1. ¿Jehová Diosajj kun lurañsa jan jarkʼkistu?

JAKÄWISAN kunanaksa lurañäni uk jiwasaw amtsna, Jehová Diosajj janiw uk jarkʼkistuti. Antisas kunjamsa suma amtanakar pursna ukwa yatichistu. Amtanakasajj Jupatakjamäki ukhajja, phoqañatakis yanaptʼarakistuwa (Sal. 119:173). Diosan Arupan utjki uka ewjjtʼanakarjam sarnaqtan ukhajja, jukʼamp suma amtanakaruw purtanjja (Heb. 5:14).

2. Mä suma amtar purisajja, ¿kun lurañas chʼamäjjaspa?

² Mä suma amtarus purkstanjja, kun lurañtï qalltktan uk tukuyañajj chʼamakëjjaspawa. Akanakat amuytʼañäni: mä wayna jilatajja, Biblia phoqatpach liyiñwa amti, mä qhawqha semananak liykasajja, janiw liyjjeti. Mä kullakajj precursorat serviñwa amti, ukampis kuna phajjsittï qalltañ munki uk sapa kutiw jittʼayi. Mä congregacionankir jilïr irpirinakajja, jilat kullakanakar jukʼampi visittʼañwa amtapjje, ukampis walja phajjsinakaw pasjje, janiw khitirus visittʼapkiti. Uka uñachtʼäwinakajj mayj mayjäkchisa, taqpachaniw mä amtar puripjje, taqpachanirakiw kuntï amtapki uk jan phoqapkiti. Nayrïr patak maranakan jakir Corinto markankir cristianonakarojja, niya ukhamarakiw pasäna. Kunsa jupanakat yateqsna uk jichhajj uñjañäni.

3. ¿Kuna amtarus Corinto markankir cristianonakajj puripjjäna, ukat kunas pasäna?

³ Khä 55 maranakanjja, Corinto markankir cristianonakajj mä wakiskir amtaruw puripjjäna. Jupanakajja, Jerusalenankiri ukat Judeankir jilat kullakanakajj wali pisinkapjjatapwa yatipjjäna. Yaqha congregacionanakajj kunjamsa uka jilat kullakanakar yanaptʼañatak qollqe apthapisipkäna uks yatipjjarakïnwa. Ukatwa munasiñata khuyaptʼayasiñat yanaptʼañ amtapjjäna, kunjamsa yanaptʼapjjaspa uksa apóstol Pabloruw  jisktʼapjjarakïna. Jupasti, kunjamsa yanaptʼapjjaspa uk ewjjtʼasajj Titoruw uk apthapiñ yanaptʼañapatak mayïna (1 Cor. 16:1; 2 Cor. 8:6). Ukampis mä qhawqha phajjsinakatjja, jan qollq apthapipjjatapwa Pablojj yatïna. Ukhamajj mayni congregacionanakajj yanaptʼa apayapkäna ukhajja, inas Corinto markankir cristianonakajj kuntï apthapipjjañapäkäna uk jan wakichapkchïnti (2 Cor. 9:4, 5).

4. Kunjamtï 2 Corintios 8:7, 10, 11 textojj qhanañchkejja, ¿kun lurapjjañapatakis Pablojj Corintonkir jilat kullakanakar ewjjtʼäna?

⁴ Corintonkir jilat kullakanakajj mä suma amtaruw puripjjäna, Pablojj Diosar taqe chuyma confiyapjjatapatsa, jilat kullakanakar khuyaptʼayañ wal munapjjatapatsa chʼamañchtʼarakïnwa. Ukampis “kuntï lurañ qalltapkta uk tukuyapjjam” sasaw ewjjtʼäna (2 Corintios 8:7, 10, 11 liytʼañataki). ¿Kunsa ukat yateqsna? Diosar jan jitheqtas servirinakasa, kun lurañtï amtapki uk phoqañatakejj chʼamachasipjjañapawa.

5. ¿Kuna jisktʼanakarus qhanañchaskañäni?

