BIBLIAJJ qellqaskäna uka tiemponjja, mä mayordomojj yaqha jaqen utapansa oraqepansa kunanakatï lurasiñapäkäna ukwa uñjirïna.

Jacob chachan José sat yoqapajj Egipto markan esclavökäna ukhajja, uywiripajj utapan mayordomot serviñapatakiw uttʼayäna. ‘Taqe kunanakapwa uñjañapatak’ Josear katuyjjarakïna (Gén. 39:2-6). Qhepat Joseajj Egipto markan apnaqerëjjäna ukhajja, mä mayordomwa utapan uñjañapatakejj uttʼayarakïna (Gén. 44:4).

Jesusajj aka oraqenkkäna ukhajja, jachʼa oraqen jaqenakajj haciendanakapat jayanwa jakapjjerïna. Ukhamïpansti, mayordomonakwa uttʼayapjjerïna, ukhamat trabajirinakapar sapüru uñjapjjañapataki.

¿Kunjam jaqenakarus mayordomot uttʼayasirïna? Nayrïr patak maranakan jakiri Columela sasin uñtʼat mä qellqer romano chachajj akham sasaw ewjjtʼäna: ‘“Experienciani” esclavoruw mayordomot uttʼayasiñapa. Jupajj “janiw taqe kunar iyawsiri jaqëñapäkiti, janirakiw sinti qhorüñapäkisa”’ sasa. Uka chachajj akham saskakïnwa: “Jupajj janiw taqe kunsa yatkaspa ukham tukur jaqëñapäkiti, kuntï jan yatki uk yateqañatakis jankʼakïñapawa” sasa.

Biblianjja, congregación taypin mä qhawqha lurañanakat qhanañchañatakiw mä mayordomot parli. Sañäni, apóstol Pedrojj akham sasaw cristianonakar ewjjtʼi: “Diosan wali khuyapayasiñap kunaymanit katoqer mayordomonakjamajja, kuntï sapa maynis Diosat katoqapkta ukarjam maynit maynikam yanaptʼasipjjam” sasa (1 Ped. 4:10).

Jesusas ukhamarakiw Lucas 16:1-8 texton jikjjataski uka uñachtʼäwit qhanañchañatakejj mayordomot parläna. Reyjam jutkani uka toqet parlir profeciapanjja, discipulonakaparojj mä ‘suma phoqeri amuyasir esclavoruw’, mä arunjja ‘suma phoqeri mayordomoruw’ uttʼayä sasaw Jesusajj säna. Uka mayordomojj aka qhepa urunakanjja, manqʼäkaspas ukhamwa cristianonakarojj Diosan yatichäwinakap churañapäna (Mat. 24:45-47; Luc. 12:42). ‘Suma phoqeri mayordomojj’ Bibliat apstʼat qellqatanakwa jiwasar chʼamañchtʼañatak wakichi. Ukanak katoqasasa uka qellqatanak aka oraqpachan churatapatsa walpun yuspärtanjja.