1, 2. 1) ¿Kunatsa Armagedonan puriniñapajj mä suma yatiyäwejja? 2) ¿Kuna jisktʼanakarus aka yatichäwin qhanañchaskañäni?

ARMAGEDÓN aru istʼasajja, waljaniw akham amuyapjje: “Aka oraqejj bombanakampi, terremotonakampi, jan ukajj yaqha ukhamanakampi tʼunjataw uñjasini” sasa. Ukampis Bibliajj janiw ukham yatichkiti, antisas Armagedonan puriniñapajj mä suma yatiyäwiwa, kusisiyarakistuwa sasaw yatichi (Apoc. 1:3). Armagedonajja, janiw jaqenakar chhaqtaykaniti, jan ukasti salvaniwa. ¿Kunjamas ukajj pasani?

² Bibliarjamajja, akapach apnaqer jaqenakasa jan wali jaqenakasa, Armagedonanwa jiwarapjjani, ukampis cheqapar sarnaqer jaqenakajj salvasipjjaniwa. Armagedonajj aka oraqe jan tukjatäñapatakiw yanaptʼarakini (Apoc. 11:18). Uka toqet sum amuytʼañatakejja, aka pusi jisktʼanakaruw aka yatichäwin qhanañchaskañäni: ¿Kunas Armagedonajja? ¿Kunanakas uka nayrajj pasani? ¿Kunsa salvasiñatakejj lursna? ¿Kunsa uka uru puriniñapkamajj Diosat jan jitheqtañatak lursna?

3. 1) ¿Armagedón arojj kamsañsa muni? 2) Apocalipsis 16:14, 16 textorjamajja, ¿Armagedonajj janiw mä cheqpach lugaräkiti sasin kunatsa sistan?

³ (Apocalipsis 16:14, 16 liytʼañataki). Armagedón arojj mä kutikiw Biblian uñsti, uka arojj hebreo arutwa juti, “Meguidó Qollu” sañwa muni (Apoc. 16:16, nota). Nayra Israel tiemponjja, mä markaruw Meguidó sasin uñtʼasïna (Jos. 17:11, NM). Ukampis Armagedonajj janiw mä cheqpach lugaräkiti, jan ukasti, kunapachatï ‘oraqpachankir reyinakajj’ Jehová Dios contra saytʼañatak tantachasipkani ukaruw ukham uñtʼasi (Apoc. 16:14). Aka yatichäwinjja, ‘reyinakajj’ tantachasipkani uka qhepat apaskani uka guerrat parlañatakiw Armagedón arojj apnaqasirakini. Ukampis ¿Armagedonajj janiw mä cheqpach lugaräkiti sasin kunatsa sistanjja? Maya, Meguidó qollojj janiw  utjkiti. Paya, Meguidó cheqajj janiw jachʼäkiti, ukhamajj uka lugarajja, taqpach reyinakatakisa, ejercitonakapatakisa, armamentonakapatakis jiskʼakïspawa. Kimsa, kunjamtï aka yatichäwin yatjjatkañänejja, kunapachatï reyinakajj Diosan markapar jan waltʼayañatak sartapkani ukhaw Armagedonajj qalltani.

4. ¿Kunatsa Jehová Diosajj Armagedonat parlasajj Meguidó cheqat parlpachäna?

⁴ Armagedonat parlasajja, ¿kunatsa Jehová Diosajj Meguidó cheqat parlpachäna? Uka cheqansa uka jakʼankir Jezreel sat vallensa, walja nuwasiñanakaw utjäna. Sañäni, Jehová Diosajja, Meguidó cheqan umanakajj utjkäna uka jakʼanwa Barac sat israelitanakan juezaparojj yanaptʼäna, ukhamat Sísara chachan pʼeqtʼata cananeonakan ejercitopar atipañapataki. Barac chachasa Diosat parlir (profetisa) Débora warmisa, Jehová Diosarojj uka jaqenakar mä milagro toqe atipjatapat yuspärapjjänwa. Mä cancionan akham sapjjänwa: “Warawaranakasti alajjpacha altotwa Sísara chachatakejj nuwasinipjjäna. [...] Cisón sat jawirasa taqe jupanakaruw chhaqtayi” sasa (Juec. 5:19-21).

