1. ¿Kunatsa Diosan Arupajj wali chʼamaniwa sistanjja? (Aka paginankir fotonak uñjjattʼäta).

“DIOSAN arupajj jakkiriwa, wali chʼamanirakiwa” siski uka arunakatjja, Diosan servirinakapajj janiw pächasktanti (Heb. 4:12). Diosan Arupajj kunjamsa jiwasarusa, mayni jilat kullakanakarus yanaptʼi ukwa uñjtanjja. Yaqhepajja, janïr Testigökasajj lunthatasiri, drogasiri, qʼañu juchanakan sarnaqeri ukhamäpjjänwa. Yaqhepajj wali uñtʼata, wali qollqeni ukhamäpkchïnsa, janiw kusisit jakasipkänti (Ecl. 2:3-11). Biblian yanaptʼapampiw kuna jan walinaktï nayrajj lurapjjerïkäna ukanak apanukjjapjje, jutïr urun sum jakasiñsa suytʼasipkaraki. Jupanakat yaqhep jilat kullakanakan experienciapajja, Yatiyañataki revistanwa “Bibliat yatjjatasaw nayra jakäwinakapjja jaytawayapjje” siski uka cheqan mistu, ukanak liytʼañajj wal chʼamañchistu. Jiwasajj walja maranakas Jehová Diosan Testigopäjjstanjja, Diosampi sum apasiskakiñatakejj Biblian yanaptʼap munaskaktanwa.

2. Nayra maranakan jakiri yaqhep cristianonakajja, ¿kunjamsa Diosan Arupampi yanaptʼayasisajj jan wali lurañanak apanukupjjäna?

² Bibliat yatjjatasajja, waljaniw kuna jan walinaktï nayrajj  lurapjjerïkäna ukanak apanukupjje. Ukajj janiw jichha tiemponak paskiti, nayra maranakan jakiri alajjpachar sarañatak ajllit cristianonakas ukhamarakiw jan wali lurañanak apanukupjjäna (1 Corintios 6:9-11 liytʼañataki). Khitinakas Diosan Reinopar jan mantapkani ukanakat parlkasajja, apóstol Pablojj akham sasaw cristianonakar säna: “Jumanakat yaqhepajj ukhamäpjjayätawa” sasa. Ukampis Diosan Arupampi espíritu santon yanaptʼapampiw jan wali lurañanak apanukupjjäna. Yaqhepajj cristianöjjapjjäna uka qhepatwa jachʼa juchanak lurapjjäna, ukatsti Jehová Diosampejj janiw sum apasjjapjjänti. Biblianjja, alajjpachar sarañatak ajllita mä cristianojj congregacionat jaqsutaw uñjasïna sasaw qhanañchi. Qhepatjja, taqe chuymaw arrepentisjjäna, ukatsti congregacionaruw kuttʼanjjäna (1 Cor. 5:1-5; 2 Cor. 2:5-8). Walja jilat kullakanakajj kunjamsa Diosan Arupampi yanaptʼatajj jan wali lurañanak apanukuwayapjje uk uñjañajj wal chʼamañchistu.

3. ¿Kunanakatsa aka yatichäwin yatjjataskañäni?

³ Jehová Diosan Arupajj wali chʼamaniwa, ukhamasti cheqaparjam apnaqañatakiw chʼamachasiñasa (2 Tim. 2:15). Aka yatichäwinjja, Diosan Arupampi jakañ vidasana, jaqenakar yatiykasa, plataformat yatichkasa yanaptʼayasiñatakejj kunsa lurañasa ukwa yatjjataskañäni. Ukanak yatjjatañajja, Jehová Diosar munasiñataki, yuspärañatakiw yanaptʼistani. Jupajj kunatï yanaptʼkistaspa ukwa yatichistu (Isa. 48:17).

4. 1) ¿Bibliampi yanaptʼayasiñatakejj kunsa lurañasa? 2) ¿Biblia liyiñatakejj kunjamsa jumajj tiempo apstʼasta?

⁴ Diosan Arupampi yanaptʼayasiñ munstanjja, sapüru liyiñatakiw chʼamachasiñasa (Jos. 1:8). Cheqas niya taqeniw jan tiemponi sarnaqtanjja, ukhamäkchisa Biblia liytʼañatak tiempo apsusiñasapuniwa. Kunayman lurañanakampi phoqañasäkchisa liyiñatakejj chʼamachasiñasawa (Efesios 5:15, 16 liytʼañataki). Alwanaka, urunaka, jan ukajj arumanakaw Biblia liysna. Salmo qellqerjamarakiw akham sissna: “Yatichäwimarojj walpun munasta: ¡Sapüruw ukjjat lupʼiskta!” sasa (Sal. 119:97).

5, 6. 1) ¿Kunatsa Biblia liykasajj lupʼiñasa? 2) Liyktan ukanakat lupʼkasajja, ¿kun lurañasasa? 3) ¿Kunjamsa Biblia liyiñasa kuntï liyktan ukanakat lupʼiñas jumar yanaptʼtamjja?

