Biblian ewjjtʼapa: “Jakañ vidanjja jan qollqe añcha munirïpjjamti, kunanakatï utjapktam ukanakampejj kusisitakïpjjam” (Hebreos 13:5).

Akapachajja, kunayman cosasanakanïñatakiw chʼamañchistu, wakiskirïkaspasa ukhamwa amuyayarakistu. Ukampis Bibliajja, kunatï utjapktam ukampejj kusisitakïpjjañamawa sasaw qhanañchi. ¿Kunjamsa uka ewjjtʼar istʼsna?

Qollqer jan añcha munaña. ‘Qollqe añcha munasajja’, walja jaqenakajj usuntañanakaruw purtʼasipjje, familiapatsa amigonakapatsa armtʼasjjapjjewa, janiw sum sarnaqjjapjjeti, jan walitwa uñjayasipjjaraki (1 Timoteo 6:10). Ukanakajj jan kunatak askiwa. Qollqe añcha munirejja, “jukʼampwa muni” (Eclesiastés 5:10).

Cosasanakat sipansa jaqew jukʼamp valorani. Cosasanakajj wakiskirïpjjewa, ukampis kunjamäsktansa uk janiw amuyapkaspati ni munaskistaspasa. Cheqas jaqenakakiw uk lurapjjaspa. ‘Mä suma amigonïñajja’, wal kusisiyistu (Proverbios 17:17).

Biblian ewjjtʼapa: “Kusisit chuymajj jaqen jakañapwa sumaptayi” (Proverbios 17:22).

Kusisitaki sarnaqasiñajj mä qolljamawa, aguantañatakiw yanaptʼistu. Ukampis ¿kunjamatsa usutäkasas kusisitaki sarnaqassna?

Yuspärasirïña. Problemanakasatak llakisisktan ukhajja, sapürus jan walikamakiwa (Proverbios 15:15). Bibliajja, “yuspärasirïpjjapunim” sasaw ewjjtʼistu (Colosenses 3:15). Kuna askinaktï katoqktan ukanakat yuspärasirïñasawa, sañäni, inti jalanta uñjasasa, mä munat familiasan lartʼasitap uñjasasa ukat yaqha ukhamanak uñjasas yuspärasirïñasawa.

Mayninakar yanaptʼaña. Usutäktan ukhasa, “katoqañat sipansa churañanwa jukʼamp kusisiñajj utji” (Hechos 20:35). Maynejj mä kun luratasat yuspäristu ukhajja, kusisitakïtanwa, llakinakasatsa janiw sinti lupʼjjtanti. Mayninakar yanaptʼasajja, kusisitarakïtanwa.

Biblian ewjjtʼapa: ‘Kunas wali wakiskiri uk amuykiptʼasipjjam’ (Filipenses 1:10).

Mä chacha warmitï jukʼa tiempoki uñjasipjjchi jan ukajj parltʼasipjjchi ukhajja, jan waltʼayasiñaruw puripjjaspa. Ukatwa chacha warmjamajj panipäñataki tiempo apsusipjjañapa, ukaw jupanakatakejj wali importantëñapa.

Panimaw kuns lurapjjañama. Bibliajj akham siwa: “Mayni sapat sipansa paniniw jukʼamp askejja” sasa (Eclesiastés 4:9). Ukhamajja, kunanakatï gustktam ukanak sapamaki lurañat sipansa, kunanaksa panimajj lurapjjasma ukanakwa amuytʼasma. Sañäni, panimaw phayapjjasma, paseytʼiris sarapjjasma jan ukajj yaqha ukhamanaksa lurapjjasma.

Munasiñampiw uñjasipjjañama. Casarat chacha warminakajja, munasiñampi respetompiw uñjasipjjañapa sasaw Bibliajj qhanañchi (Efesios 5:28, 33). Munasiñampiw uñkattʼasipjjañama, qhomanttʼasipjjañama jan ukajj mä kunsa regaltʼasipjjañama, ukanakaw jukʼamp mayachtʼatäpjjañamatak yanaptʼapjjätam. Casarata chachajja esposapampikiw ikthapiñapa, warmis ukhamarakiw esposopampik ikthapiñapa (Hebreos 13:4).