35 YATICHÄWI
Jehová Diosajj humilde servirinakapar wal munasi
“Tatitojj [...] llampʼu chuyman jaqerojj uñtaniwa” (SAL. 138:6).
CANCIÓN 48 Sapürus Jehová Diosampiw sarnaqañasa
¿KUNANAKATSA YATJJATASKAÑÄNI? *
1. ¿Kunjamsa Jehová Diosajj humilde chuymaninakar uñji?
JEHOVÁ DIOSAJJ llampʼu chuymani jan ukajj humilde jaqenakar wal munasi. Khitinakatï cheqpachapun humilde chuymanïpki ukanakakiw Diosan amigopäpjjaspa, ukampis ‘jachʼa jachʼa tukur jaqerojj jayatakwa Jupajj uñtʼi’ (Sal. 138:6). Taqeniw Diosatakjam sarnaqañsa Jupar jakʼachasiñsa muntanjja, ukatwa humilde chuymanïñ yateqañajj wali wakiskiri.
2. ¿Kuna jisktʼanakarus aka yatichäwin qhanañchaskañäni?
2 Aka yatichäwinjja, aka jisktʼanakaruw qhanañchaskañäni: 1) ¿Kunjamas humilde chuyman jaqejja? 2) ¿Kunatsa humilde chuymanïñasa? 3) ¿Kunapachas humilde chuymanïñajj chʼamakïspa? Kunjamtï yatjjatkañänejja, humilde chuymanïñajj Jehová Diosar kusisiyiwa, jiwasarus yanaptʼarakistuwa (Prov. 27:11; Is. 48:17).
¿KUNJAMAS HUMILDE CHUYMAN JAQEJJA?
3. ¿Kunjamas humilde chuyman jaqejja?
3 Humilde chuyman jaqejj janiw yaqhanakar jiskʼachkiti, ni jachʼa jachʼas tukkiti. Humilde chuymanejja, Jehová Diosarojj Taqe Kunjjar Munañanitwa uñji, jaqe masiparus jilïrïkaspas ukhamwa uñjaraki sasaw Bibliajj qhanañchi (Filip. 2:3, 4).
4, 5. ¿Kunatsa humilde chuymanjamäpki ukanakajj jan humildëpkaspa?
4 Yaqhepajj ajjsarirïpjjewa, yaqhepasti respetasiri munasiri familianwa jilsupjjaraki, ukatwa humilde chuymanïpkaspas ukham tukupjjaspa. Ukampis jachʼa jachʼa tukur chuymanïsipkaspawa. Cheqas kunjam chuymanïpjjesa ukajja, tiempompejj yatisikipuniwa (Luc. 6:45).
5 Maysa toqetjja, khitinakatï jan ajjsaras qhan parlapki ukanakajj janiw jachʼa jachʼa tukur chuymanïpkapuniti (Juan 1:46, 47). Ukampis jupanakajj amuyasipjjañapawa, ukhamat jan jachʼa jachʼa tukupjjañapataki. Jan ajjsaras qhan parlirïstansa janisa, taqeniw humilde chuymanïñatakejj chʼamachasiñasa.
Apóstol Pablojj humilde chuymanïnwa, janiw jachʼañchasirïkänti. (Párrafo 6). *
6. Kuntï 1 Corintios 15:10 texton siski ukarjamajja, ¿kunsa apóstol Pablot yateqsna?
6 Apóstol Pablot parltʼañäni. Jehová Diosajj jupa toqew congregacionanak walja markanakan uttʼayäna. Pablojj Jesucriston mayni apostolonakapat sipansa, jukʼamp markanakanwa yatiypachäna. Ukhamäkchïnsa, janiw jachʼañchaskänti, jan ukasti humilde chuymampiw akham säna: “Nayajj apostolonak taypitjja jukʼamp jiskʼätwa, janirakiw apóstol satäñatakis walïkti, Diosan congregacionapar jan waltʼayañatak arknaqataj layku” sasa (1 Cor. 15:9). Apóstol Pablon luratanakapajj waljäkchïnsa, jupajj akham sänwa: ‘Diosan wali khuyapayasiñapatwa Jupar serviskta’ sasa (1 Corintios 15:10 liytʼañataki). Pablon humilde chuymanïtapajj wali yateqaskayawa. Corinto markankir cristianonakat yaqhepajj jan walinaksa jupat parlapkchïnjja, humilde chuymampiw jupanakar carta qellqäna (2 Cor. 10:10).
