1, 2. 1)¿Kuna jan walinakansa munañapampi apnaqayasirinakajj uñjasipjje? 2) ¿Kunatsa munañasampi jan apnaqayasiñat parlañajj jichhürunakan wakisi?

JEHOVÁ DIOSAW munañasampi jan apnaqayasiñatakejj yanaptʼistaspa (Gál. 5:22, 23). Jupajj janiw munañapamp apnaqayaskaspati, ukampis pantjasirïtasatjja, munañasampi jan apnaqayasiñajj jiwasatak chʼamakïspawa. Jichhürunakanjja, jaqejj munañaparjamakiw kuns lurjje, ukatwa kunayman jan waltʼäwinakajj utji. Sañäni, kuntï lurapjjañapäki ukjja qhepürutakiw jaytapjje, trabajopansa janiw sum trabajipkiti, escuelansa janiw sum yateqapkiti. Munañapampi apnaqayasisajja, jaqenakajj jan walinak parlapjje, machapjje, nuwasipjje, divorciasipjje, manur mantapjje, vicionakar yatintapjje, carcelan jistʼantatäpjje, llakinakan uñjasipjje, qʼañu juchanak lurasin usunak katupjje, wawanis uñjasipjjaraki (Sal. 34:11-14).

² Kunjamtï uñjktanjja, munañapampi apnaqayasirinakajj jan walinakanwa uñjasipjje, jaqe masiparus jan walinak lurapjje. Uka jan walejja sapürutjamaw jiljjattaski. Munañasampi jan apnaqayasiñajj kunja wakiskirisa ukajj 1940 maranakanwa yatjjatasjjäna, ukhampachasa, jichha tiemponjja jukʼampiw jaqenakajj munañapampi apnaqayasipjje. Ukampis ukanak uñjasajj janiw muspañasäkiti, “qhepa urunakanjja” jaqenakajj ‘munañapampiw apnaqayasipjjani’ sasaw Bibliajj nayratpach qhanañchjjäna (2 Tim. 3:1-3).

3. ¿Kunatsa munañasampi jan apnaqayasiñatakejj chʼamachasiñasa?

 ³ ¿Kunatsa munañasampi jan apnaqayasiñatakejj chʼamachasiñasa? Uk pä toqet uñjañäni. Maya, munañapampi jan apnaqayasirinakajja janiw sinti jan walinakan uñjasipkiti, jaqe masipampis sumakiw apasipjje, janirakiw jankʼakis colerasipkiti, ni sinti llakisiñarus puripkarakiti. Paya, Diosan amigopäñ munstan ukhajja, yantʼanakar saykatañasawa, janirakiw jan wali munañanakasampis apnaqayasiñasäkiti. Adanampi Evampejj munañapampi apnaqayasisaw juchar purtʼasipjjäna (Gén. 3:6). Jichhürunakansa jaqenakajj munañapampi apnaqayasisaw kunayman jan walinakan uñjasipjje.

4. ¿Kunas munañanakapar jan atipirjamäpki ukanakarojj chʼamañchtʼaspa?

⁴ Jaqenakatakejja, munañanakampi jan apnaqayasiñajj chʼamakïspawa. Jehová Diosajj uk sum yati, ukatwa jan wali munañanakasar atipañatakejj yanaptʼañ munistu (1 Rey. 8:46-50). Jehová Diosajj mä amigor uñtasitaw khitinakatï munañanakapar jan atipirjamäpki ukanakarojj munasiñampi chʼamañchtʼi. Aka yatichäwinjja, kunjamsa Jehová Diosajj munañapampi jan apnaqayaski ukwa nayraqat uñjañäni. Ukjjarojja, khitinakas munañapamp apnaqayasipjjäna, khitinakas jan apnaqayasipkarakïna ukwa yateqaskañäni. Tukuyarusti, munañasampi jan apnaqayasiñatakejj kunsa lursna ukwa uñakiptʼarakiñäni.

5, 6. ¿Kunsa munañasampi jan apnaqayasiñatjja Jehová Diosat yateqsna?

