1. ¿Kunatsa Jehová Diosar istʼañasa?

JEHOVÁ DIOSAW Luririsajja, ukatwa Jupar istʼañasa. * Jupakiw kunsa lurañasa kunsa janiraki uk sistaspa (Apoc. 4:11). ¿Kunatsa Jehová Diosar istʼañasaraki? Taqenit sipansa jupakiw suma apnaqerejja. Jaqenakajja, nayratpachaw jaqe masipar apnaqawayapjje. Ukampis taqe apnaqerinakat sipansa, Jehová Diosakiw wali yatiñani, munasiri, khuyaptʼayasiri, sinttʼasiri suma apnaqerejja (Éx. 34:6; Rom. 16:27; 1 Juan 4:8).

2. Hebreos 12:9-11 textorjamajja, ¿kunatsa Diosar istʼañasa?

² Jehová Diosajja, janiw Jupar ajjsaratas layku istʼañas munkiti, jan ukasti Jupar munasitas layku, wali munasiri Awkisarjam uñjatas layku istʼsna ukwa muni. Pablojj hebreo cristianonakar qellqkäna uka cartanjja, Diosajj “sum jakasiñasatakiw cheqañchistu” ukatwa Jupar ‘jankʼaki istʼañasa’ sasaw säna (Hebreos 12:9-11 liytʼañataki).

3. 1) ¿Kunjamsa Jehová Diosar istʼatas uñachtʼaytanjja? 2) ¿Kuna jisktʼanakarus aka yatichäwin qhanañchaskañäni?

³ Jehová Diosar istʼatasjja, Jupar taqe kunan istʼañatak chʼamachasisa, yatiñasar jan confiyañatak chʼamachasisaw uñachtʼaytanjja (Prov. 3:5). Jehová Diosajj kunja suma chuymanisa uk sum yattan ukhajja, Jupar istʼañajj janiw chʼamäkiti. Diosan suma chuymanïtapajj taqe luratanakapanwa uñjasi (Sal. 145:9, NM). Jehová Diosar jukʼamp uñtʼasajj jukʼampiw Jupar munastanjja. Diosar jukʼamp munastan ukhasti, kunsa lurañasa kunsa jan lurañasäkaraki uka toqet parlir mä listajj janiw munaskiti. Jan ukasti, kunatï walïki jan walïkaraki uka toqet Jupjam amuyunïñataki Jupjam chuymanïñatakiw chʼamachastanjja (Sal. 97:10). Ukampis awisajja, Diosar istʼañajj  chʼamakïspawa. ¿Kunatsa chʼamäspa? Nehemías gobernadoratsa, David reyitsa, Jesusan María taykapatsa ¿kunsa jilïr irpirinakasa awk taykanakas yateqapjjaspa? Aka yatichäwinwa uka jisktʼanakar qhanañchaskañäni.

4, 5. Romanos 7:21-23 textorjamajja, ¿kunatsa awisajj Diosar istʼañajj chʼamakïspa?

⁴ Mayajj akäspawa: juchjja mä herenciäkaspas ukhamwa Adanampit Evampit katoqawaytan, pantjasir jaqerakïtanwa. Ukatwa awisajj Diosar jan istʼañ munañajj chuymasan utjaspa. Kunapachatï Adanampi Evampejj jan manqʼapjjañapäkäna uka achu manqʼantasin Dios contra saytʼapjjäna ukhajja, kunatï walïki jan walïkaraki uk jupanak pachpaw amtapjjäna, janiw Diosar istʼjjapjjänti (Gén. 3:22). Jichhürunakanjja, jupanakjamarakiw jilaparte jaqenakajj Diosar jan istʼañ munapkiti, kunatï walïki jan walïkaraki uk jupanak pachpaw amtapjje.

⁵ Jehová Diosar uñtʼirinakatakisa Jupar munasirinakatakisa, Diosar taqe chuyma istʼañajj chʼamakïspawa. Ukaw apóstol Pablompejj pasäna (Romanos 7:21-23 liytʼañataki). Pablot yateqasisajja, kunatï Diosatak walïki uk lurañwa muntanjja. Ukampis niyakejjay jan istʼasiñ munir chuymanïstanjja, Diosar istʼañatakejj wal chʼamachasiñasa.

