MÄ KUTEJJA, Jesusajj akham sänwa: “Katoqañat sipansa churañanwa jukʼamp kusisiñajj utji” sasa (Hech. 20:35). Uka wakiskir yatichäwejj Jehová Diosamp sum apasiñatakiw yanaptʼistaspa. ¿Kunatsa ukham sistanjja? Kusisit jakasiñatakejj kunaymanwa Jehová Diosajj churistu. Ukampis jiwasatï Jupar churañäni ukhajja, jukʼamp kusisitaw jakasiñäni. ¿Kunsa Jehová Diosar chursna? Proverbios 3:9 textojj akham siwa: “Taqe qamir kankañamampi jachʼañcham” sasa. Uka ‘qamir kankañanakajja’, tiemposa, kunanaktï lurañ yatktan ukanaka, chʼamasa, kunanakatï utjkistu ukanakäspawa. Ukanakamp Diosar yupaychañatak yanaptʼtan ukhajja, mä regalsa Diosar churksna ukhamawa, ukajj wal kusisiyistu.

Kunatï utjkistu ukanak Jehová Diosar churañ jan armañatakejj ¿kunas yanaptʼistaspa? Apóstol Pablojja, Diosar churañatakejj ‘sapa mayniw mä qhawqsa iraqtʼapjjañama’ sasaw Corinto markankir jilat kullakanakar säna (1 Cor. 16:2). Jakaskta uka cheqan kunjamsa donacionamampi yanaptʼasma uk yatiñatakejja, aka aynachankir recuadro uñjjattʼäta.

Yaqhep markanakanjja, janiw donacionanak Internet toqe churañajj utjkiti. Ukampis Internetan donate.pr418.com uka cheqanjja, kunjamanakatsa donacionanak chursna ukaw qhanañchasi. Yaqhep markanakanjja, kunjamsa qollqemp yanaptʼsna uka toqet jisktʼanakar qhanañchañatakejj mä qellqataw utji.