⁵ Jehová Diosajj janipuniw munañapamp apnaqayaskaspati, Jupajj janipuniw kunansa pantjaskaspati (Deu. 32:4). Ukampis jiwasajj pantjasirïtanwa, ukatwa munañasampi jan apnaqayasiñatakejj kunjamsa Diosat yateqassna uk yatjjatañasa, ukaw jan walinakan uñjasiñäni ukhajj wali amuyumpi kuns lurañatak yanaptʼistani. Kunjamsa Jehová Diosajj munañapampi jan apnaqayaskäna uk jichhajj uñjañäni.

⁶ Supayajj Dios contra saytʼkäna ukhajja, ¿kunsa Jehová Diosajj luräna? Supayan jan wali arunakapajja, Diosar alajjpachan servipki ukanakatakejj jan walipunïpachänwa, inas jupanakajj colerapjjchïna. Supayan saytʼasitapatjja kunayman jan walinakaw jichhürunakansa utji, ukanak uñjasajj inas jiwasas colerarakstan. Ukampis Jehová Diosajj janiw coleramp atipayaskänti, wali amuytʼasisaw taqe kuns luräna. Ukhamatwa ‘jan jankʼaki colerasirïtap’ uñachtʼayäna, Supayajj Jupa contra saytʼaskäna ukhasa, cheqaparjamaw uk uñjäna (Éxo. 34:6; Job 2:2-6). Ukampis ¿kunatsa jan walinak jichhakam jan askichkpacha? Diosajj ‘janiw khitin jiwañapsa munkiti, jan ukasti taqenin arrepentisipjjañapwa muni’ ukatwa jichhakamas suytʼaski (2 Ped. 3:9).

7. ¿Kunsa Jehová Diosat yateqassna?

⁷ Janïr kun lurkasasa, jan ukajj kun parlkasasa, nayraqatajj sum amuytʼasiñasawa, ukwa Jehová Diosat yateqsna. Ukhamasti, janïr kun lurañ amtkasajja, uka toqet sum amuytʼasiñasawa, Diosarus ‘yatiñam churita’ sasaw mayisiñasa, ukhamatwa cheqaparjam kuns arsuñäni lurarakiñäni (Sal. 141:3). Ukampis jiwasatï coleratäkasin kuns lurañäni, jan ukajj kuns parlañäni ukhajja, jan walinakanwa uñjassna, qhepatakwa ukham luratasat arrepentissna (Pro. 14:29; 15:28; 19:2).

8. 1) ¿Kawkinsa munañapampi jan aqnaqayasirinakat yateqsna? 2) ¿Kunas Josearojj juchar jan purtʼasiñatak yanaptʼäna? (Página 3 ukankir dibujo uñjjattʼäta).

⁸ ¿Khitinakas munañapamp jan apnaqayasipkäna? Biblianjja waljanitwa parli, jupanakat maynejj José satawa, jupajj Jacob chachan yoqapänwa. Joseajj Potifaran utapanwa  trabajïna, Potifarajj Egipto marka apnaqeri faraonan guardianakapan capitanapänwa. Niyakejjay Joseajj ‘wali suma uñnaqtʼani waynächïnjja’, Potifaran warmipajj walja kutiw jupampejj ikintasiñ munäna. Ukampis ¿kunas Josearojj uka juchar jan purtʼasiñatak yanaptʼäna? Juchar purtʼasispa ukhajj kuna jan walinakansa uñjasispa ukanakatwa amuytʼaspachäna. Ukhamasti, warmejj Josear isit waythapisin “iktʼaskañäni” siskäna ukhajja, Joseajj tʼijsuwayjjänwa. Jupajj akham sänwa: “¿Kunjämaraki nayasti uywirejjarusti uka jan wali luririststi, ukhamarak Dios contrasa juch lurarakiriststi?” sasa (Gén. 39:6, 9; Proverbios 1:10 liytʼañataki).

9. ¿Kunjamsa yantʼanakar saykatañatakejj wakichtʼassna?

