1. ¿Kunatsa chuymachtʼatäñ taqenis muntan?

TAQENIW chuymachtʼatäñ muntanjja. Inas llakinakana, jan waltʼäwinakana, aynachtʼata ukham jakasstan. Inas chuymankipstatätas layku, usutätas layku jan ukajj familiasat mayni jiwatap layku tʼaqesiskstan. Yaqhepajj mayninakan jiskʼachataw uñjassna. Jaqenakas sapürutjamaw jukʼamp jan walir tukusipki. Cheqas ‘chʼama tukuña aka jan wali tiemponakan’ jakkasajja, ‘qhepa urunakankataswa’ amuytanjja, Paraisojj sapürutjamaw jukʼamp jakʼankjjaraki (2 Tim. 3:1). Ukhamäkchisa kuntï Jehová Diosajj jutïritak arsuwayki uk phoqasiñap inas walja maranak suyaskstan, ukat inas sapürutjam jukʼampi jan walinakan uñjasstan. Ukhamächi ukhajja, ¿kawkinsa chuymachtʼir arunak jikjjatsna?

2, 3. 1) ¿Kunsa Habacuc profetat yattanjja? 2) ¿Kunatsa Habacuc librot yatjjatañäni?

² Uka jisktʼar qhanañchañatakejj Habacuc librot yatjjatañäni. Uka profetan sarnaqäwipajj kunjamänsa ukjja, janiw Bibliajj sumpun qhanañchkiti. Habacuc sutejja, ‘munasiñat qhomantaña’ sañwa munaspa. Ukajja Jehová Diosajj chuymachtʼañatakis  qhomantʼkistaspa ukwa amuytʼayistu, maysa toqetjja servirinakapajj taqe chʼamampis jupar katuntasksna ukhamwa amuytʼayarakistu. Habacuc librojj wali chuymachtʼkir arunakaniwa. Uka profetajj Diosampiw parläna, wali wakiskir jisktʼanakwa jisktʼarakïna. Jehová Diosasti taqe jisktʼanakaparuw qhanañchäna. Niyakejjay ukanakajj jiwasar yanaptʼañapächïnjja, taqe ukanak qellqañapatakiw amuytʼayarakïna (Hab. 2:2).

³ Habacuc profetajj kunjamsa Jehová Diosampi parläna, ukakwa Bibliajj uka llakit profetat qhanañchi. Libropajja, “taqe kunanakatï nayra tiempon qellqaskäna” ukanakat maynïriwa, Bibliankarakiwa, “ukhamat kuntï Diosajj jutïrin churkistani uk suytʼañasataki. Uka Qellqatanakaw aguantañasatak yanaptʼistu, chuymachtʼarakistu” (Rom. 15:4). ¿Kunjamsa Habacuc librojj yanaptʼistaspa? 1) Jehová Diosar confiyañajj kamsañsa muni ukwa amuytʼayistu. 2) Jan walinakana, tʼaqesiñanakan uñjaskasasa maynejj chuymapan sumakiw jikjjatasispa ukwa amuytʼayarakistu. Uka amtampi jichhajj Habacuc librot yatjjatañäni.

4. ¿Kunatsa Habacuc profetajj wal llakisïna?

⁴ (Habacuc 1:2, 3 liytʼañataki). Habacuc profetajj jan wali tiemponwa jakäna. Jaqenakajj wali qhoru jan sinttʼasiri ukhamäpjjänwa ukatwa wal llakisïna. ‘¿Kunapachkamas jan walinakajj utjaskakpachäni? ¿Kunatsa Jehová Diosajj jan kuns lurkpacha?’ sasaw jisktʼaspachäna. Ina chʼusat tʼaqesiñanaka, jan waltʼañanakakiw utjäna, ukatakejj pachpa israelitanakaw juchanïpjjäna. Janis khiti arjjatiris utjkaspa ukhamwa amuyasïna. Ukham jan walinak taypin jakasaw Diosar yanaptʼa mayïna. Jehová Diosajj janis llakiskaspa, jan waltʼäwinak janis jankʼak askichkaspa ukham inas qalltan amuychïna. ¿Jiwasajj uka profetjam jikjjatasirïtanti?

5. ¿Kuna wakiskir yatichäwis Habacuc libron utji? (Página 13 ukankir foto uñjjattʼäta).