5. Armagedonajj janiw Barac chachajj nuwaskäna ukhamäkaniti sasin ¿kunatsa sissna?

⁵ Barac chachasa Débora warmisa, cancionap akham sasaw tukuyapjjäna: “¡Dios Tatitu, ukhama tukjatäpana jumaru taqe uñisirinakajja, ukampis jumaru taqe munirinakasti waliraki qhanapjjpan kunjämtejj intejj qhanki ukhama!” sasa (Juec. 5:31). Armagedonanjja, ukhamarakiw Diosar uñisirinakajj tukjatäpjjani, Jupar munasirinakasti salvatäpjjaniwa. Ukampis Armagedonajj janiw Barac chachajj nuwaskäna ukhamäkaniti. Armagedonanjja, Diosan servirinakapajj janiw nuwasipkaniti, ni armanakanïpkanisa. Jupanakatï jan sint llakisipkani, Jehová Diosaru ukhamarak Diosan alajjpachankir ejercitonakapar confiyapjjani ukhajja, janiw ajjsarapkaniti (Is. 30:15, NM; Apoc. 19:11-15).

6. Armagedonanjja, ¿kunjamsa Diosajj uñisirinakapar tukjpachäni?

⁶ Armagedonanjja, ¿kunjamsa Diosajj uñisirinakapar tukjani? Inas terremotonakampi, chhijchhinakampi (granizonakampi), qʼejjo qʼejjonakampi, yaqha ukhamanakamp tukjchini (Job 38:22, 23, NM; Ezeq. 38:19-22). Inas uñisirinakapajj jupanakkam nuwarasipjjchini (2 Crón. 20:17, 22, 23). Jan ukajja, jan wali jaqenakarojj inas angelanakapamp jiwaraychini (Is. 37:36). Kunanakampiy Diosajj tukjchini, Jupaw atipjani. Taqe uñisirinakapaw jiwarayatäpjjani, ukampis cheqaparjam sarnaqerinakajj salvasipjjaniwa (Prov. 3:25, 26).

7, 8. 1) Kuntï 1 Tesalonicenses 5:1-6 texton siski ukarjamajja, ¿kunsa marka apnaqerinakajj yatiyapjjani? 2) ¿Kunatsa uka yatiyäwejj jan waltʼayir kʼarïpachäni?

⁷ “Jehová Diosan urupajj” jutkani uka nayrajja, “suman jakasiñampi jan ajjsaras jakasiñampiw utj-jje” sasaw yatiyasini (1 Tesalonicenses 5:1-6 liytʼañataki). ‘Jehová Diosan urupa’ sasinjja, ‘wali tʼaqesiña’ tiempotwa 1 Tesalonicenses 5:2 texton parli (Apoc. 7:14). Ukampis ¿kunjamatsa ‘wali tʼaqesiña’ tiempon niya qalltañampïskatap yatiñäni? Bibliajja, mä yatiyäwiw utjani sasaw qhanañchi, ukaw uk uñachtʼayani.

⁸ Marka apnaqerinakajja, “suman jakasiñampi jan ajjsaras jakasiñampiw utj-jje” sasaw yatiyapjjani. ¿Kunatsa ukham yatiyapjjpachäni? Janiw sum yatktanti. ¿Religión pʼeqtʼirinakajj uk yatiyapjjarakpachäniti? Inas ukhamächini. Ukampis uka yatiyäwejj demonionakan yaqha engañopäniwa, waljaniruw jan waltʼayani, ¿kunatsa? Jaqenakajja, jan ajjsaras jakasiñas utjkaspa ukhamwa ‘wali tʼaqesiñ’ tiempo nayrajj amuyapjjani, ukampis ukhaw tʼunjäwejj jupanakjjar mä akatjamat jankʼaki jutani,  “kunjamtï mä usur warmirojj partojj waytki ukhama”. Uka tiemponjja, ¿kunas Diosan servirinakapampejj pasani? ‘Wali tʼaqesiñ’ tiempojj kunapachas qalltani uk jupanakajj janiw yatipkiti, ukhamajj inas sustjasipjjchini, ukampis wakichtʼatäpjjaniwa.