⁹ ¿Kunsa Joseat yateqassna? Awisajja, Jehová Diosan leyip jan pʼakintañatakejj yantʼanakat ‘jaltjjañasawa’. Jehová Diosan janïr Testigopäkasajja, yaqhepajj walja manqʼañanakana, umañanakanwa sarnaqapjjerïna. Yaqhepasti, cigarro fumapjjerïna, drogasipjjerïnwa, qʼañu juchanak lurapjjerïna, jan ukajj yaqha ukham jan walinakanwa sarnaqapjjerïna. Bautisatäjjasasa, inas uka yantʼanakan uñjasisipkakchispa. Jiwasatï ukham yantʼanakan uñjassnajja, uka juchanakar purtʼasisajj kunjamsa Diosampi sum apasitas aptʼassna ukanakatwa amuytʼañasa. Ukatakejja, kunanakas uka juchanakar purtʼayistaspa ukwa janiräkipan amuytʼañasa, kunjamsa ukanakar saykatsna uksa amuytʼañasarakiwa (Sal. 26:4, 5; Pro. 22:3). Ukham yantʼanakan uñjassna ukhajja, Jehová Diosaruw yatiñapa mayisiñasa, munañasampi jan atipayasiñatakis chʼamapwa mayisiñasaraki.

10, 11. 1) ¿Kuna jan walinakansa walja wayn tawaqonakajj escuelan uñjasipjje? 2) ¿Kunas cristiano wayn tawaqonakarojj Diosan leyinakap jan pʼakintañatak yanaptʼaspa?

¹⁰ Jichhürunakanjja, cristiano wayn tawaqonakat waljaniw Joseyjam uñjasipjjaraki. Jupanakat maynejj Kimberly satawa. Yateqer masinakapajja seman tukuyanakaw qʼañu juchanak lurapjjerïna, ukham lurapjjatapatjja wali waliw tukupjjerïna. Kimberly kullakajj janiw kunsa uka toqet parlirjamäkänti, ukatwa awisajj sapakïkaspasa, jaytanukutäkaspas ukham amuyasirïna. Ukhamarus yateqer masinakapajj ‘jan amuytʼasirïtamatwa jan khiti waynampis sarnaqktati’ sasaw sapjjäna. Ukampis kullakajj wali amuytʼasirïnwa, wayn tawaqökasajj jankʼakiw maynejj uka jan wali jucharu purtʼasispa uk jupajj sum yatïna (2 Tim. 2:22). Yateqer masinakapajja, ‘¿janipunit jichhakamajj khitimpis ikintaskta?’ sasaw sapakuti jiskhipjjerïna. Kullakajja, kunatsa qʼañu juchanak jan lurkäna ukwa qhanañchirïna. Cheqas walja cristiano wayn tawaqonakaw uka kullakjam sum sarnaqapjje, ukajj wali kusiskañawa, Jehová Diosas qʼoma sarnaqapjjatapat walpun kusisi.

¹¹ Biblianjja, kunjamsa yaqhepajj qʼañu juchanakan sarnaqapjjäna ukanakatwa qhanañchi. Ukham munañapampi apnaqayasisajja, kuna jan walinakansa uñjasipjjäna uksa qhanañcharakiwa. Jumatï Kimberly kullakjam uñjasstajja, Proverbios 7 capitulon mä jan amuytʼasir waynat parlki ukwa amtañama. Amnón chachajj jan wali sarnaqatapat kuna jan walinakansa uñjasïna uksa lupʼirakismawa (2 Sam. 13:1, 2, 10-15, 28-32). Awk taykanakajja, uka sarnaqäwinakat familian yatjjatkasaw kunjamsa wawanakapajj jan uka chachanakjam munañapampi apnaqayasipkaspa, suma amtanakarus puripjjaspa ukwa wawanakapar amuytʼayapjjañapa.

12. 1) Joseajj jilanakapampi parlkäna ukhajja, ¿kunsa luräna? 2) ¿Kunanakansa munañasampi jan apnaqayasiñasäki?