Karl Klein jilatajj humilde chuymanïnwa, jupajj Oraqpachan Jilïr Irpirinakat maynïrïnwa. (Párrafo 7).
7. ¿Kunjamsa wali uñtʼat mä jilatajj humilde chuymanïtap uñachtʼayäna?
7 Walja Testigonakaw Karl Klein jilatan sarnaqäwip liytʼasajj chʼamañchtʼasipjje, uka jilatajj Oraqpachan Jilïr Irpirinakat maynïrïnwa. Karl jilatajj kuna jan walinakansa jakäwipan uñjasïna ukanakatjja humilde chuymampiw parläna. Sañäni, khä 1922 maranjja, nayrïr kutiw utat uta yatiyir mistüna. Yatiyañajj jupatak wali chʼamänwa, ukatwa niya pä marajj jan yatiyjjänti. Qhepat Betel Utan serviskäna ukhajja, mä jilataw ewjjtʼäna, ukatwa mä tiempojj uka jilatatak colerata sarnaqäna. Ukatjja, depresión nerviosa sat llaki usumpiw usuntarakïna, ukampis qhepat waliptjjänwa. Ukhamanakansa uñjaskchïnjja, *
Diosan markapan walja luräwinakwa katoqäna. Karl jilatajj wali uñtʼatänwa, ukhamajj kuna jan walinakansa uñjasïna uka toqet parlasajj humilde chuymanïtapwa uñachtʼayäna. Walja jilat kullakanakaw Karl Klein jilatat wali munasiñampi amtapjje, sarnaqäwipajj qellqaskäna ukats ukhamarakiw amtapjje.¿KUNATSA HUMILDE CHUYMANÏÑASA?
8. Humilde chuymanïñajj Jehová Diosar kusisiyiwa, ¿kunjamsa 1 Pedro 5:6 textojj uk amuyañatak yanaptʼistu?
8 ¿Kunatsa humilde chuymanïñajj wali wakiskiri? Kunjamtï apóstol Pedrojj siskänjja, humilde chuymanïñajj Jehová Diosaruw kusisiyi (1 Pedro 5:6 liytʼañataki). Kuntï Pedrojj siskäna uka toqet parlkasajja, “Jutam nayar arkita” sat librojj akham siwa: “Jachʼa jachʼa tukuñajj venenompi sasiwa. Jachʼa jachʼa tukur jaqejj wali yatiñanïkchisa janiw Diosatakejj kunäkisa. Maysa toqetsti jan yatiñani jaqesa altʼat chuymanïchi ukhajja wali askiw Jehová Diosatakejja. [...] Jiwasatï ukham altʼat chuymanïñänejja wali munasiñampiw [Diosajj] askinak churistani” sasa. * Cheqas taqe kunat sipansa, Jehová Diosar kusisiyañaw wali wakiskiri (Prov. 23:15).
9. ¿Kunatsa jaqenakajj humilde chuymaninakampi parltʼasiñ wal munapjje?