6, 7. ¿Kunatsa Diosar istʼañajj chʼamarakïspa? Uk mä uñachtʼäwimp qhanañchtʼam.

⁶ ¿Kunatsa Diosar istʼañajj chʼamarakïspa? Jilsuwayktan uka cheqankir jaqenakajj jan wali costumbrenakanïpjjewa, ukarjam jilsutas laykuw Jehová Diosar istʼañajj chʼamarakïspa. Waljanejja, janiw kunjamtï Jehová Diosajj amuyki ukham amuyapkiti. Ukhamajj jupanakjam jan amuyañatakejj chʼamachasiskakiñasawa. Mä kullakat parltʼañäni.

⁷ Yaqhep cheqanakanjja, walja qollqe ganapjjañapatakiw wayn tawaqonakar chʼamañchasi. Ukhamwa Mary * sat mä kullakar chʼamañchapjjäna. Jehová Diosar janïr uñtʼkasajja, markapankir wali uñtʼat mä universidadanwa estudiäna. Familiapajj wali uñtʼatäñapataki, walja qollqenïñapatakiw chʼamañchäna. Jupas ukwa munarakïna. Ukampis Jehová Diosar uñtʼjjäna, Jupar munasjjarakïna ukhajja, janiw ukanak munjjänti. Ukhamäkchïnsa kullakajj akham siwa: “Awisajja, walja qollqe ganañatak trabajonakaw uñstarapitu, ukampis uka trabajonak katoqasajj janiw Jehová Diosar sum sirvjjeristti. Niyakejjay walja qollqe ganañ munañatak yatichata jilsuwaystjja, ‘janiw uka trabajonak katoqañajäkiti’ sañajj nayatak chʼamakiwa. Jehová Diosarojja, ‘jumar serviñ jarkʼkitaspa uka trabajonak jan katoqañatak yanaptʼita’ sasaw mayista” sasa (Mat. 6:24).

8. ¿Kunsa jichhajj yatjjatañäni?

⁸ Jehová Diosar istʼañajj wal yanaptʼistu. Ukampis jilïr irpirinakasa, awkinakasa, taykanakasa, yaqha ukham pʼeqtʼirinakasa, ¿kunatsa Jehová Diosar istʼapjjañaparaki? Mayninakaruw wal yanaptʼapjjaspa, ukatwa istʼapjjañapa. Jichhajja, Biblian qellqatäki uka sarnaqäwinakajj kunjamsa Diosan munañaparjam pʼeqtʼañatak yanaptʼistaspa uk yatjjatañäni.

9. Jerusalenar purisajja, ¿kuna jan walinaksa Nehemiasajj jikjjatäna?

⁹ Jehová Diosajja, congregacionapar awatipjjañapatakiw jilïr irpirinakar uttʼayi (1 Ped. 5:2). Jupanakajja, kunjamtï Nehemías gobernadorajj Jehová Diosan markapar uñjkäna ukat wal yateqapjjaspa. Niyakejjay  Nehemiasajj judionakan gobernadorapächïnjja, jupanakjjar wali munañanïnwa (Neh. 1:11; 2:7, 8; 5:14). Jerusalenar purisajj kuna jan walinaksa jikjjatäna uk uñjañäni. Judionakajja, kunatï templon jan lurasiñapäkäna ukanakwa lurasipkäna. Kunatï Moisesan Leyiparjamajj levitanakar churasiñapäkäna ukanaksa janiw churapkänti. Sábado ursa janiw respetapkänti, yaqha markankir warminakampiw yaqhepajj casarasipjjarakïna. Nehemiasajja, taqe ukanakwa Jerusalenar purisajj yatïna. Ukampis uka jan walinak askichañapänwa (Neh. 13:4-30).