¹² Josean jilanakapajj Egipto markar manqʼa alasir sarapkäna ukhaw Joseajj munañapampi  jan apnaqayasirïtap uñachtʼayarakïna, ukajj wali yateqaskayawa. Kunsa jilanakapajj amuyasipkäna uk yatiñatakejja, Joseajj jumanakan jilamätwa sasajj janiw yatiykänti. Ukampis chuymap chʼalljjtayasïna ukhajja, yaqha cheqar sarasaw jachaqtʼasïna (Gén. 43:30, 31; 45:1). Mä jilatatï, jan ukajj kullakatï chuym ustʼayistaspa ukhajja, Joseat yateqasiñaw amuytʼasis parlañataki jan ukajj kun lurañatakis yanaptʼistani, ukhamat jan qhepatak amtasiñataki (Pro. 16:32; 17:27). Inas familiasat maynejj congregacionat jaqsutächi. Ukhamächi ukhajja, janiw munañasampi apnaqayasiñasäkiti, jupampejj wakiski ukhakiw parlañasa. Uk lurañajj chʼamakïspawa, ukampis ak amtañasawa: Jehová Diosat yateqasisaw uk lurasktanjja, Jupajj uk lurañaswa muni.

13. ¿Kunanaksa David reyin sarnaqäwipat yateqsna?

¹³ David reyitwa yateqasiraksna. Saúl chachasa, Simeí chachasa jan wal lurapkäna ukhajja, janiw Davidajj coleraskänti, ni reyïtap laykus jupanakar jan wal lurkänti (1 Sam. 26:9-11; 2 Sam. 16:5-10). Ukampis mä kutejja, Davidajj munañapamp apnaqayasisaw Betsabé (Bat-seba) warmimpi qʼañu jucha luräna, Nabal chachatakis wal colerasïna (1 Sam. 25:10-13; 2 Sam. 11:2-4). ¿Kunsa David chachat yateqsna? Maya, Diosan markapan pʼeqtʼapki uka jilïr irpirinakajja, janiw munañaparjamak kuns lurapjjañapäkiti, jan ukasti munasiñampiw jilat kullakanakar uñjapjjañapa. Paya, janiw kuna jucharus purtʼaskäti sasajj janiw khitis amuyañapäkiti (1 Cor. 10:12).

14. 1) ¿Kunas mä jilatar pasäna? 2) Jiwasajj ukhaman uñjassna ukhajj ¿kunatsa jan colerampi atipayasiñasäkaraki?

¹⁴ ¿Kunas munañasampi jan apnaqayasiñatakejj yanaptʼistaspa? Uka toqet amuytʼañatakejj Luigi jilatat parltʼañäni. Mä autow jilatan autopar qhepäjjat chocantäna, janis jupajj juchanïkchïnjja uka auton dueñopajj wali colerataw Luigi jilatar toqjäna, nuwasiñwa munarakïna. Jilatajj jan colerampi atipayasiñatakejja, Jehová Diosaruw mayisïna, uka jaqen jan sinti colerasiñapatakis inamayakiw chʼamachasïna. Ukampis uka jaqen toqesiskakitap uñjasajja, jilatajj auto placa numerop qellqaqasaw sarjjäna. Mä semana qhepatjja, Luigi jilatajj Bibliat jukʼampi yatichañatakiw mä warmir visittʼir saräna, uka warmin chachapajj autor chocantas wal toqeskäna uka jaqënwa. Jilatar uñjasajja, wal sustjasïna, ukatjja ukham toqesitajat perdontʼita sasaw säna. Ukatsti, Luigi jilatan autop arreglapjjañapatakiw autojj aseguratäki uka empresar jawsäna. Bibliatsa esposapamp chikaw wali kusisit yateqjjarakïna. Uk uñjasajja, Luigi jilatajj colerampi jan atipjayasiñajj kunja wakiskirisa uk amuyäna, colerasispän ukhajj kunja jan walispänsa uksa amuyarakïnwa (2 Corintios 6:3, 4 liytʼañataki).

15, 16. Jiwasarusa familiasarusa ¿kunjamsa Bibliat yatjjatañajj munañasampi jan apnaqayasiñatak yanaptʼistaspa?