⁵ ¿Janit Habacuc profetajj Diosarusa arsutanakaparus confiyjjpachäna? Confiyaskakïnwa. Llakinakapa jaqenakar yatiyañat sipansa Jehová Diosaruw confiyäna, ukhamatwa pacienciamp suytʼatap amuytanjja. Jupajja kunatsa Diosajj jan kuns lurkäna, tʼaqesitapsa ukhamak uñchʼukïna ukanakatwa llakisïna. Jehová Diosajj Habacuc profetan llakinakap jupar qellqayasajj akwa yatichistu: Diosarojj jan ajjsartʼasaw llakinakas yatiyañasa. Diosajj jupar taqe kunsa yatiysna ukwa muni (Sal. 50:15; 62:8). Proverbios 3:5 textojj akham ewjjtʼistu: “[Jehová] Tatitur taqe chuymamampi katuyasim; juman chʼikhi kankañamarukejj jan alkatasimti” sasa. Habacuc profetajj uka arunak yatpachänwa, chuymaparuw katoqasirakpachäna.

6. ¿Kunatsa Diosar mayisiñajj wali wakiskiri?

⁶ Habacuc profetajj Jehová Dios Amigoparu Awkiparuw confiyäna. Ukatwa amuyuparuki confiyañat sipansa llakimpi aynachtʼañat sipansa, Diosar jisktʼañ amtäna. Kunas llakisiyäna, kunjamsa jikjjatasïna ukanaksa yatiyänwa. Ukajj jiwasatak wali yateqaskayawa. Jehová Diosajj oracionanakas istʼiwa, ukatwa kunanakas llakisiyistu uk Jupar yatiyañas muni (Sal. 65:2). Ukham lurañäni ukhajja, mayisitas istʼistani ukhajj mä munasir awkjamas qhomantkistaspa ukham amuyasiñäni, kunjamsa yanaptʼaskistu uksa amuyarakiñäniwa (Sal. 73:23, 24). Kuna llakinsa uñjaskchiñänejja, kunjamsa Diosajj ukanak uñji ukham uñjañatakiw Jupajj yanaptʼistani. Cheqas Diosar taqe chuyma  mayistan ukhaw Jupar confiyatas uñachtʼaytanjja.

7. Habacuc profetan llakinakap istʼasajja ¿kunsa Jehová Diosajj luräna?

⁷ (Habacuc 1:5, * 6, 7 liytʼañataki). Habacuc profetajj Jehová Diosar llakinakap jaytasajja, ‘kunsa lurpachäni’ sasaw jisktʼaspachäna. Jehová Diosajj mä munasir awkjamaw kunjamsa Habacuc profetajj jikjjatasïna uk amuyäna, ukatwa jan toqenoqkänti. Jupajj jan kamachtʼirjamäsaw ukham mayisïna uksa Diosajj yatïnwa. Uka arunakajj Diosar jan istʼasir israelitanakatakïnwa. Diosasti kunsa jupanakar lurani ukanakwa profetar yatiyäna, amuyatajja juparuw nayraqat yatiypachäna.

8. Jehová Diosajj kuntï siskäna ukajja, ¿kunatsa Habacuc profetar llakisiypachäna?

⁸ Jehová Diosajja, kuntï lurañ amtkäna ukatak wakichtʼatätapwa Habacuc profetar yatiyäna. Jupajja, caldeonakampi jan ukajj babilonionakampiw uka markar castigañ amtäna. ‘Urunakamana’ sasinjja, profetajj jakkäna uka urunakanwa juiciojj purinini sañwa Diosajj munäna. ¿Habacuc profetajj ukham sañapti suypachäna? Janiwa. Kuntï Jehová Diosajj siskäna ukajja Judá markankirinakarojj jukʼampiw tʼaqesiyañapäna. Caldeonakasa jan ukajj babilonionakasa, Diosan arunakap uñtʼapkäna uka israelitanakat sipan jukʼamp qhoru, jan sinttʼasiri jaqenakäpjjänwa. Jehová Diosajj ¿kunatsa kʼari diosanakar adoriri, jan sinttʼasir jaqenakampi markapar castigañ amtpachäna? Jiwasatï uk istʼsnäna ukhajj ¿kunsa lursnäna?

9. ¿Kamsasas Habacuc profetajj Diosar jisktʼäna?

⁹ (Habacuc 1:12-14, 17 liytʼañataki). Jehová Diosajj qhoru jan sinttʼasiri israelitanakarojj Babiloniankir jaqenakampiw castigañapäna, Habacuc profetajj uk yatïnwa, ukampis janiw creyirjamäkänti. Ukhampachasa humilde chuymampiw Jehová Diosar ‘nayan imantasiñajätawa [jan ukajja, “imantasiñ qarqajätawa”, NM]’ sasin säna (Deut. 32:4; Is. 26:4). Habacuc profetajja, Diosajj munasiriwa khuyaptʼayasiriwa sasin confiyaskakïnwa. Ukatwa Juparojj jan ajjsaras mayampi akham jisktʼaskakïna: ‘¿Kunatsa Judá markan jukʼamp jan walinak utjañap ukhamak uñchʼukta? ¿Kunatsa jankʼak jan kunsa lurkta? ¿Taqe Chʼamani Diosjamajj kunatsa jukʼamp tʼaqesiñanak utjipan jan kunsa lurkta? ¿Kunatsa jan wali jaqenakajj jukʼamp jiljjattipan amukïskta?’ sasa. Cheqas Diosajj ‘qollanawa’ mä arunjja santowa, Jupajj janiw jan walinak ukhamak uñchʼukkaspati.

