1. ¿Kunatsa Jehová Dios saparuk serviñasa?

JEHOVÁ DIOSAW lurawayistu jakañsa churarakistu, ukatwa Jupa saparuk serviñasa (Apoc. 4:11). Ukampis ukham lurañajj chʼamakïspawa. Jehová Diosar wal munastanjja respetaraktanwa, ukampis yaqha cosasanakaw jakäwisan jukʼamp wakiskirëjjaspa, ukaw Dios saparuki serviñ jarkʼistaspa. Ukar jan purtʼasiñatakejja, kunjamsa ukajj pasaspa ukwa amuyañasa. Nayraqatajja, Dios saparuki serviñajj kamsañsa muni uk yatjjatañäni.

2. Mateo 4:10 textorjamajja, ¿kunsa Jehová Dios saparuki sirvstan ukhajj lurañäni?

² Jehová Dios saparuk serviñatakejja, maynejj Diosar taqe chuymaw munasiñapa sasaw Bibliajj qhanañchi. Dios saparuki serviñajja, Jupa saparuki adoraña sañwa muni. Chuymasanjja, janiw khitirusa ni kunarusa Jehová Diosat sipan jukʼamp munasiñasäkiti (Mateo 4:10 liytʼañataki).

3. ¿Kun yateqasas Jehová Diosar sirvtanjja?

³ Jehová Diosarojj janiw aleq ukhamatak sirvktanti, jan ukasti, Jupajj kunjam Diosasa uk sum yateqasaw sirvtanjja. Kunas gusti kunas jan gustkaraki uk sumwa yattanjja, uka toqet Jupjamaw amuyaraktanjja. Jehová Diosajj kuna amtampis jaqenakar lurawayi uks sum yattanjja, ukarjamarakiw sarnaqtanjja. Diosajj Jupan amigopäsna ukwa muni, uk yatiñajj wal kusisiyistu (Sal. 25:14, NM). Jiwasar Luriri Diosat jukʼamp yateqasajja, jukʼampiw Jupar jakʼachastanjja (Sant. 4:8).

4. 1) ¿Kuna toqes Supayajj Jehová Dios saparuki jan serviñasatak chʼamañchistu? 2) ¿Kunsa aka yatichäwin yatjjatañäni?

 ⁴ Akapachajj Supayan amparapankiwa, uka toqew kuntï munktan ukajj jakäwisan nayrankañapataki, munañasampi apayasiñasatak chʼamañchistu (Efes. 2:1-3; 1 Juan 5:19). Jehová Dios saparuki serviñat sipansa, yaqha cosasanakar munassna ukwa Supayajj muni. Kunjamsa ukar purtʼasiyistaspa uk pä toqet yatjjatañäni. Maya, walja utjirinïñatakiw chʼamañchistu. Paya, kunatï jan walïki ukanakampi kusistʼsna ukwa muni.

5. ¿Kunatsa qollqe añcha munañar purtʼasiñat amuyasiñasa?

⁵ Taqeniw suma isinïñsa, mä suma utan jakasiñsa, manqʼañanïñsa muntanjja. Ukampis janipun qollqe añcha munañar purtʼasiñäniti. Jichhürunakanjja, waljaniw “qollqe añcha munirinaka”, walja utjirinïñ munirinaka ukhamäpjje (2 Tim. 3:2). Jesusan arkirinakapajj inas uka munañampi apayasipjjchispäna, uk yatisaw Jesusajj akham säna: “Janiw khitis pä patronar esclavot sirvkaspati. Maynirojj uñisiniwa, maynirusti munasirakiniwa; maynirojj jakʼachasiniwa, maynirusti yaqhacharakiniwa. Janiw jumanakajj Diosampir Qollqempir esclavot servipkasmati” sasa (Mat. 6:24). Maynitï Diosar sirvkasin walja qollqenïñatak wal chʼamachaschi, tiempsa aptʼasirakchi ukhajja, pä patronarus serviñ munkaspa ukhamawa. Uka jaqejj janiw Jehová Dios saparuk sirvkiti.

6. ¿Jesusajj kuntï Laodicea markankir congregacionar siskäna ukat kunsa yateqsna?

