Mulhouse (Francia) markanwa nasta, jakaskayäta uka cheqanjja jan walinak lurapjjerïna. Wawaskayäta ukhajj familianak pura nuwasirwa ukan uñjirïta, ukjja amtaskaktwa. Familiajanjja chachanakajj janiw warminakar sum uñjapkänti. ‘Warminakajj cocinankañapawa, chachaparu, wawanakaparuw uñjapjjañapa’ sasaw sapjjerïtu.

Wawakasajj janiw kusisit jilsuwaykti, 10 maranïkayät ukhaw awkijajj umiritap layku jiwjjäna. Phesqa maratjja, mä jilïr jilajaw jiwayasjjarakïna, ukat familianak pura nuwasisin maynir jiwayirsa uñjaraktwa, ukajj walpun sustjawayitu. Yaqhep familiaranakajajj nuwasiña ukat cuchillu, pistol apnaqañwa yatichapjjetäna ukhamat jarkʼaqasiñajataki. Cuerppacharuw tatuajenak lurayasiyäta, chʼajjwiri, wali umiri ukhamajjayätwa.

Sapüruw 16 maranirojj 10 jan ukajj 15 cervezanak umjjayäta. Ukat droganakampiw qolljasjjayäta, ukanak alañatakejj lunthatasiyätwa, merqʼe cosasanakwa aljayäta. 17 maranirusti lunthatasitajata ukat nuwasitajat 18 kutiw carcelar mantjjayäta.

Jukʼamp jan walinakanwa 20 maranirojj uñjasjjayäta. Sapüruw 20 cigarronak pitjjayäta, droganakampi, yaqha ukham jan walinakampiw qolljasjjayäta. Ukham qolljasitajatjja, walja kutiw niy jiwarakta. Qhepatjja, droganak alj-jjayäta ukat pistol aptʼataw sarnaqjjayäta. Mä kutejj mä chacharuw illaptʼta ukampis balajj cinturonan fierroparukiw purïna. Mamajajj 24 maranikayät ukhaw jiwjjäna, ukhamïpansti jukʼamp qhorojjayätwa. Jaqenakajj nay uñjasajj maysa toqnam sarjjapjjeri. Yaqhep seman tukuyanakajj nuwasitajatjja, carcelan llawintata jan ukajj hospitalanwa uñjasirïta.

Nayajj 28 maraniruw casarasta, qhorutajatsti janiw warmijar respetomp uñjkayätti. Jan wali arunakampiw toqerïta ukat nuwarakirïta. Janirakiw jupampïñatak tiempo apsurïkti, lunthatat joyanak churatajj walikïspaw sayätwa. Mä urojj Testigonakampiw Bibliat yatjjatañ qalltäna. Ukhatjja janiw cigarro pitjjänti ni lunthatat qollqsa katoqjjetänti, lunthatat joyanaksa kuttʼayjjetänwa. Ukatwa Bibliat jan jukʼampi yateqañapatak jarkʼayäta. Wali coleratasajja, amanutwa cigarro  jewqʼempi ajanut phuskatirïta ukat taqen uñjkataw phenqʼachirïta.

Mä arumajja, wali umantatäsaw utajj phichantasta. Warmijaw phesqa maran jiskʼa wawajampir qhespiyapjjetäna. Jan umatajjayäta ukhakiw wal pisayasiyäta. Diosajj janipuniw perdonkitaniti sasaw amuyayäta. Ukhaw mä sacerdoten arsutap amtta jupajj akham sänwa: ‘Jan wali jaqenakajj infiernoruw sarapjje’ sasa. Doctorajasa ‘janiw yanaptʼañjamäktati’ sasaw sarakitäna.

Ut phichantaskta uka qhepatjja, suegrojan utapar jakasiriw sarjjapta. Jehová Diosan Testigonakapaw warmijar uñjir jutapjjäna, ‘¿Diosajj juchanakaj perdonitaspati?’ sasaw jupanakar jisktʼayäta. Ukat 1 Corintios 6:9-11 qellqatwa Bibliat liytʼarapipjjetu. Ukanjja, kunanakas Diosatak jan askïki ukwa qhanañchi, ukat akham sarakiwa: “Jumanakatjja yaqhepanakajj ukhamäpjjarakïyätawa” sasa. Uk istʼasaw nayajj jan wali lurañanak jaytjjarakiristwa sasin amuyayäta. Diosajj qawqsa munasitu uk amuyañajatakejj 1 Juan 4:8 qellqat liytʼarapipjjetäna. Ukajj walpun chuymachtʼitäna, ukatwa semanan pay kuti Bibliat yatichapjjeta sasin jupanakar mayta, tantachäwinakaparus sarjjarakiyätwa. Diosarus sapa kutiw mayisiyäta.

Mä phajjsitjja, droganaksa, alcohol umañsa jaytjjañ amtayäta. Ukampis cuerpojajj mayiskakitänwa. Arumanakajj janiw ikjjayätti, pʼeqew wal usutäna, calambrew churitäna ukat yaqha ukham jan walinakanwa uñjasiyäta. Jehová Diosaw jan aynachtʼañatak yanaptʼitäna. Apostól Pabljamaw jikjjatasiyäta, jupasti sänwa: ‘Diosan jachʼa chʼamapampejj taqe kunaruw saykatirista’ sasa (Filipenses 4:13, NM). Tiempompejja, janiw droganakamp qolljasjjayätti (2 Corintios 7:1).

Bibliajja, janiw jakäwij sum uñjañatakik yanaptʼawaykituti, familiajampi sum apasiñatakis yanaptʼawayarakituwa. Warmijarojj respetompiw uñj-jjayäta, “mirä ampsuma”, “yuspära” sasaw sisjjayäta. Wawajampïñatakis tiempo apstʼasjjarakiyätwa. Mä mara Bibliat yatjjatjjasajja, warmijar uñtasitaw Jehová Diosan Testigopjam bautisasjjta.

Jehová Diosar jan uñtʼapki uka familianakäjajja, ‘droganakampi qolljasisa jan ukajj nuwasisaw jiwjjani sapjjayäsmawa’ sasaw sapjjetu. Cheqas Bibliaw jiwañat qhespiyawayitu.

Bibliajj kuntï chachanakaru, awk taykanakaru ewjjtʼki ukarjam sarnaqjjasajja, familiajan sumaw jakasjjapjjta (Efesios 5:25; 6:4). Chacha warmjamaw kunsa lurjjapjjta. Janiw warmijan cocinankañapak suyjjti, antisas Diosan arunakap jukʼampi yatiyañapatakiw yanaptʼta ukajj wal kusisiyitu. Jupas ukhamarakiw taman irpir chuymanjam irnaqtʼañajatak yanaptʼitu.

Diosajj munasiriwa, khuyaptʼayasiriwa ukaw nayra jakäwij jaytañatak yanaptʼawayitu. Maynitï Biblian yatichäwiparjam sarnaqaspa ukhajja, jan wali luräwip jaytaspawa. Ukatwa nayjam jan walin uñjasipki ukanakar Jehová Diosat wal yatiyañ munta. Nayarojj chachanakaru, warminakaru wali respetompi uñjañwa Bibliajj yatichawayitu ukat jakäwij sum uñjañsa yatichawayarakituwa.