NAYAJJ 1934 maranwa nasta. Awk taykajajja, Fred ukat Edna Molohan satäpjjewa, jupanakajj 20 maranakaw Bibliat Yatjjatirëjjapjjäna (Jehová Diosan Testigonakapa). Cheqas Jehová Diosar munasiñjja jupanakaw yatichawayapjjetu, ukat walpun yuspärta. Parsons sat jiskʼa markanwa jakasipjjäyäta, ukajj Kansas markan inti jalsu aynach toqenkiwa. Congregacionajanjja, niya taqeniw alajjpachar sarañatak ajllitäpjjäna. Tantachäwinakarusa, yatiyiris jan faltaw sarapjjerïta. Sábado tardenakajj callenakan yatiyapjjapunirïtwa, jichhajja ukham yatiyañajj ‘walja jaqenak utjki uka cheqanakan yatiyaña’ sasin uñtʼatäjjewa. Awisajj wal qaripjjerïta, ukampis yatiyañ tukuyatarojja, tatajajj helado manqʼer irpapjjapunirïtuwa.

Congregacionajan jukʼanikïpjjayätwa, ukampis territoriopajj wali jachʼänwa, walja jiskʼa markanakana, granjanak utjki ukanakanwa yatiyapjjañajäna. Jupanakajj Bibliat apstʼat qellqatanakatjja, ukhak apsut verduranaka, kʼawnanaka, wallpanakwa churapjjerïtu. Tatajajj Bibliat apstʼat qellqatanakatjja contribución churjjänwa, ukhamajj kuntï jaqenakajj churapkitäna ukanakajj manqʼa jan faltañapatakejj wal yanaptʼapjjetäna.

Awk taykajajja, yatiyañatakejj mä gramófono jikjjatapjjäna. Jiskʼäskataj laykojj uk apnaqañajj nayatak wali chʼamänwa, ukampis Bibliat yatichiri, jan ukajj revisit luriri sarapjjerïta ukhajja, Rutherford jilatan discursop grabata utjkäna ukanak uchasaw yanaptʼirïta.

Tatajajja, 1936 maran lurata autop patjjaruw mä jachʼa parlante uchäna. Uka autojj walpun yatiyañatakejj yanaptʼapjjetäna. Nayraqatajja, musicwa jaqenakan istʼañ munapjjañapatakejj uchtʼapjjerïta, ukjjaruw grabata discurso uchasipkirïta. Tukuyjjeri ukhajja, yatiñ munapkäna ukanakarojj Bibliat apstʼat qellqatanakwa churapjjerïta.

 Kansas markankir Cherryvale sat jiskʼa markanjja, parque lugarar jaqenakan sapa domingo samartʼir sarapjjatap laykojja, policiajj ‘janiw uka grabacionanak ukan uchañamäkiti’ sasaw tatajar jarkʼäna, ukampis uka anqatjja, janiw jarkʼkänti. Tatajajj jankʼakiw auto aptjjäna, ukatsti uka lugarar sarir mä calleruw saytʼayäna. Ukatsti, wasitampiw grabata discurso jaqenakan istʼasipkakiñapatakejj uchtʼäna. Tatajampi Jerry sat jilïr jilajamp chika ukanak lurañajj nayatakejj wali kusiskañänwa.

Uka maranakanjja, yatiyañatakejj mä campañaw utjäna, ukhamat kawkjantï jarkʼatäkäna ukan jukʼa tiemponaki yatiyañataki. Kunjamtï qalltan siskayätjja, ukatwa Joplin (Misuri) sat jiskʼa markaru sarañatakejj chika aruma sartapjjerïta, ukat taqe uta punkunakaruw tratadonak jamasat jaytapjjerïta. Ukham jaytasajja, taqenisipkäyätti jan ukajj khitiruch policiajj katuntjje uk yatiñatakejj marka anqäjjaruw tantachtʼasipjjerïta.

