasa. ¿Janit tantachäwi janïr qalltkipansa, jan ukajj tukuyarusa jilat kullakanakampi parltʼasiñatak chʼamachaskasma?

Qalltanjja, inas jilat kullakanakar uñtʼañatak wal chʼamachaschïta, ukampis jukʼat jukʼatjja janiw ukhamäjjaspati. Ukhamäkchinis yaqha amigonakanïñatak chʼamachasiskakiñamawa.

Yaqhep arbolanakajj mayawjat yaqha cheqar ayruntatajja jankʼakiw saphintapjje, yaqhepajj janiraki. Niya ukhamarakiw yaqhep jilat kullakanakajj machaq congregacionapan jankʼaki yatinoqtapjje, yaqhepajj janiraki. Jumatï congregacionat cambiasta ukampis jichhakam jan yatinoqtirjamäksta ukhajja, Bibliankir aka yatichäwinakaw yanaptʼiristam:

“Kunatï walïki ukjja jan jaytas lurasipkakiñäni, janitï qarjtkañäni ukhajja, tiempoparuw apthapiñäni” (Gál. 6:9).

Pienskayäta ukat sipan jukʼamp tiempotwa yatinoqtaskasma. Sañäni, Galaad Escuelar sarir misioneronakajj kawkïr markarutï khitatäpki ukatjja, walja maranak qhepatwa markapar kuttʼasipki. Ukaw congregacionapankir jilat kullakanakampi yatinoqtañatakisa, yaqha costumbrenakar yatinoqtañatakis yanaptʼi.

Alejandro jilatajj walja kutiw congregacionat cambiasi, jupajj yatinoqtañataki tiempo munasitap sum yati. Jupajj akham siwa: “Congregacionat jichhak cambiasipkta ukanjja, esposajajj akham sänwa: ‘Taqpach amigonakajaw mayni congregacionankapjje’ sasa ”. Ukat pä maranak nayrajj uka congregacionar sarjjapkäna ukhajja, uka pachparakwa esposapajj satayna, ukwa jilatajj esposapar amtayäna. Uka pä maranakanjja, jilat kullakanakar taqe chuymaw kullakajj yanaptʼäna, qalltan janis sum uñtʼasipkchïnjja, qhepat suma amigonakäjjapjjänwa.

“Janipun jisktʼasimti, ‘¿Kunatsa nayra maranakajj ancha sumäna?’ sasa. Uka jisktʼasti janiw chʼikhin jisktʼapäkiti” (Ecl. 7:10).

Nayra congregacionajaw sumäna sasajj janiw sañamäkiti. Machaq congregacionamankir jilat kullakanakajj inas ajjsarirïpjjchi, jan ukajj qhana arunïpjjchi. Ukampis kunjam uñjatäñtï munkta ukhamwa uñjañama. Sañäni, kunanaktï sum lurapki ukwa jukʼamp uñjañama. Congregacionat cambiasipki uka jilat kullakanakajj akham  jisktʼasipjje: “¿Cheqapunit ‘taqpach creyente masinakajar munastjja’?” sasa (1 Ped. 2:17).

“Mayisipkakim, churatäpjjätawa” (Luc. 11:9).

Jehová Diosat yanap mayisiskakiñamawa. Jilïr irpiri David jilatajj akham siwa: “Janiw sapaki llakisiñamäkiti, Diosaruw yanap mayisiñama. Awisajj Jehová Diosan yanaptʼapampikiw kuns lursna, ukatwa ukjjat orasiñama” sasa. Raquel kullakajj ukhamwa amuyaraki, jupajj akham saskakiwa: “Jilat kullakanakamp janis yatinoqtatäpkirista ukham amuyasisajja, esposojampejj uka toqetwa Diosar mayisipjjta. Jilat kullakanak nanakat jayarstʼapjjañapatakejj kuncha jan wal lurasipkpachäta uk amuyasiñatakiw Diosar mayisipjjta. Ukatsti jilat kullakanakar jukʼamp uñtʼañatakiw chʼamachasipjjta” sasa.

Awk taykanaka, wawanakamatï machaq congregacionan jan yatinoqtirjamäpkchejja, jupanakampiw uka toqet Diosar orasipjjañama. Machaq amigonakanïpjjañapatakejj utaruw jilat kullakanakar invittʼapjjasma.

¿Congregacionamar jichhak purinipki ukanakar kunjamsa yanaptʼasma? Qalltatpachwa amigopäñatak chʼamachasiñama. Jumatï yaqha congregacionar sarjjasmajja, kunjam katoqtʼatäñsa munasma uka pachpwa lurañamaraki (Mat. 7:12). Familian Bibliat yatjjatapkta ukaru, jan ukajj JW Broadcasting programa uñtañatakis invittʼarakismawa. Jupanakampi yatiyir sarañatakiw janiräkipan amtapjjasma. Utamar manqtʼasiñatak invittʼätajja, janiw uk armapkaniti. ¿Kunanakampsa yanaptʼañatak lurasma?

Carlos jilatajj akham sarakiwa: “Machaq congregacionar puripkta ukhajja, mä kullakajj kawkjansa iraqtʼat aljapjje ukanakwa mä listar churapjjetu. Ukajj wal yanaptʼapjjetäna” sasa. Thaya lugarata jan ukajj juntʼu lugarat purinipki uka jilat kullakanakarojja, kunjamsa thayansa, lupinsa, jallunsa isthaptʼasipjjaspa ukanwa yanaptʼsna. Uka markan kuna costumbrenïpjjesa, kunarus creyipjje ukanak yatiyatasajj Diosan arunakap sum yatiyapjjañapatakiw yanaptʼani.

Parlaniwayktan uka Allen jilatajj mara jilaw machaq congregacionapankjje, jupajj akham siwa: “Qalltanjja jilat kullakanakar sum uñtʼañatakejj wal chʼamachasiñajänwa. Jichhajj familiajäpkaspas ukhamäpjjewa, wali kusisitätwa” sasa. Amigonak aptʼasiñat sipansa, jukʼamp amigonakanëjjewa, inas jupanakampejj wiñay amigöpjjchini.