10. Jan walinakat yatisajja, ¿kunsa Nehemiasajj luräna?

¹⁰ Nehemiasajj gobernadorätap laykojja, janiw judionakarojj jupan munañap lurapjjañapatak obligkänti. Jan ukasti, taqe chuymaw Jehová Diosarojj yanaptʼa mayisïna, judionakarus Moisesan Leyipwa yaticharakïna (Neh. 1:4-10; 13:1-3). Ukhamarus humilde chuymanïnwa, Jerusalenan perqanakap wasitat saytʼayasipkäna ukanakamp chikaw trabajirakïna (Neh. 4:15).

11. Kuntï 1 Tesalonicenses 2:7, 8 textojj siski ukarjamajja, ¿kunjamsa jilïr irpirinakajj jilat kullakanakar uñjapjjañapa?

¹¹ Jilïr irpirinakajja, kuna jan walinaktï Nehemiasajj askichañapäkäna ukhamanak inas jan askichapjjañapäkchiniti. Ukampis jupat wal yateqasipjjaspa. Sañäni, jilat kullakanakar yanaptʼañatakiw wal chʼamachasipjje. Janirakiw mayninakat sipan jukʼampïpkaspas ukham amuyasipkiti, jan ukasti, munasiñampiw jilat kullakanakar uñjapjje (1 Tesalonicenses 2:7, 8 liytʼañataki). Wali munasirïpjjatapasa humilde chuymanïpjjatapasa, kunjamsa mayninakar parlapjje ukanwa uñjasi. Wali experienciani Andrew sat mä jilïr irpirejj akham siwa: “Jilïr irpirinakajj wali munasirïpjje, mayninakarus munasiñampi uñjapjje ukhajja, jilat kullakanakajj jupanakar istʼapjjewa. Ukham chuymanïpjjatap uñjasajja, jilat kullakanakajj jukʼampiw jupanakar yanaptʼapjje” sasa. Tony jilatajj walja  maranakaw jilïr irpirit serviskaraki, jupajj akham siwa: “Mayninakarojja, Filipenses 2:3 textojj siski ukarjam uñjañatakejj chʼamachasipuntwa, ukanjja ‘mayninakarojj jumanakat sipansa jilïrïpkaspas ukham uñjapjjam’ siwa. Ukaw mayninakar munañajarjam jan apnaqañatak yanaptʼitu” sasa.

12. ¿Kunatsa jilïr irpirinakajj humilde chuymanïpjjañapa?

¹² Jilïr irpirinakajj Jehová Diosjam humilde chuymanïpjjañapawa. Jupajj Taqe Kunjjar Munañanïkchisa, ‘oraqetpachwa pistʼat jaqerojj wayti’ (Sal. 18:35, NM; 113:6, 7). Ukampis jachʼa jachʼa tukurinakarojj uñisiwa (Prov. 16:5).

13. ¿Kunatsa jilïr irpirinakajj amuytʼasis parlapjjañapa?

¹³ Jehová Diosar istʼiri jilïr irpirinakajja, amuytʼasisaw kuns parlapjjañapa. Ukham jan lurapkaspa ukhajja, maynejj jupanakar jan respetomp parlaspa ukhajj chuyma ustʼayir arunakampiw kuttʼayapjjaspa (Gál. 5:14, 15; Sant. 1:26). Parlaniwayktan uka Andrew jilatajj akham siwa: “Awisajja, jilat kullakanakajj jan respetompis parlapkitaspa ukhamwa amuyasta, ukatwa awisajj chuyma ustʼayir arunakamp kuttʼayañ munta. Ukampis humildëñasa llampʼu chuymanïñas kunja wakiskirisa uk amuyañatakejja, Diosat jan jitheqtas servirinakat Bibliajj parlki ukanakat lupʼiñaw yanaptʼitu” sasa. Jilïr irpirinakajj munasirïpjje, jilat kullakanakarusa yaqha jilïr irpirinakarus suma arunakamp parlapjje ukhajja, Jehová Diosar istʼapjjatapwa uñachtʼayapjje (Col. 4:6).

