KUNA horäjjes uk yatiñatakejj ¿kunsa lurtan? Yatiñatakejja mä reloj uñjjattanjja. Maynitï kuna horäjjes sasin jisktʼistu ukhajj ¿kamsasas sistanjja? Cheqas kunaymanitwa uk qhanañchtanjja.

Amuytʼañataki, chika urutaki tunka phesqani minutunak faltaski ukhajja, akham sasaw sissna: ‘Niya las docëjjaniwa’, jan ukajj ‘niya chika uröjjaniwa’ sasa. Yaqhep cheqanakanjja, 11:45 uka horasäjjew sasaw sapjjaraki.

Biblia liytʼkasajja, inas akham jisktʼasstan: “Bibliajj qellqaskäna uka tiemponjja, ¿kunjamatsa kuna horäjjes uk yatipjjerïna?” sasa. Uka tiempon kunaymanitwa kuna horäjjes uk sapjjerïna. Hebreo Arut Qellqatanakanjja, ‘alwa’, ‘chika uru’, ‘chʼamakthapi’ sasaw qhanañchi (Gén. 8:11; 19:27; 1 Rey. 18:26). Ukampis awisajja, kuna horapunïnsa uksa Biblian qhanañcharakiwa.

Uka tiemponjja, centinelanaka jan ukajj guardianakajj utjapunirïnwa, yamas arumanakajj utjapunirïnwa. Jesusan nasiñapatakejj walja maranak faltkäna ukhajja, israelitanakajj kimsaruw mä arum jalanoqapjjerïna, ukajj vigilianaka sasin uñtʼatänwa. Sañäni, Jueces 7:19 textonjja, “chika arumata guardia lurirejj qalltapkäna” uka horasatwa parli. Jesusajj aka oraqenkkäna ukhajja, judionakajj griegonakjama romanonakjamaw mä arum pusiru jalanoqapjjerïna.

Uka vigilianakatjja, Mateo, Marcos, Lucas ukat Juan uka libronakan walja kutiw parli. Sañäni, Jesusajj “niya qhantatëjjäna [mä arunjja, ‘pusïr vigiliäjjäna’, nota]” ukhaw discipulonakapajj barconkasipkäna ukar uma patjjnam saräna (Mat. 14:25). Mä kutejja, Jesusajj akham sänwa: “Mä utanitejj kuna horas [jan ukajj kuna vigiliarus] lunthatajj utapar mantani uk yatispa ukhajja, jan ikjasaw uñnaqaspa, janirakiw lunthatampis utapar mantaykaspati” sasa (Mat. 24:43).

Jesusajj discipulonakapar “amuyasipjjapunim, kunapachas utanejj jutani ukjja janiw yatipktati, inas arum toqerüchini, chika arumächini, janïr qhanjtanki uka horasarüchini, jan ukajj wali alwa purinchini” siskäna ukhajja, pusi vigilianakatwa parlaskäna (Mar. 13:35, nota). Nayrïr vigiliajja, ‘arum toqerünwa’, ukasti inti jalantat niya llätunka aruma horaskamänwa. Payïr vigiliajja, ‘chika arumänwa’, ukasti niya llätunka aruma horasatjja chika arumkamänwa. Kimsïr vigiliasti, ‘janïr qhanjtanki uka horasarünwa’ jan ukajj ‘wallpa artʼa’ horasänwa, ukasti chika arumatjja niya kimsa alwa horaskamänwa. Jesusar jiwayañatak katuntapkäna uka arumajja, uka horasaruw mä wallpajj artʼäna (Mar. 14:72). Pusïr vigiliajja, ‘wali alwänwa’, ukasti niya kimsa alwa horasatjja niya sojjta alwa horaskamänwa.

Ukhamajja, Bibliajj qellqaskäna uka tiempon janis jichhürunakjam reloj apnaqapjjerïkchïnjja, kuna horäjjes uk kunaymanitwa jaqenakajj yatipjjerïna.