9. ¿Kunjamsa Jehová Diosajj Supayan apnaqat akapacharojj tʼunjani?

⁹ Jehová Diosajja, janiw Supayan apnaqat akapacharojj juntuki tʼunjkaniti, kunjamtï Noé chachan urunakapan lurkäna ukhama. Nayraqatajja, Jachʼa Babiloniaruw tʼunjani, mä arunjja, taqpach falso religionanakaru. Ukat Armagedonanjja, politiconakaru, militaranakaru, qollqe ganañ amtampi negocio luririnakaruw tʼunjarakini. Jehová Diosajj kunjamsa ukanak lurani uk jukʼamp amuytʼañäni.

10. Apocalipsis 17:1, 6 ukat 18:24 qellqatarjamajja, ¿kunatsa Jehová Diosajj Jachʼa Babiloniar tʼunjani?

¹⁰ ‘Jachʼa prostituta warmiruw juchañchasini’ (Apocalipsis 17:1, 6; 18:24 liytʼañataki). Jachʼa Babiloniajj walpun Diosan sutip qʼañuchawayi. Kʼarinakwa Diosat yatichi, Dios nayraqatanjja, mä prostituta warmïkaspas ukhamaw gobiernonakar yanapasajj sarnaqe. Jaqenakarus jan walinakwa luri, qollqepsa katuntasirakiwa. Waljaniw falso religionan jiwayatajj uñjasiwayapjje, jupanakat yaqhepajj Diosan servirinakapänwa (Apoc. 19:2). ¿Kunjamsa Diosajj Jachʼa Babiloniar tʼunjani?

11. 1) ¿Kunas ‘llijkir wila salvaje animalajja’? 2) ¿Diosajj kunjamsa uka animalampejj Jachʼa Babiloniar tʼunjani?

¹¹ Jehová Diosajja, ‘mä llijkir wila salvaje animalan’ ‘tunka wajjranakapampiw’ prostituta warmirojj jiwayani. Uka salvaje animalajj Organización de las Naciones Unidas ukawa, tunka wajjranakasti uka organizacionar yanapiri gobiernonakarakiwa. Uka gobiernonakajja, Diosajj amtkani ukhaw Jachʼa Babiloniar tʼunjapjjani. Kunanakapatï utjki ukanak ‘taqpachwa aparapjjani, jan isinwa jaytapjjarakini’, jan wali luratanakapsa qhanstayapjjarakiniwa (Apoc. 17:3, 16). Jachʼa Babiloniarojj ratukiw tʼunjasini, ‘mä urunaksa’ tʼunjaskaspa ukhama. Uk uñjasajja, jupar yanapapkäna ukanakajj wal musparapjjani, ¿kunatsa? Jachʼa Babiloniajj  nayratpachaw akham säna: “Mä reinar uñtataw qontʼatäskta, janiw nayajj viudäkti, janirakiw kunapachas llakiskäti” sasa (Apoc. 18:7, 8).

12. ¿Akapachankir markanakan kun lurapjjañapsa Diosajj jan permitkani, ukat kunatsa?

¹² Markanakajj janiw Diosan servirinakapar tukjapkaniti, Diosajj janiw uk permitkaniti, ¿kunatsa? Jupanakajj Diosan sutipwa apapjje, ‘Jachʼa Babiloniat mistjjapjjam’ siski ukarus istʼapjjarakiwa, ukatwa jan tukjaskaniti (Hech. 15:16, 17; Apoc. 18:4). Jachʼa Babiloniat mistupjjañapataki yaqhanakar yanaptʼañatakis wal chʼamachasiwayapjje. Ukhamajja, ‘janiw plaganakap katoqapkaniti’. Ukhamäkchisa, Diosar jukʼamp confiyañatakejj chʼamachasisipkakiñapawa, ukhamatakwa jan waltʼäwinakar saykatapjjani.