Maysa toqetjja, yatiyañatakejj marchanakjam wakichasaw thakinakar mistupjjarakirïta, ukajj wali kusiskañänwa. Letreronak warkuntasisaw Diosan Reinopat yatiyañatakejj mä filaki sarnaqapjjerïta. Mä kutejj markajanwa ukham yatiyapjjta. Jilat kullakanakajja, “Religionajj kʼariwa engañjistaspawa” sasin qellqata letrerwa apapjjäna. Utajat mistusajj mä kilómetro chikatani jila sarasajj kuttʼanjjapjjarakïnwa. Janiw nanak contra parlirinakajj utjkänti, antisas yateqañ munirinakaw utjäna.

Familiajajj Kansas markat Texas markakamaw jachʼa tantachäwirojj sarirïna. Tatajajj Misuri markat Kansas markaru ukat Texas markaru trenanakajj sarki ukanwa trabajïna, ukhamajj gratisakiw familianakar visitirisa, jachʼa tantachäwinakarus viajipjjayäta. Mamitajan jilïr jilapajja, Fred Wismar satänwa, esposapasti Eulalie satarakïnwa, jupanakajj Temple (Texas) markanwa jakapjjäna. Fred tiojajj 1940 mara nayraw waynäkasa Diosar uñtʼatayna, bautisasirakïna, jupaw mamitajarusa, mayni kullakanakaparus Bibliat parlatayna. Texas marka taypinkir taqe jiskʼa markanakanwa jilat kullakanakajj tiojar uñtʼapjjäna, ukanjja congregacionanak tumptʼiritwa (nayrajj siervo de zona) servïna. Jupajj wali munasiri kusisita ukhamänwa, jupampïñajj wali kusiskañänwa. Diosarojj wal munasïna, jupaw waynäkäyät ukhajj yanaptʼawayitu.

San Luis (Misuri) markan apaskäna uka jachʼa tantachäwirojj trenatwa 1941 maran sarapjjta. Ukanjja, Rutherford jilatan “Reyin wawanakapa” sat arstʼäwip istʼañatakejj wawanakarusa wayn tawaqonakarusa, yaqha cheqaruw qontʼayapjjetäna, 15.000 ukhanits jilapjjayätwa. Tantachäwi tukuyarojja, Rutherford jilatampi yanapirinakapampejj Hijos sat machaq libro churapjjetäna, uk janiw suyapkayätti.

Coffeyville (Kansas) markanjja, “Llamada a la Acción” sat mä jachʼa tantachäwiw abril, 1943 maran apasïna, jukʼanikis tantachasipkchïyätjja, jan armkañänwa. Ukanjja, ‘Diosan Arunakap  Yatiyañatak Escuela sat tantachäwiw congregacionanakan utj-jjani’ sasaw yatiyasïna. Uka escuelan yatjjatañatakejja, 52 yatichäwinakani mä folleton utjatapwa yatiyasïna. Uka pachpa maranwa uka escuelan mä discurso nayrïr kuti arstʼta. Uka jachʼa tantachäwinarakwa uka jakʼankir mä granjan uma estanquejj utjkäna ukan yaqhanakamp chika bautisasta. Ukajj nayatak jan armkañapuniwa.

Khä 1951 maran colegio tukuyasajja, kunsa jakäwijamp lurä uk amtañajänwa. Jerry jilajajj Betelan sirvkäna ukhamarakiw nayajj Betelan serviñ wal munayäta. Ukatwa Brooklyn markaru mä solicitud apayta. Mä jukʼa tiempotjja, iyawsapjjetänwa, ukatjja 10 de marzo, 1952 maranwa Betelan serviñ qalltta. Ukan trabajiñajj Diosar serviñan walpun yanaptʼawayitu.