9 Humilde chuymanïñajj janiw Jehová Diosaruk kusisiykiti, jiwasarus wal yanaptʼarakistu. Humilde chuymanïpki ukanakampejja, jaqenakajj wal parltʼasiñ munapjje. ¿Kunatsa ukhamäpacha? Amuytʼañäni, ¿khitinakamp parltʼasiñas jiwasar gustistojja? (Mat. 7:12). ¿Khitinakatï taqe kuns munañapar lurayañ munapki, jan ukajj kun satas jan istʼasipki ukanakampi? Janiwa. Antisas khitinakatï llakisirinakamp llakisipjje, jilapurjam munasipjje, wali sinttʼasirïpjje, humilde chuymanïpjje uka jilat kullakanakamp parltʼasiñajj wal gustistu (1 Ped. 3:8). Jiwasarutï ukham chuymani jaqenakampi parltʼasiñajj gustchistojja, humilde chuymanïñäni ukhakiw yaqhanakajj jiwasamp parltʼasiñ munapjjani.
10. ¿Kunatsa humilde chuymanïñajj jan waltʼäwinakar saykatañatak yanaptʼistu?
10 Humilde chuymanïñajj jan waltʼäwinakar saykatañatakis yanaptʼarakistuwa. Awisajja, inas jan walinakan uñjaschiñäni, jan ukajj yaqhanakar ukhaman uñjasir uñjchiñäni. Wali yatiñani Salomón reyejj akham sänwa: “Uñjaraktwa esclavo jaqenakar caballota saraskiri, Ecl. 10:7). Awisajja, taqe kun suma lurtʼirinakajj janiw suma uñjatäpkapuniti, jan ukasti menos yatiñani jaqenakaw suma uñjatäpjje. Salomonajj uk yatïnwa, ukatwa jan waltʼäwinak utjipan jan sint llakisiñatak ewjjtʼäna (Ecl. 6:9). Ukhamajj jiwasatï humilde chuymanïstanjja, janiw kunanakatï akapachan paski ukanakat sint llakiskañäniti, akapachajj janiw kunjamtï jiwasajj munktan ukhamapunïkaniti.
jilïrinakarusti kayuki saraskiri, esclavöpkaspas ukhama” sasa (¿KUNAPACHAS HUMILDE CHUYMANÏÑAJJ CHʼAMAKÏSPA?
Ewjjtʼatäsajja, ¿kunatsa humilde chuymanïñajj chʼamakïspa? (Párrafos 11, 12). *
11. ¿Kunsa ewjjtʼatajj lurañasa?
11 Sapüruw humilde chuymanïtas uñachtʼaysna, uk mä qhawqha uñjañäni. Ewjjtʼapkistu ukapachana. Akwa amtañasa: awisajja, janis pantjasksna ukhamwa amuyassna, ukampis jachʼa pantjasiñar puritasatwa maynejj tiempo apstʼasisin ewjjtʼistu. Ukapachanjja, inas qalltan jan istʼañ munksnati, jan ukajja, inas ewjjtʼkistu uka jilatatsa, jan ukajj kullakatsa jan walinak parlsna, ‘janiw munasiñamp ewjjtʼkituti’ sasaw amuysna. Ukampis jiwasatï humilde chuymanïstanjja, jan ukham amuyañatakiw chʼamachasiñäni.
12. Proverbios 27:5, 6 textorjamajja, ¿kunatsa maynin ewjjtʼatajj yuspärañasa? Uk mä uñachtʼäwimp qhanañchtʼam.
12 Humilde chuyman jaqejja, ewjjtʼatajj yuspärasiwa. Amuytʼañataki, Tantachasiñ Utansa mä qhawqha jilat kullakanakamp parlasksna ukham sañäni. Jupanakat maynejj yaqha cheqar irpasin akham sistaspa: “Lakaman manqʼaw utji” sasa. Ukham satajj inas phenqʼaschiñäni, ukampis yuspärañäniwa. ‘¿Kunatsa yaqhanakajj jan sapkpachïtu?’ sasin inas sischiñäni. Mä jilatan ewjjtʼatajja, ukhamarakiw jiwasar jan ajjsaras ewjjtʼatapat humilde chuymamp yuspärañasa. Uka jilatarojja, janiw mä enemigosarjam uñjañasäkiti, jan ukasti mä munasiri amigosarjamaw uñjañasa (Proverbios 27:5, 6 liytʼañataki; Gál. 4:16).