10. ¿Kunatsa awisajj Habacuc profetjam jikjjatassna?

¹⁰ Habacuc profetjamaw awisajj jikjjatassna. Jehová Diosan arunakaparjamaw sarnaqtanjja, Juparus confiyaraktanwa, Arupatsa yatjjattanwa, ukajja kuntï Diosajj jutïr urunakan lurkani ukar confiyañatakiw yanaptʼistu. Diosan markapansa ukanakat jukʼampwa yatjjattanjja. Ukhamäkchisa inas akham jisktʼassna: “¿Kunapachas tʼaqesiñanakajj tukusjjpachäni?” sasa. Jan walin uñjasisajj kunsa Habacuc profetajj luräna, kunjamsa jupat yateqassna uk jichhajj yatjjatañäni.

11. Jehová Diosamp parlasajja, ¿kun lurañsa Habacuc profetajj amtäna?

¹¹ (Habacuc 2:1 liytʼañataki). Diosampi parlasajja Habacuc profetajj janiw sinti  llakisjjänti. Ukatwa Jehová Diosar confiyasajj taqe chuyma suytʼaskakiñ amtäna. Qhepatsti mayampiw akham säna: “Jan ajjsarañampiw suytʼäjja” sasa (Hab. 3:16). Diosat jan jitheqtir yaqha servirinakasa ukhamarakiw Diosar confiyapjjäna, pacienciampi suyapjjarakïna. Ukaw jan aynachtʼañatakisa Diosar suytʼaskakiñatakis jiwasar yanaptʼistu (Miq. 7:7; Sant. 5:7, 8).

12. ¿Kunanaksa Habacuc profetat yateqsna?

¹² ¿Kunsa Habacuc profetat yateqsna? Maya, kuna jan walinakansa uñjaskchiñänejja, Jehová Diosar jan qarjtas oraskakiñasawa. Paya, Diosajj kuntï Arup toqesa markap toqesa ewjjtʼkistu ukarojj istʼañasawa. Kimsa, Diosaw tʼaqesiñanak horasapar chhaqtayani sasin pacienciampiw suytʼañasa. Ukham lurañäni ukhajja, Habacuc profetjamarakiw jan sinti llakiskañäniti, jan walinakan uñjaskañäni ukhas aguantaskakiñäniwa. Diosajj kuntï jutïr urunakan lurkani ukajja, jukʼamp paciencianïñatakiw yanaptʼistani, pacienciasti jan walinkkasas kusisitäñatakiw yanaptʼarakistani. Cheqas jutïritak kuna suytʼäwitï utjkistu ukajja, Diosaw horasapar taqe kunsa askichani sasin confiyañatakiw yanaptʼistu (Rom. 12:12).

13. ¿Jehová Diosajj Habacuc profetar kamsänsa?

¹³ (Habacuc 2:3 liytʼañataki). Habacuc profetan suytʼatapajj Jehová Diosar kusisiyänwa. Kuna jan walinakansa uñjasïna ukjja, Taqe Chʼamani Diosajj yatïnwa. Ukatwa ‘taqe jisktʼanakamar jaysämawa’ sasin munasiñamp chuymachtʼäna. Mä jukʼampitjja, llakinakapajj chhaqtjjañapänwa. Diosajj akham siskaspas ukhamänwa: “Nayar confiyasita, amuyatajj janisay jankʼäkpa, pacienciampi suytʼaskakim, mayisitamar istʼaskämawa” sasa. Diosajja kunapachas arsutanakap phoqani ukwa amtayäna, suytʼaskakim sasaw ewjjtʼarakïna. Cheqas Habacuc profetajj Diosan arunakap phoqasir uñjänwa.

14. Jan walinakan uñjaskañäni ukhajj ¿kunsa lurañasa?

¹⁴ Diosaw jan walinak chhaqtayjjani sasin pacienciampi suytʼañäni ukhasa, kuntï siskistu ukarus istʼarakiñänejja, Diosar confiyañäniwa, jan walinakan uñjaskañäni ukhas janiw sinti llakiskañäniti. Diosajj kunapachas jan walinak tukjani uka toqet jan sinti llakisiñasatakiw Jesusajj ewjjtʼistu (Hech. 1:7). Jehová Diosajj horasaparuw uka jan walinak chhaqtayani, ukat janipun pächasipjjañäniti. Ukhamajja jan qarjtasa, humilde chuymampi, pacienciampi suytʼasipkakiñäni. Ukañkamajja, tiempo jan ina chʼusar aptʼasa Diosar taqe chuyma servisipkakiñäni (Mar. 13:35-37; Gál. 6:9).

