1, 2. 1) “Tata, jan ukham parlamti” sasin Pedrojj säna ukhajja, ¿Jesusajj kamsänsa? (Aka paginankir dibujo uñjjattʼäta). 2) ¿Kunatsa Jesusajj ukham säna?

JESUSAN discipulonakapajja, kuntï istʼapkäna uk janiw creyirjamäpkänti. Jesusajj uka tiemponsa Israel markatakejj reino mayamp uttʼaykaspa ukham amuyapjjäna, ukampis Jesusajja, ‘tʼaqesiyapjjetaniwa ukat jiwayapjjarakitaniwa’ sasaw säna. Uk satajja, Pedrojj akham sänwa: “Tata, jan ukham parlamti, janipuniw jumajj ukhamar purtʼaskätati” sasa. Jesusasti jupar akham sarakïnwa: “¡Saraqet Supaya! Kuntï lurañajäki ukat jan jarkʼistati. Janiw jumajj kunjamtï Diosajj amuyki ukham amuyktati, jan ukasti jaqenakjamaw amuytajja” sasa (Mat. 16:21-23; Hech. 1:6).

² Ukham sasinjja, Diosan amuyunakapampi Supayan apnaqat akapachan amuyunakapampejj jan pachpätapwa Jesusajj uñachtʼayaskäna (1 Juan 5:19). Pedron arunakapajja, akapachankir jaqenakan amuyupjamänwa. Ukampis Jehová Diosajj janiw ukham  amuykänti, antisas Jesusan tʼaqesiñataki jiwañataki wakichtʼasiñapwa munäna, Jesusajj uk sum yatïna. Kuntï Jesusajj jan pächasisa Pedror siskäna ukajj Awkipjam amuyatapwa uñachtʼayäna.

3. ¿Kunatsa Diosjam amuyañajj chʼamakïspa, ukat akapachankir jaqenakjam amuyañajj kunatsa facilakïspa?

³ ¿Kunjamsa jiwasajj amuyaraktan? ¿Diosjamat amuytan jan ukajj akapachankir jaqenakjamacha? Diosan servirinakapjamajja, Jupatakjam sarnaqañatakiw chʼamachastanjja. Ukampis ¿amuyusajj ukhamarakiti? ¿Kunjamtï Diosajj amuyki ukham amuyañatakit chʼamachastanjja? Ukham amuyañatakejj wal chʼamachasiñasaw wakisi. Cheqas akapachankir jaqenakjam amuyañajj janiw chʼamäkiti, jiwasajj uka taypinwa jaktanjja (Efes. 2:2). Ukhamarusa, kuntï akapachankir jaqenakajj amuyki ukajj munañjamäspawa, kunattejj jiwas pachpat llakisiñatakiw chʼamañchi. Cheqas Jehová Diosjam amuyañajj chʼamakiwa, ukampis akapachankir jaqenakjam amuyañajj janiw chʼamäkiti.

4. 1) Akapachankir jaqenakjam amuyjjañäni ukhajja, ¿kunas pasani? 2) ¿Kunsa aka yatichäwin yatjjataskañäni?

⁴ Akapachankir jaqenakjam amuyjjsna ukhajja, jupanakjamarakiw munañasak thaqjjsna, kunas wali kunas jan walïkaraki uk amtañsa munjjsna (Mar. 7:21, 22). Ukatwa jaqenakjam amuyañat sipansa Jehová Diosjam amuyañ yateqañasa. Aka yatichäwejj ukham lurañatakiw yanaptʼistani. Diosjam amuyañajj janiw taqe kunat jarkʼkistuti, jan ukasti yanaptʼistuwa ukwa aka yatichäwin yatjjatañäni. Kunas akapachankir jaqenakjam jan amuyañatak yanaptʼistaspa uksa yatjjatarakiñäniwa. Ukat akjjar jutki uka yatichäwinjja, kunjamatsa Diosjam amuyañ yateqsna uka toqetwa yatjjatarakiñäni.

