39 YATICHÄWI
Biblian parlki uka ‘walja jaqenakajj’ ¿khitinakäpjjesa?
“Ukatjja jan khitins jaktʼkaña walja jaqenakaruw uñjta, jupanakajj [...] trono nayraqatana Cordero nayraqatan saytʼatäsipkän[wa]” (APOC. 7:9).
CANCIÓN 60 Jaqenakar salvasipjjañapatak yanaptʼañäni
¿KUNANAKATSA YATJJATASKAÑÄNI? *
1. Niya 95 maranjja, ¿kuna jan walinakansa apóstol Juanajj uñjasïna?
APÓSTOL Juanajja, niya 95 maranjja jan waltʼäwinakan uñjasïna. Jupajj edadanëjjänwa, Patmos sat islan preso katuntatarakïnwa, inas jupa sapaki apostolonakat jakjjchïna (Apoc. 1:9). Kunjamsa Dios contra saytʼirinakajj congregacionanakar engañjapjjäna, jilat kullakanakarus tʼaqanoqtayapjjäna uksa uñjarakïnwa. Cheqpach cristianonakajj niya tukusiñampïkaspas ukhamänwa (Jud. 4; Apoc. 2:15, 20; 3:1, 17).
Apóstol Juanajj “walja jaqenakaruw” mä visionan uñjäna, jupanakajj kayukam purir janqʼo isinakampi isthapita, amparanakapansa palmera ramanakas aptʼasita ukhamaw saytʼatäsipkäna. (Párrafo 2 uñjjattʼäta).
2. Apocalipsis 7:9-14 qellqatarjamajj ¿kunsa Juanajj mä visionan uñjäna? (Nayrïr paginankir dibujo uñjjattʼäta).
2 Ukham jan waltʼäwinakan uñjaskasaw apóstol Juanajj mä suma visión uñjäna. Ukanjja mä angelaw yaqha pusi angelanakarojj akham säna: ‘Diosasan esclavonakaparu sellañ tukuyasiñapkamajj wali tʼaqesiñan thayanakap katjjasisipkakim’ sasa (Apoc. 7:1-3). Uka esclavonakajj 144.000 cristianonakawa, jupanakaw Jesusamp chika alajjpachan apnaqapjjani (Luc. 12:32; Apoc. 7:4). Ukjjarusti apóstol Juanajj yaqha grupo cristianonakaruw uñjarakïna, jupanakajj waljanïpjjänwa, ukatwa akham säna: “Jan khitins jaktʼkaña walja jaqenakaruw uñjta, jupanakajj taqe markanakata, tribunakata, kunayman kasta jaqenakata, kunayman aru parlirinakat jutirinakäpjjänwa. Jupanakajj [...] trono nayraqatana Cordero nayraqatan saytʼatäsipkän[wa]” sasa (Apocalipsis 7:9-14 liytʼañataki). Kunjamsa jutïrin waranqa waranqa jaqenakajj Jehová Diosar adorapjjani uk uñjasajja apóstol Juanajj wal kusispachäna.
3. 1) ¿Kunatsa Juanan visionapajj Diosar jukʼamp confiyañatak wal yanaptʼistu? 2) ¿Kunsa aka yatichäwin yateqaskañäni?
3 Uka visionajja, Diosar jukʼamp confiyañapatakejj wal Juanar yanaptʼpachäna. Niyakejjay uka visionajj jichhürunakan
phoqasiskchejja, Diosar jukʼamp confiyañatakejj wal yanaptʼarakistu. Jichhürunakanjja walja jaqenakaruw Diosan markapar mantanir uñjtanjja, jupanakajj wali tʼaqesiñ tiempo jakkir pasasin aka oraqen wiñay jakañwa suyasipki. Aka yatichäwinjja, kimsaqallq tunka maranak nayrajj kunjamsa Jehová Diosajj khitinakäpjjes ‘walja jaqenakajj’ uk qhanañchäna, ukwa yatjjataskañäni. Ukatjja uka ‘walja jaqenakajj’ 1) qhawqhanïpjjesa, 2) kawkit jutirinakäpjjesa ukwa yatjjataskarakiñäni. Khitinakatï uka grupo taypinkañ suyasipki uka jilat kullakanakarojj Diosar jukʼamp confiyapjjañapatakiw wal yanaptʼani.KAWKINSA WALJA JAQENAKAJJ JAKAPJJANI
4. ¿Cristianöpjjtwa siri religionanakajj kunsa jan amuyapki, Bibliat Yatjjatirinakajj kamsapjjarakïnsa?