Mayninakajj luräwinak congregacionan katoqapjje ukhajja, ¿kunatsa humilde chuymanïñajj wakisi? (Párrafos 13, 14). *
13. Mayninakajj luräwinak congregacionan katoqapjje ukhajja, ¿kunjamsa humilde chuymanïtas uñachtʼaysna?
13 Mayninakajj luräwinak congregacionan katoqapjje ukapachana. Jason sat mä jilïr irpirejj akham siwa: “Mayninakajj luräwinak katoqapjje ukhajja, ‘¿kunatsa nayar jan churapkpachïtu?’ sasaw awisajj amuyta” sasa. ¿Jiwasajj ukham amuyirïtanti? Diosar jukʼamp serviñatak chʼamachasiñajj walikïskiwa (1 Tim. 3:1). Ukampis kunsa lupʼisktan ukanakat amuyasiñasawa, jan ukajj jachʼa jachʼaw tukjjsna. Maynejj akhamwa amuyjjaspa: “Nayaw congregacionan utjki uka luräwinak sum phoqañatakejj jukʼamp wakichtʼatätjja” sasa. Jan ukajja, inas mä kullakajj akham amuychispa: “Yaqha jilatat sipansa, esposojaw luräwinak phoqañatakejj jukʼamp wakichtʼatajja” sasa. Jiwasatï cheqpachapun humilde chuymanïstanjja, janiw ukham amuykañäniti.
14. Mayninakajj luräwinak katoqapjjäna ukhajja, ¿kunsa Moisesajj luräna, ukat kunsa yateqsna?
14 Mayninakajj luräwinak katoqapjjäna ukhajja, Moisesajj kunsa luräna ukat kunsa yateqsna uka toqet parltʼañäni. Jupatakejja, Israel markar pʼeqtʼañajj wali kusiskañänwa. Ukampis Jehová Diosajj mayni israelitanakar jupamp chik servipjjañapatak uttʼayäna ukhajja, janiw coleraskänti (Núm. 11:24-29). Yaqha horasanjja, Israel markar juzgasiñapatak yaqhanakar uttʼayasïna ukhajja, humilde chuymampiw jupanakamp yanaptʼayasïna (Éx. 18:13-24). Walja juezanak utjipanjja, israelitanakajj janiw juzgatäñatakejj walja tiempo suyjjapjjänti. ¿Kunsa ukajj Moisesat uñachtʼayistu? Luräwinakapat sipansa israelitanakar yanaptʼañaw jupatakejj jukʼamp wakiskirïnjja. Ukajj jiwasatak wali yateqaskayawa. Ak amtapuniñäni, jiwasatï Jehová Diosar jukʼamp serviñ munstanjja, mä kun sum lurañ yatiñat sipansa, humilde chuymanïñasawa. Kunjamtï Salmo 138:6 qellqatajj siskejja, “Tatitojj alajjpachankchi ukasa, llampʼu [jan ukajj humilde, NM] chuyman jaqerojj uñtaniwa”.
15. ¿Kuna cambionakansa yaqhepajj uñjasiwayapjje?
15 Jakäwisan cambionak utjki ukapachana. Aka qhepa maranakanjja, Diosar walja maranak servir jilat kullakanakat waljaniw yaqha asignacionanak katoqawayapjje. Sañäni, 2014 maranjja, congregacionanak tumptʼirinakar uñjiri jilatanakarusa esposanakaparusa, yaqha asignacionan servipjjañapatakiw invittʼasïna. Uka pachpa marat aksarojja, congregacionanak tumptʼir mä jilatatï 70 maranëjjchi ukhajj asignacionap jaytjjewa.