5. ¿Kunatsa yaqhepajj jan khitimpis kun sayasiñ munapki?

⁵ Yaqhep jaqenakajj janiw khitimpis kun sayasiñ munapkiti. “Janiw khitis nayar kuns sañapäkiti” sasaw sapjje. Ukham sasinjja, ‘naya pachpaw kun lurañsa amtañaja’ sañwa munapjjpacha, ukampis ukham amuyañajj janiw juchäkiti. Jupanakajj janiw mayninakjamäñatak khitin obligatäñsa munapkiti. *

6. 1) ¿Jehová Diosajj taqe kun lurañatti jarkʼistu? 2) ¿Munañasarjamakit ukhamajj taqe kuns lursna?

⁶ Jehová Diosjam amuyañajja, janiw taqe kunat jarkʼatäña sañ munkiti. 2 Corintios 3:17 textojj akham siwa: “Kawkjantï Jehová Diosan espiritupajj utjki ukanjja, libre jakasiñaw utji” sasa. Ukhamajj kunjam jaqëñsa muntan, kun lurañsa muntan uk sapa mayniw amtsna. Jehová Diosaw ukham lurawayistu. Antisas amtasarjam taqe kuns lurañaw jan walïkiti (1 Pedro 2:16 liytʼañataki). Ukampis kunas wali kunas jan walïkaraki uk amtañasächi ukhajja, Jehová Diosajj Biblian yatichäwinakaparjam lurañaswa muni. Ukajj ¿taqe kunatti jarkʼistu jan ukajj yanaptʼistucha?

7, 8. Jehová Diosjam amuyañajj janiw taqe kun lurañat jarkʼkistuti sasajj ¿kunatsa sissna? Uk mä uñachtʼäwimp qhanañchtʼma.

⁷ Awk taykanakat parltʼañäni. Jupanakajja, honradoña, trabajtʼirïña, mayninakat siñttʼasirïña ukat yaqha ukhamanakwa wawanakapar yatichapjje. Ukham yatichasajj ¿taqe kunatti jarkʼapjje? Cheqas janiwa. Antisas jakäwipan sum sarnaqapjjañapatakiw  yatichasipki. Wawanakajj jilsjjasin utat sarjjapjjani ukhajja, kunsa jakäwipampi lurapjjani uk jupanakpachpaw amtjjapjjani. Awk taykapajj yatichawayapki ukarjam sarnaqasajja, janiw arrepentisipkaniti, ni jan walinakarusa llakinakarus purtʼasipkaniti.

⁸ Jehová Diosajj wali munasir awkiwa. Taqe wawanakapas kusisita jakasipjjaspa ukwa muni (Is. 48:17, 18). Ukatwa kunjamsa sum sarnaqsna, kunjamsa jaqe masisar uñjañasa uka toqet sum yatichistu. Uka toqenakat Jupjam chuymanïsna Jupjam amuysna ukwa muni. Ukhamajj ¿janit jiwas pachpajj kuns amtksna? Cheqas janiw ukhamäkiti, antisas kunjamsa sum sarnaqsna uk amtañatakiw yanaptʼistu (Sal. 92:5; Prov. 2:1-5; Is. 55:9). Suma amtanakar puriñatakis yanaptʼarakistuwa, kunanaktï munktan ukanaksa luraraksnawa (Sal. 1:2, 3). Ukhamajj Jehová Diosjam amuyañajj wal yanaptʼistu.

9, 10. Jehová Diosan amuyupajj akapachankir jaqenakan amuyupat sipan wali jilankiwa sasajj ¿kunatsa sissna?