4 Biblianjja istʼasir jaqenakajj aka oraqenwa wiñayatak jakasipjjani sasaw yatichi, ukampis cristianöpjjtwa siri religionanakatjja jilapartejj janiw ukham yatichapkiti (2 Cor. 4:3, 4). Antisas suma jaqenakajj taqeniw jiwjjasajj alajjpachar sarjjapjje sasaw yatichapjje. Ukampis 1800 uka maranakanjja Watch Tower (Yatiyañataki) revista apsupkäna uka Bibliat Yatjjatirinakajj janiw ukham amuyapkänti. Jan ukasti Diosajj aka oraq mä paraisoruw tukuyani, alajjpachar sarañat sipansa, Diosar istʼiri walja jaqenakaw aka oraqen jakapjjani sasaw sapjjäna. Ukhampachasa, istʼasir uka jaqenakajj khitinakäpjjanisa uk janïraw sum amuyapkänti (Mat. 6:10).
5. ¿Kunsa 144.000 cristianonakat Bibliat Yatjjatirinakajj amuyapjjäna?
5 Maysa toqetjja, Bibliat Yatjjatirinakajja ‘oraqet alatäpki’ ukanakaw Jesusamp chika alajjpachan apnaqapjjani sasaw Bibliarjam creyipjjarakïna (Apoc. 14:3). Oraqet alatanakajj 144.000 cristianonakäpjjewa, jupanakaw aka oraqenkkasin Diosar taqe chuyma servipjjäna sasaw amuyapjjarakïna. Ukampis ¿‘walja jaqenakajj’ khitinakäpjjew sapjjänsa?
6. ¿Kunsa ‘walja jaqenak’ toqet Bibliat Yatjjatirinakajj amuyapjjäna?
6 Apóstol Juanajj uka ‘walja jaqenakarojj’ “trono nayraqatana Cordero nayraqatan” saytʼat uñjäna (Apoc. 7:9). Bibliat Yatjjatirinakajj uka arunakarjamaw ‘walja jaqenakajj’ alajjpacharurakikiw sarapjjani sasin amuyapjjäna. Niyakejjay paypach grupojj alajjpachar sarapjjchispänjja, ¿kunansa mayj mayjäpjjäna? Bibliat Yatjjatirinakajja, khitinakatï oraqenkkasin Diosan mayitanakap jan sum phoqapkäna uka cristianonakaw ‘walja jaqenakat’ uñtʼatäpjje sasaw amuyapjjäna. Uka cristianonakajj mä jukʼa qʼomas jakäwipan sarnaqapkchïnjja, yaqhepajj inas cristianöpjjtwa siri religionanakat jan mistupkchïnti. Niyakejjay jupanakajj Diosar jan sum servipkchïnjja, janiw Jesusampi chikajj alajjpachan apnaqapkaspati sasaw amuyapjjäna. Diosar jan taqe chuyma munasipjjatap laykojj janiw alajjpachan trononakan qontʼasipkaspänti, jan ukasti trono nayraqatanakwa saytʼasipjjaspäna.
7. 1) ¿Bibliat Yatjjatirinakajja khitinakaw Waranqa Maranjja aka oraqen jakapjjani sapjjänsa? 2) ¿Diosan nayra servirinakapat kamsapjjänsa?