⁶ Laodicea markan utjkäna uka congregacionankir cristianonakajj akham sapjjänwa: “Qamirïtwa, walja utjirinïtwa, janiw kunsa munjjti” sasa. Ukampis Jehová Dios nayraqatansa Jesús nayraqatansa, wali llakkaña, sintkaña, pobre, juykhu, jan isini ukhamäpjjänwa. Jesusajj janiw wali utjirinïpjjatap laykojj  jupanakar cheqañchkänti, jan ukasti, ukanakar wal munasajj Jehová Diosampiw jan sum apasjjapjjänti, ukatwa cheqañchäna (Apoc. 3:14-17). Jiwasatï qollqer wal munatas amuyasstanjja, jankʼakiw chuymasat uk apsuñasa (1 Tim. 6:7, 8). Janitï ukham lurksnajja, Diosar janiw taqe chuyma munasjjsnati, ukhamajj Jupar servitasajj inamayakëjjaspawa. Jehová Diosajja, jupar taqe chuyma munassna ukwa muni (Mar. 12:30). Ukampis ¿kunas qollqe añcha munañar purtʼasiyistaspa?

7-9. ¿Kunsa David sat mä jilïr irpiri jilatan experienciapat yateqsna?

⁷ Estados Unidos markankiri wali trabajtʼiri David sat mä jilïr irpirit parltʼañäni. Jupajja, ‘trabajojan wali suma trabajtʼiriyätwa’ siwa. Trabajkäna uka empresanjja, mä suma puesto katoqäna. Markapansa, kuntï lurañ yatkäna ukan mä qhawqhanikiw jupjam wali suma yatjjatatäpjjäna. Jilatajj akham siwa: “Ukapachanjja, Jehová Diosan yanaptʼapampis taqe ukanak jikjjatkirista ukhamwa amuyayäta” sasa. Ukampis ¿ukhamänti?

⁸ David jilatajja, trabajopajj kunjamsa Jehová Diosat jitheqtayaskäna ukwa amuyasïna. Akham siwa: “Tantachäwinakansa predicacionansa, kuna jan walinakatï trabajojan utjkäna uka toqetakwa lupʼiskayäta. Walja qollqwa ganayäta, ukampis jukʼamp llakitaw uñjasiyäta, esposajampis janiw waltʼayasjjayätti” sasa.

⁹ Jakäwipan kunas nayrankañapa ukwa David jilatajj amuytʼañapäna. Jupajj akham siwa: “Kunatï jan waltʼaykitäna uk askichañwa amtayäta” sasa. Jilatajj janiw nayrjam walja horanak trabajiñ munjjänti, ukatwa jefepar uka toqet parltʼäna. Ukham luratapatjja, trabajopat alisnukutaw uñjasïna. ¿Kunsa ukhaman uñjasisajj luräna? Jupajj akham siwa: “Qhepürpachaw precursor auxiliarat serviñatak mä solicitud phoqantayäta” sasa.  Qollqe ganasiñatakejja, jilatampi esposapampejj utanak qʼomachasaw trabajiñ qalltapjjäna. Mä qhawqha tiempotjja, David jilatajj precursor regularat serviñwa qalltäna, qhepatjja, esposapas ukhamarakiw precursorat serviñ qalltäna. Jilatampi esposapampejj utanak qʼomachasakis trabajipjjchejja, jupanakatak walikïskiwa. Nayrat sipan wali jukʼakwa ganapjje, ukampis janipuniw qollqejj gastonakapatak faltkiti. Jupanakatakejja, Jehová Diosar serviñaw jakäwipan nayranki, ukhamatwa kunjamsa Jehová Diosajj ukham luririnakar sum cuidi uk uñjapjje (Mat. 6:31-33).

10. ¿Kunjamsa chuymas jarkʼaqsna?

¹⁰ Walja utjirinïstansa janisa, chuymas jarkʼaqañasawa. ¿Kunjamsa uk lursna? Qollqe añcha munañar jan purtʼasiñatakiw chʼamachasiñasa, trabajosas janipuniw Jehová Diosar serviñat sipan jukʼamp wakiskirïñapäkiti. Ukampis jan ukhamäkchejja, akhamwa jisktʼasiñasa: “¿Tantachäwinakansa predicacionansa trabajojatakti lupʼisktjja? ¿Jutïrin qollqenïskäti janicha sasin sapa kutit llakistjja? ¿Qollqe layku, cosasanak laykut esposajampisa jan ukajj esposojampis jan waltʼayastjja? ¿Jehová Diosar jukʼamp serviñ laykojj mä jan suma trabajon trabajiristti?” sasa (1 Tim. 6:9-12). Ukham jisktʼasiñäni ukhajja, akwa amtañasa: Jehová Diosajj wal munasistu, jupar taqe chuyma servirinakarojj akham siwa: “Nayajj janipuniw jaytanukkämati, janipuniw apanukkämasa” sasa. Ukatwa apóstol Pablojj akham säna: “Jakañ vidanjja jan qollqe añcha munirïpjjamti” sasa (Heb. 13:5, 6).