⁹ Jehová Diosan amuyupajj taqet sipansa jilankiwa, ukatwa Jupjam amuyunïñ muntanjja. Akapachanjja, sum sarnaqañ toqetsa, familiasampi apasiñ toqetsa, trabajiñ toqetsa walja ewjjtʼanakaw utji. Ukanakat jilapartejj Jehová Diosan amuyunakap contrawa. Sañäni, jaqenakarojj munañap thaqapjjañapatakiw chʼamañchi, qʼañu jucha lurañajj walikïkaspasa ukhamwa yaticharaki. ‘Kusisita jakasiñatakejja, chacha warmjam mä kunat jan waltʼayasisajj jaljtjjaña, jan ukajj divorciasjjañaw wakisispa’ sasaw awisajj yaticharaki. Ukhamajja, ¿Biblian ewjjtʼanakapati jan ukajj akapachankir jaqenakan ewjjtʼanakapach yanaptʼistaspa?

¹⁰ Jesusajj akham sänwa: “Maynin yatiñanïtapajj luratanakapanwa uñjasi” sasa (Mat. 11:19). Akapachajj tecnología toqet nayrarus sartkchejja, kunanakatï llakisiykistu ukanak tukjañ janiw puedkiti, sañäni, guerranaksa, yaqhachasiñanaksa, lunthatasiñanaksa janiw tukjañ puedkiti. Yamas qʼañu jucha lurañajj walikïkaspasa ukhamwa amuyayi. Ukampis uka jan wali lurañajja, jukʼampiw familianakar jan waltʼayi, usunakampiw apantasipjje, yaqha jan walinakanwa uñjasipjje. Maysa toqetjja, Jehová Diosjam amuyir cristianonakajj kusisitaw familjam jakasipjje, qʼañu juchanak jan lurasajj usunakatsa jarkʼaqasipjjewa, aka oraqpachankir jilat kullakanakampis sum apasipjje (Is. 2:4; Hech. 10:34, 35; 1 Cor. 6:9-11). Ukhamajj Jehová Diosan amuyupajj akapachankir jaqenakan amuyupat sipan wali jilankiwa.

11. ¿Khitin amuyupampis Moisesajj irpayasïna, ukat kunjamsa ukajj yanaptʼäna?

¹¹ Jehová Diosan nayra servirinakapajja, Diosjam amuyañajj akapachankir jaqenakat sipan wali jilankiwa sasaw amuyapjjäna. Moisesat parltʼañäni, jupajj ‘Egipto markankir jaqenakan taqe yatiñapampi yatichatäkchïnsa’, Jehová Diosaruw amuytʼasir jaqëñatakejj yanaptʼa mayïna (Hech. 7:22; Sal. 90:12). ‘Amtäwinakam uñachtʼayita’ sasaw mayisïna (Éx. 33:13). Jupajj Jehová Diosampi irpayasitap laykuw Diosan munañap phoqasiñapatak yanaptʼäna. Taqe chuymaw Diosar confiyäna sasaw Bibliajj jupat saraki (Heb. 11:24-27).

12. ¿Kunarjamas apóstol Pablojj taqe kuns lurirïna?

¹² Apóstol Pablojj suma yatichata chʼikhi jaqënwa, pä arunak parlañwa yatïna, inas jukʼamp arunak parlañ yatchïna (Hech. 5:34; 21:37, 39; 22:2, 3). Ukhamäkchïnsa, janipuniw akapachankir jaqenakan amuyuparjam  kuns lurirïkänti, jan ukasti Diosan Aruparjamaw taqe kuns lurirïna (Hechos 17:2; 1 Corintios 2:6, 7, 13 liytʼañataki). Ukatwa Diosan arunakap yatiyasajj wali kusisitäna, wiñay jakañwa suytʼarakïna (2 Tim. 4:8).

13. ¿Khitis Jehová Diosjam amuyañatak chʼamachasiñapa?

¹³ Jehová Diosan amuyupajj akapachankir jaqenakat sipan wali jilankiwa, ukat janiw pächasktanti. Ukhamajj kuntï Jupajj siskistu ukarjam lurañäni ukhajja, kusisitäñäniwa, sumarakiw jakasiñäni. Ukampis Jehová Diosajj janiw jupjam amuyañasatakejj obligkistuti. Ni “suma phoqeri amuyasir esclavo[sa]” ni jilïr irpirinakas obligkistuti (Mat. 24:45; 2 Cor. 1:24). Cheqas sapa mayniw Jehová Diosjam amuyañatakejj chʼamachasiñapa. ¿Kunjamsa uk lursna?