7 Ukhamajj ¿khitinakas oraqen jakapjjañapäna? Bibliat Yatjjatirinakajj akham amuyapjjäna: ‘144.000 cristianonakampi “walja jaqenakampi” alajjpachar sarjjapjjani ukhajja, walja millón jaqenakaw aka oraqen jakapjjani, Cristojj waranqa mara apnaqjjani ukhajj walja bendicionanak katoqapjjarakini’ sasa. Uka jaqenakarojj Cristojj waranqa mara apnaqañ qalltjjani ukapachaw Diosan arunakapat yatichasiskani, janiw Waranqa Mara nayra servipjjañapajj wakiskaniti sasaw amuyapjjäna. Waranqa Mara tukuyarojja Diosan mayitanakap phoqerinakaw aka oraqen wiñay jakañ katoqapjjañapäna, jan istʼasirinakarojj Sal. 45:16).
jiwarayasiñapänwa. Ukatjja Waranqa Maranjja jilïrinaka jan ukajj principenakaw utjañapäna. Nayra tiempon Diosar servipkäna ukanakaw (Cristojj janïr jutkäna uka tiempon taqe chuyma servirinakaw) jaktjjasajj principenakjam servipjjañaparakïna. Uka principenakat yaqhepajj inas Waranqa Mara tukuyarojj alajjpachar sarapjjchini sasaw sapjjarakïna (8. ¿Kuna kimsa gruponakaw utji sasas Bibliat Yatjjatirinakajj amuyapjjäna?
8 Kimsa grupos utjkaspa ukhamwa Bibliat Yatjjatirinakajj amuyapjjäna: 1) 144.000 cristianonaka, jupanakajj Jesusampiw alajjpachan apnaqapjjañapäna; 2) ‘walja jaqenakat’ uñtʼatäpki uka jan sum phoqeri cristianonaka, jupanakaw alajjpachan “trono nayraqatana Cordero nayraqatan” saytʼatäpjjañapäna; 3) walja millón jaqenaka, jupanakajj aka oraqenwa Waranqa Maran Diosat yateqapjjañapäna. * Ukampis Jehová Diosajj horasaparuw uka toqenakat jukʼamp sum qhanañchäna (Prov. 4:18).
CHEQA YATICHÄWEJJ JUKʼAMPIW QHANSTÄNA
1935 maran apaskäna uka jachʼa tantachäwinjja aka oraqen jakañ suytʼirinakat waljaniw bautisasipjjäna. (Párrafo 9).
9. 1) ¿Kunjamatsa ‘walja jaqenakajj’ aka oraqenkkasin “trono nayraqatana Cordero nayraqatan” saytʼatäpjje? 2) ¿Kunatsa Apocalipsis 7:9 texton qhanañchäwipajj qellqatanakarjamaw sissna?
9 Apóstol Juanajj visionan uñjkäna uka ‘walja jaqenakajj’ khitinakäpjjesa ukjja Jehová Diosan Testigonakapajj 1935 maranwa jukʼamp sum amuyjjapjjäna. “Trono nayraqatana Cordero nayraqatan” saytʼatäñatakejj janiw alajjpachar cheqpachapun sarapjjañapajj wakiskiti sasaw amuyjjapjjäna. Ukhamajj ¿kunjamatsa ‘walja jaqenakat’ uñtʼatäpki ukanakajj aka oraqen jakkasajj ‘trono nayraqatankapjje’? Jupanakajj Taqe Kunjjar Munañanitwa Jehová Diosar uñjapjje, taqe chuymaw jupar istʼapjjaraki (Is. 66:1). ¿Kunjamatsa ‘Cordero nayraqatankapjjaraki’? Jesusan jiwataparuw taqe chuyma creyipjje. Mateo 25:31, 32 qellqatanjja niya ukham parlaraki. Ukanjja suma jaqenakas jan wali jaqenakas “taqe markanakaw [Jesusan tronop] nayraqatan tantachatäpjjani” sasaw sistu. Uka markanakajj aka oraqenkapjjaniwa, janiw alajjpachar sarapkaniti. Ukhamasti 1935 maran amuyapkäna ukajj qellqatanakarjamänwa. Biblianjja ‘walja jaqenakat’ uñtʼatäpki ukanakajj alajjpacharuw sarapjjani sasajj janiw siskiti. Khitinakatï Jesusampi chika “aka oraqjjarojj reyinakjam” apnaqanipkani uka 144.000 cristianonakakiw alajjpachan wiñayatak jakapjjani sasaw Biblian sistu (Apoc. 5:10).