11. ¿Kunjamsa kusistʼañanakajj maynir jan waltʼayaspa?

¹¹ Jehová Diosajj wali kusisit jakassna ukwa muni, ukatakejj kusistʼañanakaw yanaptʼistaspa. Bibliajj akham siwa: “Jaqejj manqʼasispa, umasispa, ukhamarak luratapampisa kusisirakispa ukhamanwa aski luraspa” sasa (Ecl. 2:24). Ukampis akapachan utjki uka kusistʼañanakat jilapartejj jan waliwa. Jan walinak lurañajj walikïskaspasa ukhamwa jaqenakar amuyayi. Kunatï Diosan Aruparjamajj jan walïki ukar munañataki, ukarjam sarnaqañatakiw jaqenakar chʼamañcharaki.

12. Kuntï 1 Corintios 10:21, 22 texton siski ukarjamajja, ¿kunatsa kusistʼañanak sum ajlliñasa?

¹² Jehová Dios saparukiw serviñ muntanjja, ukhamajj janiw ‘Jehová Diosan mesapampita demonionakan mesapampit manqʼksnati’ (1 Corintios 10:21, 22 liytʼañataki). Jilapartejj maynimp sum apasitasatwa jupamp  manqtʼastanjja. Jiwasatï nuwasiñaru, layqasiñaru, qʼañu juch lurañaru, jan ukajj yaqha ukham lurañanakaru chʼamañchir kusistʼañanak ajllsna ukhajja, kuntï Diosan enemigonakapajj wakichapki uk jupanakamp chikas manqtʼasiñatak qontʼasksna ukhamäspawa. Ukham lurasajj jiwas pachpaw jan walinakar purtʼassna, Jehová Diosampis janiw sum apasjjsnati.

13, 14. 1) ¿Kunatsa kusistʼañanakajj manqʼampi sasispa? 2) Santiago 1:14, 15 textorjamajja, ¿kunatsa kusistʼañanak wali amuyumpi ajlliñasa?

¹³ ¿Kunatsa kusistʼañanakajj manqʼampi sasispa? Janïr kuns manqʼkasajja, kunsa lakar uchañäni uk sum amuytanjja, ukampis manqʼa pasayjjtan jan ukajj mallantjjtan ukhajja, kunas purak manqhan pasi uk janiw amuyjjtanti. Pachpa cuerposaw uka manqʼanakat kunanakas yanaptʼistani uk chʼamthapi, ukhamat ukanakajj cuerposar chʼamañchañapataki. Suma manqʼanak manqʼañajj jan usuntañatakiw yanaptʼistu, jan wali manqʼanak manqʼañasti usuntayistaspawa. Ukampis janiw ukjpachajj usuntkañäniti, tiempompiw usuntsna.

¹⁴ Kusistʼañanakampejj ukhamarakiwa. Kusistʼañanak ajlltan ukhajja, pʼeqesar kunas mantani uk amuytanwa. Ukampis pʼeqesankjje ukhajja, amuyunakassa chuymassa mayjtʼayaspawa. Suma kusistʼañanakajj yanaptʼistuwa, jan wali kusistʼañanakasti jan waltʼayistuwa (Santiago 1:14, 15 liytʼañataki). Ukajj inas ukaratpach jan amuyaskchiniti, ukampis tiempompiw amuyasini. Ukatwa Bibliajj akham sistu: “Jan jumanak pachpajj engañjasipjjamti, janiw khitis Diosat sawkaskaspati. Kuntï maynejj phawki, ukrakwa apthapini. Maynitejj jañchin jan wali munañanakapampi irpayasis phawaskchi ukhajja, jañchipatjja jan walinakwa apthapini” sasa (Gál. 6:7, 8). Ukhamajja, kunarutï Jehová Diosajj uñiski ukanak chʼamañchir kusistʼañanak janipun ajlliñäniti (Sal. 97:10).

15. ¿Kunsa Jehová Diosajj churawayistu?