14, 15. 1) Jehová Diosjam amuyañatakejja, ¿kunanakatsa jukʼamp lupʼiñasa? 2) Kuntï Romanos 12:2 textojj siski ukarjamajja, ¿kunatsa akapachankir jaqenakjam amuyañ apanukuñasa? Uk mä uñachtʼäwimp qhanañchtʼma.

¹⁴ Romanos 12:2 textojj akham siwa: “Jan jukʼampejj akapachankir jaqenakat yateqasis sarnaqapjjamti, jan ukasti machaqar tukupjjañamatakejj amuyunakam machaqar tukuyapjjam, ukhamatwa jumanak pachpajj Diosan munañap yatipjjäta. Diosan munañapajj sumawa, perfectowa, jupan chuymapsa kusisiyarakiwa” sasa. Ukhamajja, Diosar janïr uñtʼkasajj inas akapachankir jaqenakjam amuychiyätan, ukampis Jehová Diosjamajj amuysnawa, ukwa uka textojj amuytʼayistu. Cheqas inas awk taykasjam amuyunïstan, jan ukajj kunjamtï jilsuwayktan ukarjam amuystan. Ukampis nayra amuyunakas apanuksnawa. Ukhamajj kunjjay pʼeqesar phoqantchiñäni ukarjamaw amuyusajj cambiani. Jiwasatï Diosajj kuntï munki ukanakat jukʼamp lupʼiñäni ukhajja, Diosan amuyunakapajj cheqapätapwa yatiñäni. Ukatsti, Jehová Diosjamaw kuns amuyjjarakiñäni.

¹⁵ Ukhamajj amuyunakas machaqar tukuyañatakejja, janiw akapachankir jaqenakan amuyunakapampi apayasiñasäkiti. Mä arunjja, Diosatak jan walïki uka amuyunak apanukuñasawa. Uk lurañajj wali wakiskiriwa, amuytʼañatakejj mä jaqes usupat qollasiñ munkaspa ukham sañäni. Jupajja, kawkïr manqʼanakatï jan usuntaykaspa ukanakwa manqʼañ qallti. Ukampis jupatï jan wali manqʼanak sapüru manqʼaskakispa ukhajja, ¿usupat qollasispati? Janiwa. Jiwasampejj niya ukhamarakiwa, Diosjam amuyañat sipansa, akapachan amuyunakap lupʼiskaksna ukhajja, ukhamarakiw jan waltʼayistaspa.

16. ¿Kunsa jan wali amuyunakampejj lurañasa?

¹⁶ Cheqas akapachan amuyunakap istʼakipuniñäniwa, kunattejj uka taypinwa jaktanjja (1 Cor. 5:9, 10). Predickasas kʼari yatichäwinak istʼakipuntanwa. Ukhamäkchisa, istʼasajj janiw uk lupʼiskakiñasäkiti antisas pʼeqesat apsjjañasawa. Jesusat yateqasisajja, kuntï Supayajj amuyañas munki ukanak jankʼakiw pʼeqesat apsjjañasa. Janipuniw akapachankir jaqenakampejj amanuta chikachasiñasäkiti, ukhamat amuyupampi jan apayaskañäniti. Kunjamsa uk lursna uk uñjañäni (Proverbios 4:23 liytʼañataki).

17. ¿Kunjamatsa akapachankir jaqenakan amuyupat jarkʼaqassna?

