1, 2. 1) ¿Kunas jan walinakar saykatañatak yanaptʼistaspa? 2) ¿Kunsa aka yatichäwin yatjjataskañäni?

KUNA jan walinakantï uñjasiwayktan uka toqet amtasajj inas akham sirïstan: ‘Janiw ukanakar sapak saykatkiriskayätti’ sasa. Jan qollañjam mä usumpi usuntasin aguantatas layku, jan ukajj mä familiarasan jiwatapat jan aynachtʼatas laykuw ukham sirïpachätanjja. Ukanak amtasajja, Jehová Diosan espíritu santopajj “jaqen chʼamapat jilankki uka chʼama” churkitäna ukampikiw aguantawayta sasaw amuytanjja (2 Cor. 4:7-9).

² Akapachajj kuna jan walinak lurañarutï chʼamañchkistu ukar saykatañatakis espíritu santon yanaptʼapwa muntanjja (1 Juan 5:19). ‘Aka chʼamak mundon apnaqerinakapampis’ nuwasiñasarakiwa (Efes. 6:12). Niyakejjay uka jan walinakan uñjasstanjja, Diosan espíritu santopajj kunjamsa yanaptʼistu ukwa pä toqet yatjjataskañäni. Ukjjarojja, kunsa Diosan espíritu santopampi taqe kunan yanaptʼayasiñatakejj lursna uksa yatjjatarakiñäniwa.

3. ¿Kunjamsa espíritu santojj jan walinakar saykatañatak yanaptʼistu?

³ Espíritu santojj chʼam churasaw yanaptʼistu, ukhamat jan walinakan uñjaskasas kunanaktï jakäwisan lurañasäki ukanakamp phoqañasataki. Apóstol Pablojja, jan walinak utjipansa ‘Criston chʼamapampejj’ Diosar serviskakiristwa sasaw säna (2 Cor. 12:9). Misionerot payïr kutin viajkäna ukhajja, janiw predicañatakik chʼamachaskänti, jan ukasti kunanaktï jakasiñatak munkäna uk jikjjatañatakis trabajirakïnwa. Corinto markanjja, Aquilampina Priscilampin utapanwa quedasïna, jupanakajj carpanak lurañwa yatipjjäna. Niyakejjay Pablojj carpanak  lurañ yatirakchïnjja, semanan walja urunakaw jupanakamp trabajïna (Hech. 18:1-4). Espíritu santow carpanak luras trabajiñatakisa Diosan arunakap yatiyañatakis Pablor yanaptʼäna.

4. Kunjamtï 2 Corintios 12:7b-9 textojj siskejja, ¿kunas Pablor wal tʼaqesiyäna?

⁴ (2 Corintios 12:7b-9 liytʼañataki). “Mä chʼapiw jañchijan utji” sasinjja, ¿kuna toqetsa Pablojj uka versiculonakan parlaskäna? Jiwasajj mä kunampis chʼapintayastan ukhajja, wal usuyastanjja. Ukhamajj “mä chʼapiw jañchijan utji” sasinjja, mä jan walin uñjasis tʼaqesitapatwa Pablojj parlaskäna. Uka jan walejja “Supayan mä angelapäkaspas ukhamawa” sasaw säna. Ukaw juparojj wal tʼaqesiyaskäna. Jan walin uñjasitapat inas Supayasa demonionakas jan juchanïpkchïnti. Ukampis tʼaqesiskatap uñjasajj inas Pablor jukʼamp tʼaqesiyapjjchïna. ¿Kunsa ukhaman uñjasisajj luräna?

5. ¿Kun lurasas Jehová Diosajj Pablon oracionap istʼatap uñachtʼayäna?

⁵ Qalltanjja, Pablojj uka ‘chʼapin’ chhaqtañapwa munäna. Akham sänwa: “Kimsa kutiw nayajj [Jehová] Tatitur wal ruwtʼasta, uka chʼapi nayat apaqtʼañapataki” sasa. Diosar walsa ruwtʼaskchïnjja, uka jan walejj janiw chhaqtkänti. Ukhamajja, ¿Jehová Diosajj janit mayisitapar istʼkäna? Istʼänwa. Jan walin uñjaskäna uk janis chhaqtaykchïnjja, aguantañapatakiw chʼam churäna. Diosajj jupar akham sänwa: “Kunapachatï jumajj aynachtʼatäkta ukhaw nayan chʼamajajj jukʼamp qhan amuyasi” sasa (2 Cor. 12:8, 9). Diosan yanaptʼapampejja, Pablojj kusisitakïskänwa janirakiw añchas llakiskänti (Filip. 4:4-7).

