Diosar serviri Habacuc sat chachajja, akham sasaw mä kutejj säna: “Dios Tatay, ¿kunapachkamasa arnaqasëjja yanaptʼama mayisajja, jumasti janirak istʼkitätati? ¿Kunapachkamasa arnaqasëjja aka tʼaqhesiñanakanjja, jumatejj jan nanakar qhespiyir jutkät ukhajja?” sasa (Habacuc 1:2, 3). ¿Kunatsa ukham sispachäna? ¿Janit Diosar confiyjjpachäna? Janiw ukhamäkänti. Ukatwa Diosajj “suyaskakim, purisinkaniwa” sasin säna, cheqas kunapachas jan walinak chhaqtayjjani uk Diosajj yatjjänwa (Habacuc 2:2, 3).

Jiwasasa jan ukajj familiasat maynis jan walin uñjasi ukhajja, “¡kunatsa Diosajj jan walinak jichhakam jan chhaqtaykpacha, niyaw kuns lurañapäna!” sasaw amuysna. Ukampis Bibliajj Diosat akham siwa: “Jehová Diosajj promesap phoqañatakejj janiw qheptʼkiti, kunjamtï yaqhep jaqenakajj amuyapki ukhamjja, jan ukasti wali pacienciampiw jumanakar suyasipktamjja; janiw khitin jiwañapsa jupajj munkiti, jan ukasti taqenin arrepentisipjjañapwa muni” sasa (2 Pedro 3:9).

Niyaw Diosajj tʼaqesiñanak chhaqtayjjani. Kunanakas qhepa urunakan pasañapäna ukwa Jesusajj mä profecian arsüna, taqe ukanakajj mä tiempon jakiri jaqenakan jakasipkipanwa pasañapäna (Mateo 24:3-42). Jichhürunakanwa uka profeciajj phoqasiski, ukhamajj niyaw Diosajj jaqenakan apnaqata gobiernonakar tukjani. *

¿Cheqapunit Diosajj tʼaqesiñanak chhaqtayaspa? Jïsa. Jesusajj aka oraqenkkäna ukhajja, Diosajj tʼaqesiñanak chhaqtayañataki chʼamanïtapwa uñachtʼayäna. Uk jichhajj uñjañäni.

Oraqen jan waltʼäwinaka. Mä kutejja, Jesusampi apostolonakapampi Galilea qotnam sarasipkäna ukhaw mä jachʼa thayajj sartäna, oladanakas boter wal jawqʼsüna. Ukhaw Jesusajj kunatï aka oraqen utjki ukanakjjar chʼamanïtap uñachtʼayäna, Awkipajj ukham chʼamanirakiwa (Colosenses 1:15, 16). Jesusajj akham sasaw qotar säna: “‘¡Amuktʼam! ¡Tʼakuram!’ sasa. Ukatwa thayajj tʼakurjjäna, taqe kunas sumakëjjänwa” (Marcos 4:35-39).

Usunaka. Jesusajj juykhunakaru, cojonakaru, tʼuku usuninakaru, lepra usuninakaru, kunayman kasta usuninakar qollañatakiw chʼamanïna, uk waljaniw yatipjjäna. Jesusajj ‘taqe tʼaqesirinakaruw waliptayäna’ sasaw Bibliajj yatichi (Mateo 4:23, 24; 8:16; 11:2-5).

Manqʼat pistʼañanaka. Pä kutiw Jesusajja mä qhawqha tʼantʼampiki chawllampikejj walja waranqa jaqenakar manqʼayäna, cheqas Diosaw ukham lurañapatak chʼam churäna (Mateo 14:14-21; 15:32-38).

Jiwaña. Jesusajj kimsa jiwatanakaruw jaktayäna, jupanakat maynejj pusi uruw jiwatäjjäna. Ukhamajj Diosajja, jiwatanakarojj jaktayaspawa (Marcos 5:35-42; Lucas 7:11-16; Juan 11:3-44).