⁵ Bibljja janiw aleqak liyiñasäkiti. Jan ukasti liyisajj kuntï siski ukanakat lupʼiñasawa, sum amuytʼañatakiw chʼamachasiñasaraki (Sal. 1:1-3). Ukhamatakwa, kuntï yateqktan ukarjam sarnaqañäni. Biblia pachpat liytʼasasa, celularata jan ukajj tabletat  liytʼasasa, kuntï siski ukarjam sarnaqañ amtampiw liyiñasa.

⁶ Biblia liyktan ukanakat lupʼkasajja, ¿kun lurañasasa? Saytʼas saytʼasaw liyiñasa ukatsti akham jisktʼasiñasarakiwa: “¿Kunsa aka textojj Jehová Diosat yatichitu? ¿Kuntï siski ukarjamat nayajj sarnaqasktjja? ¿Kunanakan chʼamachasiñajas wakisiskaki?” sasa. Jiwasatï Biblia liytʼasajj lupʼiñäni, orasirakiñäni ukhajja, yateqktan ukarjam sarnaqañatakiw chʼamachasiñäni. Ukhamatwa Diosan Arupampi yanaptʼayasiñäni (2 Cor. 10:4, 5).

7. Diosan arunakap yatiykasajja, ¿kunjamsa Diosan Arupampi yanaptʼayassna?

⁷ Jehová Diosan arunakap yatiyktan ukhajja, ¿kunjamsa Bibliampi yanaptʼayassna? Diosan arunakap yatiykasasa yatichkasasa Bibliat liytʼañasapuniwa. Mä jilatajj akham sänwa: “Jehová Diosampi utat uta yatiyir sarasma ukhajja, ¿jumakit sapa utansa parlasma, jan ukajj Jupar parltʼayarakismacha?” sasa. Ukham sasajja ¿kamsañsa uka jilatajj munpachäna? Yatiykasajj Bibliat liytʼktan ukhajja, Jehová Diosarus parlayksna ukhamawa. Suma ajllit textojja, arunakasat sipansa jukʼampiw jaqenakan chuymapar purtʼaspa (1 Tes. 2:13). Ukatwa akham jisktʼasiñasa: “¿Diosan arunakap yatiykasajj Bibliat liytʼapuntti?” sasa.

8. ¿Kunatsa jaqenakatak Bibliat liytʼarapisajj qhanañchañasaraki?

⁸ Jaqenakatakejj janiw aleqak liytʼarapiñasäkiti. Nayra tiemponakansa, jichha tiemponsa janiw taqenejj kuntï Bibliajj yatichki ukanak amuyapkiti (Rom. 10:2). Jaqenakatak Biblia liytʼarapktan ukhajja, entiendpachaw sasakejj janiw amuyañasäkiti. Jan ukasti, kunanaktï qhanstañap munktan ukanak amuyañapatakejj mayamp mayampwa  sañasa, kamsañsa muni uksa qhanañchañasarakiwa. Ukhamatwa kuntï yatichktan ukajj pʼeqeparusa chuymaparus purtʼani (Lucas 24:32 liytʼañataki).

9. Jaqenakan Bibliar respetompi uñjapjjañapatakejja, mä texto janïr liytʼkasajj kamsnasa uk mä uñachtʼäwimp qhanañchtʼma.

⁹ Mä texto janïr liytʼkasajj kuntï siskañäni ukaw jaqenakarojj Bibliar respetañapatak yanaptʼaspa. Inas akham sissna: “Taqe kun Luriri Diosajj kamsisa uk uñjañäni” sasa. Religionar jan sarir jaqempi parlkasajj akham saraksnawa: “Diosan Arupajj kamsisa uk uñjañäni” sasa. Religionat jan yatiñ munki ukanakarojj akham sissnawa: “Aka arunak istʼirïtati” sasa. Niyakejjay jaqenakajj jan mä pachpak amuyapkchejja, kamsañänisa uk sum amuytʼañasawa (1 Cor. 9:22, 23).

10. 1) Diosan arunakap yatiykasajj kunas mä jilatar pasäna uk qhañachtʼma. 2) Diosan arunakap yatiykta ukhajja, kunjamsa Bibliat liytʼarapiñajj jaqenakar yanaptʼi, uk qhanañchtʼma.

¹⁰ Diosan Arupampi jaqenakar yatiyktan ukhajja, chuymaparuw purtʼi sasaw walja jilat kullakanakajj sapjje. Mä jilatajj walja maranakaw chuymani mä jaqetak revistanak aparapirïna. Mä urojja, jichhak mistur Yatiyañataki revista churasajj ukan uñstir mä textompwa Bibliat liytʼarapïna. Ukajj 2 Corintios 1:3, 4 textönwa, ukan akham siwa: ‘Diosajj wali munasiñampi khuyaptʼayasiri Awkiwa, taqe kunan chuymachtʼasiri Diosarakiwa, jupaw taqe llakinakasan chuymachistu’ sasa. Uka arunakajj chuymaparuw purtʼäna, ukatwa mayamp liytʼarapita sasin jilatar säna. Ukatsti ‘nayampi esposajampejj chuymachtʼatäñwa munapjjta, Bibliat jukʼamp yatjjatañsa munapjjaraktwa’ sasaw sarakïna. Kunjamtï uñjawayktanjja, yatiykasin Bibliat mä texto liytʼañajj jaqenakan chuymaparuw purtʼaspa (Hech. 19:20).

