KHÄ 1935 niya uka maranakanjja, James Sinclair tatajampi Jessie mamajampejj Nueva York markankir Bronx cheqaruw sarjjapjjäna. Uka markanwa Willie Sneddon chachamp uñtʼasipjjäna, jupajj Escocia markatwa jutarakitayna. Mä ratutjja, familianakapatwa parlapjjäna. Ukapachajj janïraw nayajj utjkayätti.

Mamajajj akham sasaw Willie chachar familiapat awisäna: ‘Tatajampi jilajampejj Mar del Norte sat lamar qotanwa Primera Guerra Mundial janïr qalltkipan jiwapjjäna. Chawlla katuñ barcopaw imantat mä bombar chocantatayna’ sasa. Jupasti, “tatamajj infiernonkaskiwa” * sasaw sarakitayna. Jupajj Jehová Diosan Testigopänwa, mamajajj ukhamatwa Diosar uñtʼañ qalltäna.

Willie jilatan ukham satapajj janiw mamajar gustkänti, tatajajj suma jaqënwa sasaw säna. Ukjjarusti Willie jilatajj akham sänwa: “¿Jesusajj infiernonkarakïnwa sirisma ukhajj kamsasmasa?” sasa. Uk satajja, mamajajj Iglesiapan ‘Jesusajj infiernoruw mantäna, kimsürutwa jaktjjäna’ sasin resapjjerïkäna ukwa amtasïna. “¿Kunatsa jan wali jaqenakajj ninan tʼaqesisipki ukar Jesusajj mantpachäna?” sasaw mamajajj jisktʼasïna. Ukaw Diosan arunakapat yatjjatañatakejj yanaptʼatayna. Bronx markankir congregacionaruw sarañ qalltäna, 1940 maranwa bautisasjjarakïna.

Uka tiemponjja, awk taykanakaw wawanakapar Bibliat yatichapjjañapa sasajj janiw chʼamañchasirïkänti. Wawäskayät ukhajja, mamajajj tantachäwinakar sarirïki ukhasa, seman tukuyanakajj Diosan arunakap yatiyir sarirïki ukhas tatajakiw uñjirïtu. Mä qhawqha maranakatjja, nanakamppachaw tantachäwinakar sarjjapjjayäta. Mamajajj walpun Diosat yatiyirïna, waljaniruw Bibliat yaticharakïna. Mä tiempojja, mä pachpa lugarankir Bibliat yateqañ munirinakajj tantachasisaw mamajampi yateqapjjeri. Vacacionanjja nayajj mamajampiw yatiyir sarirïta. Ukhamatwa Bibliat jukʼampi yateqayäta, yaqhanakar yatichañsa yateqarakiyäta.

 Jiskʼäskayäta ukhajja, Bibliat yateqañajj janis wakiskaspa ukham uñjirïta. 12 maraniruw yatiyir mistjjayäta, ukhat jichhakamaw Diosan arunakap yatiyaskta. 16 maranirakiw Jehová Diosar jakañ vidajj katuyasta, ukatsti Toronto (Canadá) markan apaskäna uka jachʼa tantachäwinwa 24 de julio, 1954 maran bautisasta.

Congregacionajankir yaqhep jilat kullakanakajj Betelankapjjänwa, yaqhepasti nayraw Betelan trabajipjjatayna. Jupanakar uñjasaw Betelankañ munarakiyäta. Discurso arstʼapjjatapasa, Bibliat sum qhanañchapjjatapas wal gustitäna. Profesoranakajajj universidadar sarañajsa munapkchïnjja, nayajj Betelar sarañwa munayäta. Ukatwa Toronto markan apaskäna uka jachʼa tantachäwin ukar sarañatak solicitud phoqantayäta. 1955 maranjja, Nueva York markan Estadio de los Yankees ukan apaskäna uka jachʼa tantachäwin mayampwa solicitud phoqantayäta. Brooklyn markankir Betelan 19 de septiembre urut trabajiñ qalltañatakiw 1955 maran invitación katoqayäta, ukhajj 17 maranïskayätwa. Betelar purkta uka qhepürojja, libronak luraski uka talleranwa trabajiñ qalltta, calle Adams número 117 ukana. Ukanjja, hojanak yaqha maquin chʼukthapiñapatak wakichir maquinampiw trabaj-jjayäta.