⁵ Kun lurañtï amtktan uk phoqañajja, jiwasatakejj Corinto markankir cristianonakatakjam chʼamarakïspawa. ¿Kunatsa? Pantjasirïtanwa, awisajj mä akatjamatwa kuna jan walis utjaraki, ukatwa jan phoqjjsnati (Ecl. 9:11; Rom. 7:18). Aka yatichäwinjja, aka jisktʼanakaruw qhanañchaskañäni: ¿kunjamsa suma amtanakar pursna? Wakiskani ukhajja, ¿amtawayktan uk uñakipañatakejj kunsa lursna? ¿Kun lurañtï qalltktan uk tukuyañatakejj kunas yanaptʼistaspa?

6. ¿Kunapachas mä amta mayjtʼayañajj wakisispa?

⁶ Wakiskir yaqhep amtanakasjja, janipuniw mayjtʼaykañäniti. Sañäni, Jehová Diosarojj wiñayatakiw serviñ muntanjja, janirakiw esposasarusa jan ukajj espososarus yaqhampi engañjañ munktanti (Mat. 16:24; 19:6). Ukampis jakäwisajj mayjtʼaspawa, ukatwa yaqhep amtanakas mayjtʼayañajj wakisispa. Ukhamajj ¿kunas suma amtanakar puriñatak yanaptʼistaspa?

7. ¿Kunsa Diosarojj mayiñasa, ukat kunatsa?

⁷ Diosaruw yatiñanïñ mayiñasa. Jehová Diosajj akham sasin qellqañapatakiw Santiagor amuytʼayäna: “Jumanakat maynitejj yatiñanïñ munchejja, Diosar mayiskakpan, jupajj taqenirus taqe chuyma walja chuririwa” sasa (Sant. 1:5). Cheqas taqeniruw ‘yatiñanïñajj’ mä kunans faltistu. Ukhamajj mä amtar janïr purkasasa kuntï amtktan uk uñakipkasas Diosaruw confiyañasa. Jupaw suma amtanakar puriñatak yanaptʼistani.

8. ¿Kunanaksa janïr kun amtkasajj lurañasa?

⁸ Sumwa yatjjatañasa. Kun lurañtï munktan uka toqet Bibliajj kamsisa ukwa yatjjatañasa, Bibliat apstʼat qellqatanakwa liytʼañasa, khititï sum ewjjtʼkistaspa ukampiw parltʼañasaraki (Prov. 20:18). Ukanakjja, janïr yaqha trabajor mantañ amtkasa, janïr yaqha cheqar jakir sarkasa, Diosar serviskakiñatakejj kun lurañsa yateqañäni uk janïr amtkasaw lurañasa.

9. ¿Kuna amtampis mä kuns lurañ muntan uk amuytʼañajj kunjamsa yanaptʼistani?

⁹ Kunatsa lurañ muntan ukwa amuytʼañasa. Jehová Diosatakejja, kunatsa mä kuns lurtan ukajj wali wakiskiriwa (Prov. 16:2). Jupajj taqe kuns suma amtamp lursna ukwa muni. Ukhamajj mä kun lurañs amttan ukhajja, kunatsa uk lurañ muntan uk sum amuytʼañasawa. Janitï ukhamäkaspajja, kuntï qalltktan uk tukuyañajj chʼamakëjjaspawa. Mä waynat parltʼañäni, jupajj precursorat serviñwa amti, ukampis qhepatjja phoqañapäki uka horanak jan phoqjjasajj janiw Diosan arunakap kusisit yatiyjjeti. ‘Nayajj Jehová Diosar kusisiyañatakiw precursorat serviñ munta’ sasin inas amuychïna. Ukampis chuymapanjja, inas awk  taykaparu jan ukajj maynir kusisiyañ laykuki precursorat serviñ qalltchïna.

10. ¿Kunas maynirojj jan walinak jaytañatak yanaptʼaspa?

¹⁰ Jichhajj Bibliat yateqer mä chachat parltʼarakiñäni. Jupajj cigarro fumañ jaytañwa amti. Qalltanjja, wal chʼamachasitap laykojj janiw mä pä semanajj fumjjeti, ukampis wasitampiw fumañ qallti. Qhepatsti fumañ jaytjjapuniwa. Jehová Diosar wal munasi kusisiyañwa munaraki ukaw cigarro fumañ vicio jaytañatak yanaptʼawayi (Col. 1:10; 3:23).