Revistanakasa yaqha qellqatanakas imprimiski ukanwa trabajiñ munayäta. Ukampis janipuniw ukan trabajiwaykti, antisas meserota, qhepatjja cocinanwa trabajiyäta. Kuntï ukan lurkayäta ukajj gustitänwa waljanakwa yateqarakta. Niyakejjay trabajiñ turnasipjjchiyätjja, Betelan utjkäna uka jachʼa bibliotecan sapaki estudiañatakejj tiempojj utjitänwa. Ukaw Jehová Diosampi jukʼamp sum apasiñatakisa, Jupar jukʼamp confiyañatakisa, Betelan serviskakiñatakis yanaptʼitäna. Jerry jilajajj 1949 maranwa Betelat mistjjäna, ukatsti Patricia kullakampiw casarasjjäna, ukampis Brooklyn pachpanwa jakasipjjäna. Betelan serviñ qalltkäyäta ukhajj jupanakaw wal yanaptʼapjjetu, chʼamañchtʼapjjarakitu.

Betelar purta uka qhepatjja, khitinakas Betelan sum arstʼirïpjje ukanak ajlliñwa jilatanakajj qalltapjjäna, ukhamat congregacionanakar visitir sarapjjañapataki. Jupanakajj Brooklyn markat 322 kilometronak jayankki ukhakamaw congregacionanakarojj visitir sarapjjerïna. Mä horaw discurso arstʼapjjerïna, jilat kullakanakampis predicapjjarakirïnwa. Nayarojj ukham visitañatakiw ajllipjjetäna, ukampis qalltan ajjsarayasiyätwa. Jilapartejj trenatwa viajiyäta. 1954 maran mä domingo jaypʼojj kunatï paskäna uk janipuniw armaskti, ukhajj juyphi pachänwa. Nueva York markaruw trenat kuttʼasinkayäta, Betelarojj chʼamakthapiruw puriñajäna. Ukampis khunun wal khununtatapata, wali thayätapatjja, trenan motorapaw jan waltʼjjänti. Ukatsti trenajj saytʼki ukarojj lunesakiw niya phesqa alwa horasar purjjayäta. Ukatjja, Brooklyn markar sarir trenat purisajj cocinar cheqakiw mä jukʼa qheptʼata trabajir sarta, jan akchʼas ikitäjatjja, wali qaritäyätwa. Ukampis ukanakat sipansa, seman tukuyanakan jilat kullakanakaru ukham yanaptʼañasa, walja amigonak jikjjatañas wali kusiskañänwa.

Betelanjja, nayrïr maranakajj WBBR sat radion yanaptʼañatakiw invittʼapjjetu, ukhajja uka radiojj calle Columbia Heights, edificio 124 ukankänwa, payïr pisona. Ukanjja sapa semanaw mä qhawqhanis Bibliat yatjjatapkaspa ukham programajj utjäna, nayajj ukanwa yanaptʼarakiyäta. A. H. Macmillan jilataw WBBR radion yanaptʼäna, juparojj Mac sasaw munasiñat sapjjerïta. Jilatajj walja maranakaw Diosarojj jan jitheqtasa Betelan serviwayi, ukajj jukʼa tiempoki Betelan servisipkäyäta ukanakatakejj wali yateqaskayänwa.

Galaad Escuelan yanaptʼañajatakiw 1958 maran invittʼapjjetu. Ukanjja, machaq misioneronakaruw yaqha markar sarapjjañapatak papela jikjjatañ yanaptʼayäta. Uka tiemponjja, avionat viajiñajj wali carönwa, ukatwa jukʼa misioneronakaki avionat sarapjjerïna. África cheqaru, Lejano Oriente uksaru saririnakat jilapartejj carganak apir barconakatwa lamar qotnam sarapjjerïna. Qhepatjja, avionat sarañajj iraqtjjänwa, ukhamïpansti misioneronakajj avionatwa sarjjapjjäna.