Mä phajjsitjja, qellqañ máquina apnaqañ yatitajatwa, Departamento de Suscripciones ukan trabajiñatak khitapjjetäna. La Atalaya, ¡Despertad! revistanak sapa phajjsi katoqañatak qellqayasipkäna, ukanakan direccionanakapwa jilat kullakanakajj metalat lurata mä sellor uñtasit lurapjjerïna. Mä qhawqha phajjsitjja, Departamento de Envíos ukanwa yanaptʼarakiyäta. Ukanjja Klaus Jensen jilataw sarayäna, jupajj akham jisktʼitäna: ‘¿Yaqha markanakar qellqatanak apayañatak puertonakar apki uka camión apnaqerimp sarasmati? ¿Estados Unidos markar apayañatakisa  correo oficinar revistanak apasmati?’ sasa. Niyakejjay wali flacöchiyätjja, ukham trabajiñajj yanaptʼätamwa sasaw Jensen jilatajj sitäna. Ukhajj 57 kilonakak pesayäta. Puertonakaru, correo oficinaru qellqatanak apañajj cheqapuniw chʼamanïñatak yanaptʼitäna.

Departamento de Suscripciones ukajja, congregacionanakajj mayipkäna ukarjamaw revistanak apayäna. Ukhamatwa kuna arunakantï Brooklynan imprimiskäna uka arunak uñtʼayäta. Ukanakat jilapartjja, janiw nayrajj istʼirïkayätti, ukampis walja revistanak jayanakar apayasitapajj wal kusisiyitäna. Walja maranak qhepatjja, niya taqpach uka markanakaruw visitir sarta, janipuniw ukham sarañ piensirïkti.

Tesorería ukaruw 1961 maran asignapjjetäna, ukanjja Grant Suiter jilataw pʼeqtʼäna. Mä qhawqha maranak qhepatjja, Nathan Knorr jilatan oficinaparuw sarañama sasaw sapjjetäna. Ukhajj uka jilataw Diosan markap sarayaskäna. Jupajj akham sitänwa: ‘Yanapkitu uka jilatajj mä phajjsiw Jilïr Irpirinakataki ukat Taman Yanapirinakapatak Escuelar sarani, kuttʼanjjasajj Departamento de Servicio ukanwa trabajini. Jupa lantiw Don Adams jilatampi trabajïta’ sasa. 1955 maran mä jachʼa tantachäwinjja, Adams jilataw Betelar sarañajataki solicitudaj katoqetäna. Uka oficinanjja Robert Wallen jilatampi Charles Molohan jilatampiw trabajipjjarakitayna, jupanakampejj pusiniw 50 maranak jila trabajipjjta. Diosar taqe chuyma serviri jilatanakampi trabajiñajj wali kusiskañänwa (Sal. 133:1).

Khä 1970 maranjja, ‘Watch Tower Society ukan sucursalanakaparuw sapa mara, jan ukajj sapa pä maranakat visitir sarañama’ sasaw sapjjetäna, ukarojj walja semananakatakiw  sarañajäna. Nayrajj visitas de zona sasaw ukarojj uñtʼasïna. Uka visitanakanjja, betelitanakaru, misioneronakaruw chʼamañchtʼasirïna, sucursalan archivonakapas uñakipasirakirïnwa. Galaad Escuelajj utj-jjäna uka nayrïr escuelanakar saririnakaruw uñtʼarakiyäta, jupanakajj kawkïr markanakarutï khitatäpkäna ukanwa Diosar taqe chuyma servisipkakïna. 90 jila markanakaruw ukham visitawayta. Ukajj Diosan mä bendicionapawa.

Brooklynankir betelitanakarojj Nueva York markankir congregacionanakaruw khitapjjetäna, nayajj Bronx cheqankir congregacionaruw sarayäta. Uka congregacionajj wal jiltjjäna, ukatwa payar jaljasïna, nayrïr congregacionajj Upper Bronx satänwa, nayajj ukaruw sarayäta.

Letonia markat jutiri mä familiajja, 1965 niya uka maranakanwa Bronx markan aynach toqen Diosar uñtʼapjjatayna. Congregacionajajj yatiykäna uka cheqaruw jupanakajj jutjjapjjäna. Livija sat jilïr phuchapajja, colegio tukuyasajj precursor regularäjjänwa. Mä qhawqha phajjsinakatjja, kawkjantï yatiyirinakajj munaski ukaruw Massachusetts markar sarjjäna. Nayasti, congregacionajj kunjamäskänsa uk yatiyañatakiw qellqerïta, jupajj Boston toqen kunja kusisitas yatiyaskäna ukanakwa awisirïtu.