10. ‘Walja jaqenakat’ uñtʼatäpki ukanakajj ¿kunatsa janïr Cristojj waranq mara apnaqkipan Jehová Diosan mayitanakap uñtʼapjjañapa?
10 Jehová Diosan Testigonakapajja 1935 marat akham amuyjjtanjja: ‘Walja jaqenakat’ uñtʼatäpki ukanakajj taqe chuyma serviri cristianonakäpjjewa, jupanakaw aka oraqen wiñayatak jakapjjani. Ukatjja ‘wali tʼaqesiñ’ tiempo jakaskiri pasañatakisa, “taqe kunanakatï pasañapäki ukanakat” escapañatakisa, janïr Cristojj waranq mara apnaqkani ukhaw Jehová Diosan mayitanakap sum uñtʼapjjañapa, Diosar confiyapjjatapsa uñachtʼayapjjañaparaki (Luc. 21:34-36).
11. ¿Kunatsa Bibliat Yatjjatirinakajj Waranqa Mara tukuyar inas Diosar taqe chuyma servirinakat yaqhepajj alajjpachar sarapjjchini sasin amuyapjjäna?
11 Kunjamtï paqallqo parrafon uñjaniwayktanjja, Bibliat Yatjjatirinakajj Waranqa Mara tukuyarus yaqhepajj alajjpachar sarapkaspa ukham amuyapjjäna. ¿Kunatsa? 15 de febrero de 1913 The Watch Tower (Yatiyañataki) sat revistanwa uka toqet parläna. Yaqhepajj inas akham amuyapjjchïna: ‘Niyakejjay Diosan
mayitanakap jan sum phoqerinakajj alajjpachar sarapjjchinejja, ¿kunatsa taqe chuyma nayra servirinakat yaqhepajj aka oraqenaki jakapjjani?’ sasa. Uka amuyunakajj aka pä razonatwa utjäna: 1) walja jaqenakat uñtʼatäpki ukanakajj alajjpacharuw sarapjjani sasaw sapjjäna, 2) ‘walja jaqenakat’ uñtʼatäpki ukanakajj Diosan mayitanakap jan sum phoqerinakäpjjewa sasaw sapjjarakïna.12, 13. Ajllitanakasa ‘walja jaqenakasa’, ¿alajjpachar sarañatsa jan ukajj aka oraqen jakañatsa kunsa amuyjjapjje?
12 Ukampis kunjamtï yateqaniwayktanjja, Testigonakajj 1935 maratwa apóstol Juanajj visionan uñjkäna uka ‘walja jaqenakajj’ Armagedón guerra jakkir pasirinakaw sasin amuyjjtanjja. Jupanakaw ‘wali tʼaqesiñat mistusajj’ aka oraqen akham sapjjani: “Tronon qontʼatäki uka Diosasampita Corderompitwa salvacionajj juti” sasa (Apoc. 7:10, 14). Ukhamarusa nayra tiempon Diosar taqe chuyma servirinakat sipansa, khitinakatï alajjpachan jakañatak jaktapki ukanakajj “kunatï jukʼamp sumäki” ukwa katoqapjje sasaw Biblian sistu (Heb. 11:40). Uka machaq qhanañchäwirjamaw jilat kullakanakajj jaqenakar wali kusisit jawsañ qalltapjjäna, ukhamat uka jaqenakajj aka oraqen wiñay jakañ suytʼasa Jehová Diosar servipjjañapataki.
