AKA oraqpachanjja, jilïr irpir jilatanakajj Diosan markapan kuna luräwtï katoqapki uk wali askit uñjapjje. Jiwasas yanaptʼap wali askitwa uñjaraktanjja. Ukampis chuymankipstat jilïr irpirinakarojja, jichhanakakiw yaqhep chʼama luräwinak wayna jilïr irpirinakar churapjjañapatak mayisïna.

Ukhat aksarojja, congregacionanak tumptʼirinakasa, Diosan markapan escuelanak utjki ukan yatichir jilatanakasa, 70 maranak phoqjjasajj jaytjjapjjewa. Yamas 80 marani jilïr irpirinakajja, Sucursal sarayirita (coordinador) jan ukajj jilïr irpirinakan sarayiripat irnaqchïna ukhajj wayna jilïr irpirinakaruw jaytjjapjje. Uka chuymankipstat jilatanakajj uk yatisajj ¿kunsa lurapjje? Jupanakajj Jehová Diosarusa markaparus jan jitheqtas taqe chuym servisipkakiwa.

Ken jilatajja, niya 49 maranakaw Sucursal sarayirit servïna. Jupajj akham siwa: “Uk istʼasajj walikiw sayätwa. Ukampis uka alwakiw Jehová Diosarojj ‘Sucursal sarayirit serviñapatak mä wayna jilata munapjjta’ sasin mayisiyäta” sasa.  Cheqas chuymankipstat walja jilatanakaw aka oraqpachan uka jilatjam amuyapjjaraki. Jupanakajj jilat kullakanakarojj wali kusisitaw yanaptʼapjjäna. Ukatwa yaqhepajj qalltan uka cambio utjipan mä jukʼa llakthapisipjjäna.

Esperandio sat jilatajja, congregacionapan jilïr irpirinakan sarayiripatwa servïna. “Qalltanjja, mä jukʼa llakthapisiyätwa” sasaw qhanañchi. Ukatsti akham sarakiwa: “Niyakejjay chuymankipstatäjjstjja, sapürutjamaw jan jukʼamp usuntañatakejj wal cuidasiñaja” sasa. Uka jilatajj Diosar jan jitheqtas serviskakiwa, jilat kullakanakatakis mä bendicionarakiwa.

Congregacionanak tumptʼirit walja maranak serviwayapki uka jilatanakajj ¿kunjamas jikjjatasipjjaraki? Allan jilatajj 38 maranakaw ukham servïna, jupajj akham siwa: “Uk istʼayäta ukhajja, wal sustjasiyäta” sasa. Ukampis “wayna jilatanakar wakichtʼañajj wali wakiskiriwa” sasaw saraki. Jilatajj Diosar jan jitheqtas serviskakiwa.

Russell jilatajj 40 maranakaw congregacionanak tumptʼirita, Diosan markapan escuelanakajj utjki ukan yatichirita serviwayi. Qalltanjja, esposapampejj mä jukʼa llakisipjjänwa. Jilatajj akham siwa: “Diosar ukham serviñajj nanakatak wali askïnwa, ukham serviskakiñatakejj chʼamanjamaw amuyasipjjayäta” sasa. Jichhajj panpachaniw experienciapampejj congregacionapan yanaptʼasipkaki, jilat kullakanakas jupanakampïsajj wali kusisitäpjjewa.

Inas uka jilatanakjam jan jikjjataskstanti. Ukampis kuntï 2 Samuel qellqatan siski uk yatjjatañaw kunjamsa jupanakajj jikjjatasipjjäna uk amuytʼañatak yanaptʼistani.

Absalón chachat parltʼañäni, jupajj awkip contrawa, mä arunjja David contraw saytʼäna. Davidajj Jerusalenat Mahanaim sat cheqaruw escapjjäna, Jordán Jawirat inti jalsu toqeru. Ukanjja, jupasa jupamp chikäpkäna uka chachanakasa, kunanakatï jakañatak munaski ukwa munapjjäna. ¿Kunas qhepat pasäna?