11. Kunjamsa amtanakas phoqañäni uk ¿kunatsa yatiñasa?

¹¹ Kunjamsa amtanakas phoqañäni uk yatiñasawa. Ukaw kuntï qalltktan uk tukuyañatak yanaptʼistani. Sañäni, jiwasatï Biblia sapüru liyiñ amtstanjja, ukampis janirak mä programajj liyiñatak utjkchistu ukhajj janiw uka amtas phoqkañäniti. * Mä congregacionankir jilïr irpirinakat amuytʼarakiñäni, jupanakajj jilat kullakanakar jukʼamp visittʼañwa amtapjje, ukampis walja phajjsinakaw pasjje, janiw khitirus visittʼapkiti. Kun lurañtï amtapki uk phoqañatakejj akham jisktʼasiñaw jupanakar yanaptʼaspa: “¿Kawkïr jilat kullakanakarutï visittʼapkä uk mä listar qellqtʼasipjjtti? ¿Kunapachas visittʼapjjä uk amtapjjtti?” sasa.

12. ¿Kun lurañasas wakisispa, ukat kunatsa?

¹² Kun lurañtï munktan uk phoqerjamätanti janicha ukwa amuytʼañasa. Cheqas janiw kunanaktï lurañ munktan ukanak taqpach lurañatakejj tiempos chʼamas utjkistuti. Ukhamajj amtanakas phoqerjamätanti janicha uk amuyañasawa, janirakiw jan phoqerjamäktan ukanak lurañ amtañasäkiti. Awisajja jan phoqerjamäjjtan uka amtanak mayjtʼayañajj inas wakischini (Ecl. 3:6). Sañäni, kun lurañtï amtkayätan uk uñakipasin mayjtʼaystan, mayjtʼayktan uka amta phoqerjamätas amuyarakstan ukhajja, ¿kunas qalltktan uk tukuyañatakejj yanaptʼistaspa? Uk phesqa toqet amuytʼañäni.

13. ¿Kunjamatsa kuntï amtktan uk phoqañatakejj chʼamanïsna?

¹³ Diosaruw chʼam mayiñasa. Jehová Diosaw kun lurañtï amtktan uk ‘phoqañatakejj chʼam churistaspa’ (Filip. 2:13). Ukhamajj Juparuw espíritu santo mayiñasa, ukhamatwa amtanakas phoqañatakejj chʼamanïñäni. Diosajj mayisitanakas janis istʼkistaspa ukhamsa amuykstanjja, mayisiskakiñasawa. Jesusajj akham sänwa: “[Espíritu santo] mayisipkakim, churatäpjjätawa” sasa (Luc. 11:9, 13).

14. Kun lurañtï amtktan uk phoqañatakejja, ¿kunjamsa Proverbios 21:5 textojj yanaptʼistu?

¹⁴ Kunjamsa lurañäni ukwa amtañasa (Proverbios 21:5 liytʼañataki). Mä kun lurañatakejja, kunjamsa lurañäni uk amtañaw wakisi, ukat ukarjamaw phoqañasaraki. Ukhamajj mä amtar purisajja, kunjamsa uk phoqañäni ukwa mä listar qellqtʼasiñasa. Mä kun lurañatï chʼamänejja, jukʼat jukʼatwa lurañasa, ukhamatwa qhawqsa lurasktan uk amuyañäni. Pablojj Corinto markankir cristianonakar akham sänwa: ‘Sapa semanan nayrïr urupanwa mä qhawqha qollqe iraqtʼapjjasma, ukhamat purinkä ukhak jan apthapisiñapataki’ sasa (1 Cor. 16:2). Chʼama lurañanak jukʼat jukʼat lurañajja, jan chʼama tukuñatakiw yanaptʼarakistu.