13 ‘Walja jaqenakarojj’ aka oraqen wiñay jakañ suytʼañajj wal kusisiyi. Jehová Diosaw khitinakas alajjpachar sarapjjani khitinakas aka oraqen jakapjjani uk amtjjañapa sasaw sapjjaraki. Jehová Diosajj wali khuyapayasiñapatwa Jesucristorojj juchat kutsuyañataki aka oraqer khitanïna, jupa toqew ajllitanakasa ‘walja jaqenakasa’, alajjpachar sarañsa aka oraqen jakañsa katoqañäni (Rom. 3:24).
WALJA JAQENAKAJJ ¿QHAWQHANÏPJJESA?
14. ‘Walja jaqenakat’ parlir profeciajj kunjamsa phoqasini sasajj ¿kunatsa 1935 marat qheparojj jisktʼasipjjäna?
14 ‘Walja jaqenakajj’ khitinakäpjjesa uk 1935 maran qhanañchasjjäna uka qhepatjja, waljaniw akham jisktʼasipjjäna: ‘¿Kunjamarak aka oraqen jakañ suyirinakajj waljanïpjjaspasti?’ sasa. Amuytʼañataki, Ronald Parkin sat jilatajj 1935 maran 12 maranëjjänwa, jupajj akham siwa: “Uka tiemponjja 56.000 jilat kullakanakakiw aka oraqpachan utjäna, jupanakatjja jilapartew alajjpachar sarañatak ajllitanakäpjjäna. Ukhamajj aka oraqen jakirinakajj jukʼanikïpjjänwa” sasa.
15. ¿Kunjamsa ‘walja jaqenakajj’ jiljjattawayapjje?
15 Ukampis qhepa maranakanjja misioneronakarojj walja lugaranakaruw khitasïna, ukatwa Jehová Diosan Testigonakapajj jukʼampi Is. 60:22). Aka qhepa maranakanjja, Jehová Diosan markapajj jaqenakar Bibliat yatichañatakejj walja yanaptʼanakwa lurawayi. Jichhakamajj ‘walja jaqenakaruw’ tantachthapisiwayi, kimsaqallq millonatsa jiläjjapjjewa.
jiljjattäna. 1968 maranjja, La verdad que lleva a vida eterna sat librompiw Bibliat yatichasiñ qalltasïna. Uka librojj Biblian yatichäwinakapjja amuykañ sum qhanañchäna, ukatwa walja jaqenakajj Diosan markapar mantanipjjäna. Pusi maranakwa 500.000 jila machaq discipulonakajj bautisasipjjäna. América Latina toqensa jan ukajj yaqha markanakansa Iglesia Catolicajj janiw walja jaqenëjjänti, Europa Oriental toqensa, África toqen yaqhep markanakansa janiw Testigonakarojj jarkʼasjjänti ukapachanakaw walja millón jaqenakajj bautisasipjjäna (¿‘WALJA JAQENAKAJJ’ KAWKIT JUTIRINAKÄPJJESA?
16. ¿‘Walja jaqenakajj’ kawkit jutirinakäpjjesa?
16 Apóstol Juanajja ‘walja jaqenakajj’ “taqe markanakata, tribunakata, kunayman kasta jaqenakata, kunayman aru parlirinakat jutirinakäpjjänwa” sasaw säna. Zacarías profetajj niya ukhamarak qellqäna, akham sasa: “Khä urunjja, tunka jan uñtʼatanakaw yaqha markankirinakata mä judío jaqerojj isipat katuntasipjjani, sapjjarakiniwa: ‘¡Jumanakamp Zac. 8:23).
saraña munapjjta, nanakasti istʼapjjtwa Diosajj jumanakampïtapa!’” sasa (17. Taqe markankiri, kunayman aru parliri jaqenakar yanaptʼañatakejj ¿kunas lurasiski?