6. 1) ¿Kunjamsa Jehová Diosajj mayisitanakas istʼaspa? 2) ¿Parrafon uñstki uka textonakankir promesanakat kawkïris chʼamañchtʼistu?

⁶ ¿Jiwasajj Pabljamarakit jan walinakan uñjasisajj Diosar wal mayisirïtanjja? Ukhamsa mayiskstanjja, chhaqtañat sipansa jukʼampikiw jan walinakajj jiljjattaspa. Uk uñjasajja, Jehová Diosajj janis suma jaqet uñj-jjestaspa ukhamwa amuyassna. Ukham amuyasiñäni ukhajj Pablotwa amtañasa. Diosajj kunjamtï mayisitapar istʼkänjja, ukhamarakiw jiwasar istʼistani. Inas jan walinakas jan chhaqtaykchiniti, ukampis espíritu santop toqejj aguantañatakiw chʼam churistani (Sal. 61:3, 4). Inas jan walinakajj aynachtʼaychistaspa, ukampis Jehová Diosajj janiw jaytanukkistaniti (2 Cor. 4:8, 9; Filip. 4:13).

7, 8. 1) Espíritu santojj thayamp sasiwa sasajj ¿kunatsa sistanjja? 2) Espíritu santojj kunjamsa yanaptʼistu uk qhanañchañatakejja, ¿kuna toqetsa Pedrojj parläna?

⁷ ¿Kunjamsa espíritu santojj yanaptʼarakistu? Jachʼa oladanakajj qotan sartki ukhajja, thayaw mä boterojj kawkirutï saraski ukar puriñapatak yanaptʼi. Espíritu santojja, jachʼa oladanakar uñtasit jan walinakar saykatañatakejj uka thayjamarakiw yanaptʼistu, ukhamata Diosajj churapjjämaw siskistu uka machaq mundor puriñasataki.

⁸ Apóstol Pedrojj chawlla katurïnwa, ukhamajj qotan botet sarnaqañ yatïnwa. Ukatwa kunjamsa espíritu santojj yanaptʼistu uka toqet parlañatakejj qotan botet sarnaqañat parlpachäna. Akham sänwa: “Profecía arunakajja, janiw kunapachas jaqen munañapat parlatäkänti, jan ukasti espíritu santon yanaptʼapampiw jaqenakajj Diosat parlapjjäna” sasa. ‘Yanaptʼapampiwa’ siski uka arojj griego arunjja, ‘apatawa’ sañwa muni (2 Ped. 1:21; nota).

9. ‘Apatawa’ sasinjja, ¿kuna toqetsa Pedrojj parlaskäna?

⁹ ‘Apatawa’ sasinjja, ¿kuna toqetsa Pedrojj parlaskäna? Hechos libro qellqeri Lucas chachajja, thayamp apayasir barcot parlañatakejj griego arut jutir niya uka pachpa arwa  apnaqarakïna (Hech. 27:15). Ukhamajj espíritu santon “apataw” Biblia qellqerinakajj Diosan Arup qellqapjjäna sasinjja, Pedrojj qotan botet sarnaqañatwa parlaskäna sasaw Biblia toqet yatjjatiri mä chachajj säna. Mä arunjja, Pedrojj akham sañwa munäna: ‘Thayajj kunjamtï mä boterojj saraski ukar puriñapatak yanaptʼkejja, ukhamarakiw espíritu santojj profetanakarusa Biblia qellqerinakarus Diosan Arup qellqapjjañapatak yanaptʼäna’ sasa. Biblia toqet yatjjatiri uka chachajj akham saskakïnwa: “Profetanakajj velonaksa janatatapkaspa ukhamänwa” sasa. Jehová Diosajja, “thaya” churasa, mä arunjja, espíritu santop churasaw jupanakar yanaptʼäna. Biblia qellqerinakasti, uka espíritu santon yanaptʼapampiw Biblia qellqapjjarakïna.

10, 11. ¿Kunanaksa espíritu santompi yanaptʼayasiñatakejj lurañasa? Uk mä uñachtʼäwimpi qhanañchtʼam.

¹⁰ Jichhürunakanjja, Jehová Diosajj janiw espíritu santopampejj Biblia qellqasiñapatak yanaptʼjjeti. Ukampis uka toqejj servirinakapar yanaptʼaskakiwa. Ukhamajj kuntï lurañapäki uk phoqaskakiwa. Ukampis espíritu santompi yanaptʼayasiñatakejj jiwasaw chʼamachasiñasa, ¿kunsa lurañasa?