15. Kun lurañtï amtktan uk kunjamsa phoqañäni uk qellqtʼasisajja, ¿kunanakampsa luraraksna?

¹⁵ Kun lurañtï amtktan uk kunjamsa phoqañäni uk mä listar qellqtʼasiñajja, amtanakas phoqañatakiw yanaptʼistani (1 Cor. 14:40). Sañäni, congregacionanakan utjki uka jilïr  irpirinakarojj akham sasaw ewjjtʼasi: ‘Jumanakat mayniruw kuntï tantachäwinakaman amtapkäta uk qellqtʼañapatak ajllipjjañama, khitisa ukat kunapachkamas uk lurani uksa amtapjjañamarakiwa’ sasa. Uka ewjjtʼarjam lurir jilïr irpirinakatakejja, kun lurañtï amtapki uk phoqañajj janiw sinti chʼamäjjeti (1 Cor. 9:26). Jiwasajj jupanakjamarakiw lursna. Sañäni, mä urun kunanaksa lurañäni ukwa qellqtʼassna, kunsa nayraqat lurañäni, ukjjarojj kunsa lurarakiñäni ukanakwa qellqtʼassna. Ukham lurañajja janiw kuntï qalltktan uk phoqañatakik yanaptʼkistaniti, jan ukasti jukʼa tiemponak walja lurañanakampi phoqañatakiw yanaptʼistani.

16. Romanos 12:11 textorjamajja, ¿kuntï amtktan uk phoqañatakejj kun lurañas yanaptʼistaspa?

¹⁶ Chʼamachasiñasawa. Kunjamsa lurañäni uk amtasin ukarjam phoqañatakisa tukuyañatakis chʼamachasiñasawa (Romanos 12:11 liytʼañataki). Pablojj Timoteor akham sänwa: ‘Mayninakar yatichañatakejj chʼamachasiskakim’ sasa. Uka ewjjtʼajj taqe kunanwa Diosar serviñan yanaptʼistaspa (1 Tim. 4:13, 16).

17. ¿Kunjamsa Efesios 5:15, 16 textojj kun lurañtï amtktan uk phoqañatak yanaptʼistu?

¹⁷ Tiempos janiw ina chʼusar aptʼañasäkiti (Efesios 5:15, 16 liytʼañataki). Kun lurañtï amtktan uk kunapachas lurañäni uk amtasajj jan cambiañäniti. ‘Yaqha uruw uk lurañatak tiempojj utjaskani’ sasas janirak suyañäniti, inas uka tiempojj jan purinkchiniti (Ecl. 11:4). Kunatï wakiskirïki ukwa nayraqat lurañasa, janiw kunatï jan sinti wakiskirïki ukanakaruk tiempsa chʼamsa aptʼañasäkiti (Filip. 1:10). Lurañjamächejja, yaqhanakajj jan pantjasiykistaspa ukapachatakiw tiempo apstʼasiñasa. Jiwasar jan pantjasiyañapatakis yaqhanakar avisañasawa. Celularsa jiwtʼayañasawa, janirakiw uka ratojj correo electrónico ukarusa ni redes sociales ukanakarus mantañasäkiti. *

18, 19. Mä suma amtar purisajja, ¿kunas chʼamäkchi ukhas phoqañatak yanaptʼistaspa?

¹⁸ Kunjamsa amtanakasajj phoqasini uka toqetwa lupʼiñasa. Kun lurañtï amtktan uk phoqañajj kawkirutï puriñ munktan ukamp sasiwa. Ukar puriñatak thakejj jistʼantatäki ukhajja, yaqha cheqnam saraskaktanwa. Jiwasatï kunjamsa amtanakasajj phoqasini uka toqet lupʼiñäni ukhajja, ukhamarakiw jan waltʼäwinakan uñjaskasas jan aynachtʼkañäniti, jan ukasti amtktan ukanak phoqañatakejj chʼamachasiskakiñäniwa (Gál. 6:9).

¹⁹ Suma amtanakar puriñasa ukanak phoqañas janiw faciläkiti. Ukampis kuntï qalltktan uk tukuyañatakejja, Jehová Diosaw yatiñsa chʼamsa churistani.