13. 1) ¿Khitirus Gog sasin uñtʼasi? 2) Ezequiel 38:2, 8, 9 qellqatarjamajja, ¿kunjamatsa Gog sasin uñtʼatäki ukajj Diosan markapar jan waltʼayañatak sartani?

¹³ Gog sasin uñtʼatäki ukaw Diosan markapar jan waltʼayañatak sartani (Ezequiel 38:2, 8, 9 liytʼañataki). Taqpach falso religionanakajj tʼunjatäjjapjjani uka qhepatjja, Jehová Diosan servirinakapakiw utj-jjani. Supayajj uk uñjasin wal colerpachäni. Ukatwa markanakarojj demonionakan amuytʼayat yatiyäwinakampi mayachtʼani, ukhamat Diosan markapar jan waltʼayañatak sartapjjañapataki (Apoc. 16:13, 14). Uka mayachtʼat markanakajj ‘Magog markankir Gog’ sasin uñtʼatawa. Jupanakajj Diosan markapar jan waltʼayañatak sartapkani ukhaw Armagedonajj qalltani (Apoc. 16:16).

14. ¿Kunsa Gog sasin uñtʼatäki ukajj amuyasini?

¹⁴ Gog sasin uñtʼatäki ukajj ‘jaqenakan chʼamaparuw’ confiyani, mä arunjja, ejercitonakaparuw confiyani (2 Crón. 32:8). Ukampis jiwasajj Jehová Diosaruw confiyañäni. Uk uñjasajja, markanakajj larusipjjaniwa, ¿kunatsa? Jachʼa Babiloniajj wali munañanïkchïnsa, janiw diosanakapajj ‘tunka wajjranakatsa’ ‘salvaje animalatsa’ qhespiykänti (Apoc. 17:16). Ukatwa Gog sasin uñtʼatäki ukajj akham amuyani: ‘Atipjañajj facilakïniwa’ sasa. Ukhamajj kunjamatï mä chʼiyara qenayajj mä markar chhaqtaykejja, ukhamaw Diosan markapar  jan waltʼayañatak sartani (Ezeq. 38:16). Ukampis mä trampar jalantatapwa amuyasini. Kunjamatï Faraonampejj Mar Rojo sat qotan paskänjja, ukhamarakiw Jehová Dios contra nuwasiskatap amuyasini (Éx. 14:1-4; Ezeq. 38:3, 4, 18, 21-23).

15. ¿Kunsa Jesusajj Armagedonan lurani?

¹⁵ Cristosa alajjpachankir ejercitonakapasa, Diosan servirinakapar jarkʼaqapjjaniwa, ukampis markanakarusa ejercitonakaparus tʼunjapjjaniwa (Apoc. 19:11, 14, 15). ¿Kunas Jehová Diosar wali uñisiri Supayampejj pasani? Kʼari yatiyäwinakampi markanakar Armagedonatak mayachtʼiri uka Supayarojja, Jesusajj mä mikʼayaruw jaqontani, demonionakaparus ukhamarakiw lurani, ukanwa jupanakajj waranqa maranak llawintatäsipkani (Apoc. 20:1-3).

16. 1) ¿Kunsa Diosar uñtʼatas uñachtʼayañatakejj lurañasa? 2) ¿Kunas Jehová Diosar uñtʼirinakampejj Armagedonan pasani?

¹⁶ Jukʼa tiempokisa, jan ukajj walja maranakas Diosan markapankstanjja, Armagedonan salvasiñatakejj Diosar uñtʼataswa uñachtʼayañasa, ‘Jesús Tatitusat parlki uka suma yatiyäwinakarus’ istʼañasarakiwa (2 Tes. 1:7-9). ¿Kunapachas Diosar uñtʼtwa sasin sissna? Kunatï Jupatak walïki jan walïkaraki ukanak yattan, mandamientonakaps sum uñtʼaraktan ukhaw uñtʼtwa sasin sissnajja. Diosar uñtʼatasjja, Jupar munasisa Jupa saparuk servisaw uñachtʼaytanjja (1 Juan 2:3-5; 5:3). Jiwasatï ukanak lurañänejja, Diosajj uñtʼistaniwa, mä arunjja, suma jaqetwa uñjistani (1 Cor. 8:3). Ukhamtï uñjistanejja, Armagedonan salvistaniwa.