15, 16. 1) ¿Kuna wakiskir arunakas Habacuc libron utji? 2) ¿Kunsa uka arunakat yateqsna?

¹⁵ Jehová Diosajj akham sänwa: ‘Aski jaqenakajj iyawsäwi laykuwa jakapjjani’, ukat ‘Dios Tatitun jachʼa luräwinakapat yatiñajj taqe akapacharuw phoqtʼarakini’ sasa (Hab. 2:4, 14). Cheqas Jehová Diosajja, pacienciampi suytʼirinakarusa Jupar confiyirinakarus wiñay jakañwa churani.

¹⁶ Habacuc 2:4 texton kuntï Diosajj siskäna ukanakat amuytʼañasawa. Uka arunakajj wali wakiskiriwa, apóstol Pablojj cartanakapan kimsa kutiw uka arunak aytäna (Rom. 1:17; Gál. 3:11; Heb. 10:38). Kuna jan walinakansa uñjaskchiñänejja, Diosar confiyaskakiñäni ukhajj kunjamsa arsutanakap phoqani uk uñjañäniwa. Jehová Diosajja, llakinakasat lupʼiñat sipansa kuntï Jupajj jutïrin lurkani ukanakat lupʼiñaswa muni.

17. ¿Kunjamsa Habacuc librojj chʼamañchtʼistu?

 ¹⁷ Aka qhepa urunakanjja Habacuc librojj wal yanaptʼistu. Jehová Diosajj jupar confiyirinakar wiñay jakañ churañwa arsuwayi. Ukhamasti kuna jan walinakansa uñjaskstanjja, Diosar jukʼamp confiyañatak chʼamachasiskakiñäni. Diosajj Habacuc profetap toqejj ‘nayaw yanaptʼaskäma, salvaskarakïma’ sasaw sistu. Jupar confiyañatakis munasiñampiw mayistu, Reinopajj aka oraqjjar apnaqjjani ukhakam pacienciampi suytʼañatakis mayirakistuwa. Ukhaw aka oraqejj kusisita, sumankañ thaqeri jaqenakamp phoqantatäni, jupanakajj taqeniw Diosar adorapjjani (Mat. 5:5; Heb. 10:36-39).

18. ¿Kunjamsa Jehová Diosan arunakapajj Habacuc profetar yanaptʼäna?

¹⁸ (Habacuc 3:16-19 liytʼañataki). Jehová Diosan arunakapajj Habacuc profetan chuymaparuw purtʼäna. Diosajj kunjamsa nayrajj markapar yanaptʼäna, ukanakat lupʼiñaw Jupar jukʼamp confiyañatak yanaptʼäna. Mä qhawqha tiempompi tʼaqesiñap yatkchïnsa, uka jan walinak horasaparuw Jehová Diosajj chhaqtayani sasaw confiyäna. Ukajj walpun chuymachtʼpachäna, qalltan llakiskchïnsa, Jehová Diosaw yanaptʼitani sasaw taqe chuyma confiyjjäna. Qhawqsa Diosar confiyäna uka jan armkay arunakajj Biblian qellqatawa. Versículo 18 texton qellqatäki uka arunakajja, ‘Diosap laykojj kusisiñatsa thoqtʼasiniwa sañwa muni’ sasaw Bibliat yatjjatirinakat yaqhepajj sapjje. Habacuc profetan ukham chuymanïtapajj wali yateqaskayawa. Jehová Diosajj janiw musparkaña arunakaki arsuwaykiti, jan ukasti uka arunakajj phoqasiniwa sasaw sarakistu.

19. Habacuc profetjam chuymachtʼatäñatakejja, ¿kunsa lurañasa?

¹⁹ Habacuc libron qellqatäki uka arunakajj Jehová Diosar confiyañwa yatichistu (Hab. 2:4). ¿Kunas Diosar confiyaskakiñatak yanaptʼistaspa? Jupampejj jukʼamp sumwa apasiñasa. Ukatakejj akanakwa lurañasa. 1) Diosarojj orasiñasapuniwa, taqe llakinakaswa yatiyañasaraki. 2) Kuntï Arup toqesa markap toqes ewjjtʼkistu ukar istʼañasawa. 3) Jupajj horasaparuw jan walinak chhaqtayjjani sasin confiyasaw pacienciamp suytʼañasa. Ukwa Habacuc profetajj luräna. Jupajj librop qellqañ qalltkäna ukhajj llakitäkchïnsa, kusisitaw Diosar taqe chuyma confiyasajj qellqañ tukuyjjäna. Jupat yateqasipjjañäni, ukhamatwa Jehová Diosajj mä munasir awkjamas qhomantkistaspa ukham amuyañäni. Ukajj aka jan wali pachanjja, wal chuymachtʼistani.