Ukanjja, kimsa chachanakaw jupanakat khuyaptʼayasisajj ikiñanaka, manqʼañanaka ukat yaqha ukhamanakampi yanaptʼapjjäna. Jupanakat maynïrejj Barzilai chachänwa (2 Sam. 17:27-29). David contra saytʼirejj jan utj-jjäna ukhajja, Davidajj wasitampiw Jerusalenar kuttʼanjjäna, Barzilai chachaw Jordán Jawirkam compañtʼarakïna. Davidasti, jupamp chika Jerusalenar sarjjañapatakiw Barzilai chachar mayïna, manqʼañanakwa churäma sasaw sarakïna. Cheqas uka chachajj wali utjirinïnwa, ukhamajj janiw ukajj wakiskaspänti (2 Sam. 19:31-33). Inas Davidajj suma jaqëtapata, wali experiencianïtapat irpañ munchïna, ukhamat yanaptʼayasiñataki. Barzilai chachatakejj reyimpi trabajiñasa jupamp chika jakañas mä suma bendicionäspänwa.

Ukampis Barzilai chachajja, kuntï jan lurirjamäkäna uk amuyasisajj 80 maranëjjtwa sasaw Davidar säna, ukatsti akham sarakïnwa: ‘¿Nayajj kunatï walïki kunatï jan walïki uk amuyiristti?’  sasa (2 Sam. 19:35, NM). ¿Ukampejj kamsañsa munäna? Uka chachajj walja maranaka jakasajja, wali yatiñanëjjänwa. Jupajj ‘jilïr awkinakjamaw’ sum ewjjtʼaskakispäna, kunjamtï Roboam reyir uka qhepat ewjjtʼapkäna ukhama (1 Rey. 12:6, 7; Sal. 92:12-14; Prov. 16:31). Ukhamajja, Barzilai chachajj inas chuymankipstatäjjatap layku ukham sischïna. Janiw manqʼajj kʼarati janicha uksa amuyjjtti, ni jiñchus sum istʼjjarakiti sasaw sarakïna (Ecl. 12:4, 5). Ukatwa Davidarojj Quimam sat waynampi Jerusalenar saram sasin säna. Quimam waynajj Barzilai chachan yoqapäpachänwa (2 Sam. 19:36-40).

Chuymankipstat jilatanakat aka yatichäw qalltan parlaniwayktan uka cambiojja, Barzilai chachajj kuntï lurkäna ukarjamaw lurasiwayi. Ukampis ukajja janiw mä jaqet lupʼisak lurasiwaykiti, jan ukasti aka oraqpachankir chuymankipstat jilïr irpirinakatakejj kunas jukʼamp wakiskirïspa uk lupʼisaw lurasiwayi.

Uka jilatanakajja, akwa humilde chuymampi amuyapjje: wayna jilatanakar luräwinakap jaytapjjani ukhajja, Diosan markapajj jiltaskakini ukan yanaptʼapjjaniwa. Uka wayna jilatanakarojj chuymankipstat jilatanakaw jilapartejj wakichtʼawayapjje, Barzilai chachas ukhamarakiw yoqapar wakichtʼpachäna, apóstol Pablos ukhamarakiw Timoteo waynarojj wakichtʼäna (1 Cor. 4:17; Filip. 2:20-22). Uka wayna jilatanakajja, ‘mä bendicionar uñtatäpjjatapwa’ uñachtʼayapjje, ‘Criston cuerpoparus’ mä arunjja, congregacionarus chʼamañchtʼapjjarakiwa (Efes. 4:8-12; Números 11:16, 17, 29 uñjjattʼarakïta).

Kawkïr jilatanakatï yaqhep luräwinakap yaqhanakaru jaytjjapjje uka jilatanakajja, Diosar jukʼamp serviskakiñatakiw chʼamachasipjje.