14. ¿Kunatakis Jehová Diosajj awkinakar uttʼayi, ukat kun lurapjjañapsa muni?

¹⁴ Jehová Diosajj awkinakaruw familia pʼeqtʼirit uttʼayi, ukhamasti wawanakapar yatichapjjaspa cheqañchapjjaspa ukwa muni (1 Cor. 11:3; Efes. 6:4). Ukampis janiw wawanakaparojj amtaparjamak uywapjjañapäkiti. Jehová Diosan munañapatwa taqe familianakajj utji, ukhamajj kunjamsa familiapar uñjasipki uk Diosaruw cuenta churapjjani (Efes. 3:14, 15). Awkinakajja, kunjamtï Jehová Diosajj familiar pʼeqtʼapjjañap munki ukham pʼeqtʼasaw Diosar istʼapjjatap uñachtʼayapjje. Jupanakarojja, David reyin sarnaqäwipat yatjjatañaw wal yanaptʼaspa.

15. ¿Kunatsa Davidajj awkinakatak wali yateqaskayajja?

¹⁵ Jehová Diosajja, janiw Davidarojj familiap pʼeqtʼañapatakik uttʼaykänti, jan ukasti Israel markpach pʼeqtʼañapatakiw uttʼayäna. Niyakejjay reyïchïnjja, mayninakjjar wali munañanïnwa. Ukampis awisajj jan walinakwa luräna (2 Sam. 11:14, 15). Ukhamäkchïnsa Jehová Diosampejj cheqañchayasïnwa, ukhamatwa Jupar istʼatap uñachtʼayäna. Taqe  chuymaw Diosar mayisïna, arunakaparjam sarnaqañatakis wal chʼamachasirakïna (Sal. 51:1-4). Chachanakana warminakana ewjjtʼatas humilde chuymampiw istʼäna (1 Sam. 19:11, 12; 25:32, 33). Jan walinaksa lurkchïnjja, janiw mayamp lurjjänti, antisas Jehová Diosar serviñatakiw chʼamachasïna.

16. ¿Kunanaksa awkinakajj David reyit yateqapjjaspa?

¹⁶ Awkinaka, ¿kunanaksa David reyit yateqapjjasma? Familiar pʼeqtʼapjjatam laykojj janipun jan walinak lurapjjamti. Pantjasisajj “pantjastwa” sasin sapjjam, mayninakajj Bibliamp ewjjtʼapkätam ukhajj jupanakar istʼapjjam. Ukhamtï lurapjjätajja, esposamasa wawanakamas humilde chuymanïpjjatam laykojj respetapjjätamwa. Jupanakamp chika mayisipjjäta ukhasti, Diosar taqe chuyma mayisipjjam. Ukhamatwa, Diosamp yanaptʼayasiñajj jumanakatak kunja wakiskirisa uk jupanakajj amuyapjjani. Taqe kunat sipansa, Jehová Diosar serviñatak chʼamachasipjjam (Deut. 6:6-9). Yateqaskay sarnaqapjjatamajja, familiamatakejj wali valorani regalökaspas ukhamäniwa.

17. ¿Kuna luräwsa Jehová Diosajj taykanakar churi?

¹⁷ Taykanakarojja, Jehová Diosajj mä wakiskir luräwwa familia taypin churi, wawanakapjjar mä jukʼa munañanïñwa churaraki (Prov. 6:20). Cheqas taykanakajja, arumpisa luratampis walpun wawanakapar yanaptʼapjjaspa (Prov. 22:6). Taykanakajj kunsa Jesusan María taykapat yateqapjjaspa uk yatjjatañäni.

18, 19. ¿Kunsa taykanakajj Mariat yateqapjjaspa?

¹⁸ Mariajj sumwa Qellqatanak uñtʼäna. Jehová Diosar wal respetäna, wali sumwa Jupampejj apasirakïna. Jakäwipajj mayjtʼañapäkchïnsa, Jehová Diosajj kun lurañaptï maykäna uk taqe chuymaw luräna (Luc. 1:35-38, 46-55).

