Diosajj Adanar akham sänwa: ‘Uka qoqan achup manqʼäta ukapachasti cheqpachan jiwäta’ sasa (Génesis 2:17). Adanatï chuymankipstañapächïna ukat jiwañapapunïchïna ukhajja, Diosan ukham satapajj inamayakïspänwa. Adanajj qoqan achup (fruto) jan manqʼantkaspäna ukhajja, janiw jiwkaspänti uk jupajj sum yatïna.

Adanampin Evampin manqʼañapatakejj Edén jardinan walja qoqanakaw utjäna, ukhamajja jakaskakiñatakejj janiw uka qoqat manqʼapjjañapapunejj wakiskänti (Génesis 2:9). Jupanakatï uka qoqat jan manqʼapkaspäna ukhajja, jakañ churir Diosar istʼasirïpjjatapwa uñachtʼayapjjaspäna. Ukatjja, kuns jupanakajj lurapjjañapäna uk sañatak Dios sapaki derechonïtapwa uñachtʼayapjjarakispäna.

Kunatsa Adanampi Evampejj jiwapjjäna uk amuytʼañatakejja, kuna toqetsa asirompi (katari) Evampejj parlapjjäna uk yatjjatañasawa, kuntï parlapkäna ukaw jichhakamas jan waltʼayistu. Supayajj mä asiru toqew kʼarinak Evar parläna. Bibliajj akham siwa: “Diosasti taqe animalanak lurkatayna ukanak taypinjja katarejj wali chʼikhïnwa taqe animalanakat sipansa, ukatsti warmiruw jisktʼäna akham sasa: ‘¿Ukhamajj Diosajj sapjjtamti: “Janiw kawkïri qoqan achunakapsa manqʼapjjätati” sasa?’” (Génesis 3:1).

Eva warmisti akham sarakïnwa: “Kawkïri qoqan achupatsa manqʼasipkakiristwa, chika taypinkki uka qoqan achunakapakwa janejj manqʼapkiristtejja. Diosasti sapjjarakituwa: ‘Janiw uka qoqan achupjja manqʼapjjätati ni llamktʼapjjätasa. Manqʼapjjäta ukhasti jiwapjjataw’ sasa”. Ukatsti, asirojj akham sänwa: “Janiw ukajj cheqäkiti, kʼariwa. Janiw jiwapkätati. Diosajj yatiwa, kunapachatejj jumanakajj uka qoqan achunakapata manqʼapjjasma ukkhajj yatipjjasmawa kunatejj askïki, ukhamarak ñanqhäki ukanakjja, ukatsti Diosjamäpjjasmawa” sasa. Supayajj ukham sasaw Jehová Diosat kʼarinak parläna, kunatï askïki ukatsa jarkʼkaspa ukhamwa Evar amuyayarakïna (Génesis 3:2-5).

Evajj kuntï istʼkäna ukarojj creyïnwa. Qoqar uñkatasajj wali munkañätapwa amuyäna... Ukatsti amparap loqtasaw qoqan achup apaqäna, manqʼantarakïna. Ukat kunas ukjjarojj pasäna uk Bibliajj akham siwa: “Ukatsti chachaparurakiw churäna, jupasti manqʼantarakïnwa” sasa (Génesis 3:6).

Adanampi Evampi jan istʼapjjatapatjja, Jehová Diosajj walpun llakispachäna. ¿Diosajj kunsa  luräna? Adanarojj akham sänwa: “Sapüru manqʼañamsti jumpʼimampirakiw jikjjatäta, kuna laqʼata luratäktatejj ukar kuttañamkama, laqʼätawa, laqʼarurakiw kuttäta” sasa (Génesis 3:17-19). Ukajj cheqapuniw phoqasïna, “juntorusti llätunk pataka kimsatunkani maranakarakiw [Adanajj] jakäna. Ukapacharakiw jiwjjäna” (Génesis 5:5). Adanajj jiwjjasajja, janiw alajjpacharus ni jan uñtʼat yaqha cheqarus sarkänti. Jehová Diosajj Adanar laqʼat janïr lurkäna ukhajja, janiw utjkänti, jiwjjasasti laqʼaruw tukjjäna, mä arunjja, Adanajj janiw utj-jjänti. Ukajj wali llakkañäwa.

Niyakejjay Adanampi Evampejj Diosar jan istʼasipkchïntejja, janiw perfectöjjapjjänti, wiñay jakañsa aptʼasipjjarakïnwa. Ukat aksarojj janiw nayrjamäjjapjjänti, pantjasirëjjapjjänwa, juchararäjjapjjarakïnwa. Ukampis juchachasitapajja, janiw jupanakaruki jan waltʼaykänti, taqe wawanakaparus jan waltʼayarakïnwa. Romanos 5:12 textojj akham siwa: “Mä sapa jaqen juchapatwa juchajj akapachar mantani, jiwañajj uka juchan utjatapatwa mantaniraki, ukhamatwa jiwañajj taqe jaqenakar katunti, taqenin juchachasipjjatap layku” sasa.

Jiwañajj mä mantor uñtasitaw taqe markanakar imjjati, mä velor uñtasitaw taqe markanakar imjjataraki siw Bibliajja (Isaías 25:7). Taqpach jaqenakar imjjatki uka mantojja, venenoni jewqʼëkaspas ukhamawa, janiw khitis escapkaspati. Cheqas ukhamawa, ‘taqeniw Adán kawsajj jiwarasipki’ (1 Corintios 15:22). Apóstol Pablojja, “¿khitikis akham jiwañar apir cuerpot salvitani?” sasaw jisktʼasïna, jiwasas uka pachparakwa jisktʼastanjja. Ukhamajj ¿khitis salvistaspa? (Romanos 7:24).