¹¹ Aka toqet amuytʼañäni. Botet sarnaqer mä jaqetï thayamp yanaptʼayasiñ munchejja, akanakwa lurañapa: maya, thayajj phustʼki uksaruw bote apañapa, ukampis botejj muellenkaskakini ukhajja, janiw kawksarus sartkaniti. Paya, velonakap taqpachwa janatatañapa, thayajj velor phustʼani ukhakiw botejj sartani. Jiwasampejj niya ukhamarakiwa, espíritu santomp yanaptʼayasiñäni ukhakiw Jehová Diosarojj serviskaksna. Ukatakejj akanakwa lurañasa: maya, thayajj phustʼki uka cheqaruw sarañasa, mä arunjja, kunanakatï Diosan espíritu santop katoqañatakejj yanaptʼkistaspa ukanakwa lurañasa. Paya, ukanak taqe chuymaw lurañasa, ukhamatwa “velonakas taqpach janatatatas” uñachtʼayañäni (Sal. 119:32). Jiwasatï ukanak lurañänejja, espíritu santojj Jehová Diosat jan jitheqtas  serviskakiñatakiw yanaptʼistani. Jan walinakansa jan ukajj yantʼanakansa uñjaschiñänejja, machaq mundor puriñkamajj Diosar serviskakiñäniwa.

12. ¿Kunsa jichhajj yatjjatañäni?

¹² Akhakamajja, espíritu santojj kunjamsa yanaptʼistu ukwa pä toqet yateqawaytanjja. Espíritu santojj yantʼanakan uñjasktan ukhaw chʼam churistu, Jehová Diosar jupat jan jitheqtas serviskakiñatakis yanaptʼistuwa. Diosar serviskakiñatakisa machaq mundor puriñatakis yanaptʼarakistuwa. Jichhajja, espíritu santompi taqe kunan yanaptʼayasiñatakejj kunsa lurañasa uk pusi toqet yatjjatañäni.

13. 1) Kuntï 2 Timoteo 3:16, 17 texton siski ukarjamajja, ¿kunjamsa Qellqatanakajj yanaptʼistaspa? 2) ¿Kunsa jiwasajj lurañasa?

¹³ Maya, Diosan Arupatwa yatjjatañasa (2 Timoteo 3:16, 17 liytʼañataki). “Diosan amuytʼayatawa” siski uka arojj griego arunjja, ‘Diosan phustʼata’ sañwa muni. Jehová Diosajj espíritu santo toqew Biblia qellqerinakar phustʼäna, mä arunjja, uka toqew jupanakan pʼeqenakaparojj amuyunakap usküna. Ukhamajj Diosan Arup liyisasa liyktan uka toqet lupʼisasa, pʼeqesampiru chuymasampiruw Diosan yatichäwinakap katoqtanjja. Diosan amuytʼayat uka yatichäwinakaw Diosatakjam sarnaqañatak yanaptʼarakistu (Heb. 4:12). Ukampis espíritu santompi taqe kunan yanaptʼayasiñatakejja, Bibliat sapakuti yatjjatañatakiw tiempo apsusiñasa, liyktan ukatsa lupʼiñasarakiwa. Ukhamatwa, Diosajj munki ukham parlañatakisa sarnaqañatakis Bibliajj yanaptʼistani.

14. 1) Tantachäwinakasan “thayas phustʼankaspa” ukhamawa sasin ¿kunatsa sissna? 2) Tantachäwinakar “velonak janatatatas” sarksna ukhamäñapatakejja, ¿kunsa lurañasa?

¹⁴ Paya, servirinakapampi chikaw Diosar yupaychañasa (Sal. 22:22). Niyakejjay Diosan espíritu santopajj tantachäwinakankchejja, “thayas ukan phustʼankaspa” ukhamawa (Apoc. 2:29). ¿Kunatsa ukham sistanjja? Jilat kullakanakasamp tantachastan ukhajja, espíritu santwa maytanjja, Diosan Aruparjam lurat qʼochunakwa cantaraktanjja. Espíritu santon uttʼayat jilatanakan discursonakapwa istʼaraktanjja. Kullakanakarusa uka pachpa espiriturakiw demostracionanak wakichtʼañatakisa uñachtʼayañatakis yanaptʼi. Ukampis jiwasatï espíritu santompi taqe kunan yanaptʼayasiñ munstanjja, arstʼañatakejj wakichtʼataw tantachäwinakar sarañasa. Ukhamatwa ukar “velonak janatatatas” sarksna ukhamäni.