¹⁹ Taykanaka, ¿kunanaksa Mariat yateqapjjasma? Maya, Jehová Diosamp sum apasiskakiñatakejja, Bibliat yatjjatapjjam Diosarus mayisipjjarakim. Paya, Diosatakjam sarnaqañatakejja, jakäwim mayjtʼayañajj wakisini ukhajj mayjtʼayapjjam. Sañäni, inas awk taykanakamajj colerasiri toqesiri ukhamäpjjchïna. Ukhamajj inas akham amuyas jilsuwayapjjsta: “Wawanakarojj ukham uywañäpachawa” sasa. Jehová Diosajj wawanakar kunjam uywapjjañamsa muni uk yatipkstasa, jupanakar pacienciampi jan colerasisa uywañajj chʼamakïspawa. Yamas qaritäpkta, wawanakamajj jan walinak lurapki ukhajj jukʼamp chʼamäspawa (Efes. 4:31). Ukapachajja, jukʼampiw Jehová Diosar mayisipjjañama.  Lidia sat mä kullakajj akham siwa: “Wawajajj jan istʼaski ukhajja, jupar jan toqjañatakejj taqe chuymaw awisajj Diosar mayisiñaja. Awisajj chik arskasaw Diosarojj ‘yanaptʼita’ sasin chuyma manqhan mayista. Ukaw jan colerasiñatak yanaptʼitu” sasa (Sal. 37:5).

20. ¿Kunas yaqhep taykanakatakejj chʼamarakïspa, ukat kunas jupanakarojj cambiañatak yanaptʼaspa?

²⁰ Yaqhep taykanakatakejja, wawanakapar qhawqsa munasipjje uk uñachtʼayañaw chʼamarakïspa (Tito 2:3, 4). ¿Kunatsa chʼamakïspa? Wawäsipkäna ukhajja, awk taykapajj janiw jupanakar munasipjjatap uñachtʼayapkänti. Ukampis janiw wawanakapar uka kikpa uywapjjañapäkiti. Jehová Diosar istʼiri taykanakajja, inas wawanakapar munasiñ uñachtʼayañ yateqapjjañapächi. Ukampis inas jupanakatakejj amuyunakap mayjtʼayañasa, chuymap mayjtʼayañasa, munasirïpjjatap uñachtʼayañas chʼamakïchispa. Ukampis cambiapjjaspawa. Ukhamäni ukhajja, jupanakasa familiapas jukʼamp kusisitaw jakasipjjani.

21, 22. Isaías 65:13, 14 textorjamajja, ¿kuna bendicionanaksa Jehová Diosar istʼasajj katoqtanjja?

²¹ Jehová Diosar istʼañajj qhawqsa jakäwipan yanaptʼäna uk David reyejj sumwa yatïna. Akham sänwa “[Jehová] Tatitun kamächit arunakapajj cheqapawa, chuymar kusisiyiriwa; Tatitun arsutanakapajj qʼomawa, nayranakar qhan chuririwa” sasa. Ukatsti sarakïnwa: “Ukatpï uywatamajj arunakam sum yatjjatejja, arunakam imañajj askinak jikjjatañawa” sasa (Sal. 19:8, 11). Jichhürunakanjja, Jehová Diosar istʼirinakampi jan istʼirinakampejj kunansa mayjäpjje ukajj qhanaw amuyasi. Khitinakatï Diosar istʼapki ukanakajja, ‘chuymanakapan kusisiñ utjatap laykojj’ wali kusisitäpjjewa (Isaías 65:13, 14 liytʼañataki).

²² Kunapachatï jilïr irpirinakasa, awkinakasa, taykanakas Diosar taqe chuyma istʼapjje ukhajja, jukʼamp sumaw jakasipjje, familianakapas jukʼamp kusisitäpjjewa, congregacionas jukʼampiw mayachtʼasi. Taqe kunat sipansa, Jehová Diosaruw kusisiyapjje (Prov. 27:11). ¡Ukajj walpun kusisiyistu!