Khä 1960 maranjja, jukʼamp trabajiñaw waktʼitäna. Jilat kullakanakarojja, Estados Unidos markat Europa toqer alquilat avionanakat  sarapjjañapatakiw yanaptʼayäta. Jupanakajj walja markanakat jachʼa tantachäwinakajj 1961 maran utjkäna ukaruw sarapjjañapäna. Nayas Nueva York markat alquilat avionatwa Hamburgo (Alemania) markar sarta. Jachʼa tantachäwi tukuyarojja, kimsa betelitanakampiw mä auto alquilasis Italia markar viajipjjta, ukanjja Roma markankir sucursalaruw visittʼapjjta. Ukatjja, Francia markarurakiw sarapjjta, Pirineos jachʼa qollunak pasasajj España markaruw puripjjta, ukanjja Diosan arunakap yatiyañajj jarkʼatänwa. Barcelona markankir jilat kullakanakar uñtʼañasa, Bibliat apstʼat qellqatanak regaljam llawtʼas jamasat churañas wali kusiskañänwa. España markatjja, Ámsterdam markakamaw puripjjta, ukjatsti Nueva York markakamaw avionat sarjjapjjarakta.

Niya mä mara qhepatjja, 583 jilat kullakanakan walja markanakar viajipjjañapatakiw yanaptʼayäta, jupanakajj walja markanakat jachʼa tantachäwinak utjkäna ukaruw sarapjjañapäna. Uka tantachäwejj 1963 maranwa apasïna “Buenas Nuevas Eternas” sat pʼeqeñchäwinïnwa. Ukasti, Europa, Asia, Pacífico sur uka cheqanakanwa apasïna, qhepatjja Honolulú (Hawái), Pasadena (California) uka markanakanwa apasirakïna. Viajkasajj Líbano ukat Jordania uka cheqanakarus visittʼapjjañapänwa, ukhamat Biblian parlki uka cheqanakar visittʼasin jukʼamp yateqañataki. Trabajkayäta uka departamentonjja, yaqha markanakar mantañatak documento papel jikjjatañ yanaptʼapjjañajänwa, avión pasajsa jayäkipanwa alapjjañajäna, alojasipjjañapatakis mayipjjañajarakïnwa.

Khä 29 de junio, 1963 maraw Misuri markankir Lila Rogers kullakampi casarasipjjta, uka marajj nayatak jan armkayawa. Jupajj kimsa maranakaw Betelan serviskäna. Casarasipkta ukat mä semanatjja, Grecia, Egipto, Líbano markanakar viajipkäna uka grupomp chikaw viajiñ qalltapjjarakta. Beirut markat Jordania markankir jiskʼa aeropuertoruw avionat puripjjta. Niyakejjay yatiyañajj uka cheqan jarkʼatächïnjja, janiw uka markar mantañatakejj Testigonakar documento papel churapkätamti sapjjetänwa, ukatwa ‘kunay inas paschistani’ sasin llakisipjjayäta. Ukampis puripjjta ukhajja, “Jehová Diosan Testigonakapa, walik jutapjjtajja” sasin qellqtʼat letrerompiw mä qhawqha jilat kullakanakajj terminal techo patapan suyapjjatayna. Biblian parlki uka cheqanak uñtʼañajj wali kusiskañänwa, ukanwa Abrahán, Isaac, Jacob chachanakajj jakapjjäna, Jesusampi apostolonakapampejj uka cheqanakanwa yatiyapjjerïna. Cristianonakas ukanwa Diosan arunakap “oraq tukuykam” yatiyañatakejj qalltapjjäna (Hech. 13:47).

Esposajajj 55 maranakaw kawkjarutï visitir sarañajäkäna ukar nayamp chik saräna. España, Portugal uka markanakan yatiyañajj jarkʼatäkäna ukhajj walja kutiw visitapjjta. Jilat kullakanakaruw chʼamañchtʼapjjta, qellqatanaksa ukat kuntï munapkäna ukanaksa jupanakatak  apapjjarakiyätwa. Cádiz (España) markan carcelankir yaqhep jilat kullakanakarus visitapjjarakiyätwa. Jupanakatak discurso artʼasa chʼamañchtʼasajj wal kusisiyäta.