11. Plataformat yatichapki uka jilatanakajja, ¿kunjamsa yatichapjjañapa?

¹¹ Tantachäwinakaru, jachʼa tantachäwinakaru sarañjja taqeniw wal muntanjja. Taqe kunat sipansa, Jehová Diosar adorañatakiw uka tantachäwinakar sartanjja. Yatichaski ukanak yateqeriw sararaktanjja. Jilatanakatakejj plataformat yatichañajj mä bendicionawa, ukampis sum yatichañatakiw chʼamachasipjjañapa (Sant. 3:1). Ukatwa Bibliarjampuni yatichapjjañapa. Jumatï discursonak arstʼirïstajja, ¿kunjamsa Diosan Arupampejj tantachasirinakan chuymapar purtʼasma?

12. Discurso arstʼir jilatajja, ¿kunjamsa Bibliarjampun yatichañatak chʼamachasispa?

¹² Discurso arstʼkasajja, Bibliarjampun yatichañatakiw chʼamachasiñama (Juan 7:16). Mä uñachtʼäwimpi yatichäta jan ukajj mä experienciat parläta ukhajja, Bibliaw jukʼamp qhanstañapa. Ukampis ak amtañamawa: Bibliat liytʼañampi, Bibliat yatichañampejj janiw pachpäkiti. Jumatï discursoman walja textonak liyisma ukhajja, jilapartejj janiw kuntï yatichkta uk amtapkaspati. Ukatwa wali amuyumpi kuna textonaksa liytʼäta uk sum ajlliñama. Uka textonak liytʼañatakisa, qhanañchañatakisa, uñachtʼäwimpi amuytʼayañatakisa, kunjamsa yanaptʼistaspa uk qhanañchañatakis tiempomajj utjañapawa (Neh. 8:8). Discursomatï bosquejo utjki ukarjam arstʼañächi ukhajja, kuntï qhanañchki ukanak sum yatjjatañamawa, textonaksa liytʼañamarakiwa, ukatsti kunjamsa uka textonakajj bosquejon siski ukar yanaptʼi ukanak sum amuytʼañatakiw chʼamachasiñama. Ukjjarusti, bosquejon kuna toqettï parlki ukarjamajj kawkïr textonak liytʼañas wakisispa ukanak sum ajlliñamaraki  (ukatakejj Benefíciese de la Escuela del Ministerio Teocrático libron 21-23 yatichäwinakap uñjjattʼäta). Bibliajj kuntï yatichki ukanak sum yatichañatakejja, Jehová Diosar yanaptʼa mayisiñamaw jukʼamp wakiskirejja (Esdras 7:10; Proverbios 3:13, 14 liytʼañataki).

13. 1) ¿Kunjamsa mä kullakarojj tantachäwin mä texto liytʼir istʼañajj yanaptʼäna? 2) Tantachäwinakan Bibliampi yatichasitapajj ¿kunjamsa jumar yanaptʼtamjja?

¹³ Australia markankir mä kullakarojj tantachäwin Bibliampi yatichapjjatapaw wal yanaptʼäna. Wawäkasajja, jupajj kunayman jan walinakanwa uñjasïna, qhepatsti, Bibliat yatjjatasajj bautisasjjänwa. Ukhampachasa, Jehová Diosajj janis munaskaspa ukhamwa amuyasïna. Ukampis mä urojja, tantachäwin istʼkäna ukanakat mä textow chuymapar purtʼäna. Uka textot wal lupʼisasa, yaqha textonak liytʼasasa, Jehová Diosajj jupar wal munasitapwa amuyasjjäna. * ¿Jumarojj tantachäwina, jan ukajj mä jachʼa tantachäwin Bibliat liytʼaski ukanakat mä textojj yanaptʼarakirïtamti? (Neh. 8:12).

14. ¿Kunjamsa Diosan Arupar munasitassa, wali valoranit uñjatassa uñachtʼaysna?

¹⁴ Jehová Diosar walpun yuspärtanjja, Jupajj jiwasar wal munasaw Arupa qellqayawayi, ‘Arujajj wiñayatakïniwa’ siski uka arsutapsa phoqarakiwa (1 Ped. 1:24, 25). Ukhamajja, Biblia sapüru liyipjjapuniñäni, ukarjam sarnaqapjjañäni, yaqhanakarus Bibliampipun yanaptʼapjjañäni. Ukham lurasajja, Diosan Arupar wal munasitasa, wali valoranit uñjataswa uñachtʼayañäni. Yamas Biblia Qellqayiri Jehová Diosar munasitaswa uñachtʼayañäni.