Marco jilatajj akham siwa: “Jichhajja, kawkïr kullakantï esposopajj jan Testigöki uka chachanakar jukʼampiw yanaptʼta” sasa. Jupajj 19 maranakaw congregacionanak tumptʼirit serviwayi.

Geraldo jilatajj 28 maranakaw congregacionanak tumptʼirita serviwayaraki. Jupajj akham siwa: “Esposajampejja, khitinakatï predikirisa, tantachäwinakarus jan sarjjapjje ukanakar yanaptʼaña, jukʼamp jaqenakar Bibliat yatichaña ukat yaqha ukhamanak lurañwa amtapjjta” sasa. Jupanakajj mä 15 jaqenakaruw Bibliat yatichasipki, kawkïr jilat kullakanakarutï yanaptʼawayapki ukanakat jilapartejj predikirisa tantachäwirus sarjjapjjewa.

Qalltan parlaniwayktan uka Allan jilatajj akham siwa: “Jichhajja, predicañatakisa, Bibliat yatichañatakisa ukat yaqha ukhamanak lurañatakis jukʼamp tiemponïpjjtwa. Vecinonakaru, kawkjantï walja jaqenakajj utjki ukana, mercadonakana yatiyañajj wal gustapjjetu. Pä vecinonakajajja, Tantachasiñ Utar visittʼirejj jutapjjewa” sasa.

¿Jumajj uka jilatanakjamarakit Diosan markapan yaqhep luräwim jaytjjta? Ukhamächi ukhajja, jumat sipans menos maranïpki ukanakaruw Diosan markapan kuntï yateqawaykta ukanak yatichasma, ukhamatwa Jehová Diosamp chik trabajitam uñachtʼayarakisma. Parlaniwayktan uka Russell jilatajj akham siwa: “Jehová Diosajj wakichtʼat jilatanakampiw markaparojj yatichaski. Uka jilatanakajj wali kusisitaw jilat kullakanakar yatichapjje awatipjjaraki” sasa. (“ Waynanakar nayrar sartapjjañapatak yanaptʼapjjam” siski uka recuadro uñjjattʼäta).

Jumatï Diosan markapan mä luräwi jichhak jaytawaysta ukhajja, Diosar jan aynachtʼas serviskakim. Diosan markapan taqe chuyma servisajj waljaniruw yanaptʼawaytajja, jichhas yanaptʼaskakismawa. Taqenins wali munatätawa, munatakïskätawa.

Kuntï lurawaykta ukjja, Jehová Diosajj janipuniw armkaniti. Bibliajj akham siwa: “Jupajj janiw luratanakamatsa ni sutipar munasipjjatamatsa armaskaniti, ukanakajj santo jilatanakaru jichhakam servisipkatamanwa qhan uñjasi” sasa (Heb. 6:10). Jehová Diosajj janiw kuntï lurawayktan  ukak amtaskiti, ukwa Diosan amuytʼayat uka arunakajj amtayistu. Jumajj Jehová Diosatakejj wali valoranïtawa, kuntï nayrajj lurawaykta, jichhas luraskakta ukanak janiw armkaniti.

Inas jiwasajj uka jilatanakjam jan uñjaskstanti, ukampis ukajja jiwasar yanaptʼarakistaspawa.

Diosan markapan luräwinak jaytawayjjapjje uka chuymankipstat jilatanakampi chikachasisajja, experienciapat waljanakwa yateqassna. Jupanakaruw kun lurañatakis jisktʼassna. Kunjamsa experienciapampejj luräwinakap sum phoqasipkaki ukatsa yateqasiraksnawa.

Jiwasatï luräwinak jaytawayapki uka jilatanakat maynïrïstan, jan ukajj experienciapat yateqasiri jilatästan jan ukajj kullakästan ukhajja, ak janipuniw armañasäkiti: Diosajj jupar jan jitheqtasa walja maranak servirinakarusa jichhas servisipkaki ukanakarusa wali valoranitwa uñji.