Walja markanakat jachʼa tantachäwinakajj África, América Central, América del Sur, Australia, Europa, Hawái ukat Lejano Oriente, Nueva Zelanda, Puerto Rico uka cheqanakanwa apasïna. Ukar sarapjjañapatakejj 1963 maratpachaw jilat kullakanakar yanaptʼawayta. Esposajampejja, jan armkay walja jachʼa tantachäwinakaruw sarapjjta, 1989 maranjja, Varsovia (Polonia) markaruw sarapjjta. Ukarojj Rusia markankir walja jilat kullakanakaw nayrïr kuti jutapjjäna. Jupanakat yaqhepajja, Diosar servipjjatapat walja maranakaw Unión Soviética cheqankir carcelan jistʼantatäpjjäna.

Betelankir jilat kullakanakaru, misioneronakar oraqpachan chʼamañchtʼañataki visittʼañaw wal kusisiyapjjarakitäna. Corea del Sur markaru visittʼasajja, Suwon markankir carcelan jistʼantata 50 jilat kullakanakaruw uñtʼapjjta. Jupanakajj kusisitakïsipkänwa, Diosarus wasitampi libre serviñ munapjjarakïnwa. Jupanakar uñtʼañajj walpun chʼamañchtʼapjjetu (Rom. 1:11, 12).

Uka maranakan kunjamsa Jehová Diosan bendicionapampejj Diosan markapajj wal jiljjattäna uksa uñjawayaraktwa. Nayajj 1943 maranwa bautisasta, ukhajj patak waranqa yatiyirinakakiw utjäna. Jichhajj kimsaqallqo millonats jilaw 240 markanakana, cheqanakana yatiyjjtanjja. Ukajj misioneronakan yanaptʼapampiw jiljjattawayi. Nayatakejja, uka jilat kullakanakar kawkjarutï asignatäpki ukar puripjjañapatak yanaptʼañajj wali kusiskañänwa.

Waynäkasina Jehová Diosar serviñ amtatajata, Betelan serviñatak solicitud papel phoqantatajat wal kusista. Ukhat jichhakamajja, Jehová Diosajj walpun bendisiwayitu. Esposajampejj Betelan servisasa, walja maranaka Brooklyn markankir walja congregacionanakan yanaptʼasas wali kusisitäpjjtwa. Suma amigonakwa jikjjatapjjarakta.

Lila esposajan yanaptʼapampejj Betelan serviskaktwa. 84 jila maranëjjtwa, ukampis cartanak katoqasaw sucursalan yanaptʼaskakta.

Jehová Diosan markapankañasa, Malaquías 3:18 texton phoqasitap yatiñas kusiskañawa. Ukan akham siwa: “Jumanakajj amuyasipjjäta kunatejj askïki, ukhamaraki kunatejj jan askïki uksa, ukhamaraki khititejj Diosaru yupaychki, jan yupaychki ukanaksa” sasa. Sapürutjamaw Supayan apnaqat akapachajj jan walir saraski, jaqenakas llakita jan suytʼäwini ukhamäpjjewa. Ukampis Jehová Diosar munasipktan servipktan ukanakajj aka jan wali tiemponakansa, jutïritak suma suytʼäwinïsajj kusisitätanwa. Diosan Reinopat jaqenakaru yatiyañajj mä suma bendicionawa (Mat. 24:14). Diosan Reinopajj niyaw akapachar tukj-jjani, ukatsti mä suma Paraíso apanini. Uka uru puriniñap wal muntanjja. Ukanjja, Diosar jan jitheqtas servirinakajj janiw usutäjjañäniti, wiñayatakiw aka oraqen jakasjjarakiñäni.