15. ¿Kunsa predicacionan espíritu santompi yanaptʼayasiñatakejj lurañasa?

¹⁵ Kimsa, predikiriw sarañasa. Yatiykasasa Bibliat maynir yatichkasas Bibliat liytʼtan ukhajja, espíritu santompiw yanaptʼayasisktanjja (Rom. 15:18, 19). Ukatakejj sapa kutiw predikir sarañasa, Bibliatsa puediskani ukhajj liytʼañasapuniwa, ukhamatwa espíritu santompejj taqe kunan yanaptʼayasiñäni. Jaqenakamp Bibliat jukʼamp sum parltʼañatakejja, Cristianjam Jakañataki ukat Yatiyañataki sat qellqatan yatiyañatak yanaptʼanakajj utjki ukarjamaw predicañasa.

16. ¿Kunjamsa Diosan espíritu santop cheqak katoqsna?

¹⁶ Pusi, Jehová Diosaruw mayisiñasa (Mat. 7:7-11; Luc. 11:13). Jehová Diosar mayisaw espíritu santo cheqak katoqsna. Diosarojj janiw mä carcelan perqanakapasa ni Supayasa oracionanakas istʼañapatakejj jarkʼkaspati, janirakiw espíritu santon jiwasar yanaptʼañapatakis jarkʼkaspati (Sant. 1:17). ¿Kunjamsa Diosarojj espíritu santopampi taqe kunan yanaptʼayasiñatakejj mayisiñasa? Uka jisktʼar qhanañchañatakejja, oración toqet parlir mä  uñachtʼäwit parltʼañäni, ukajj Lucas libronakwa uñsti. *

17. Jesusan uñachtʼäwipajj Lucas 11:5-9, 13 textonakan qellqatäki ukajja, ¿kunsa mayisiñ toqet yatichistu?

¹⁷ (Lucas 11:5-9, 13 liytʼañataki). Jesusan uka uñachtʼäwipajja, kunjamsa Diosan espíritu santop mayiñasa ukwa yatichistu. Uka uñachtʼäwinjja, tʼantʼa mayisir chachajj “jan ajjsartʼas wal mayisitap laykojj” kuntï munkäna uk katoqänwa. Chika arumäkchïnsa, jan ajjsartʼasaw amigopar yanaptʼa mayïna. * Uka uñachtʼäwimpejj ¿kunsa Jesusajj mayisiñ toqet yatichañ munäna? Akham sänwa: “Mayisipkakim, churatäpjjätawa; thaqasipkakim, jikjjatapjjätawa; leqtʼasipkakim, llawiratäpjjätawa” sasa. ¿Kunsa ukat yateqsna? Espíritu santon yanaptʼap katoqañatakejj Diosar wal mayisiñasawa.

18. Jehová Diosajj espíritu santop churistaniwa sasin ¿kunatsa sissna?

¹⁸ Uka uñachtʼäwejja, Jehová Diosajj kunatsa espíritu santop churistani uk amuytʼañatakiw yanaptʼarakistu. Jesusajj parlkäna uka chachajja, utapar wali arum purkäna uka jaqer sum katoqtʼañwa munäna. Wajjtʼañatakejj janis kunapas utjkchïnjja, wajjtʼañwa munäna. Ukampis jan ajjsartʼas wal mayisitap laykojja vecinopajj tʼantʼa churänwa sasaw Jesusajj säna. ¿Kunsa Jesusajj yatichañ munäna? Pantjasir mä jaqetï jan ajjsartʼas mayir vecinopar yanaptʼchejja, alajjpachankir wali munasir Awkisajj jukʼampiw kutin kutin mayirinakarojj espíritu santop churani. Ukhamajja, ‘churistaniwa’ sasaw Jehová Diosarojj espíritu santop maysna (Sal. 10:17; 66:19).

19. Supayajj janiw atipjkistaniti sasin ¿kunatsa sissna?

¹⁹ Supayajja Diosat jitheqtayañatakejj jan walinak luraskakistaniwa, ukampis janiw atipjkistaniti. ¿Kunatsa ukham sistanjja? Espíritu santojj pä toqetwa yanaptʼistu. Maya, jan walinakan uñjasktan ukhaw aguantañatak chʼam churistu. Paya, “velonakasarus phustʼkaspa” ukhamawa, ukaw machaq mundor puriñkamajj Jehová Diosar serviskakiñatak chʼamañchistu. Ukhamasti, espíritu santompi taqe kunan yanaptʼayasiñatakejj chʼamachasiskakiñäni.