ADANAMPIN Evampin pantjasipjjatap laykus juchasa jiwañasa utjkchejja, Diosan amtapajj jaqenakatak pachpakïskiwa. Diosajj Arup toqewa, mä arunjja, Biblia toqew amtapajj pachpakïskatap walja kuti yatiyistu.

• “Aski jaqenakajj oraq katoqapjjani, wiñayatakiw ukan jakapjjarakini” (Salmo 37:29).

• “[Jehová Dios] Tatitojj wiñayatakiw jiwañarojj tʼunjani, taqe jaqenakana nayranakapatsti jachanakapsa pichararakiniwa” (Isaías 25:8).

• “Jiwañasa, mä arunjja qhepïri enemigosa janiw utj-jjaniti” (1 Corintios 15:26).

• “Janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti” (Apocalipsis 21:4).

¿Diosajj ‘jiwañar wiñayatak tʼunjañataki’ jan ukajj chhaqtayañatakejj kunsa lurani? Kunjamtï uñjktanjja, ‘aski jaqenakajj wiñayatakiw aka oraqen jakapjjani’ sasaw Bibliajj qhanañchi. Ukampisa “aka oraqenjja janiw khitis aski jaqejj utjkiti, janipun juch lurasa aski lurirejja” sasaw saraki (Eclesiastés 7:20). ¿Diosajj jiwañar tukjañ laykukejj leyinakap mayjtʼayaspati? Janipuniw uk lurkaspati, kunattejj “jan kʼarisir” Diosawa (Tito 1:2). Ukhamajj kuntï aka oraqetak lurañ amtki uk ¿kunjamsa Jupajj phoqani?

Jehová Diosajj munasiñatwa jaqenakar juchat salvañataki kunatï wakiski uk churäna. ¿Kunjamsa maynirojj juchat kutsuyasi? Maynin jan wali luratapat perdonasiñapatakejja, ukhat ukha mä precio pagañaw wakisi, jan ukajj kuntï leyejj mayki uk churañaw wakisiraki. Taqenis pantjasirïtasatwa jiwañar katuyatätanjja, ukatwa Bibliajj akham qhanañchi: ‘Janiw khitis jupa pachpajj qhespiyaskaspati, janirakiw qhespiyasiñatakejj Diosar qollq churapkaspati. Jaqen jakañapajj wali jila alaniwa, janiw kunas alañatakejj alcanskaspati’ sasa (Salmo 49:7, 8).

Mä jaqejj jiwjje ukhajja, juchapatakwa pagaski, janiw jupapachpajj salvaskaspati ni mayninakan juchanakapatsa pagkaspati (Romanos 6:7). Ukhamajj mä perfecto jaqen jiwañapaw munasïna, jupajj janiw juchanakapat jiwañapäkänti, jan ukasti juchanakas laykuw jiwañapäna (Hebreos 10:1-4).

Diosajj alajjpachankiri Jesús yoqaparuw aka oraqer khitanïna, jupajj jan juchani jaqënwa (1 Pedro 2:22). Jesusajja, ‘jakañaj churañatakiw jutta, ukhamat waljanir juchat kutsuyañataki’ sasaw säna (Marcos 10:45). Jupajj jiwañar atipjañatakiw jiwawayi ukhamat wiñay jakañ jikjjatañasataki (Juan 3:16).

Jichha tiemponjja, ‘chʼama tukuña jan wali tiemponakanwa’ jaktanjja, ukaw kunjamtï Biblian profecianakapajj siskejja, aka jan wali pachan ‘qhepa urunakapan’ jakasitas uñachtʼayistu (2 Timoteo 3:1). “Jan wali jaqenakajj tʼunjatäkani, juicio urus purinkani” ukhaw qhepa urunakajj tukusjjani (2 Pedro 3:3, 7). Ukampis Diosar munasir jaqenakajj janiw tʼunjatäkaniti, antisas ‘wiñay jakañ katoqapjjani’ (Mateo 25:46).

Walja millón jiwat jaqenakaw jaktanjjasajj wiñayatak jakañ puedipjjani. Jesusajj jiwatanakar jaktayaspawa. Naín marka pasaskäna ukhajja, mä viuda warmin sapa wawapan jiwatap  uñjasajja uka warmit sinttʼasisajj yoqapar jaktayänwa (Lucas 7:11-15). Apóstol Pablojj akham sarakïnwa: “Kunjamtï nayajj Diosar confiyas suytʼasktjja, [...] cheqapar sarnaqer jaqenakasa jan cheqapar sarnaqer jaqenakas jaktanipjjaniwa” sasa. Ukajja, qhawqsa Diosajj jaqenakar munasi ukwa uñachtʼayi (Hechos 24:15).

Walja millón jaqenakaw wiñay jakañ puedipjjani. Bibliajj akham siwa: “Aski jaqenakajj oraq katoqapjjani, wiñayatakiw ukan jakapjjarakini” sasa (Salmo 37:29). Ukanwa wali kusisita kunjamtï Pablojj niya 2000 maranak nayrajj siskäna ukham sapjjani: “Jiwaña, ¿kawkinkaraki atipjañamasti? Jiwaña, ¿kawkinkaraki venenomasti?” sasa (1 Corintios 15:55). Cheqas ukhaw jiwañajj mä arunjja, jachʼa enemigojj atipjatäni.