17. ‘Jesús Tatitusat parlki uka suma yatiyäwinakar’ istʼañatakejj ¿kunanaksa lurañasa?

¹⁷ ‘Jesús Tatitusat parlki uka suma yatiyäwinakajja’, kunanaktï Jesusajj yatichkäna taqe ukanakawa, ukanakajj Biblian qellqatawa. Uka yatichäwinakar istʼatasjja, ukarjam sarnaqasaw uñachtʼaytanjja. Ukatakejj Diosar serviñaw jakäwisan nayrankañapa, leyinakaparjamaw sarnaqañasaraki, Reinopatsa yatiyañasarakiwa (Mat. 6:33; 24:14). Maysa toqetjja, alajjpachar sarañatak ajllit Criston jilanakaparuw  yanaptʼañasaraki, jupanakajj walja luräwinakwa phoqasipki (Mat. 25:31-40).

18. Alajjpachar sarañatak ajllit cristianonakajja, ¿kunjamsa ‘yaqha ovejanakarojj’ yanaptʼapjjatapat pago churapjjani?

¹⁸ Alajjpachar sarañatak ajllit cristianonakajja, niyaw ‘yaqha ovejanakarojj’ yanaptʼapjjatapat pago churapjjani (Juan 10:16). ¿Kunjamsa uk lurapjjani? Armagedón janïr qalltkipanjja, 144.000 ajllit cristianonakajj taqeniw alajjpachan jan jiwir cuerpo katoqjjapjjani. Jupanakajj Gog sasin uñtʼatäki ukar tʼunjkani uka alajjpachankir ejercitonak taypinkapjjaniwa, ‘walja jaqenaka’ sasin uñtʼatäki uka llampʼu chuyman jaqenakaruw jarkʼaqapjjarakini (Apoc. 2:26, 27; 7:9, 10). Cheqas ‘walja jaqenaka’ sasin uñtʼatäki ukanakajja, alajjpachar sarañatak ajllit cristianonakar yanaptʼapjjatapat wal kusisipjjani.

19, 20. Jan walinakansa uñjaskstanjja, ¿kunsa Armagedón puriniñapkamajj Diosat jan jitheqtañatak lursna?

¹⁹ Aka jan wali qhepa urunakanjja, Jehová Diosan servirinakapat waljaniw jan walinakan uñjastanjja. Ukampis kusisitaw aguantsna (Sant. 1:2-4). Ukatakejj Diosat mayisiñasapuniwa (Luc. 21:36). Arupatsa sapüruw yatjjatañasa, yateqktan ukatsa lupʼiñasarakiwa. Sañäni, jutïrin phoqaskani uka profecianakatwa yatjjatsna lupʼiraksna (Sal. 77:12). Jiwasatï ukanak lurañäni, predicañatakis wal chʼamachasiñäni ukhajja, jukʼampiw Diosar confiyañäni, kunanaktï jutïrin katoqkañäni uks taqe chuymaw suyañäni.

²⁰ Kunapachatï Jachʼa Babiloniajj chhaqtjjani, Armagedonas tukuyjjani ukhajja, wali kusiskañäniwa. Yamas Diosan sutipasa Jupan Taqe Kunjjar Munañanïtapas jachʼañchasjjani ukhajja, jukʼamp kusiskañäniwa (Ezeq. 38:23). Cheqas Armagedonan puriniñapajj Diosar uñtʼapki ukanakatakisa, Yoqapar istʼapki ukanakatakisa, akapachan tukusiñapkam aguantapkani ukanakatakis mä suma yatiyäwiwa (Mat. 24:13).