17 Kunayman arunak parlirinakaru tantachthapiñatakejj walja arunakatwa suma yatiyäwinakajj predicasiñapa uk Testigonakajj sum yattanjja. Ukatwa 130 jila maranakajj Bibliat apstʼat qellqatanak tradustanjja. Jichhajj walja patak arunakaruw tradusjjtanjja, janiw khitis ukham lurkiti. Jehová Diosajj jichhürunakan mä milagro luraski: taqe markanakatwa walja jaqenaka tantachthapiski. Niyakejjay Diosan arunakapajj walja arunakar traducitächejja, waljaniw Jehová Diosar mayachtʼat servisipki. Taqe chuyma predikirita ukhamarak maynit maynikam munasiritwa Testigonakar uñtʼapjjestu. Ukajj ¡Diosar jukʼamp confiyañatakiw wal yanaptʼistu! (Mat. 24:14; Juan 13:35).
KUNJAMSA UKA VISIONAJJ CHʼAMAÑCHISTU
18. 1) Isaías 46:10, 11 qellqatarjamajj ¿kunatsa ‘walja jaqenakat’ parlir profecian phoqasiñap suyayätanjja? 2) ¿Kunatsa aka oraqen jakapkani ukanakajj apanukutjam jan amuyasipki?
18 Uka profeciat yatiñajj wal jiwasar kusisiyistu. Jehová Diosajj uka profecía sum phoqaski, ukham phoqasiñappun suyayätanjja (Isaías 46:10, 11 liytʼañataki). ‘Walja jaqenakajja’ aka oraqen wiñay jakañ suytʼäwipat wal yuspärapjje. Jesusamp alajjpachar servir sarañataki espíritu santompi jan ajllitäpjjatapatjja janiw apanukutjam amuyasipkiti. Biblianjja, taqe chuyma serviri walja jaqenakatwa parli, jupanakarojj espíritu santos irpkchïnjja, janiw 144.000 ajllitanak taypinkapkänti, jupanakat paninejj Bautisir Juanampi Davidampiwa (Mat. 11:11; Hech. 2:34). Jupanakampi waljanimpiw Paraison jakañatak jaktanipjjani. Taqe jupanakasa, ‘walja jaqenakat’ uñtʼatanakasa Jehová Dios toqetwa saytʼasipjjani, taqe chuymaw jupar servipjjarakini.
19. ‘Walja jaqenakat’ parlir visionan phoqasitap amuyañajj ¿kunatakis chʼamañchistu?
19 Jehová Diosajj jichhapuniw taqe markanakata walja millón jaqenakaru jupar adorapjjañapatak tantachthapiski. Alajjpachar saririnakasa aka oraqen jakirinakasa, taqeniw ‘yaqha ovejanakat’ uñtʼatäpki uka walja jaqenak taypir mantapjjañapatakejj waljanir yanaptʼañasa (Juan 10:16). Mä jukʼampitjja, Jehová Diosajj ‘wali tʼaqesiñ’ tiempo qalltayani, ukhaw jaqenakar tʼaqesiyir gobiernonakarusa religionanakarusa qʼal tukjani. ‘Walja jaqenakat’ uñtʼatäpki ukanakajj mä suma bendición katoqapjjani: wiñayatakiw Jehová Diosar aka oraqen servipjjani (Apoc. 7:14).
CANCIÓN 139 Jutïrpachanjja, ¿kunjamas jakasjjañäni?
^ Párrafo 5 Aka yatichäwinjja apóstol Juanan visionapat yatjjataskañäni, jupajj “walja jaqenakaruw” tantachasiri uñjta sasaw säna. Uka toqet yatjjatañajja, khitinakatï uka grupo taypinkañ suyapki ukanakarojj Diosar jukʼamp confiyapjjañapatakiw yanaptʼani.
^ Párrafo 8 Los testigos de Jehová, proclamadores del Reino de Dios libron páginas 159-163 español arut uñjjattʼäta.