¹⁷ Sañäni, amigonakasjja sum amuytʼasisaw ajlliñasa. Jiwasatï Jehová Diosar jan servirinakampi chikachasiñäni ukhajja, jupanakjamarakiw amuyjjañäni sasaw Bibliajj qhanañchistu (Prov. 13:20; 1 Cor. 15:12, 32, 33). Kunanakampis kusistʼañäni uksa sumwa  ajlliñasaraki. Monot jutatätanwa sapki uka yatichäwir creyiñatak chʼamañchki uka kusistʼañanak janipuniw ajlliñasäkiti, ni nuwasiñanakaru, qʼañu jucha lurañanakar chʼamañchki ukanaksa ajlliñasäkiti. Ukanakajj Diosan amuyup contrawa (2 Cor. 10:5).

18, 19. 1) ¿Kunatsa akapachan yaqhep amuyunakapat wal amuyasiñasa? 2) ¿Kunanaksa jisktʼasiñasa, ukat kunatsa?

¹⁸ Awisajja, akapachankir jaqenakan amuyunakapajj jan amuyañjamäspawa, ukanakat amuyasiñasawa, jarkʼaqasiñasarakiwa. Sañäni, mä yatiyäwejja, mä partido politicon amuyuparuw arjjataspa. Yaqhep yatiyäwinakajja, maynit parlasaw kuntï akapachan jikjjatapki ukar chʼamañchistaspa. Yaqhep peliculanakansa, libronakansa, jiwas pachpata, familiasat llakisiñaw taqe kunat sipansa nayrankañapa sasaw yatichapjje. Ukampis uka amuyunakajj janiw Biblian yatichäwiparjamäkiti. Antisas Bibliajja, Jehová Diosaru taqe kunat sipansa munasisaw familiasan kusisita jakassna sasaw qhanañchi (Mat. 22:36-39). Wawanakatak lurat yaqhep cuentonakanjja, ukhamarakiw jan walinak yatichapjje, jilapartejj walïskchisa jan amuykañakiw wawanakarojj jan wali qʼañu lurañanakajj walikïkaspas ukham amuyayaspa.

¹⁹ Ukhamajj ¿janipunit kusistʼañajj wakisjjaspa? Cheqas suma kusistʼañanakampi kusistʼañajj walikïskiwa. Ukampis akanak jisktʼasiñasawa: “¿Akapachan amuyunakapajj jan amuykayäkchi ukhas amuyastti? ¿Kuntï wawanakajajj uñchʼukipki liyipki ukanakat jan walïki uk jarkʼaqtti? ¿Naya pachpas ukanakat cuidasiraktti? ¿Kuntï Jehová Diosajj amuyki ukanak wawanakajar yatichtti, ukhamat akapachan amuyupampi jan apayasipjjañapataki?” sasa. Jiwasatï Jehová Diosan amuyupampi akapachankir jaqenakan amuyupampejj kunjamasa uk sum amuyañäni ukhajja, ‘janiw akapachankir jaqenakat yateqasis sarnaqkañäniti’.

20. ¿Khitirus istʼañäni uk kunatsa sum ajlliñasa?

²⁰ Ak amtañasawa: ¿Jehová Diosjamat amuyañäni jan ukajj Supayjamach amuyañäni? Jupanakat khitiruy istʼchiñäni ukarjamaw amuyañäni. Jiwasatï akapachan amuyupampi apayassna ukhajja, jupanakjamaw amuyjjsna kuns lurjjaraksna. Ukatwa kunsa uñchʼukiñäni, liyiñäni, istʼañäni, amuyañäni ukanak sum ajlliñasa.

21. ¿Kuna toqetsa akjjar jutki uka yatichäwin yatjjataskañäni?

²¹ Kunjamtï yatjjatawayktanjja, Jehová Diosjam amuyañatakejj janiw akapachankir amuyunakapatak jarkʼaqasiñasäkiti, jan ukasti, Jehová Diosan amuyunakapatwa lupʼiñasa, ukaw Jupjam amuyañatakejj yanaptʼistani. Kunjamsa uk lursna uka toqetwa akjjar jutki uka yatichäwin yatjjataskañäni.