¹⁵ Munañasampi jan apnaqayasiñatakejj Bibliat sapüru yatjjatañaw yanaptʼistaspa. Diosajj kuntï Josué chachar siskäna uk amtañasapuniwa, Jupajj akham sänwa: “Amtasipunïtaw kuntï Diosan leyi libropanjja siski uka, ukhamaraki uruy arumarakiw lupʼirakïta kuntejj librojj siski uka lurañamataki. Ukhamatwa taqe luräwinakamajj sumaru sarani” sasa (Jos. 1:8). Ukampis ¿kunjamsa Bibliat yatjjatañajj munañasampi jan apnaqayasiñatak yanaptʼistaspa?

¹⁶ Kunjamtï uñjaniwayktanjja, kunanaktï lurkañäni ukarjamaw walinsa jan walinsa uñjasiñäni. Jehová Diosajj jiwasar yatichañatakiw ukanak Bibliar qellqayäna (Rom. 15:4).  Ukhamajj uka sarnaqäwinakat liyiñasa, yatjjatañasa, lupʼiñasa wali wakiskiriwa. Uka sarnaqäwinakajj kunjamsa jiwasarusa familiasarus yanaptʼaspa uk amuytʼañasarakiwa. Jehová Diosaruw arunakaparjam sarnaqañatakejj yanaptʼa mayisiñasaraki. Munañasampi jan apnaqayasiñatak jukʼamp chʼamachasiñasajj wakischi ukhajja, Jehová Diosaruw yanaptʼa mayisiñasa, arunakaparjam sarnaqañatakis chʼamachasiñasarakiwa (Sant. 1:5). Bibliat apstʼat qellqatanakan ewjjtʼanakajj utjki ukanaksa yatjjatañasarakiwa.

17. ¿Kunjamsa awk taykanakajj wawanakapar munañapampi jan apnaqayasipjjañapatak yanaptʼapjjaspa?

¹⁷ Awk taykanaka ¿kunjamsa wawanakamarojj munañapampi jan apnaqayasipjjañapatak yanaptʼapjjasma? Wawanakajj munañapampi jan apnaqayasiñatakejj yanaptʼamwa munapjje, ukatwa jumanakajj sum sarnaqasa jupanakar yatichapjjañama (Efe. 6:4). Wawanakamatï munañapampi apnaqayasipjjchi ukhajja, ‘¿yateqaskayati sarnaqasipktjja?’ sasaw jisktʼasipjjañama. Yatiyirisa tantachäwinakarus sarapjjañamapuniwa, familiansa Bibliat yatjjatapjjañamarakiwa. Janiw wawanakamarojj taqe kunsa iyaw sapjjañamäkiti. Jehová Diosajj kuntï Adanampir Evampir siskäna ukajja, Jupar respetañ yateqapjjañapatakïnwa. Awk taykanakajj ukhamarakiw wawanakapar cheqañchasa sum sarnaqasa, munañapampi jan apnaqayasipjjañapatak yanaptʼapjjaspa. Awk taykanakajj taqe kunat sipansa Jehová Diosar munasiña, leyinakapar respetañwa wawanakapar yatichapjjañapa (Proverbios 1:5, 7, 8 liytʼañataki).

18. ¿Kunatsa amigonakas sum ajlliñasa?

¹⁸ Wawanakanïstansa janisa, taqeniw amigonakas sum ajlliñasa. Amigonakasatï Jehová Diosar munasipjjchejja, Jupar jukʼamp sum serviñatakiw yanaptʼapjjestani, jan walinakat jarkʼaqasiñatakis yanaptʼapjjarakistaniwa (Pro. 13:20). Sum sarnaqapjjatapas munañasampi jan apnaqayasiñatakiw yanaptʼarakistani. Jiwasas sum sarnaqatasampejj jupanakar yanaptʼaraksnawa. Munañasampi jan apnaqayaskañäni ukhajja, Jehová Diosampejj sum apasiñäni, kusisitaw jakasiñäni, familiasampis amigonakasampis sum apasirakiñäni.