MÄ WALI uñtʼat pelot anatirit parlir mä peliculsa uñchʼukiskasma ukham amuytʼañäni, jumasa juparojj wali suma anatiritwa uñtʼaraktajja. Peliculajja, uka anatirejj kunjamas wawäkasajj jakasïna, kunjamsa pelot anatañ yateqäna, ukanakatwa qalltan parli. Ukatjja, jilsjjasajj wali uñtʼat mä equipon anataskirwa uñachtʼayaraki. Qhepatsti, yaqha markanakan wali uñtʼat anatirëjjatapwa uñachtʼayaraki. Película tukuyanjja, uka anatirejj chuymankipstatäjjewa (vejez) ukat jiwjjarakiwa.

Uka peliculajja mä jaqen cheqpach sarnaqäwipatwa parli, ukampis uka jaqejj jiwatäjjewa. Mä cientificöskpasa, tʼijurïskpasa jan ukajj yaqha ukham wali uñtʼatäskpasa ukhamarakiw jiwañar purispa. Jakkasajj walja askinaksa jikjjatkchispajja, jan chuymankipstkaspäna jan jiwkaspäna ukhajj jukʼampinakwa jikjjataspäna sasaw amuysna.

Cheqas taqeniw jiwañar puriñäni (Eclesiastés 9:5). Walsa chʼamachaskstanjja, janiw khitis chuymankipstañata jiwañat escapañ puedktanti. Janiw ukakïkiti, mä akatjamatwa usuntasasa jan ukajj mä accidentensa jiwsna. Kunjamtï Bibliajj siskejja, ‘jakañajj urpur uñtasitawa, urpojj mä jukʼa tiempotakikiw uñsti, ukatjja chhaqtjjarakiwa’ (Santiago 4:14).

‘Qhawqha tiempos jakañäni uk janiw yatktanti, jakäwisas inamayakiwa’ sasaw yaqhepanakajj amuyapjje ukatwa akham sapjje: “Manqtʼasiñäni, umtʼasiñäni, qharürojj jiwjjchiñänejjaya” sasa (1 Corintios 15:32). Ukham sasajja, janiw khitis jiwañat escapksnati sañwa munasipki. Cheqas taqeniw jan walin uñjasisajj akham jisktʼastan: ‘¿Jakañajj jiwañarukit tukusjjpacha?’ sasa. ¿Kawkinsa uka jisktʼan qhanañchäwip jikjjatsna?

Waljanejja, cientificonakan yanaptʼapwa thaqapjje. Cientificonakasa doctoranakasa, kunjamatsa mä jaqejj nayrat sipan jukʼamp maranak jakaspa ukanakwa yatjjatasajj jikjjatapjje. Yaqhep cientificonakasti, kunjamatsa jichhat sipan jukʼamp maranak jaqenakajj jutïrin jakapjjaspa ukatakiw wal chʼamachasipjje. Ukhamsa chʼamachasipkchejja, akham jisktʼasiskaktanwa: ‘¿Kunatsa chuymankipsttanjja ukat jiwtanjja? ¿Mä urojj jiwañar atipjpachañäniti?’ sasa. Akjjar jutki uka yatichäwinakanwa uka jisktʼanakarojj qhanañchasiskani. ¿Jakañajj jiwañarukit tukusjjpacha? siski uka jisktʼarus qhanañchasirakiniwa.