Mä qhawqha maranak qhepatjja, Livija kullakajj precursora especialäjjänwa. Jupajj Diosar serviñatakejj kunay munaschi uk lurañwa munäna, ukatwa Betelar sarañatakejj solicitud phoqantäna. Ukatsti 1971 maranwa Betelar jawsapjjäna. Jehová Diosas jupampïñaj munkaspa ukhamänwa. 27 de octubre, 1973 maranwa casarasipjjta. Nathan Knorr jilataw discurso arstʼäna, ukajj mä bendicionänwa. Proverbios 18:22 textojj akham siwa: “Esposa jikjjatañajj suma aski jikjjatañawa; Diosan bendicionap katoqañarakiwa” sasa. Ukajj cheqäskapuniwa, panijajj 40 maranakaw Betelan servisipkta, ukajj Diosan mä suma regalopawa. Bronx markankir congregacionaruw sarasipkakta.

Knorr jilatar yanaptʼañajj wali kusiskañänwa. Diosan Arupa yatiyasiñapatakejj taqe chuymaw jupajj yanaptʼäna, misioneronakarus wali munasiñampiw uñjirïna. Misioneronakat jila partejja, kawkïr markarutï sarapkäna ukanjj jupanakakiw qalltan Testigöpjjäna. Knorr jilatajj 1976 maranwa cáncer usumpi usuntäna, tʼaqesir uñjañajj wali llakiskañänwa. Mä kutejj ikiñankaskäna ukhajja, imprimisiñapäkäna uka qellqat liytʼañajatakiw mayitäna. Ukatsti Frederick Franz jilatampir jawsanim, jupajj istʼarakpan sitänwa. Franz jilatajj janiw sum uñj-jjänti, ukatwa Knorr jilatajj imprimisiñapäkäna uka qellqatanak liytʼarapirïtayna, qhepatakwa uk yatiyäta.

Knorr jilatajj 1977 maranwa jiwjjäna, aka oraqenjja jan jitheqtasaw Jehová Diosar serviwayi, ukaw uñtʼapkayäta, munasipkarakiyäta  ukanakarojj chuymachtʼapjjetäna (Apo. 2:10). Ukatsti Frederick Franz jilataw Diosan markap sarayjjäna.

Uka tiempotakejja Milton Henschel jilatan secretariopayätwa, jupajj walja maranakaw Knorr jilatampi trabajitayna. Jichhajj Franz jilataruw wakiskani ukanakan yanaptʼäta sasaw Milton jilatajj sitäna. Imprimisiñapäkäna uka qellqatanakwa Franz jilatatak sapakuti liytʼarapirïta. Jupajj kuntï liytʼarapirïkta ukanakjja janiw armirïkiti, liytʼarapirïkta ukhas sum istʼiri. Jiwañapkam yanaptʼañajj wali kusiskañänwa jupajj diciembre, 1992 maranwa aka oraqen jakañap tukuyawayjje.

Awk taykajajj jiwañkamaw Jehová Diosar jan jitheqtasa serviwayapjje. Jaktanjjapjjani uka urun katoqtʼañatakiw wal suyaskta (Juan 5:28, 29). Betelanjja, 61 maranakaw Diosar serviskta, jan kunakiw ukha maranakajj pasawayjje. Nayatakejja, kunanakatï Supayan apnaqat akapachan utjki ukanakajj janiw kunäkisa. Antisas Jehová Diosar taqe chuyma serviri jilat kullakanakamp oraqpachankir jilat kullakanakar yanaptʼañaw mä suma bendicionajja. Livija esposajampejj akham sasaw taqe chuyma sapjjta: Diosar serviwayktan uka maranakanjja, Jehová Diosajj ‘kusisiñapampiw chʼamañchawayistu’ sasa (Neh. 8:10).

Janiw khiti jaqes wali wakiskirïkiti, Diosan markapajj yanaptʼatas jan yanaptʼatas nayrar sartaskakiniwa, Diosan Reinopatsa yatiyasiskakiniwa. Jehová Diosar jan jitheqtas serviri walja jilat kullakanakampi ukha maranak trabajiñajja, mä suma bendicionawa, kusiskañarakiwa. Trabajipkayäta uka ajllit jilatanakat jila partejj janiw aka oraqenkjjapjjeti. Ukampis Diosar taqe chuyma servir jilatanakampi trabajitajat walpun yuspärta.