¹⁵ Jehová Diosan servirinakapat waljaniruw JW Broadcasting^® programa (canal de televisión por Internet) uñtañajj wal gusti. Marilyn sat mä kullakajj akham sänwa: “Uka programajj jukʼamp kusisitäñatakiw yanaptʼawayitu, kunanakatï ukan utjki uksa jan ajjsarayasisaw uñtta. Sapaki, jan ukajj aynachtʼat amuyasta ukhajja, mä arstʼäwisa Diosar yupaychañataki alwa tantachäwin arstʼaski ukas wal chʼamañchtʼitu. Ukaw Jehová Diosar jukʼamp jakʼachasiñatakisa markapar jukʼamp jakʼachasiñatakis yanaptʼitu. JW Broadcasting programajj walpun jakäwijan yanaptʼawayitu” sasa. Niyakejjay uka yanaptʼajj Jehová Diosan regalopäkaspas ukhamächejja, ¿ukamp yanaptʼayasisktanti? JW Broadcasting programajj sapa phajjsiw uñtañatak utji, ukampis ukan utjki uka yaqha videonakjja, kunapachas uñtaksnawa, grabacionanaksa, chʼamañchtʼkir cancionanaksa ukhamarakiw istʼsna.

16, 17. 1) ¿Qhawqha tiempos kusistʼtan uka toqet kunatsa amuyasiñasa? 2) ¿Kun lurañas kusistʼañanakar walja tiempo jan aptʼasiñatak yanaptʼistaspa?

¹⁶ Janiw suma kusistʼañanakak ajlliñasäkiti, jan ukasti qhawqha tiempos kusistʼtan uka toqetsa amuyasiñasarakiwa. Jiwasatï jan amuyasksnajja, Jehová Diosar serviñat sipansa kusistʼañanakarukiw tiempo aptʼasjjsna. Ukampis yaqhepatakejja, qhawqha tiempos kusistʼapjjani uk amuyasiñajj chʼamakïspawa. Sañäni, 18 marani Abigail sat kullakajj akham siwa: “Mä urun utjki uka lurañanak tukuyasin sum samartʼañatakejja, televisión uñtañaw yanaptʼitu. Ukampis jan amuyaskirista ukhajj walja horanakaw televisión uñchʼukirista” sasa. Samuel sat mä waynajj akham sarakiwa: “Awisajj Internetanjja, jan samartʼasaw jiskʼa videonak uñchʼukirïta. Mä video  uñtañ qalltasajja, kimsa jan ukajj pusi horanak pasjjeri ukhakiw amuyasirïta” sasa.

¹⁷ ¿Kunas kusistʼañanakar walja tiempo jan aptʼasiñatak yanaptʼistaspa? Nayraqatajja, qhawqha tiempos kusistʼtan uk yatiñatakiw chʼamachasiñasa. Ukatakejja, semanan qhawqha tiempos televisión uñchʼuktan, Internetarus manttan, celularansa anattan ukanak mä calendarioruw qellqtʼassna. Ukanakar walja tiempo aptʼasitas amuyasstanjja, mä horario lurañatakiw chʼamachasiñasa. Uka horarionjja, kunanakatï jakäwisan wali wakiskirïki ukanakaw nayrankañapa, ukjjarojja, kunapachas kusistʼañäni ukwa qellqtʼasiñasaraki. Ukatjja, ukarjam lurañatakiw Jehová Diosar yanaptʼa mayiñasa. Ukhamatwa Bibliat sapak yatjjatañatakisa, familjam yatjjatañatakisa, tantachäwinakatakisa, predicañatakisa, jaqenakar Criston discipulopar tukupjjañapatak yanaptʼañatakis tiempojj utjistani, chʼamas utjarakistaniwa. Mä jukʼa kusistʼañäni ukhas janiw llakiskañäniti.

18, 19. ¿Kunjamsa Jehová Dios saparuki servitas uñachtʼaysna?

¹⁸ Akapachan tukusiñapampita machaq mundompit qellqasinjja, apóstol Pedrojj akham sänwa: “Munat jilatanaka, niyakejjay ukanak suyaskstanjja, Dios nayraqatan wali qʼomäñataki, jan kuna manchanïñataki, jupampi sumankañatak chʼamachasipjjam” sasa (2 Ped. 3:14). Uka ewjjtʼarjam sarnaqasin Dios nayraqatan wali qʼomäñataki, ukat Jupajj munki ukarjam yupaychañatak chʼamachastan ukhajja, Jehová Dios saparuki servitaswa uñachtʼaytanjja.

¹⁹ Supayasa jupan apnaqat akapachasa, jakäwisan kunatï nayrankañapäki uk mayjtʼayañasatak yantʼaskakistaniwa (Luc. 4:13). Kuna jan walinakansay uñjaschiñänejja, janipuniw khitirusa ni kunarusa Jehová Diosat sipan jukʼamp munasiñasäkiti. Jehová Dios saparukiw serviñasa.