Maysa toqetjja, 80 marani jilatanakasa, jukʼamp jila marani jilatanakasa, janiw jilïr irpirinakan sarayiripat sirvjjapjjeti. Pasir maranakanjja, walja betelitanakaruw precursorat servipjjañapatakejj invittʼasiwayi. Yaqhepajj usutäpjjatap layku, familiapar uñjañ layku, jan ukajj yaqha ukhamanak phoqañ laykuw Diosar sapürunjam serviñ jaytapjjaraki.16. ¿Kunjamsa yaqhep jilat kullakanakajj humilde chuymanïpjjatap uñachtʼayapjje?
16 Uka jilat kullakanakat waljanitakejja, asignacionap jaytañajj janiw faciläkänti. Jupanakajj walja maranakaw asignacionapan wali kusisit servipjjäna. Asignacionap jaytasajj wali llakitas yaqhepajj uñjasipkchïnjja, tiempompejj Jehová Diosar munasipjjatap laykojj yatinoqtapjjänwa, jan ukajj jichunoqtapjjänwa. Jupanakajj Diosaruw jakäwip katuyasipjjäna, janiw mä asignacionarojja (Col. 3:23). Jichhajja, wali kusisitaw Diosarojj yaqha asignacionan humilde chuymamp servisipki. Jehová Diosajj jupanakat wal llakisi, uk yatisaw uka jilat kullakanakajj Diosar ‘taqe llakinakap katuyapjje’ (1 Ped. 5:6, 7).
17. Bibliajj humilde chuymanïñatakiw chʼamañchistu, ¿kunatsa ukat wal yuspärtanjja?
17 Bibliajj humilde chuymanïñatakiw chʼamañchistu, wal ukat yuspärtanjja. Ukham chuymanïñajj wal yanaptʼistu, yaqhanakarus ukhamarakiw yanaptʼi. Humilde chuymanïsajja, jan waltʼäwinakar saykatañatakejj jukʼamp wakichtʼatätanwa, taqe kunat sipansa Alajjpachankir Awkisaruw jukʼamp jakʼachastanjja. Jehová Diosajj ‘alajjpachankir’ Diosäkchisa, humilde chuymani servirinakaparojj wal munasi, wali valoranitwa uñjaraki, uk yatiñajj wal kusisiyistu (Is. 57:15).
CANCIÓN 45 Lupʼitanakajajj Diosatakjamäpan
^ Párrafo 5 Diosan servirinakapatakejja, humilde chuymanïñajj wali wakiskiriwa. Ukampis ¿kunjamas humilde chuyman mä jaqejja? ¿Kunatsa humilde chuymanïñasa? Jakäwisan cambionakajj utjki ukhajja, ¿kunatsa humilde chuymanïñajj chʼamakïspa? Uka toqenakatwa aka yatichäwin yatjjataskañäni.
^ Párrafo 7 “Jehová me ha tratado recompensadoramente” sat yatichäwjja, La Atalaya, 1 de marzo 1985 revistan uñjjattʼäta.
^ Párrafo 8 “Jutam nayar arkita” sat libronjja, 3 yatichäwin párrafo 23 uñjjattʼäta.
^ Párrafo 53 DIBUJOT JUKʼAMP QHANAÑCHTʼAÑATAKI: Mä jilatan utapanwa Apóstol Pablojj yaqha jilat kullakanakampi wawanakampi chikäski, ukham lurasajj humilde chuymanïtapwa uñachtʼayi.
^ Párrafo 57 FOTOT JUKʼAMP QHANAÑCHTʼAÑATAKI: Mä chuymankipstat jilataw jupat sipansa jukʼamp wayna jilatamp ewjjtʼayasiski, wayna jilatajj Bibliampiw jupar ewjjtʼaski.
^ Párrafo 59 FOTOT JUKʼAMP QHANAÑCHTʼAÑATAKI: Wayna jilatajj congregacionan mä luräwiniwa, uk uñjasajja jilïr jilatajj janiw envidiaskiti.